Read kalabari Suku-saakị 18 Bible Online

Suku-saakị 18 - kalabari bible

Suku-saakị 18

¹Eneḅaka-fịafịa-ogbo, Ebira-amụ Mamụrẹ ḅẹ ịn kẹ oku nwẹn-sịn asịn ma akaka, ori akpụrụ-warị ḅọkọ ḅụ lẹgị-sime wararị ogbo KỊNỊNYANAḄỌ ḅe ḅụụ pakama ò ḍiem.

²Ori ọ̀ tọrụ saakị tẹ ḍikim, tẹ tẹra owiapụ ẹrịm ini ọ̀ tọrọkọ ḅụ sịẹsime wararị. Ori in ẹrị tẹso, ọ̀ nwẹnị akpụrụ-warị mẹ ḅọkọ mẹ ḅụ mangị ini na bịama ḅẹ mu, tẹ ọ̀ sịḅị-tuu mu kiri lama,

³tẹ ḅẹẹ, “Ị̀ nyanaḅọ, í ḍiki-tọrụ ḅụ arị ị́ ḅụụ-ḅẹlẹm ḅẹḅẹ, ị́ fịrịmẹnjịḅọ kọkọrọ ḅọrọma.

⁴Yee à minji kalịye ọkị-ḅo, tẹ kẹ í aḅụọ-suku ma sịkịrị, tẹ opu sịn mẹ suku ọmịnị ịnyọsararị

⁵ogbo à mu fịye kalịye ọkị-ḅo igoni kẹ ọ́ kọn mịẹtẹ ó sin kẹlẹ ịnyọ sụa, tẹ aniemẹ ḅọrọ tẹso, ọmịnị inetẹ ḅọrọ-so ó muarị anga mu ḅa ó ḅo ọmịna fịrịmẹnjịḅọ la tẹ nwẹn ḅẹẹ sakị.” Anie ḅụ ịn nwẹnị pakịrị, “Í ḍuko tẹ ḅara mịẹ.”

⁶Ebira-amụ nwẹnị fọnya akpụrụ-warị mẹ ḅio Sera ḍọkụma-mu, tẹ ḅẹẹ, “Iḅitẹịn fịlawa ḅụ ye-tọnye mẹ ḅẹ tẹrẹị tọn tẹ tẹlẹma tẹ kẹ sarasarama kịkị mịẹ.”

⁷Ebira-amụ nwẹnị mangị nama ogbo mẹ mu, tẹ tim-timtẹ gbọrụ iḅi asambịrịma kala nambulo ọkị tẹ kẹ fịrịmẹnjịḅọ ḅe tẹ fọnya anị tẹlẹmaḅọ ḅe pịrị.

⁸Anịtẹso ò kpootẹ ndo-minji na, lẹgẹlẹgẹtẹ ye na, asambịrịma nambulo mẹ tẹ ọ̀ tẹlẹma tẹ ye mẹ na ọkị tẹ anị kẹ ịna tọrọkọ gbanam, tẹ ịn fịye mẹ fịarị sakị, ori nwẹnị opu sịn mẹ suku ịna akaka ḅụ sịẹsime.

⁹In nwẹnị ò gbela, “Ị́ ta Sera á tọ-anga emi?” Ọ̀ nwẹnị pakịrị, “Árị akpụrụ-warị mẹ ḅio emi.”

¹⁰KỊNỊNYANAḄỌ ḅe nwẹnị ḅẹẹ, “Tụkụma ḅara ḅụ kala fẹngụ sakị ḅụ à pịkịma ị́ ḍọkụma-ḅo ḅa, tẹ ị́ ta Sera gbọrụ owiḅọtụḅọ iyi ḅa. Sera akpụrụ-warị mẹ ḅọkọ, ori ọḅụjụ sime tẹ pokiarị.”

¹¹Mịọkụ Ebira-amụ na, Sera na ini omongi tẹ kpọọ tẹẹ. Sera sọ ḅarị pịkị sakị ẹrị-a.

