Read kalabari Лукан бичсн Сән Зәңг 5 Bible Online

Лукан бичсн Сән Зәңг 5 - kalabari bible

Лукан бичсн Сән Зәңг 5

¹Нег дәкҗ Исус Генесәрет нуурин көвәд зогсв. Кесг әмтн Бурхна үгмүд соңсхар нүрлдҗ бәәцхәв.

²Исус усна көвәд хойр оңһц бәәсинь үзв. Заһсчнр оңһцас һарад гөлмән уһаҗацхала.

³Нег оңһцд Исус орв. Тернь Шимона оңһц бәәҗ. Исус оңһциг усна көвәһәс цааран түлктн гиҗ сурв. Дәкәд Исус оңһц дотр сууһад әмтиг сурһв.

⁴Исус номан умшҗ төгсәчкәд Шимонд: — Нуурин гүүнүр усчад, гөлмән уснд хайтн, — гив.

⁵Шимон хәрүднь: — Багш, бидн сөөни дуусн көдләд, нег чигн заһс бәрҗ авч чадсн угавидн, зуг ода би Тана келсәр кенәв, — гиҗ келв.

⁶Тедн гөлмән татад, дегд дала заһс бәрҗ авцхав. Гөлмнь заһсар икәр дүүрәд тасрн гив.

⁷Өөрк оңһцд бәәсн үүрмүдтән дем болтн гиҗ тедн докъя өгв. Наадкснь өөрдв, хойр оңһцнь заһсар дүүрәд уснд чивн гив.

⁸Шимон Пётр энүг үзәд, Исусин көлднь унад: — Деед Эзн минь, намаг энд үлдәтн! Би килнцтәв! — гиҗ келв.

⁹[9-10] Пётр, Зебедана көвүд Яков болн Йохан ах дү хойр болн нань чигн заһсчнр дала заһс үзәд икәр әәцхәв. Исус Шимонд: — Бичә ә! Эн өдрәс авн чи әмтиг бәрҗ авдг күн болхич, — гиҗ келв.

¹¹Тедн хойр оңһцан уснас һарһҗ авад үлдәһәд, Исусин ардас дахцхав.

¹²Исус нег хотнд бәәҗ, Терүнә өөгүр арсна гемәр өвчтә нег күн йовҗ. Тер Исусиг үзәд, һазр элкдҗ унад: — Деед Эзн, намаг гемәсм цеврлх саната болхла, цеврлтн! — гиҗ эрҗ сурв.

¹³Исус терүнд һаран күргәд: — Чамаг цеврлх санатав. Цеврд! — гив. Тер дарунь күн арсна гемәсн эдгв,

¹⁴болв Исус терүнд иигҗ зәрлг болв: — Цуг энүнә тускар күүнд бичә кел, зуг гелң тал одад бийән үзүл, болв эдгсн төләдән Мошен закаһар Бурхнд тәкл тәк. Терүгәрн чи әмтнд эдгсән медүлхич, — гив.

¹⁵Исусин туск зәңг өдр ирвәс улм ик өргнәр тархагдв. Терүн тал әмтн ик олар йовдг болв, цуһар Терүнә ном соңсхар болн гемән эдгәхәр ирдг бәәсмн.

¹⁶Исус болхла бәәҗ-бәәҗәһәд аглһ һазр тал йовад, Бурхнд зальврдг бәәсмн.

¹⁷Нег дәкҗ, Исус әмтиг сурһҗасн цагла, паршмуд болн ном цәәлһәчнр Һалильяс, Йудьяс, Ерусалимас болн нань чигн хотн болһнас ирәд, бас Терүг соңсла. Исус Бурхна күч авад, гемтә әмтиг эдгәдг бәәсмн.

¹⁸Нег цөөкн күн девскр деер кевтсн, һар-көлнь тәкрсн күүг авч ирәд, гер дотр орулҗ Исусин өмн тәвхәр седҗ.

