Read kalabari Лукан бичсн Сән Зәңг 4 Bible Online

Лукан бичсн Сән Зәңг 4 - kalabari bible

Лукан бичсн Сән Зәңг 4

¹Исус Әрүн Сәкүсәр дүүрсн бәәҗ, болв Йордан һолас хәрү йовҗ йовхлань, Сәкүсн Терүг эҗго көдәһүр дахулв.

²Тенд дөчн өдртән эрлгәр сөргдсмн. Эн цагин болзгт хот идл уга бәәсн төләдән Исус дегд икәр өлсв.

³Тиигхлә эрлг Терүнд: — Кемр Чи Бурхна Көвүн болхла, эн чолунд өдмг бол гиҗ зәрлг өг, — гиҗ келв.

⁴Исус хәрүднь: — Бурхна Бичгт: «Һанцхн өдмгәр күн бийән цадхҗ хаңһашго» гиҗ бичәтә, — гив.

⁵Эрлг Терүг ик өөдм һазр тал дахулҗ авч одад, нег агчмин зуур орчлңд бәәсн нутг болһниг үзүлв.

⁶— Эн нутгудын йосинь болн туурмҗинь би Чамд өгнәв. Цуг эн Мини, болв би энүг дурта күүндән өгч чадҗанав.

⁷Кемр Чамаг нанд сөгдхләчн, цуг эн Чини болх, — гиҗ эрлг Исуст келв.

⁸Исус хәрүднь: — «Эврәннь Деед Эзн Бурхндан сөгд, һанцхн Бурхндан цергл» гиҗ Бурхна Бичгт бичәтә, — гив.

⁹Цааранднь эрлг Терүг Ерусалимд авч ирәд сүмин ора деер зогсаһад келв: — Кемр Чи Бурхна Көвүн болхла, эн ора деерәс дорагшан һәрәдҗ үз.

¹⁰Юңгад гихлә, «Бурхн Эврәннь Бурхна элчнртән Чамаг әрвләд хәләтхә гиҗ зәрлг өгв»,

¹¹болв дәкәд «тедн Чини көлчн чолунд бичә цокгдтха гиһәд Чамаг һар деерән теврәд авад йовх» гиҗ бичәтәлм, — гив.

¹²— Бурхна Бичгт: «Эврәннь Деед Эзн Бурхан бичә сөрәд бә» гиҗ бичәтә, — гиҗ Исус хәрү өгв.

¹³Тиигәд эрлг сөрдгән уурад, Исусиг цаг болзг күртлнь үлдәв.

¹⁴Исус Сәкүснә күчнд батрад, хәрү Һалилья һазр тал ирв. Терүнә туск зәңг цуг нутгар тархаҗ соңсгдв.

¹⁵Исус теднә хурлмудт сурһдг бәәсмн. Цуһар Терүг туурулдг бәәсмн.

¹⁶Исус эврәннь өссн-боссн Назарет гидг хотнд ирв. Тер саак кевәрн амрлһна бемб өдр хурлд одв. Тенд Исус Бурхна ном умшхар босад зогсв.

¹⁷Әмтн әәлдәч Эшьян дегтр Терүнә һарт бәрүлв, болв Исус терүг секәд, иим нег юм олҗ умшв:

¹⁸[18-19] «Би Деед Эзнә Сәкүстәв. Тер Намаг Сән Зәңг угатя-яду улст тархалһхар йовулла. Бәрәнд бәәх әмтнд сулдхврин тускар, сохр әмтнд нүднә харана тускар зәңглхин төлә даҗргдсн әмтиг сулдххин төлә, Деед Эзнә хәәрлтин цаг ирсиг дурдхин төлә Тер Намаг илгәсмн».

¹⁹

²⁰Исус Бурхна Бичгиг хаачкад, тенд церглҗәх күүнд өгәд ормдан суув. Хурлд бәәсн улс нүдәрн Исус тал ширтҗ хәләцхәв.

²¹Цааранднь Исус экләд: — Эндр тадниг соңссн цагт эн әәлдхл күцв, — гив.

²²Цуһар энүг чик гиһәд, Исусин амарн келсн һәәхмҗтә үгмүдиг өврцхәв: — Эн Йосипин көвүнлм! — гиҗ әмтн сурцхав.

²³Исус теднд: — Тадн Нанд эрк биш «Эмч, Бийән эдгә!» гидг үлгүр келхит. «Капернамд болсн юмна тускар бидн соңславидн, тиигҗ Эврәннь төрскн һазртан чигн ке!» гиҗ тадн келхит.

²⁴Зуг Би таднд үнәр келҗәнәв, ямаран чигн әәлдәчиг төрскн һазртнь әәлдәч гиҗ тоолдмн биш.

²⁵Элья әәлдәч бәәсн цагт Израильд кесг белвсн күүкд улс бәәсмн. Тиигхд һурвн җил дундур хур орлго, һазр деер ик харһнлт болв.

²⁶Зуг Бурхн Элиг талдан күүкд күүнүр йовуллго, Сидона өөр бәәсн Цәрепәт хотна нег белвсн күүкд күүнүр илгәсмн.

²⁷Израильд Элиша әәлдәч бәәсн цагт арсна хальдвр гемәр кесг улс гемтсн бәәҗ, зуг Найман гидг сирий келн күүнәс оңдан күн цеврдсн уга бәәҗ, — гив.

²⁸Хурлд бәәсн цуг улс энүг соңсад йир икәр уурлцхав.

²⁹Тедн цуһар ормасн өсрҗ босад, Исусиг балһснас һарһад, уулын ора деер авч ирәд зогсав. Назарет тер уулын ора деер бәәҗ. Әмтн Исусиг ик уул деерәс түлкҗ уңһахар седв.

³⁰Зуг Исус әмтнә заагар һарад, хотнас цааран темцәд йовҗ одв.

³¹Исус Һалилья һазрт бәәсн Капернам гидг хотнур ирәд, бемб өдр әмтнд Бурхна ном умшҗ сурһв.

³²Цуһар Терүнә ном соңсад өврәд бәәцхәв, юңгад гихлә, Исусин келсн үгин ик күчнь медгдв.

³³Хурлд нег хар сәкүстә күн бәәҗ. Генткн тер ик дууһар хәәкрәд:

³⁴— Э-э! Назаретас ирсн Исус, маднас Танд юн кергтәв? Та мадниг уга кехәр ирвт? Би Таниг медв! Та Бурхна Әрүн Күнт! — гиҗ келв.

³⁵— Тагчг бә! Эн күүнәс һарч әрл цааран! — гиҗ Исус терүг хөрҗ келв. Хар сәкүсн тер күүг әмтнә нүднд һазр деер шивәд, терүнә дотрас бийднь хорлтан келго һарч одв.

³⁶Цуһар өврәд нег-негндән келцхәв: — Эн юн гидг юмн болхмб? Энтн тиим ик йоста болн күчтә, нам хар сәкүсдт зәрлг өгнә, теднь әрләд йовҗ одна! — гицхәв.

³⁷Тиигәд Исусин туск зәңг тер нутгар тархагдв.

³⁸Исус хурлас һарад, Шимона герүр йовв. Шимона хадм экнь ик халута бәәҗ, терүнд нөкд болыч гиһәд цуһар Исусиг эрҗ сурцхав.

³⁹Күүкд күүнүр өкәһәд, Исус халунь хәртхә гиҗ зәрлг өгв, тиигәд тер халу дөрдгән уурв. Тер дарунь күүкд күн босад, хотан белдв.

⁴⁰Нарн суух кемд әмтн Исус тал кесг өвчтә улсиг авч ирв, Исус күн болһнд һаран күргҗ эдгәв.

⁴¹Кесг әмтнә дотрас тедниг эзлсн хар сәкүсд хәәкрлдәд һарцхав. Болв тедн: — Чи Бурхна Көвүнч! — гиҗ бәәглдцхәв. Зуг Исус тедниг хөрәд, эврәннь тускар келх зөв өгсн уга, юңгад гихлә, тедн Исусиг Христос гиҗ меддг бәәҗ.

⁴²Өрүн эртәр Исус хотнас һарад аглһ һазрур йовв. Әмтн Терүг хәәв. Тедн Исус тал ирәд Терүг тәвшгоһар бичә йовтн гиҗ эрв.

⁴³Зуг Исус: — Би Бурхна йосна туск Сән Зәңгиг талдан хотн болһнар тархах зөвтәв, тер юңгад гихлә, энүнә төлә Намаг Бурхн илгәв, — гиҗ келв.

⁴⁴Тегәд Тер Йудья нутгин хурлмудт Сән Зәңг цәәлһҗ делгрүлв.