¹²Mie ḅụ Sera iku ḅio ḍẹrịm, tẹ ḅẹẹm, “Àrị omongi tẹ ì di sọ omongi pụrụkụ tẹrẹmẹ, à pịkị tọrụ-ḅẹlẹ nyana ḅẹ?”

¹³KỊNỊNYANAḄỌ ḅe nwẹnị Ebira-amụ gbela, “Sera tiegotẹ ḍẹrị tẹ ḅẹẹ, ‘À nwẹn omongi tẹrẹmẹ, à pịkị iyi ḅẹ ọkụ emi?’

¹⁴KỊNỊNYANAḄỌ ḅe ḅụụ kụrọ ḅaka ye emi? Kala fẹngụ mẹ ḅio, à tọn sakị mẹ ḅụ, à pịkịma ị́ ḍọkụma-ḅo ḅa, tẹ Sera gbọrụ owiḅọtụḅọ iyi ḅa.”

¹⁵Kụma Sera pikim, tẹ ḅẹẹm, “À ḍẹrị-a” á gbala ḅalafa tẹ ẹrẹsị. Ọ̀ nwẹnị ḅẹẹ, “Ẹn-ẹn, ḍẹrị mẹ kụma ị́ ḍẹrịm.”

¹⁶Anịtẹso owiapụ ma anịjụ saakị tẹ paka-som, tẹ tọrụ kẹ Sọdọmụ da-mu pakịrị ḍikim; tẹ Ebira-amụ ịn ḅọrọma pakamam.

¹⁷KỊNỊNYANAḄỌ ḅe nwẹnị ọ̀ ḅụụ ḅii, “Àrị à mịẹ ḅẹ-yearị ye kẹ Ebira-amụ ḅọịma ḅẹ?

¹⁸Karakara-ḅara-ḅụ, Ebira-amụ gburo-gburotẹ kụrọ nyana gbọrụ opu sịẹ sọ ḅa, tẹ tomikiri ḅẹ asịẹ mamgba Ebira-amụ ḅụụ ḅụ ḅọrọ tẹ boma nyana ḅa.

¹⁹Àrị ọ̀ sẹlẹ-ọkị tẹẹ, mịẹtẹ ọ̀ tọn ori awọmẹ na ọ̀ warị-suku na pịrị ịn ò ḍikimatẹ karakara na kura ḅẹrẹkọn na ḅụ ì etela mẹ mẹnjị ḅẹ ḅara. Ịn ọkọ mịẹm ḅẹḅẹ, à kẹ Ebira-amụ karịma aị mamgba à mịẹ ọ̀ pịrị ḅa.”

²⁰Anịtẹso KỊNỊNYANAḄỌ ḅe nwẹnị ḅẹẹ, “Sọdọmụ na, Gomora mịẹarị si mẹ ḍụḅa ḅụra tẹẹ, anịsakị ini ịn gotẹ kọn-arị owu mẹ ḅeri-tọtọma tẹ ẹrẹsị,

²¹arị ideri-mu ẹrị ḅa ḅeri-tọtọma owu mẹ tẹ ịn kọn tẹ ḅo ị̀ laarị ye mẹ anie ịn gbọrsịḅị mịẹarị ḅara na, ini ọkọ mịẹ-a ḅoto na, à nwẹn nimi ḅa.”

²²Mie ḅụ owiapụ ma anịanga ḅụ pịkị Sọdọmụ da-mum; kụma Ebira-amụ paa KỊNỊNYANAḄỌ ḅe tọrọkọ sịẹsimem.

²³Anịtẹso Ebira-amụ nwẹnị sọma KỊNỊNYANAḄỌ ḅe kpeki tẹ gbela, “Tụkụma ḅara ḅụ ị́ kuraye-mịẹapụ ma kẹ si-sịḅịḅio-sụa atomi ma ḅụụ sụa ḅaa guluguluma ḅẹ?

²⁴Karakara mịẹarị kịnị amesi oyi finji opu ama mẹ ḅio emi ọkụma, ị́ ini ma tẹ karakara mịẹarị kịnị amesi oyi finji ma gbaịma tẹ opu ama mẹ wẹrịso ḅịa tẹ paa ịn ḅaa guluguluma ḅẹ?