¹⁹Зуг герт дала әмтн бәәсн төләд тедн орҗ чадлго, герин ора деер һарад, деевриг цоолҗ хамхлад, тәкрсн күүг девскртә хамднь ора деерәс Исусин өмн буулһҗ тәвцхәв.

²⁰Исус теднә итклинь үзәд, гемтә күүнд: — Көвүн! Килнцчн тәвгдҗәнә, — гиҗ келв.

²¹Паршмуд болн ном цәәлһәчнр Терүг бурушаһад дотран: — Эн күн бийән Бурхнд тоолҗана. Эн күн кен болхмб? Бурхнас талдан кен күүнә килнц тәвҗ чаддмб? — гиҗ ухалв.

²²Исус теднә ухалсн санаг медәд: — Тиим ухан юңгад таднд орҗахмб? — гиҗ келв.

²³— Ю келснь амр болх, «Чини килнц тәвгдв», эс гиҗ «Босад йов»?

²⁴Зуг Би, Күмни Көвүн, һазр деерк улсиг килнцәснь һарһх йостав гиҗ таднд медүлхин төлә келҗәнәв, — гив. Дәкәд Исус тәкрсн күүнд: — Соңс Намаг! Бос! Эврәннь девскрән авад хәр! — гив.

²⁵Тер күн дарунь босад, девскрән авад, Бурхиг магтад герүрн йовв.

²⁶Цуһар өврәд Бурхиг туурулв. Цуг энүг үзсн әмтн сүрдцхәв: — Эндр ик өвәрц юм бидн үзвидн, — гиҗ тедн келцхәв.

²⁷Энүнә хөөн тер герәс һарад, Исус Леви гидг кү үзв. Тер әмтнәс алв цуглулдг күн бәәҗ. Леви тамһин герин өөр сууҗ. — Намаг дахад йов! — гиҗ Исус терүнд келв.

²⁸Леви цуг юмиг үлдәһәд, Исусиг дахв.

²⁹Дәкәд тер Исуст нерәдҗ гертән ик нәр кев. Тер нәәрт алв цуглулдг кесг улс болн талдан чигн әмтн ирцхәв. Тедн Исусла хамдан хот ууһад нәәрлцхәв.

³⁰Паршмуд болн закана багшнр дурго болад, Исусин сурһульчнрас: — Тадн, алв цуглулдг килнцтә әмтнлә яһад хот ууҗахмт? — гиҗ сурцхав.

³¹Тедниг сурһульчнрас ю сурҗахинь соңсад, Исус иим хәрү өгв: — Эрүл күүнд биш гемтә күүнд эмч кергтә болдмн.

³²Би чик седклтә әмтнүр биш килнцтә әмтнүр килнцтә җирһлән үлдәтн гихәр ирв, — гив.

³³Тиигәд тедн Исусас: — Юңгад Йохана болн паршмудын сурһульчнр дару-дарунь мацг бәрәд зальврна, болв Тана сурһульчнр болхла оньдин хот ууһад бәәнә? — гиҗ сурв.

³⁴— Хүрмин гиичнрлә күргн бәәхлә, теднәр мацг бәрүлҗ болхий? — гиҗ Исус хәрү өгв.

³⁵— Зуг цагнь ирхлә, күргиг теднәс салһҗ авхла, тер цагт тедн мацг бәрәд бәәх, — гив.

³⁶Исус теднд иим үлгүр келҗ өгв: — Кен чигн шин хувцнас таслҗ авад, хуучн хувцндан халас тәвхш. Кемр тиигәд кехлә, тер шин хувцан чигн үрәх, болв тер халаснь хуучн хувцндчн зокшго.

³⁷Кен чигн хуучн бөрвд күчән авчах чаһр кедмн биш. Кемр тиигҗ кехлә, тер чаһрнь деврәд һархла, бөрвнь шуурад, чаһрнь асхрад, бөрвнь үрҗ одх.

³⁸Күчән авчах чаһриг шин бөрвд кедмн.

³⁹Болв кен чигн хуучн чаһр ууһад күчән авчах чаһр суршго, юңгад гихлә, хуучн чаһр шин чаһрас деер гиҗ келх.