Read kalabari Suku-saakị 25 Bible Online

Suku-saakị 25 - kalabari bible

Suku-saakị 25

¹Ebira-amụ jen ẹrẹḅọ simem, arị ẹrẹ Ketura.

²Arị Ebira-amụ na Zimiranị na Jokisanị na, Mẹdanị na, Midiyanị na, Isibaki na, Suha na iyi ọ̀ pịrịm.

³Jokisanị anie Sẹba na, Dedanị na ḍaḅọ. Dedanị owiapụ-awọmẹ ma anie Asurimụ na, Letusimụ na, Lehumimụ na.

⁴Midiyanị owiapụ-awọmẹ ma anie Ẹfa na, Ifa na, Hanọkụ na, Abida na, Helida na. Mịna apụ mamgba Ketura awọmẹ famam.

⁵Ebira-amụ ọ̀ nyana aị mamgba kẹ Ayịzịkị pịrị famam.

⁶Kụma ori ịgwa-ereme ma owiapụ-awọmẹ ma Ebira-amụ ḍiepịrị-aị kẹ ịn pịrịm, tẹ ọ̀ paa ḍumo wararị sakị ḅụ ori ori owiḅọtụḅọ Ayịzịkị ḅụụ ḅụ ịn ḅelema kẹ ịrụa-saakịarị-anga ḅẹ opu sịẹ mẹ fịrịmam.

⁷Ebira-amụ ḍumo ḅụ sọnọa akụra ofori kụra esenia si (175) ọ̀ sịḅị ḅọrọm.

⁸Ebira-amụ omongi tẹ ọ̀ sịḅị ḅọrọ na-iḅi akụra ḅọrọ tẹrẹmẹ ọ̀ tẹ fịịm.

⁹Ori owiapụ-awọmẹ Ayịzịkị na, Isimẹlị na ò ḍiḅim Makịpẹla ḅẹ Fukuru mẹ ḅio, Mamụrẹ ḅụ ịrụa-saakịarị-anga mẹ da anga Itayịti ḅẹ Zoha owiḅọtụḅọ Ẹfụrọnị piri mẹ ḅụ,

¹⁰piri mẹ tẹ Ebira-amụ Itayịti apụ ma ḅara fẹẹ piri mẹ. Anịjụ mie ini Ebira-amụ na, ọ̀ ta Sera na ḍiḅi ye.

¹¹Ebira-amụ fịị ḅọrọ tẹso, Tamụnọ ori owiḅọtụḅọ Ayịzịkị bomam. Tẹ Ayịzịkị Biya-lahayi-royi[12] ḅụ angam.

¹²Mịna apụ ma anie Isimẹlị, Ebira-amụ owiḅọtụḅọ, oriḅe tẹ Ega, Ijiputi ḅẹ ẹrẹḅọ, Sera fịrịmẹnjịḅọ ma iyi Ebira-amụ pịrị ḅọ ḅe, furo-ḅẹ-apụ ma.

¹³Mịna ẹrẹ ma anie Isimẹlị owiapụ-awọmẹ ma ẹrẹ ma, ịn wẹrịtẹ ini iyi koroma ọrụ ḅụ: Nebahọtị anie Isimẹlị tarị owiḅọtụḅọ na Kidarị na, Adibili na, Mibisamụ na,

¹⁴Misima na, Duma na, Masa na,

¹⁵Ẹdadị na, Tẹma na, Jitụrụ na, Nefisi na, Kẹdẹma na.

¹⁶Mịna apụ ma anie Isimẹlị owiapụ-awọmẹ ma, anịsakị mie ịna kala-ama ma na, kpoo, kpoo ḅụ ịn kobiri, kobiri sime anga ma ḅụ ịn fị ẹrẹ ini oyi maa sịḅịdapụ finji ma ịna afuro ma wẹrịtẹ sime-ḅara ḅụ.

¹⁷Isimẹlị ḍumo ḅụ ọ̀ sịḅị ḅọrọ akụra anie tẹra akụra ofori kụra sọnọma asi (137) tẹrẹmẹ ọ̀ fịịm.

¹⁸Asiriya da-mu etela ḅụ Havila ḅụ ọkị mu Suru la, Ijiputi na dama-dama ḅụ ini angam; ori ori amịnapụ mamgba ḅụ ḅele tẹ mu simem.

¹⁹Mịna apụ ma anie Ayịzịkị Ebira-amụ owiḅọtụḅọ ḅẹ furo-ḅẹ-apụ ma: Ebira-amụ anie Ayịzịkị ḍa.

²⁰Ayịzịkị sịḅị kụra amesi ḅọrọ tẹrẹmẹ mie ò Ribeka, Bẹtụwẹlị ẹrẹḅọtụḅọ pịkị Lebanị ịyịmbara ma na sime yee. (Bẹtụwẹlị ḅe anie Padani-aramụ ḅẹ Aremịya ḅẹ ḅọ)

²¹Tẹ Ayịzịkị KỊNỊNYANAḄỌ ḅe tẹkẹ ọ̀ ta pịrịm, gbala á furo pụụn wararị ẹrẹsị; tẹ KỊNỊNYANAḄỌ ḅe ọ̀ tẹkẹ naa tẹ ò ḅii ye kẹ ọ̀ pịrịm, tẹ ọ̀ ta Ribeka sime-kọnm.

²²Awọmẹ ma á furo ḅio ye-nụnụam, tẹ á nwẹnị ḅẹẹ, “Anị nwẹnị mị-ḅara mẹ kụma à tiegotẹ ḍumo ḅẹ?” Mie ḅụ á mu KỊNỊNYANAḄỌ ḅe ḅịḅị ḅiim.

²³Tẹ KỊNỊNYANAḄỌ ḅe nwẹnị á ḅẹẹ, “Maa opu asịẹ í furo ḅio emi, anịsakị ị́ iyi atomi maa kụlọ pua ḅa, gbọrụḅọ kụrọ osi-ḅọ mẹ nẹngị ḅa, omongiḅọ ḅe fịrịmẹnjị kalatụḅọ ḅe pịrị ḅa.”

²⁴Árị iyi ḅẹ akalụ ma ḅo kara tẹso, árị ẹrịm á furo ḅio maa apụ awọmẹ emi.

²⁵Tarị tụḅọ ḅe awụ ḅịyam, tẹ ori oju mẹmgba mpọrị-mpọrị-mpọrị gbala isuke-isuke-isuke opu kapa sime-ḅara; mie ