Read kalabari Рут 4 Bible Online

Рут 4 - kalabari bible

Рут 4

¹Балһсна үүднд әмтн харһдг һазрт Боаз ирәд суув. Тер саамлань, Боазин урднь келҗәсн садн хаҗуһарнь давҗ һарна. Боаз терүг дуудад, өөрән суулһна.

²Дәкәд герчнр болх арвн медәтнриг дуудад бас өөрән суулһна.

³Боаз эврәннь садндан иигҗ келнә: — Ноеми Моавас ирәд, мана садн Елимелехин хүв һазринь хулдҗана.

⁴Би чамд энүг медүлҗәнәв. Энд суусн әмтнә болн медәтнрин чирәд келҗәнәв: кемр хулдҗ авх болхла — ав, авшго болхла — нанд медүләд кел. Яһад гихлә, чамас нань күүнд хулдҗ авх зөв уга, дарукнь — бив. — Би хулдҗ авнав, — гиҗ тернь келв.

⁵— Дәкәд нег юмн бәәнә. Ноемин хулдҗах хүв һазриг хулдҗ авхларн, өңгрсн садна тохминь давулхин төлә чи Моав һазра күүкд күүг, белвсн Рутиг буулһҗ авх зөвтәч. Тер күүкд күүнәс һарсн көвүнь тер һазрин эзн болх. Тиигәд өңгрсн садна һазрнь өрк-бүлднь үлдх, — гиҗ Боаз келв.

⁶— Мини күүкдин өнчинь булалһшгон төләд би авч чадшгов; чи ав, — гиҗ тер садн хәрү өгв.

⁷Кезәнә Израильд тиим авъяс бәәҗ: хойр күүнә хоорндк ямаран чигн кергиг эс гиҗ бооцаг батлхин төлә, нег күнь көләсн буршмган тәәләд, талдан күүндән өгдг бәәҗ.

⁸Тегәд тер садн күн нег буршмган тәәләд: — Тер һазриг эврән хулдҗ ав, — гиһәд Боазд келв.

⁹Боаз болхла, медәтнрт болн цуг әмтнд иигҗ келнә: — Елимелехд, Килионд, Махлонд бәәсн цуг юминь би Ноемиһәс хулдҗ авчанав. Тадн эндр энүнд герчнр болҗанат.

¹⁰Дәкәд би өңгрсн Махлона гергинь — моавин күүкд күүг — Рутиг буулһҗ авчанав. Тиигәд тер күүнә һазрнь өрк-бүлднь үлдх, нернь ахнр-дүүнр заагтнь болн төрскн балһснднь дуудулгдҗ йовх. Тадн эндр энүнд герчнр болҗанат.

¹¹Тиигхлә медәтнр чигн, балһсна үүднд суусн әмтн чигн: — Бидн герчлҗәнәвидн. Чини герт ирсн күүкд күн Лияг болн Рахелиг дуратха! Эдн олн көвүд һарһҗ, Израилин уңг-тохм тогтала! Бурхн энүг тиим кетхә! Епратахна заагт элвг-делвг бәәҗ, Бетлехемд нернчн тууртха!

¹²Эн баахн күүкд күүнәс Бурхн чамд үрд өгтхә! Тамарь Йудад һарһҗ өгсн Пәрец көвүнә бүллә әдл чини бүл нертә болтха! — гиҗ йөрәцхәв.

¹³Тегәд Боаз Рутиг буулһҗ авв. Бурхн әдс өгәд, Рут көвү һарһна.

¹⁴Күүкд улс Ноемиг йөрәһәд иигҗ келнә: — Деед Эзнд магтал! Эндр өдр ач угаһар чамаг үлдәсн уга. Эн нилх көвүн Израиль һазрт нерән дуудултха!

¹⁵Долан көвүнәс деер, чамд дурта болдг берчн эн үриг һарһв. Тегәд эн көвүн көгшрх насндчн чамаг асрҗ, Чини җирһлин байр-бахмҗ болх.

¹⁶Ноеми нилхиг һар деерән авад, теврәд, һарсн көвүһән хәләсн әдләр килмҗтәһәр хәләдг болв.

¹⁷Хам хоша бәәдг күүкд улс: — Эн көвүн Ноемин төлә һарч, — гиҗ келдг бәәҗ. Көвүнд тедн Овид гидг нер өгч. Овид хөөннь Иессейин эцк болна. Иессей Давид хаана эцк бәәсмн.

¹⁸Пәрецин уңг-тохм эн: Пәрец Хецронин эцк,

¹⁹Хецрон Рамин эцк, Рам Аминадавин эцк,

²⁰Аминадав Нахшона эцк, Нахшон Салмона эцк,

²¹Салмон Боазын эцк, Боаз Овидин эцк,

²²Овид Иессейин эцк, Иессей Давидин эцк билә.