Read kalabari Suku-saakị 17 Bible Online

Suku-saakị 17 - kalabari bible

Suku-saakị 17

¹Ebiramụ sịḅị gbọrụ kụra ofori kụra sọnọa si ḅọrọ tẹso, KỊNỊNYANAḄỌ ḅe amịna ḅụụ pakama Ebiramụ ḍiem, tẹ ọ̀ ḅẹẹm, “Yẹrị anie Kụrọmamgba Nyana Tamụnọ ḅẹ. Ị̀nịna gbọrụ ḅụ mẹnjị tẹ ị̀ ḅịḅị pokii, tẹ sakị mamgba karakara mịẹẹ.

²Anịsakị yẹrị na, ị́yẹrị na ogboku àrị ị̀ ọḅọkụ mịẹ pakama ḅa, tẹ ị́ mịẹtẹ ị́ kama lama ḅa.”

³Anịtẹso Ebiramụ ọ̀ tọrụkuḅu kẹ ḅịkị kiri-ḅio korom; tẹ Tamụnọ nwẹnị ọ̀ ḅẹẹ,

⁴“Ḍikii, ị̀ ọḅọkụ mẹ ị́ na emi, anịsakị ị́ ḍaḅọ sọ opu asịẹ ogbo pịrị ḅa.

⁵Ị́ ẹrẹ ḅarị jen-maaịn kẹ Ebiramụ sọ ḅịa, kụma ị́ fị ḅarị ẹrẹ anie Ebira-amụ; kẹ gotẹ ọkọ ḅẹẹarị, àrị ị́ kẹ ḍaḅọ mịẹ opu asịẹ ogbo pịrị tẹ.

⁶Àrị ị́ mịẹtẹ ị́ awọ iyi kama lama ḅa, anịsakị àrị ị́ ḅụụ ḅụ tọnwa opu asịẹ pakama ḅa, tẹ tọnwa amadapụ ị́ ḅụụ ḅụ paka-ḅo ḅa.

⁷“Àrị ị̀ ọḅọkụ mịẹ pakama ḅa yẹrị na ị́yẹrị na í furo-ḅẹ-apụ na ogboku, anị sime gbamaso ọḅọkụ ḅara ḅụ sime ịna ḅụọ-ḅẹ-atomi pịrị ḅa. À Tamụnọ sọ ị́yẹrị na í furo-ḅẹ-apụ na pịrị ḅa.

⁸Anịsakị ọmịnị igoni ḅara kẹ angarị ama mẹ, Kenanị ama mẹmgba à kẹ ị́yẹrị na, ị́ ḅọrọ tẹso, í furo-ḅẹ-apụ na pịrị ḅa, anị nyana gbamaso ḅara ḅụ, tẹ arị ịna Tamụnọ sọ ḅa.”

⁹Tamụnọ nwẹnị pịkị Ebira-amụ ḅẹẹ, “Ị́yẹrị kụma, ị́yẹrị na í furo-ḅẹ-apụ na ọmịnị ị̀ ọḅọkụ mẹ koko ḅa, ịna aḅụọ mamgba mu ḅụọ-fa-ḅụọ-paka la.

¹⁰Miemẹ anie ị̀ ọḅọkụ mẹ tẹ yẹrị na, ị́yẹrị na í furo-ḅẹ-apụ na ogboku ó koko ḅarịye mẹ: ọmịna ogbo-ḅio owiḅọ nwẹn-sịn owiḅọ tarị-ḅụụ sin ḅa.

¹¹Ọmịna oju meni ḅụ ọmịnị ọmịna tarị-ḅụụ sin ḅa, anịsakị anị yẹrị na, ọmịnị na ogboku ḅẹ ọḅọkụ mẹ ḅẹ elekima sọ ḅa.

¹²Ọmịna ogbo-ḅio, ḅụọ-fa-ḅụọ-paka, iyi tẹ nine aḍin sịḅị ḅụ ḅọrọtẹ owiḅọtụḅọ goḅọ-goḅọ tarị ḅụụ sin ḅa, í warị ḅio iyi ḅọ, anịanịa igoniḅọ tẹ ị́ ḅụụ ḅụ paka-ḅo-a tẹ ị́ igbigi kẹ fẹẹ ḅọ sọ,

¹³ori ḅe tẹ ị́ warị ḅio iyi ḅọ ḅe na, ori ḅe tẹ í igbigi kẹ fẹẹ ḅọ ḅe na, tarị-ḅụụ sin ḅa. Mị-ḅara mie ị̀ ọḅọkụ mẹ ọmịna meni ḅụ sime-gbamaso ọḅọkụ sọ ḅarị ḅara.

