Read kalabari Suku-saakị 23 Bible Online

Suku-saakị 23 - kalabari bible

Suku-saakị 23

¹Sera ḍumo ḅo tẹra kụra fa kụra sonioa si oyi finji (127) lam; mịna akụra ma mie Sera kẹ ḍumo-sime ye.

²Tẹ Kiriyati-aba (anie Hẹbụrọnị) ḅụ Sera fịịm, Kenanị ama mẹ ḅio; tẹ Ebira-amụ nwẹnị Sera gotẹ saakị ḍụẹịn ḍuu tẹ á gotẹ tẹmẹ-la owu kọn.

³Ebira-amụ nwẹnị ọ̀ ḍụẹịn mẹ suku-saakị, tẹ Itayịti apụ ma ḅẹẹ,

⁴“Yẹrị anie bịanḅọ tẹ ọmịna ogbo-ḅio simearị igoniḅọ; ọmịna ogbo-ḅio ḅụ ó kiri kẹ ị̀ pịrịị, à kẹ ḍụẹịn ḍiḅi yọ mịẹ, mịẹtẹ arị ị̀ ḍụẹịn mẹ ḍiḅi tẹ ḅarị anị ẹrị ḅịa ḅara.”

⁵Itayịti apụ ma nwẹnị Ebira-amụ pakịrị,

⁶“Ị̀ nyanaḅọ, wa pokii, wamịna ogbo-ḅio ị́yẹrị anie kụrọ nyanatẹ opu amadaḅọ tụḅọ. Wamịna aḍuḅu ma ḅụ ị́ sẹlẹ tẹ iḅitẹịn ye mẹ ọkị tẹ kẹ ị́ ḍụẹịn ḍiḅii, wamịna-aḅụụ gbọrụḅọ-sọ mḅọ ḍuḅu ḅụ í kiki, anịanịa ị́ dasịẹma ḅịa, ị́ ḍụẹịn kẹ ḍiḅi ḅụ.”

⁷Ebira-amụ nwẹnị saakị tẹ sịḅị-tuu Itayịti apụ ma ama mẹ ḅẹ apụ ma pịrị,

⁸tẹ ọ̀ nwẹnị ịn ḅẹẹ, “Ó ḅiim mịnẹ arị ị̀ ḍụẹịn mẹ ḍiḅi tẹ ḅarị anị ẹrị ma ḅẹḅẹ, ọmịnị ì poki tẹ Ẹfụrọnị, Zoha owiḅọtụḅọ ḅe tẹkẹ ị̀ pịrị,

⁹mịẹtẹ ọ̀ Makịpẹla ḅẹ fukuru mẹ tẹ ọ̀ nyana ye mẹ kẹ ị̀ pịrị ḅẹ ḅara; anị ò piri mẹ ḅẹ kunoma ḅụ emi. Yee ori ọmịna tọrọkọ ḅụ anị la na-iḅi igbigi ḅịḅị ḅụ anị kẹ ị̀ pịrị, anị ì nye sọ tẹ à kẹ ḍụẹịn ḍiḅi yọ mịẹ ḅarị ḅara.”

¹⁰Mịọkụ Ẹfụrọnị ḅe sọ Itayịti apụ ma ogbo-ḅio lẹgị-sime wararị; tẹ Ẹfụrọnị, Itayịti ḅọ ḅe nwẹnị Itayịti apụ mamgba tẹ ori opu ama mẹ ḅẹ ogigo-ḅọkọ mẹ ḅụ sọ-mu apụ mamgba naarị ḅara ḅụ Ebira-amụ pakịrị,

¹¹“Ẹn-ẹn, ị̀ nyanaḅọ, pokii, piri mẹ à kẹ ị́ pịrịm, anịsakị fukuru mẹ tẹ anị ḅio simearị ye mẹ sọ à kẹ ị́ pịrịm; ị̀ atomi ma owiapụ-awọmẹ ma sọ emi anga ḅụ arị anị kẹ ị́ pịrịm, kẹ ị́ ḍụẹịn ḍiḅii.”

¹²Anịtẹso Ebira-amụ nwẹnị ama mẹ ḅẹ atomi ma tọrọkọ sịḅị-tuu.

¹³Tẹ ọ̀ nwẹnị ama mẹ ḅẹ atomi ma naarị ḅara ḅụ Ẹfụrọnị ḅẹẹ, “Ì pokii, anị nwẹnị ị́ ḅụụ-ḅẹlẹ ḅẹ kụma, mimgbe à piri mẹ la ye kẹ ị́ pịrị tẹ, ị̀ ḅara anị daa-ọkịị, mịẹtẹ arị anịanga ị̀ ḍụẹịn mẹ ḍiḅi ḅẹ ḅara.”

¹⁴Ịfụrọnị nwẹnị Ebira-amụ pakịrị,

¹⁵“Ị̀ nyanaḅọ, ì pokii, kiri laarị seleḅa ẹndẹ apakịrị ma anie ḅọrọ tiye yẹrị na, ị́ na ogboku? Ị́ ḍụẹịn ḍiḅii.”

¹⁶Ebira-amụ na, Ịfụrọnị na nwẹnị ḅịḅị-kẹ-ogbosọ; tẹ Ebira-amụ ja sịẹ ḅẹ opu tuḅokọn-apụ kẹ anị sakị ḅụ ịna ogboku ikuye tọn-arị ye-tọnye ọgọnọ ḅụ seleḅa ẹndẹ apakịrị ma tẹ Itayịti apụ ma naarị ḅara ḅụ Ịfụrọnị gotẹ seleḅa ḅịḅị mẹ tọn pakama-ḅo Ẹfụrọnị pịrịm.

¹⁷Mie ḅụ Makịpẹla ḅụ simearị Ẹfụrọnị piri mẹ tẹ Mamụrẹ ḅụ ịrụa-saakịarị-anga ḅụ emi ye mẹ, piri mẹ na, fukuru mẹ tẹ anị ḅio emi ye mẹ na, opu asịn mamgba tẹ piri mẹ ḅio emi aị mamgba na, anị bebe ḍụḅa la ḅara mẹ na kẹ sụa saḅa-ḅọrọ,

¹⁸Ebira-amụ nyana ye sọm Itayịti apụ ma sọ simearị anga, inweni-mgba tẹ ori opu ama mẹ ḅẹ ogigo-ḅọkọ mẹ ḅụ sọ-mu apụ ma tọrọkọ ḅụ.

¹⁹Miemẹ ḅọrọ tẹso, Ebira-amụ ọ̀ ta Sera ḍiḅim Makịpẹla piri mẹ ḅio ḅẹ fukuru mẹ ḅio Mamụrẹ ḅụ ịrụa-saakịarị-anga mẹ ḅụ (anie Hẹbụrọnị) Kenanị ama mẹ ḅio.

²⁰Itayịti apụ ma piri mẹ na, fukuru mẹ tẹ anị ḅio emi ye mẹ na kẹ Ebira-amụ nyana ḅara ḅụ saḅama ọ̀ pịrịm kẹ ḍụẹịn ḍiḅi yọ mịẹ gotẹ.