Read kalabari Suku-saakị 21 Bible Online

Suku-saakị 21 - kalabari bible

Suku-saakị 21

¹KỊNỊNYANAḄỌ ḅe ò ḍuko tẹ ḅara ḅụ mu toluma Sera ḍikim, tẹ KỊNỊNYANAḄỌ ḅe ò minini ḅara mịẹ Sera pịrịm.

²Tẹ Sera fura tẹ sakị mẹ tẹ Tamụnọ ḍuko ọ̀ pịrị sakị mẹ ḅụ gbọrụ owiḅọtụḅọ iyi Ebira-amụ pịrịm ori omongi sakị mẹ ḅụ.

³Ebira-amụ nwẹnị ẹrẹ kẹ owiḅọtụḅọ ḅe tẹ Sera iyi ọ̀ pịrị ḅọ ḅe koro Ayịzịkị.

⁴Tẹ Ebira-amụ Tamụnọ wẹrịtẹ tọn ọ̀ pịrị tẹ ḅara ḅụ ori owiḅọtụḅọ Ayịzịkị tarị-ḅụụ siinm nine aḍin ọ̀ sịḅị ḅọrọ tẹso.

⁵Ebira-amụ sịḅị kụra sọnọa si ḅọrọ tẹrẹmẹ Sera ori owiḅọtụḅọ Ayịzịkị iyi ọ̀ pịrịm.

⁶Tẹ Sera nwẹnị ḅẹẹ, “Tamụnọ ị̀ ḅịḅị ḍẹrị pakama tẹ, ḅẹḅọ-ḅẹḅọ tẹ anị naa ḅọ, naa ḅọ ị̀ na sọ ḍẹrị ḅa.”

⁷Á nwẹnị pịkị ḅẹẹ, “Tụḅọ ḅo mimgbe Ebira-amụ ḅẹẹ ḅa mịnẹ Sera ndo kẹ awọ pịrị ḅẹ? Anịsọ ori omongi sakị ḅụ à gbọrụ owiḅọtụḅọ iyi ọ̀ pịrị tẹẹ.”

⁸Tẹ tụḅọ ḅe ḍụḅa paka-ḅom, tẹ ndo-kụmam; tẹ Ebira-amụ anị ene mẹ tẹ Ayịzịkị ndo kụma ene mẹ ḅụ gburo-gburotẹ kopini afịaị sọ kịnị pịrịm.

⁹Kụma Sera nwẹnị Ega Ijiputi-ḅẹ-ḅọ ma owiḅọtụḅọ ḅe tẹ árị iyi Ebira-amụ pịrị ḅọ ḅe árị owiḅọtụḅọ Ayịzịkị na tii-arị ye mẹ ẹrị.

¹⁰Mie ḅụ á nwẹnị Ebira-amụ ḅee, “Ma omoni-ẹrẹḅọ ma na, arị owiḅọtụḅọ na kẹ á ḅụụ sụa dee-pakamaa; kẹ gotẹ ọkọ ḅẹẹarị, ma omoni-ẹrẹḅọ ma owiḅọtụḅọ ḅe ì owiḅọtụḅọ Ayịzịkị ḅụụ sọ tẹ ḍuu fị ḅịa.

¹¹Ye mẹ nwẹnị Ebira-amụ ḅụụ-ḅẹsọọ ori ori owiḅọtụḅọ ẹrẹsị.

¹²Kụma Tamụnọ Ebira-amụ ḅẹẹm, Kalatụḅọ ḅe na, í omoni-ẹrẹḅọ ma na gbolomaye gotẹ anị ị́ ḅụụ-ḅẹsọ ma; Sera kẹ ị́ ḅẹẹ ye, ḅẹẹ ye, arị ị́ ḅẹẹ ḅara, ḅẹẹ ḅara mịẹ, kẹ gotẹ ọkọ ḅẹẹarị, Ayịzịkị ḅụụ ḅụ mie í furo-ḅẹ-apụ ḅọrọ tẹ ẹrẹ fị ḅarị ye.

¹³Anịsakị omoni-ẹrẹḅọ ma owiḅọtụḅọ ḅe ḅụụ sọ à gbọrụ opu sịẹ pakama ḅa, gbala ori anie ị́ ḅụụ ḅụ, paka-ḅo ḅọ ẹrẹsị.”

¹⁴Mie ḅụ ene-ḅaa ḅẹ dede-funfun ḅụ Ebira-amụ saakịm tẹ fịye na, minji ḅin wararị gbọrụ nama oju minji-sụaye na ọkị tẹ kẹ Ega pịrị tẹ kẹ arị apana gbanam, tẹ á tụḅọ na arị na pakamam. Á nwẹnị paka-so tẹ mu Biyasẹba ḅẹ ịkpa mẹ ḅio sime tẹ ikelekele.

¹⁵Nama oju mẹ ḅio sime minji mẹ fa fama tẹso, á nwẹnị tụḅọ ḅe kẹ piri-ḅio gbọrụ kala sịn suku koroma,

¹⁶anịtẹso á nwẹnị ọ̀ ḅụ kuḅu amesi oyi finji pembe ye kẹ mẹnjị ḅele, tẹ lẹgị-sime tẹ owu sịnịsịnị; gbala arị mẹẹ, “Yee à sime tẹ tọrụ kẹ tụḅọ ḅe fịị mẹ ḍiki ma.” Tẹ arị ọ̀ ḅụụ ḅele mu ori na dama tẹ lẹgị ḅara mẹ, tụḅọ ḅe nwẹnị pọkọ saakị tẹ tẹmẹ-la ḅara kẹ owu.

