Read kalabari Suku-saakị 22 Bible Online

Suku-saakị 22 - kalabari bible

Suku-saakị 22

¹Mịna aị ma ḅọrọ fama tẹso, Tamụnọ Ebira-amụ daaḍikim, tẹ ọ̀ ḅẹẹm, “Ebira-amụ!” Ọ̀ nwẹnị pakịrị, “Mie yẹrị mịanga.”

²Ọ̀ nwẹnị ọ̀ ḅẹẹ, “í owiḅọtụḅọ ḅe ọkịị, ị́ kpọkpọ gbọrụ owiḅọtụḅọ Ayịzịkị oriḅe tẹ ị́ ḅẹlẹma ḅọ ḅe, tẹ so Moraya ama mẹ mu tẹ anịjụ ọ̀ kẹ gbọrụ tụndụ tẹ à ḍuko ị́ pịrị ḅarịye ọgọnọ dọkịma-agba mịẹ.”

³Mie ḅụ ene-ḅaa ḅẹ dede-funfun ḅụ, Ebira-amụ nwẹnị saakị tẹ ò yedogi-nama dẹẹ tẹlẹma, tẹ ori afịrịmẹnjịapụ ma ḅẹ maa apụ na, ori owiḅọtụḅọ Ayịzịkị na ọkị; tẹ nwẹnị ọ̀ kẹ dọkịma-agba mẹ mịẹ ḅarị sanga mẹ pẹlẹ, tẹ saakị so anịanga mẹ tẹ Tamụnọ ḍuko ọ̀ pịrị anga mẹ mu

⁴Tẹra aḍin karama ene ḅụ Ebira-amụ nwẹnị tọrụ saakị tẹ ala-jụ ḅụ anị ẹrị.

⁵Anịtẹso Ebira-amụ nwẹnị asawọ ma ḅẹẹ, “Ọ́ yedogi-nama ḅe na mịanga simee; yẹrị na, kalatụḅọ ḅe na mẹnjị mu anịjụ sunsin Tamụnọ pịrị tẹ pịkị ọ̀ ḍọkụma-ḅo ḅa.”

⁶Ebira-amụ nwẹnị kẹ dọkịma-agba mẹ mịẹ ḅẹ sanga mẹ ọkị tẹ anị kẹ Ayịzịkị ori owiḅọtụḅọ ḅe sịḅị gbana; tẹ ori nwẹnị ọ̀ ḅara-ḅio fịnị mẹ na, ogie mẹ na ọlọ. Mie ḅụ ini maa apụ ma gbọrụ ḅụọ kẹ mum.

⁷Ayịzịkị nwẹnị ọ̀ ḍa Ebira-amụ sịn tẹ ḅẹẹ, “Ị̀ ḍa!” Ọ̀ nwẹnị pakịrị, “Mie yẹrị ị̀ tụḅọọ”. Ayịzịkị nwẹnị gbela, “Ḍikii, mie fịnị mẹ na sanga mẹ na, kụma ndẹẹ ị́ kẹ dọkịma-agba mẹ mịẹ ḅẹ asambịrịma anana ḅe?”

⁸Ebira-amụ nwẹnị pakịrị, “Tamụnọ ḅara na gbọrụ asambịrịma anana kẹ wa pịrị tẹ wa kẹ dọkịma-agba mẹ mịẹ ḅa, ị̀ tụḅọọ.” Mie ḅụ ini maa apụ ma gbọrụ ḅụọ kẹ mum.

⁹Ịn ḅo anịanga mẹ tẹ Tamụnọ ḍuko ọ̀ pịrị anga mẹ la tẹso, Ebira-amụ nwẹnị gbọrụ agbamịẹ-anga nama tẹ pakịrị ma kẹ fịnị tọnọ ḅara tẹlẹma anị ọgọnọ, tẹ nwẹnị ọ̀ tụḅọ Ayịzịkị fịna tẹ kẹ edeni mẹ ọgọnọ dẹẹ wararị pakịrị ma ọgọnọ gbana.

¹⁰Anịtẹso Ebira-amụ nwẹnị ori owiḅọtụḅọ ḅe ḅaa ḅẹ ogie mẹ ọkị tẹ ọ̀ ḅara saakị-gelema.