¹⁴Owiḅọ nwẹn-sịn owiḅọ tẹ meni-oju ḅụ amụ amịna tarị-ḅụụ sin-a owiḅọ ḅe, ori atomi ḅụ ini ọ̀ pẹlẹ-siin ḅa; ori ọḅọkụ mẹ kan tẹẹ.”

¹⁵Tamụnọ nwẹnị Ebira-amụ ḅẹẹ, “Ị́ ta Sẹrayị kụma, ị́ ḅarị Sẹrayị kẹ ẹrẹ kẹ á sịn ḅịa, kụma Sera mie á fị ḅarị ẹrẹ.

¹⁶Àrị á boma ḅa, anie sikima, á ḅụụ ḅụ à gbọrụ owiḅọtụḅọ kẹ ị́ pịrị ḅa; àrị á boma tẹ á tọnwa opu asịẹ iyingiḅọ sọ ḅa; á ḅụụ ḅụ ama-da tomi-kụlọkụlọ pịrị ḅarị amadapụ paka-ḅo ḅa.”

¹⁷Anịtẹso Ebira-amụ nwẹnị ọ̀ tọrụkuḅu kẹ ḅịkị kiri-ḅio koro tẹ ḍẹrị, tẹ amịna ḅụụ ḅẹẹ, “Owiḅọ tẹ kụra sọnọa si sịḅị ḅụ ḅọrọtẹ owiḅọ ịn pịkị tụḅọ iyi ọ̀ pịrị ḅẹ? Sera ma tẹ kụra inia si oyi finji sịḅị ḅụ ḅọrọtẹ ẹrẹḅọ ma pịkị fura ḅẹ?”

¹⁸Ebira-amụ nwẹnị Tamụnọ ḅẹẹ, “Yee Isimẹlị ì ḍuu fị ḅọ sọ.”

¹⁹Tamụnọ nwẹnị Ebira-amụ ḅẹẹ, “Ẹn-ẹn. Ị́ ta Sera gbọrụ owiḅọtụḅọ iyi ị́ pịrị ḅa, tẹ ị́ kẹ ọ̀ sịn ḅarị ẹrẹ Ayịzịkị[7]. Àrị ị̀ ọḅọkụ mẹ mịẹ pakama ori na ò furo-ḅẹ-apụ na pịrị ḅa, anie sime gbamaso ọḅọkụ mẹ.”

²⁰“Isimẹlị gbolomaye kụma, í ḍuko ye àrị ị́ naa tẹẹ. Àrị ò boma tẹ mịẹtẹ ori iyi kama lama ḅa. Ori oyi maa ala-owiapụ finji iyi ḅa, anịsakị àrị ọ̀ kẹ gbọrụ gburo-gburotẹ opu sịẹ mịẹ ḅa.

²¹Kụma Ayịzịkị ori ḅe tẹ Sera jen kụra nwẹn pembe sakị ḅụ iyi ị́ pịrị ḅarị ḅọ ḅe ḅụụ mie àrị ị̀ ọḅọkụ mẹ mịẹ-pakama ḅarị ye.”

²²Tamụnọ Ebira-amụ na ẹkwẹn fama tẹso, mie ori ò koroma iwo so yee.

²³Anịtẹso anị gbọrụ ene mẹ ḅụ, Tamụnọ wẹrịtẹ ọ̀ ḅẹẹ tẹ ḅara, Ebira-amụ ori owiḅọtụḅọ Isimẹlị na, ọ̀ warị ḅio ini iyi omoni furo-ḅẹ-apụ, anịanịa ini ori igbigi kẹ fẹẹ apụ mamgba na, ori Ebira-amụ ḅe warị ḅẹ owiapụ ma ogbo-ḅio owiḅọ nwẹn-sịn owiḅọ na ọkị tẹ ịna oju meni ḅụ tarị-ḅụụ siinm.

²⁴Ini Ebira-amụ oju meni ḅụ ọ̀ tarị-ḅụụ sin sakị ọ̀ sịḅị gbọrụ kụra ofori kụra sọnọa si (99) ḅọrọ tẹ.

²⁵Anịsakị ori owiḅọtụḅọ Isimẹlị ḅụụ ḅụ ini ọ̀ tarị-ḅụụ sin sakị ọ̀ sịḅị oyi tẹra akụra finji (13) ḅọrọ tẹ.

²⁶Anị gbọrụ ene mẹ ḅụ Ebira-amụ na, ori owiḅọtụḅọ Isimẹlị na tarị-ḅụụ siinm;

²⁷anịsakị ọ̀ warị ḅẹ owiapụ mamgba warị mẹ ḅio ini iyi apụ-o, igoniḅọ ḅara ḅụ ini igbigi kẹ fẹẹ apụ-o ọ̀ ḅụụ sọ tẹ tarị-ḅụụ siinm.