Read kalabari Лукан бичсн Сән Зәңг 22 Bible Online

Лукан бичсн Сән Зәңг 22 - kalabari bible

Лукан бичсн Сән Зәңг 22

¹Эс искәсн һуйрин өдр эс гиҗ Песах гидг нәр өөрдҗ йовҗ.

²Гелңгүд болн ном цәәлһәчнр Исусиг уга кех арһ хәәцхәв. Юңгад гихлә, тедн әмтнәс әәдг бәәҗ.

³Тиигхлә эрлг Искериот гиҗ нерәддг Йудан зүркнд орв. Тер Исусин арвн хойр сурһульчнрин негнь бәәсмн.

⁴Йуда ах гелңгүд тал болн сүмин харулчнрин һардачнр тал одад, Исусиг яһҗ бәрүлҗ өгхән келҗ өгв.

⁵Тедн байрлад, Исусиг бәрүлхин төлә Йудад мөңг өгхәр шиидв.

⁶Өгчәх мөңгнд зөвән өгәд, Йуда олн әмтн уга цагт Исусиг теднә һарт бәрүлхәр кергтә цагинь күләв.

⁷Эс искәсн һуйрин нәәрин өдр ирв. Тер өдрт әмтн сетрә хурһиг алх зөвтә бәәҗ.

⁸Пётр Йохан хойриг илгәһәд Исус келв: — Ода йовад маднд Песахин хот белдтн.

⁹— Тер Песахиг альд белдх кергтә гиҗ санҗант? — гиҗ сурһульчнр сурцхав.

¹⁰Тиигхләнь Исус иим хәрү өгв: — Тадниг балһснур орҗ ирхлә, нег уста буһш авч йовсн күн харһх. Терүг дахад, герүрнь одтн.

¹¹Дәкәд герин эзнд: «Намаг сурһульчнртаһан Песахин хот эдлх хора альдв?» гиҗ Багш сурҗана гитн.

¹²Тер белдсн деерк ик хораһан таднд үзүлх, тендән хотан белдтн.

¹³Тедн йовад, Исусин келсәр цугинь олҗ авад, Песахин нәәрин хотынь белдцхәв.

¹⁴Цагнь ирхлә, Исус сурһульчнртаһан хамдан ширән өөр цуглрв.

¹⁵Исус тедндән: — Би эврәннь зовлң үзхәсн өмн таднла хамдан эн Песахин хот идхәр седләв.

¹⁶Энүг Бурхна орн-нутгт учртл Би Песахин хотыг эдлҗ чадшгов гиҗ таднд келҗәнәв, — гив.

¹⁷Исус ааһ авад, Бурхнд ханлтан өргәд: — Энүг авад хоорндан хуваһад эдлтн!

¹⁸Би таднд келҗәнәв, Бурхна йосн эс иртл Би дәкҗ уста үзмәр кесн унд уушгов, — гив.

¹⁹Дәкәд Тер өдмг авад, Бурхндан ханлт өргәд, хуһлад сурһульчнртан хуваҗ өгәд: — Тадна төлә өгсн цогцм эн. Намаг санад иигҗ кетн, — гив.

²⁰Хотын хөөн Тер ааһ авад келв: — Тадна төлә асхрулсн Мини цуснас тогтсн эн шин бооцана ааһ.

²¹Ода Намаг бәрүлҗ өгх күүнә һар Мини һарин өөр бәәнә.

²²Би, Күмни Көвүн, заясн хаалһарн йовнав. Зуг Намаг бәрүлсн күн басл зовлңган эдлх.

²³Сурһульчнр цуһар нег-негнәсн: — Маднас кень урвач болҗахмб? — гиҗ сурцхав.

²⁴Теднәс кен хамгин алдр гиҗ тоолгдхмб? гисн зүткән эдн хоорнд болв.

²⁵Тиигхлә Исус теднд: — Хаадуд болхла эврәннь әмтиг нойлҗ һардна, йос бәрдг әмтн «әмтнә үүрмүд» гиҗ бийән нерәднә.

