Read kalabari Йохана бичсн һурвдгч бичг 1 Bible Online

Йохана бичсн һурвдгч бичг 1 - kalabari bible

Йохана бичсн һурвдгч бичг 1

¹Хәәртә үр Гай! Би чонҗин ахлачин негньв. Халун менд чамд илгәҗәнәв. Би үнн седкләрн чамд дуртав.

²Хәәртә үр! Чи санан-седкләрн сән-сәәхн бәәнәч. Тиим кевәр җирһлчн сән-сәәхн болтха гиҗ чамаг оньдин эрүл-менд бәәтхә гиҗ зальврҗанав.

³Чи оньдин Бурхна үн дахҗ бәәдг кевәрн ода Бурхна үнәр бәәдгинь соңсад ик байрта бәәнәв. Эн зәңг нанд ирҗәх ахнр-дүүнр авч ирлә.

⁴Мини нилчәр Христост итксн үрдүдм Бурхна үнниг дахҗ бәәдгинь соңсхла, би йир икәр байрлнав. Тер байрас даву байр нанд уга.

⁵Хәәртә үр! Кемр чи ахнр-дүүнрт, онц кевәр зуульч улст нөкд болҗахла тернь чик.

⁶[6-7] Чини хәәрлтин тускар тедн энд чонҗин өмн келсн билә. Тер ахнр-дүүнрчн Христосин тускар ном цәәлһҗәнә, тедн буру номта улсас дөң авхш. Тер учрар, буйн болтха, цааранднь йовх хаалһднь Бурхнд таастаһар теднд дәкәд нөкд болыч.

⁸Теднлә хамдан көдлхин төлә бидн тиим улст нөкд болх зөвтәвидн.

⁹Би тана чонҗд нег бичг бичләв. Зуг әмтиг нойлхдан дурта Детреп мини бичсн юмиг керглшго.

¹⁰Детреп намаг оньдин му келнә, мини тускар худл, хов зөөнә. Эннь цугнь биш. Дәкәд болхла, холас ирсн ахнр-дүүнриг тосҗ нөкд болхш. Теднд нөкд болхар седсн улст харш болад, чонҗас көөнә. Ирхләрн би терүнд эн хар үүлмүдин тускар илдкҗ келхв.

¹¹Хәәртә үр! Му кедг әмтиг дураҗ тиим юм бичә ке. Зуг сә кедг улсиг дураҗ теднәс үлгүр ав. Сә кедг күн Бурхна күн болна. Му кедг күн Бурхиг үзәд уга.

¹²Цуһар Деметрин тускар сә келнә. Үнн бийнь энүг үзүлнә. Би эврән Деметрсин тускар сә келнәв. Мини үгмүдиг чикинь чи меднәч.

¹³Би дала үг чамд келхәр бәәләв. Зуг цугинь хулсн үзгәр болн бекәр бичхәр седҗәхшв.

¹⁴Удл уга чамла чирәһәрн харһад, үзлцәд күүндхв гиҗ нәәлҗәнәв.

¹⁵Санан-седклчн амр таварн бәәх болтха! Энд бәәсн үүрмүдчн чамд менд илгәҗәнә. Хаҗудан бәәсн үүрмүдтән нанас менд кел!