Read kalabari Suku-saakị 16 Bible Online

Suku-saakị 16 - kalabari bible

Suku-saakị 16

¹Mịọkụ Sẹrayị, Ebiramụ ta ma gbọrụ tụḅọ sọ iyi ọ̀ pịrị-a. Á nwẹnị Ijiputi ḅẹ gbọrụ ẹrẹḅọtụḅọ nyana, árị ẹrẹ Ega,

²tẹ Sẹrayị nwẹnị Ebiramụ ḅẹẹ, “Ḍikii, KỊNỊNYANAḄỌ ḅe mịọkụ awọ iyi ḅụ ì kiki tẹ ḅẹ sakị, mu ị̀ ẹrẹḅọtụḅọ ma na gbolomaa ẹbịsịya arị á ḅụụ ḅụ ḅọrọ tẹ awọ nyana ḅa.” Tẹ Ebiramụ nwẹnị Sẹrayị ḅịḅịpoki tẹ ọkọ mịẹ.

³Mie ḅụ Ebiramụ oyi akụra kẹ Kenanị ama mẹ ḅio anga tẹso, Ebiramụ ta Sẹrayị nwẹnị Ega Ijiputi ḅẹ ẹrẹḅọtụḅọ á fịrịmẹnjị-ẹrẹḅọtụḅọ ma saakị á di Ebiramụ pịrị, taḅọ ḅara ḅụ.

⁴Tẹ Ebiramụ Ega na gbolomam, tẹ á furam; á ḅo á ḅụụ ẹrị tẹso, mịnẹ á fura tẹ, á nwẹnị ḍiki-sima tọrụ kẹ á sịḅịda-ẹrẹḅọ ma ḍiki.

⁵Anịtẹso Sẹrayị nwẹnị Ebiramụ ḅẹẹ, “Yee ị̀ laarị kura-a mịẹye mẹ ị́ ọgọnọ gbana! Àrị ị̀ fịrịmẹnjị-ẹrẹḅọtụḅọ saakị ị́ pịrị ị́ ekpe kẹ á lamam, tẹ á ḅo ẹrị tẹso, mịnẹ á fura tẹ, á nwẹnị ḍiki-sima tọrụ kẹ ì ḍiki. Yee KỊNỊNYANAḄỌ ḅe kọọn ị́yẹrị na, yẹrị na pịrị!”

⁶Kụma Ebiramụ nwẹnị Sẹrayị pakịrị, “Ḍikii ị́ fịrịmẹnjị-ẹrẹḅọtụḅọ ma ị́ kụrọ mẹ suku-ḅio arị emi; ị́ ḅụụ ḅẹlẹ ḅara, ḅẹlẹ ḅara kẹ á mịẹ.” Anịtẹso Sẹrayị guda-guda ḅara kẹ arị na mịẹm, tẹ arị á ḅụụ ḅụ ḍumo-mangị kọnm.

⁷KỊNỊNYANAḄỌ ḅe enjẹlị ḅe nwẹnị ịkpa mẹ ḅio simearị gbọrụ ngụngụḅa minji akaka á ḍọkị-ẹrị, Sọọ muarị etela mẹ ḅụ simearị ngụngụḅa minji mẹ,

⁸tẹ ọ̀ nwẹnị ḅẹẹ, “Ega, Sẹrayị fịrịmẹnjị-ẹrẹḅọtụḅọ ị́ tọ-anga sime tẹ ḅo, anịsakị ị́ tọ-anga muarị?” Á nwẹnị pakịrị, “Àrị ị̀ sịḅịda ẹrẹḅọ Sẹrayị ḅụ ì ḍumo-mangị kọn-arị.”

⁹KỊNỊNYANAḄỌ ḅe enjẹlị ḅe nwẹnị á ḅẹẹ, “Pịkịma-so ị́ sịḅịda ẹrẹḅọ ma ḍọkụma-mu tẹ sịḅị-tuu á pịrịị.”

¹⁰KỊNỊNYANAḄỌ ḅe enjẹlị pịkị á ḅẹẹm, “À mịẹtẹ í furo-ḅẹ-apụ gburo-gburoma kama ḅa, tẹ kịnị inetẹ ịn kịẹn ḅịa.”

¹¹Tẹ KỊNỊNYANAḄỌ ḅe enjẹlị ḅẹ nwẹnị á ḅẹẹ, “Ḍikii, í fura wararị, anịsakị ị́ gbọrụ owiḅọtụḅọ iyi ḅa, tẹ ị́ kẹ ọ̀ sịn ḅarị ẹrẹ Isimẹlị; gbala KỊNỊNYANAḄỌ ḅe ị́ ḅụụ-ḅalaḅala tẹ tọrụsiẹrị ḅụ kọn owu mẹ naa tẹ ẹrẹsị.

¹²Ò piri-ḅio-ḅẹ yedogi-nama sime-ḅara sime tomḅọ sọ ḅa; ọ̀ ḅara tomḅọ nwẹn-sịn tomḅọ da-paka ḅa, anịsakị tomḅọ nwẹn-sịn tomḅọ ḅara pịkị ọ̀ da-paka ḅa; tẹ ori ori amịnapụ mamgba ḅụ ḅele tẹ anga tẹ ini na tụḅụrụ ḅa.”

¹³Mie ḅụ á nwẹnị ẹrẹ kẹ KỊNỊNYANAḄỌ ḅe tẹ ẹkwẹn á pịrị ḅọ ḅe sịn, “Ị́yẹrị anie Ẹlị-rọhị[5]” gbala árị á ḅụụ gbelam, “Karakara-ḅara-ḅụ à Tamụnọ ẹrị tẹ, tẹ àrị ori ẹrị ye mẹ ḅụ paa ḍumo-sime wararị mọ?”

¹⁴Anịẹrẹsị tomi nwẹnị suḅe mẹ sịn, Biya-lahayi-royi[6] suḅe — anị Kadẹsị na Bẹrẹdị na ogboku ḅụ emii.

¹⁵Tẹ Ega gbọrụ owiḅọtụḅọ iyi Ebiramụ pịrịm, tẹ Ebiramụ nwẹnị ẹrẹ kẹ owiḅọtụḅọ ḅe tẹ Ega iyi ḅọ ḅe koro Isimẹlị.

¹⁶Ega Isimẹlị iyi Ebiramụ pịrị sakị Ebiramụ sịḅị ini akụra ofori kụra inia si oyi finji (86) ḅọrọ tẹ.