²⁶Зуг тадн тиим бичә болцхатн, таднас хамгин икнь бичкн болтха, болв кен тадниг толһална, тернь зарцла әдл болтха.

²⁷Кень эднәс ах: хот идҗәснь аль хот авч ирәд заргдҗаснь? Хот идҗәснь ах биший? Би болхла тадн дунд зарцла әдл болҗанав.

²⁸Тадн ик зеткртә цагла Нанла хамдан түрү-зүдү хувалцлат,

²⁹Мини Эцк Нанд орн-нутг белглсн кевәр Би таднд орн-нутг белглнәв.

³⁰Мини орн-нутгт Мини ширән өөр сууһад, хот уухит. Тадн арвн хойр ширә деер сууһад, Израилин арвн хойр тохмин зарһинь кехит, — гив.

³¹— Шимон, Шимон, эрлг тадниг буудяг хог-богас йилһҗ авдгла әдләр шүүх зөв Бурхнас сурла.

³²Зуг Би чамаг иткдгән бичә ууртха гиҗ зальврлав. Болв чи бас Нан тал хәрү ирсн хөөн ахнран батрул, — гиҗ Деед Эзн келв.

³³Зуг Пётр келв: — Деед Эзн минь, би Тана төлә түүрмд чигн суунав, үкләс чигн әәшгов!

³⁴— Би чамд келҗәнәв, Пётр, эндр өрүн күртл эр така хәәкртл, чи һурв дәкҗ Намаг медхшв, гиҗ келхич, — гиҗ Исус хәрүднь келв.

³⁵Дәкәд Исус теднәс сурв: — Би Тадниг мөңг, түңгрцг, буршмг угаһар илгәсн цагт тадн юмар дутвт? — Уга, — гиҗ сурһульчнр хәрү өгв.

³⁶— Ода болхла мөңгн бәәхлә автн, бас түңгрцг автн, болв кемр тадн үлд уга болхла, киилгән хулдад үлд автн.

³⁷Бурхна Бичгт: «Тер йос эвдсн әмтнә тоод орла», — гиҗ бичәтә. Цуг эн келснь Нанла учрх зөвтә гиҗ таднд келҗәнәв. Мини тускар бичгдсн юмн удл уга учрх, — гиҗ Исус теднд келв.

³⁸Сурһульчнр: — Деед Эзн, манад хойр үлд бәәнә, — гив. — Болх, — гиҗ Исус келв.

³⁹Исус саак кевәрн Олив гидг уулур һарад йовв. Сурһульчнр Терүнә ардаснь дахцхав.

⁴⁰Одх һазртан ирәд Исус: — Сөрлһнлә харһшгон төлә зальврад бәәтн, — гиҗ келв.

⁴¹Исус теднәс хооран һарад, шивсн чолун күрх һазрт ирәд, сөгдҗ унад экләд зальврв:

⁴²— Аав минь, кемр Та эн зовлңгас Намаг гетлгсн болхнь! Зуг Мини таалар биш, Тана таалар болтха!

⁴³Генткн теңгрәс Бурхна элч бууҗ ирәд, Терүг батрулв.

⁴⁴Исус ик зовлңтаһар болн улм халунар Бурхнд зальврад бәәв. Маңнаһаснь һарчах көлсн цусна дусалла әдләр һазрт унв.

⁴⁵Исус зальврснаннь хөөн босад, сурһульчнр тал хәрү ирв. Тедн үрүдәд унтҗ одсн бәәҗ.

⁴⁶— Юңгад тадн унтҗахмт? — гиҗ Исус сурв, — Сөрлһнлә харһшгон төлә босад зальвртн.

⁴⁷Терүг келҗәсн цагт кесг әмтн һарч ирв. Теднә өмн арвн хойр сурһульчнрин негнь Йуда гидг күн йовла. Халхаснь үмсхин төлә тер Исус тал өөрдв.

⁴⁸Исус: — Йуда, Намаг, Күмни Көвүг, үмсәд, эднә һарт бәрүлҗәнчи? — гиҗ сурв.

