Read kalabari Христост иткдг Көринтин улст илгәсн хойрдгч бичг 1 Bible Online

Христост иткдг Көринтин улст илгәсн хойрдгч бичг 1 - kalabari bible

Христост иткдг Көринтин улст илгәсн хойрдгч бичг 1

¹Бурхна таалар Христос Исусин апостол болтха гиҗ дуудгдсн Павелас болн мана дү Тимофеяс Бурхнд иткдг Көринтфин баг улст болн цуг Ахьяр бәәх Бурхна улст цугтаднь менд.

²Мана Эцк Бурхн болн Деед Эзн Исус Христос цаһан сана болн амулң бәәдл таднд өгтхә!

³Бурхнд болн мана Деед Эзн Исус Христосин Эцкд, цаһан саната Эцкд болн мадниг төвкнүлдг Бурхнд туурмҗ!

⁴Бидн зүсн-зүүл зовлңта улсиг төвкнүлдгәр Бурхн мадниг мана цуг зовлң эдлҗәснд төвкнүлҗәнә. Бурхн мадниг төвкнүлснлә әдләр бидн тедниг бас төвкнүлҗәнәвидн.

⁵Христосин төлә бидн яһҗ икәр зовҗанавидн, тедү мет Бурхн мадниг Христосар дамҗад төвкнүлх.

⁶Кемр бидн зовҗахла, зуг тана төвкнлтин болн аврлтын төлә зовҗанавидн. Кемр мадниг төвкнүлҗәхлә, зуг тадна төвкнлтин төлә тиигҗәнә. Маднла хамдан дааҗах зовлңгиг тадн тесвртәһәр даахларн төвкнүлт авхит.

⁷Бидн таднд батар иткҗәнәвидн. Яһад гихлә, кемр тадн маднла әдл зовҗахла, тиигхлә маднла әдл төвкнүлгдхит.

⁸Ахнр-дүүнр, Азийд маднд учрсн зовлңгин тускар тадниг медтхә гиҗ бидн санлавидн. Бидн мана зовлңгиг даахин арһас даву ик аһу күчр-күндлә харһвидн. Тиигәд нам әмд үлдх нәәлврән гееввидн.

⁹Үкх шиидврлә харһсан бидн тааһад медҗәләвидн. Болв эннь цугтан учрв: мадниг бийдән биш, үкләс әмдрүлҗәх Бурхнд нәәлтхә гиҗәнә.

¹⁰[10-11] Бурхн мадниг тиим күчр үкләс аврв, мадниг дәкәд аврх. Кемр тадн мана төлә зальврад дөң болхла, Бурхн дәкн мадниг аврх гиҗ нәәлҗәнәвидн. Тиигәд Бурхн мана төлә олн зальврлһнд хәрү өгәд, маднд әдс өгх. Болв кесгнь мана төлә Бурхнд ханлтан өргх.

¹²Бидн эн җирһлд йилһән даву таднла бәәхләрн, бийән юм нуулго бәрәд, Бурхна үнәр бәәснә тускар медҗәхән зүркәрн бидн буульҗанавидн. Болв бидн күүнә цецн ухаһар биш, Бурхна цаһан санаһар тиигҗ йоввидн.

¹³[13-14] Бидн тана умшҗ болн медҗ чадхин тускар бичҗәнәвидн. Мана Деед Эзн Исусин ирх өдрт бидн тадна буульмҗ болхвидн, тедү мет тадн мана буульмҗ болхит. Эннь күцц бишинь тадн медсмн болхит. Тадниг күццднь медх гиҗ нәәлҗәнәв.

¹⁵Би энүнд цугтаднь иткҗәләв. Тиигәд тадниг хойр дам әдс автха гиһәд түрүләд тадн тал ирхәр зуралҗалав.

¹⁶Би Македонь орҗ йовад, бас нег Македоняс хәрҗ йовад, тадн тал одхар седләв. Йудья тал йовхд тадн нанд дөң болх биләт.

¹⁷Иигҗ зуралхларн би нааһар ухалсн болвза? Эс гихлә би цогц-махмудыннь седвәрәс зуралҗану: «Э» — гиҗ келчкәд, «Уга» — гиҗ ухалҗану?

¹⁸Бурхн итклтә бидн «Э», «Уга» — гиҗ дегц келҗәхшвидн.

¹⁹Мини, Силан болн Тимофейин цәәлһҗ йовсн Бурхна Көвүн, Исус Христос, дегц «Э», «Уга» болҗахш. Тертн кезә чигн «Э» болҗана.

²⁰Яһад гихлә, Бурхна өгсн үгд Христос цуг лавта хәрүнь болҗана. Тиигәд Исус Христосар дамҗад Бурхна туурмҗин төлә бидн «Тиигтхә!» гиҗ келнәвидн.

²¹Бурхн мадниг таднла Христост иткснд батраҗана, мадниг Бийиннь төлә салһв.

²²Бурхн мадниг Эврәннь улст тоолад, мадниг тамһлв. Бурхн өгсн үгән цугтаһинь эркн биш күцәхәр мана зүркнд Әрүн Сәкүсиг өгв.

²³Таднд улм зовлң үзүлшгон төлә Коринф тал намаг ода күртл эс ирснә герчнь — Бурхн.

²⁴Юунд иткхиг бидн таднд закҗ заахар бәәхшвидн. Яһад гихлә, тадн батар иткҗәнәт. Бидн хамдан тадна байрин төлә көдлҗәнәвидн.