Read kalabari Suku-saakị 2 Bible Online

Suku-saakị 2 - kalabari bible

Suku-saakị 2

¹Mị-ḅara mie So ma na Kiri mẹ na arị ḅio simearị aị mamgba na tẹmẹ fama ḅara.

²Anị ḅo sọnọma aḍin karama ene mẹ la sakị, Tamụnọ kọrịnama mẹ tẹ ọ̀ kọrị sime aị ma kọrị fama tẹ, tẹ ọ̀ kọrịnama mẹmgba ḅụ ịnyọsaram sọnọma aḍin karama ene mẹ ḅụ.

³Anie ḅụ Tamụnọ sọnọma ḍin karama ene mẹ bomam tẹ anị wẹrị fịafịamam, gbala anị ḅụ Tamụnọ ye tẹmẹ ḅụ ọ̀ kọrịnama tẹ ọ̀ kọrị tẹ aị mamgba ḅụ ịnyọsaram ẹrẹsị.

⁴Mị-ḅara mie So ma na Kiri mẹ na tẹmẹ ḅara. KỊNỊNYANA-TAMỤNỌ ḅe So ma na Kiri mẹ na tẹmẹ sakị,

⁵kiri mẹ ọgọnọ gbọrụ sịn sọ ofori, gbọrụ sịnmgbọlị sọ amụ ḍiḅi tẹ so-paka-a, gbala amụ ori eene kẹ fịrịma-a ẹrẹsị, anịsakị kiri mẹ tẹlẹma tẹ ye ḍiḅi ḅẹ gbọrụḅọ-sọ pịkị ofori ẹrẹsị;

⁶kụma kiri mẹ suku-ḅio mie minji paka-ḅoḅo tẹ kiri mẹ ọgọnọ pisimarị ye.

⁷Anịtẹso KỊNỊNYANA-TAMỤNỌ ḅe nwẹnị kiri mẹ ḅụ lịka ọkị tẹ kẹ tomḅọ sime-ḅara sime mḅudu tẹmẹ tẹ nwẹnị ḍumo-pịrị-ọwụ sara ò nini ḅio suu, tẹ tomḅọ ḅe nwẹnị saakị ḅo ḍumo wararị ḅọ sọm.

⁸Anịtẹso KỊNỊNYANA-TAMỤNỌ ḅe nwẹnị ini Ideni kẹ sịn anga ḅụ gbọrụ ḍụọ ḍiḅi ịrụa-saakịarị-anga mẹ ḅụ, tẹ anịanga mie ori ọ̀ tẹmẹ tomḅọ ḅe kẹ koroma ye.

⁹KỊNỊNYANA-TAMỤNỌ ḅe mịẹtẹ kiri mẹ ḅio kịrị-kịrị iḅitẹ ḍiki-tọrụ ḅụ ḅụụ-ḅẹlẹma asịn na, fị ḅụ iḅi ḅịtẹ asịn na so-pakam; ḍumo pịrịarị sịn na, iḅiye-na-siye-na nimi pịrịarị sịn na sọ ḍụọ mẹ karakara ogboku emi.

¹⁰Ideni ḅụ ḅuu-minji gbọrụ tọrụ sime tẹ seri-seri ḅo ḍụọ mẹ pisimarị, tẹ anị nwẹnị Ideni mẹ ḅọrọ iwo ḅụ ḍiema tẹ ini atọrụ mịẹ.

¹¹Tarị tọrụ mẹ ẹrẹ anie Pisọnị; anị mie mẹnjị bebe Havila ama mẹ ikelema-koro ye, golu simearị anga mẹ.

¹²Karakara golu anịanga ḅẹ kiri mẹ ḅio emi, kụnụ lamarị sẹntị na, ịn kẹ ọnịkịsị sịn-arị yela ḍụḅarị na sọ emi.

¹³Maaịn karama tọrụ mẹ ẹrẹ anie Giyọnị. Anị mie mẹnjị bebe Kusu[2] ama mẹ ikelema-koro ye.

¹⁴Tẹrẹị karama tọrụ mẹ ẹrẹ anie Tigirisi. Anie mie Asiriya ḅụ ịrụa-saakịarị-anga mẹ ḅụ seri ḅọrọarị ye mẹ. Anịsakị ini karama tọrụ mẹ anie Yuferetisi.

