Read kalabari Лукан бичсн Сән Зәңг 6 Bible Online

Лукан бичсн Сән Зәңг 6 - kalabari bible

Лукан бичсн Сән Зәңг 6

¹Бемб өдр Исус цаһан буудя тәрсн һазрин өөгүр йовҗ, сурһульчнрнь цаһан буудян толһас таслҗ авад һарарн үүлҗ идцхәв.

²Паршмудас зәрмнь: — Тадн яһҗахмт? Бемб өдр тиим юм кех зөв угат! — гиҗ келв.

³Исус теднд иигҗ хәрү өгәд: — Давид эврәннь үүрмүдтән өлн бәәсн цагтан ю кесинь та умшвт?

⁴Тер Бурхна герт орҗ ирәд, Бурхна өмн тәвсн өдмгиг авад эврән идәд бас өөрк үүрмүдтән өгв. Зуг тер өдмгиг һанцхн гелңгүд идх зөвтә бәәҗ, — гив.

⁵Аштнь Исус: — Күмни Көвүн бемб өдрин Эзн мөн, — гиҗ келв.

⁶Бас нег бемб өдр Исус хурлд ирәд, цуглрсн әмтнд Бурхна ном зааҗ сурһла. Тенд барун һарнь әмн уга нег күн бәәҗ.

⁷Закана багшнр болн паршмуд Исусиг бемб өдр кү эдгәхлә, гемшәхәр Терүг гетәд сууцхав.

⁸Исус тедниг ю ухалҗахинь медәд, әмн уга һарта күүнд: — Бос! Өмәрән һар! — гив. Тер күн босад өмәрән һарв.

⁹Тиигхләнь Исус теднәс: — Би таднас сурҗанав, бемб өдр күн сә кех йостай? Аль му кех йостай? Күүг үкләснь харсҗ авхмб эс гиҗ алхмб? — гиҗ сурв.

¹⁰Исус әмтиг эргҗ хәләһәд: — Һаран суңһ! — гив. Тер күн һаран суңһад, дарунь эдгв.

¹¹Паршмуд болн закана багшнр дурго болад, дегд икәр уурнь күрв. Тедн хоорндан Исусиг яахмб гиһәд күүндцхәв.

¹²Тер өдрмүдт Исус уулын ташуд ирәд сөөни дуусн Бурхнд зальврв.

¹³Өр цәәхлә, Тер эврәннь сурһульчнран дуудҗ, теднәс арвн хойр кү онц йилһҗ авад, тедниг апостолмуд гиҗ нерәдв.

¹⁴Шимон (Исус терүнд Пётр гидг нер өгв), Шимона дү Андрей, Яков, Йохан, Пилип, Бар-Толма,

¹⁵Матай, Томас, Алпана көвүн Яков, зилот багин гешүн Шимон,

¹⁶Яковин көвүн Йуда, Йуда Искериот (сүүлднь тер урвач болв).

¹⁷Исус теднлә хамдан дорагшан йовҗ, тегш һазрт зогсв. Тенд дала сурһульчнрнь цуглрцхав. Йудьяс, Ерусалимас, теңгсин шидрк Тир Сидон гидг һазрас ирсн олн әмтн цуглрцхав.

¹⁸Зәрмнь Исусиг соңсхар болн бийән эдгәхәр ирҗ. Хар сәкүснд эзлгдсн әмтн бас ирәд эдгдг бәәсмн.

¹⁹Цуһар Исуст һарарн күрхәр зүткдг бәәсмн. Юңгад гихлә, цуг әмтиг эдгәдг күчн Терүнәс һардг бәәҗ.

²⁰Исус Эврәннь сурһульчнран ширтҗ хәләһәд келв: — Яду әмтн — буйн-кишгтә! Тадн Теңгрин орна улст!

²¹Өлсҗәсн әмтн буйн-кишгтә! Цагнь ирхлә, цадхит! Уульҗасн әмтн буйн-кишгтә! Цагнь ирхлә, байрлхит!

²²Күмни Көвүнәс көлтә кемр таднд дурго болхла, көөхлә, му келхлә, неритн һутаҗ муурулхла,

²³тер өдрт байстн! Байрар дүүртн! Теңгрин ачлвр тадниг деер күләҗәнә. Эн улсин өвк экцнр әәлдәчнрт тиим юм кесмн.

²⁴Зуг байн әмтн зовлңган эдлхит! Авх юман авчквт!

²⁵Цадхлң әмтн зовлңган эдлхит! Цагнь ирхлә, тадн харһнҗ өлсхит! Инәҗәх әмтн зовлңган эдлхит! Цагнь ирхлә, оркрад уульхит!

²⁶Тадна тускар сәәнәр келхлә, басл зовлңган эдлхит! Тиим кевәр эднә өвк экцнр худл әәлдәчнрин тускар сәәнәр келлә!