¹¹Kụma KỊNỊNYANAḄỌ ḅe enjẹlị nwẹnị So-ḅio sime tẹ ọ̀ sịn, “Ebira-amụ! Ebira-amụ!” Ọ̀ nwẹnị pakịrị, “Mie yẹrị mịanga.”

¹²Tẹ enjẹlị ḅe nwẹnị ḅẹẹ, “Ị́ ḅara, anịanịa gberie-sọ kẹ tụḅọ ḅe lama ma, kẹ gotẹ ọkọ ḅẹẹarị, mẹkịnẹ à nimi tẹ mịnẹ ị́ Tamụnọ ḍiki-ḅalafarị, tẹ tọrụ-gelegele í owiḅọtụḅọ, ị́ kpọkpọ gbọrụ tụḅọ sọ ọlọ-sịẹma-a ọ̀ kẹ ị̀ pịrị ḅụ.”

¹³Ebira-amụ nwẹnị ọ̀ tọrụ saakị tẹ ḍiki, tẹ nwẹnị gbọrụ ejimina ẹrị, ori ori ịfalị kẹ ịgba-ḍigi sụka wararị. Ebira-amụ nwẹnị mu ejimina ḅe ọkị tẹ kẹ ori owiḅọtụḅọ ḅe kẹ mịẹ ḅẹ dọkịma-agba mẹ mịẹ.

¹⁴Mie ḅụ Ebira-amụ ẹrẹ kẹ anịanga mẹ sịnm, Jihova-Jirẹ — anị fiearị ye “KỊNỊNYANAḄỌ Ḅe Pịrị Ḅa.” Paa mịmgba sọ tomi ḅẹẹarị, “KỊNỊNYANAḄỌ Ḅe tụndụ ọgọnọ ḅụ ọ̀ pịrịarị.”

¹⁵Tẹ KỊNỊNYANAḄỌ ḅe enjẹlị nwẹnị So-ḅio maaịn karama sakị kẹ Ebira-amụ sịn,

¹⁶tẹ ḅẹẹ, “KỊNỊNYANAḄỌ ḅe ḅarana ḅẹẹm, í miemẹ mịẹm, tẹ í owiḅọtụḅọ, ị́ kpọkpọ gbọrụ tụḅọ sọ ọlọ-sịẹma-a ẹrẹsị,

¹⁷piki-pikiye-ofori ḅara ḅụ arị í boma ḅa, à mịẹtẹ í furo-ḅẹ-apụ So-ḅio ḅẹ alolia ma na, onwi ma tẹ tọrụ akaka ḅẹ mịmọ mẹ ọgọnọ simearị aị ma sara ḅara kama ḅa. Anịsakị í furo-ḅẹ-apụ ini na fịya-a apụ ma ogigo mẹ ọkị nyana ḅa,

¹⁸tẹ í furo-ḅẹ-apụ ḅụụ ḅụ mie tomikiri ḅẹ opu asịẹ mamgba boma nyana ḅarịye — gbala ị́ ị̀ ḅịḅịpokim ẹrẹsị.”

¹⁹Mie ḅụ Ebira-amụ pịkịma so ori afịrịmẹnjịapụ ma ḍọkụma-mum, tẹ ịn saakị tẹ gbọrụ ḅụọ kẹ so Biyasẹba mum; tẹ Ebira-amụ Biyasẹba ḅụ koro angam.

²⁰Mịọkụ mịna aị ma ḅọrọ fama tẹso, ịn nwẹnị ḍuko Ebira-amụ pịrị, “Ḍikii, Milika sọ awọ iyi í iyimbere Nahọ pịrị tẹ;

²¹Uzi, anie tarị tụḅọ na ori iyimbere Buzu na, Aramụ ḍa Kẹmụwẹlị na.

²²Kẹsẹdị na, Hazọ na, Pilidasị na, Jidilafụ na, Bẹtụwẹlị na.”

²³Bẹtụwẹlị anie Ribeka ḍa. Milika mịna ninea awọmẹ ma iyi Nahọ, Ebira-amụ iyimbere ḅe pịrịm.

²⁴Anie sikima, ori ịgwa-ẹrẹḅọ, ịn kẹ Rehuma sịn ḅọ ma pịkị Teba na, Gahamu na, Tahasị na, Mahaka na iyim.