⁴⁹Исусла бәәсн сурһульчнр юн учрхиг үзәд: — Деед Эзн, үлдән һарһхмн болвза? — гив.

⁵⁰Теднә негнь үлдән һарһад, ах гелңгин зарцин барун чикинь чавчв.

⁵¹Зуг Исус: — Болх! — гив. Тер чикән чавчулсн күүнә чикнднь һаран күргәд эдгәв.

⁵²Терүг бәрҗ авхар ирсн ах гелңгүдт, сүмин харулчнрин һардачнрт, толһачнрт Исус: — Тадн Намаг деермч гиҗ санҗант? Ю хәәҗ тадн үлд, мод атхад Намаг бәрҗ авхар ирвт?

⁵³Би өдр болһн таднла сүмд бәәдг биләв, тер бийнь тадн Мини өмнәс һаран өргсн угат. Зуг ода тадна цаг ирв, ода хар харңһун йосн залҗана, — гив.

⁵⁴Тедн Терүг бәрҗ авад, ах гелңгин гер тал авч ирцхәв. Пётр теднә ардаснь өөрдлго йовҗ йовла.

⁵⁵Герин һаза әмтн һал шатаһад эргҗ суув. Пётр бас теднлә хамдан суув.

⁵⁶Һалын хаҗуд суусн зарц күүкд күн терүнә чирә ширтҗ хәләһәд: — Эн күн Терүнлә хамдан бас бәәлә, — гив.

⁵⁷Зуг Пётр тер күүкд күүнд: — Би Терүг медхшв, — гиҗ келв.

⁵⁸Невчк бәәҗәһәд, дәкәд нег күн терүг үзәд: — Чи бас теднә негнч, — гив. — Уга, — гиҗ Пётр хәрү келв.

⁵⁹Нег цаг давсна хөөн дәкәд нег күн маһдлго келв: — Эн күн Терүнлә хамдан бәәлә. Эн бийнь Һалилья һазрин күн.

⁶⁰— Тадниг ю келҗәхинь би медҗәхшв! — гиҗ Пётр хәрүцв. Тиигҗ келҗәхлә, генткн эр така хәәкрв.

⁶¹Деед Эзн ардагшан эргҗ, Пётр тал хәләв. Тиигхлә Пётр «Эр така хәәкртл, чи эндр һурв дәкҗ Намаг медхшв гиҗ келхич» гиҗ Деед Эзнә келсн үгмүд тодлҗ санв.

⁶²Пётр цааран һарад, һашута кевәр уульв.

⁶³Исусиг хәләҗәх харулчнр Терүгәр наад бәрәд зоваҗ цокв.

⁶⁴Терүнә нүдинь кенчрәр бооһад: — Әәлдҗ кел маднд, кен чамаг цокв? — гиҗ некҗ сурцхав.

⁶⁵Нань чигн кесг му үг цергүд Исуст келҗ.

⁶⁶Өрүн эртәр әмтнә толһачнр, ах гелңгүд болн закана багшнр цуглрад, Исусиг Деед хургт авч ирв.

⁶⁷— Кемр Чи Христос болхла, маднд цәәлһҗ кел, — гиҗ тедн Исуст келв. Исус иим хәрүднь: — Кемр Би таднд келхлә, тадн иткхн угат,

⁶⁸болв кемр Би таднас юм сурхла, тадн хәрүһинь келҗ өгхн угат.

⁶⁹Зуг эн цагас авн Күмни Көвүн хамгин Күчтә Бурхна барун һартнь суух, — гив.

⁷⁰Тедн цуһар: — Тегәд Чи Бурхна Көвүн болҗахмч? — гиҗ сурв. — Чик! Тадн тиигҗ келҗәнәт, — гиҗ Исус теднә өмнәс хәрүцв.

⁷¹Тиигхлә толһачнр: — Ямаран герчллһн таднд дәкәд кергтә болҗахмб? Бидн цугинь энүнә келсн үгмүдәс медҗ үзҗәнәвидн! — гиҗ келцхәв.