¹⁵KỊNỊNYANA-TAMỤNỌ ḅe nwẹnị tomḅọ ḅe ọkị tẹ ọ̀ kẹ Ideni ḅẹ ḍụọ mẹ ḅio koroma ori anị ḅio fịye ḍiḅi tẹ anị ḍikiḍiki ḅe ḅara.

¹⁶Tẹ KỊNỊNYANA-TAMỤNỌ ḅe nwẹnị tọn tomḅọ ḅe pịrị, tẹ ḅẹẹ, “Ị́ inetẹ ị́ ḅụụ-ḅẹlẹ ḅara, ḅẹlẹ ḅara kẹ ḍụọ mẹ ḅio sin goyegoye ḅụ paka-ḅo ye fị ḅa.

¹⁷Kụma iḅiye-na-siye-na nimi pịrịarị sịn mẹ ḅụ paka-ḅo sịnmgbọlụ mẹ fị ma, kẹ gotẹ ọkọ ḅẹẹarị, anị ene mẹ tẹ ị́ anị fị ene mẹ ḅụ ị́ fịị ḅa.”

¹⁸Anịtẹso KỊNỊNYANA-TAMỤNỌ ḅe nwẹnị ḅẹẹ, “Anị ḅụụ gbẹẹ-a mịnẹ owiḅọ ḅe ngẹrị anga; arị ori na gbẹẹya ḅarasụa ḅọ tẹmẹ ọ̀ pịrị ḅa.”

¹⁹Mie ḅụ KỊNỊNYANA-TAMỤNỌ ḅe kiri mẹ ḅụ lịka kpoo tẹ kẹ piri-ḅio-ḅẹ nama goyegoye na, So-tọrụ ḅẹ feni goyegoye na tẹmẹ tẹ ini ọkị-ḅo tomḅọ ḅe pịrị ḍikim ọ̀ kẹ ịn sịn ḅarị ẹrẹ; anịsakị tomḅọ ḅe kẹ tẹmẹ tẹ ḍumo wararị ye sịn ẹrẹ, sịn ẹrẹ anie anị pịkị fị ẹrẹ.

²⁰Mie ḅụ tomḅọ ḅe ẹrẹ kẹ opu anama mamgba na, So-tọrụ ḅẹ afeni ma na piri-ḅio-ḅẹ nama goyegoye na sịnm; kụma arị ḅụ gberie-sọ tomḅọ ḅe na gbẹẹya tẹ ori na anga tẹ ḅarasụa ọ̀ pịrị ḅẹ ḅara sime-a.

²¹Anie ḅụ KỊNỊNYANA-TAMỤNỌ ḅe nwẹnị owiḅọ ḅe mịẹtẹ ori opu mono kọn, tẹ ò monoarị ogbo ori agaga ḅẹ gbọrụ mgbe sin ọkị tẹ nwẹnị meni kẹ anị kiri gbaịn;

²²tẹ anị agaga ḅẹ mgbe mẹ tẹ KỊNỊNYANA-TAMỤNỌ ḅe owiḅọ ḅe ḅụụ ọkị ye mẹ mie ọ̀ kẹ ẹrẹḅọ tẹmẹ ye, tẹ nwẹnị árị ọkị-ḅo ọ̀ pịrị.

²³Anịtẹso owiḅọ ḅe nwẹnị ḅẹẹ, “Anị ḅẹ kunoma, miemẹ anie ị̀ mgbe ma ḅẹ gbọrụ mgbe, pịkị ì oju meni mẹ ḅẹ meni: ịn kẹ á sịn ḅarịye anie ‘Ẹrẹḅọ’ gbala owiḅọ ḅụ ini á pakama-ḅom ẹrẹsị.”

²⁴Anịẹrẹsị owiḅọ ọ̀ ḍa na ò iyingi na koroma-so mu ọ̀ ta na gboloma ḅa, tẹ ịn ḅo gbọrụ oju meni mịẹ ḅa.

²⁵Owiḅọ ḅe na ẹrẹḅọ ma na ini maa apụ mamgba paụ simem, kụma ịn ḅụụ-jịrị-a.