¹⁷Tamụnọ nwẹnị tụḅọ ḅe owu pọkọ naa, tẹ Tamụnọ enjẹlị nwẹnị So-ḅio Ega sịn tẹ á gbela, “Ega tiye gbolomaye ị́ ḅụụ-fụkamarị? Ḅalafa ma, kẹ gotẹ ọkọ ḅẹẹarị, Tamụnọ tụḅọ ḅe simearị anga mẹ ḅụ ọ̀ pọkọ naa tẹ.

¹⁸Saakịị, tụḅọ ḅe saakị dogi tẹ iḅiọkụ ị́ ḅara-ḅio ori ọlọ-sịẹmaa; kẹ gotẹ ọkọ ḅẹẹarị, arị ọ̀ kẹ gburo-gburotẹ opu sịẹ mịẹ ḅa.”

¹⁹Anịtẹso Tamụnọ arị atọrụngbọ finjim, tẹ á nwẹnị minji emi gbọrụ suḅe ẹrị, tẹ á mu minji kẹ nama oju minji-sụaye mẹ ḅio sụa ḅinma, tẹ minji kẹ tụḅọ ḅe pịrị ḅuum.

²⁰Tamụnọ tụḅọ ḅe na simem, tẹ ọ̀ ḍụḅa paka-ḅom; ori ịkpa mẹ ḅio angam, tẹ iboli tẹịn ḍin ḅara-ḅaaḅọ sọm.

²¹Ò Peranị ḅẹ Ịkpa ḅio angam; tẹ ò iyingi mu Ijiputi ḅẹ ama ḅụ gbọrụ ẹrẹḅọ sime ḅo ọ̀ pịrịm.

²²Anị sakị mẹ ḅụ Abimẹlẹkị na ori ọmụ-ogbo mẹ ḅẹ sịḅịdaḅọ Fayịkọlị na nwẹnị mu Ebira-amụ ḅẹẹ, “Ị́ mịẹarị aị mamgba ḅụ Tamụnọ ị́ na emi;

²³ọkọẹrẹsị mịọkụ, mịanga Tamụnọ tọrọkọ ḅụ ye karịị, mịnẹ ị́ oḅori kẹ ị̀ sịn ḅara kẹ yẹrị ḅe, anịanịa ị̀ awọmẹ anịanịa ì furo-ḅẹ-apụ na mịẹ ḅịa, kụma à wẹrịtẹ ị́ kẹ ye-sịn ḅara kẹ ị́ na mịẹ ḅara, ị́ ọkọ kẹ yẹrị ḅe na, ama mẹ tẹ ị́ igoni kẹ bịan anga mẹ na mịẹ ḅa.”

²⁴Tẹ Ebira-amụ nwẹnị ḅẹẹ, “À karị ḅa.”

²⁵Ebira-amụ suḅe mẹ tẹ Abimẹlẹkị afịrịmẹnjịapụ kọrị ọkị ye mẹ gbolomaye ḍuko Abimẹlẹkị sụa tẹso,

²⁶Abimẹlẹkị nwẹnị ḅẹẹ, “Miemẹ mịẹ ḅọ à nimi-a. Ị́ pịkị anị gbolomaye ḍuko ị̀ pịrị-a, tẹ amụ àrị naa nwenii ḅo mịmgba lam.”

²⁷Mie ḅụ Ebira-amụ anana amẹẹ na, pootẹ-anambulo na ọkị tẹ arị kẹ Abimẹlẹkị pịrị, tẹ ini maa owiapụ ma ọḅọkụ fịm.

²⁸Ebira-amụ nwẹnị anana ogbo mẹ ḅụ sọnọma ḅụụ-ḅẹlẹma asambịrịma ịyọrọ anana sẹlẹ sikima,

²⁹tẹ Abimẹlẹkị nwẹnị Ebira-amụ gbela, “Mịna sọnọma ḅụụ-ḅẹlẹma asambịrịma ịyọrọ anana ma tẹ ị́ sẹlẹ sikima aị ma tiye fiearị?”

³⁰Ebira-amụ nwẹnị pakịrị, “Ị́ ị̀ ḅara ḅụ mịna sọnọma ḅụụ-ḅẹlẹma asambịrịma ịyọrọ anana ma daa-ọkị ḅa, mịẹtẹ í ogbo-sịẹḅọ sọ ị̀ pịrị ḅẹ ḅara mịnẹ yẹrị mị suḅe mẹ sokum.”

³¹Anịẹrẹsị ini anịjụ mẹ sịnm, Biyasẹba[10]; gbala anịjụ mie ini maa apụ ma ọḅọkụ fị ye ẹrẹsị.

³²Mie ini ọḅọkụ mẹ fị ḅara Biyasẹba ḅụ. Anịtẹso Abimẹlẹkị na, Fayịkọlị ori ọmụ-ogbo ḅẹ ḅọ na, saakị tẹ so Filisiteniapụ ma ama mẹ mum.

³³Ebira-amụ nwẹnị Biyasẹba — Hiburu ḅịḅị ḅụ ịn kẹ Ẹsịyẹlị sịn ama mẹ — ḅụ opu asịn ḍiḅi, tẹ nwẹnị anịjụ KỊNỊNYANAḄỌ ḅe ẹrẹ sịn, “Sime-gbamaso Tamụnọ.”

³⁴Tẹ Ebira-amụ Filisiteni ḅụ tọnwa aḍin simem.