²⁷Таднд, намаг соңссн әмтнд, Би келҗәнәв: Эврәннь өшәтндән дурта болтн, таднд дурго күүнд сә кетн.

²⁸Тадниг харасн әмтиг йөрәтн, тадниг му келсн күүнә төлә зальвртн.

²⁹Нег халхартн күн ташхла, дарук халхан өгтн. Кемр күн тадна деерк хувцитн булахла, дотрк бәәсн киилгән чигн тәәләд өгтн.

³⁰Сурсн күүнд өгәд бәәтн. Кемр таднас ямаран чигн күн күчәр юм булаһад авхла, буласн юмиг бичә нектн.

³¹Әмтн нанд тиим юм кех зөвтә гиҗ санҗахла, тиим юм бийстн әмтнд кех зөвтәт.

³²Тадниг таасҗ дурлсн күүнд тадн дурта болхла, тана ачтн юмб? Яһад гихлә, килнцтә әмтн бийдән тааста күүнд дурлна, тиим эсий?

³³Кемр таднд нөкд болсн әмтнд тадн нөкд болхла, тана ачтн юмб? Килнцтә әмтн бас тиигҗ кенәлм.

³⁴Кемр тадн күүнд өгйә өгәд, хәрүһинь кезә өгхинь күләхлә, ачтн юундв? Килнцтә әмтн бас килнцтә әмтнд мөңгәр өгйә өгнә, болв дәкәд хәрүһинь кезә өгх гиҗ күләнә.

³⁵Зуг тадн эврәннь өшәтндән дурта болх зөвтәт, теднд нөкд болад өгйәһинь өгтн, зуг өрән бичә нектн. Тиигхлә тана ач ик болх, тадн Деед Бурхна үрн болхит, юңгад гихлә, ханлт уга, хар саната әмтнд Бурхн бас сә кенә.

³⁶Эврәннь Эцк Бурхнла әдл өршәңгү буйнч седклтә болтн!

³⁷Кү бичә гемшәтн, тадниг Бурхн гемшәхмн уга. Күүг бичә бурушатн, тадниг Бурхн бурушахмн уга. Әмтнә буруһинь тәвтн, тиигхлә тадна буруг Бурхн бас тәвх.

³⁸Өгәд бәәтн, таднд өггдх. Таг дүүргәд, деерәс дарад, тана хормад асхад оркх. Ямаран кемҗәһәр тадн кемҗәлнәт, тиим кемҗәһәр тадниг кемҗәлх.

³⁹Цааранднь Исус үлгүрләд иигҗ келв: — Сохр күн сохриг дахулҗ чадхий? Тедн хоюрн нүкнд унх, тиим эс мөний?

⁴⁰Сурһульч эврәннь багшас деер биш, зуг кен чигн номан төгсәҗ дасхла, эврәннь багшла әдл болх.

⁴¹Ахиннь толһадк өвс үзә бәәҗ, эврәннь толһадк өвр яһад эс үзнәч?

⁴²Эврәннь толһадк өвр үзлго бәәчкәд, «Ах, чини толһадк өвс авч хайнав» гиҗ яһҗ чи келҗ чадхмч? Хойр чирәтнр! Түрүләд толһадк өврән һарһҗ хайчкад, тегәд ахиннь толһадк өвс яһҗ хайхинь медхич.

⁴³— Сән модн му темс өгшго, болв му модн сән темс өгдмн биш.

⁴⁴Модн темсәрн медгднә. Көгләс инҗр таслҗ авад, таслҗ авч болдго биший, тедү мет хатханчгас уста үзм авч болдмн биш.

⁴⁵Цаһан саната күн зүркндән хадһлсн сәәнәс сә һарһна. Хар саната күн зүркндән хадһлсн мууһасн му һарһна. Зүркнд бәәсн юмн келнд илрдмн.

⁴⁶— Ю хәәҗ тадн Намаг «Деед Эзн, Деед Эзн» гиһәд дууднат, зуг Мини келсн юм күцәхшит?

⁴⁷Нан тал ирәд, үгм соңсад, Мини келсәр үүлән күцәдг күүг кенлә дүңцүлҗ болхинь Би ода келҗ өгнәв.

⁴⁸Тиим күн гүүнәр һазр малтад, чолун деер ул тәвҗ герән тосхсн күн мет. Усн деврәд, эргәсн һарад, гер деернь асхрхла, тернь көндрсн уга, тер юңгад гихлә, гер батар тосхгдсн бәәҗ.

⁴⁹Үгм соңсв чигн Мини келсәр үүлән күцәдго күүг һазр деер ул угаһар герән тосхсн күүнлә дүңцүлҗ болхмн. Усн деврәд эрс деернь асхрхла, терүнә гернь нурад хамхрҗ одсмн. Тер гер бәәсн ормд зуг хамхрха модн чолун үлдҗ.