²⁵Iḅieri, kuraye-mịẹapụ kẹ si-sịḅịḅio-sụapụ ḅụụ sụa ḅa guluguluma ḅụ ị́ ḅụụ wẹrị ḅelemaa, anie kuraye-mịẹapụ ma mịẹtẹ ịn si-sịḅịḅio-sụapụ ma mẹnjị ḅara mẹnjị! Iḅieri, anie ḅụ ị́ ḅụụ ḅelemaa! Tomi-juḅẹye, ị́yẹrị tomikiri mẹmgba kọn ḅarị ḅẹrẹkọnḅọ ḅe í kuraye mịẹ ḅa.”

²⁶Tẹ KỊNỊNYANAḄỌ ḅe nwẹnị ḅẹẹ, “À Sọdọmụ ḅụ karakara mịẹarị kịnị amesi oyi finji ẹrị-ẹrị, àrị ịna asịḅị gotẹ bebe ye-yọ mẹ wẹrịso ḅa.”

²⁷Ebira-amụ nwẹnị pịkị ḅẹẹ, “Ḍikii, yẹrị gbọrụḅọ-sọ gbọrụḅọ-a kụma fọọn na, lịka na ọkị ị̀ ọgọnọ gbana tẹ, tẹ ẹkwẹn KỊNỊNYANAḄỌ ḅe pịrịarị.

²⁸Ẹbịsịya karakara mịẹarị kịnị amesi oyi finji ma sọnọa apụ kara-a kụma? Kara-a sọnọa apụ ma gotẹ í bebe opu ama mẹ ḅaa guluguluma ḅẹ?” KỊNỊNYANAḄỌ ḅe nwẹnị pakịrị, “Àrị anịjụ karakara mịẹarị kịnị amesi sọnọa apụ finji ḍọkị-ẹrị-ẹrị, àrị anị ḅaa guluguluma ḅịa.”

²⁹Ebira-amụ nwẹnị pịkị sin ẹkwẹn ọ̀ pịrị tẹ ḅẹẹ, “Ẹbịsịya ị́ anịjụ kịnị amesi ḍọkị-ẹrị kụma.” Ọ̀ nwẹnị pakịrị, “Kịnị amesi ma gotẹ à mịẹ ḅịa.”

³⁰Anịtẹso ọ̀ nwẹnị ḅẹẹ, “Paa-sisi ịganị ma, KỊNỊNYANAḄỌ, anịsakị àrị ẹkwẹn ḅa. Ẹbịsịya ị́ anịjụ kịnị asuei ḍọkị-ẹrị kụma?” Ọ̀ nwẹnị pakịrị, “Àrị anịjụ kịnị asuei ḍọkị-ẹrị-ẹrị, à mịẹ ḅịa.”

³¹Ebira-amụ nwẹnị pịkị ḅẹẹ, “KỊNỊNYANAḄỌ, à paa tọrụ-gelegele ẹkwẹn ị́ pịrịarị ye mẹ gotẹ si-wẹrịso ị̀ pịrịị. Ẹbịsịya ị́ anịjụ si-kem ḍọkị-ẹrị kụma.” Ọ̀ nwẹnị pakịrị, “Si-kem ma gotẹ àrị anị ḅaa guluguluma ḅịa.”

³²Anịtẹso Ebiramụ nwẹnị ḅẹẹ, “Paa-sisi, KỊNỊNYANAḄỌ, ịganị ma, yee à pịkị siin ẹkwẹn. Ẹbịsịya ị́ nwẹnị anịjụ oyi apụ ḍọkị-ẹrị kụma?” Ọ̀ nwẹnị pakịrị, “Oyi apụ ma gotẹ àrị anị ḅaa guluguluma ḅịa.”

³³KỊNỊNYANAḄỌ ḅe ẹkwẹn Ebira-amụ pịrị fama tẹso, mie ò so ò muarị anga mu ye. Tẹ Ebira-amụ pịkịma-so ò simearị anga mum.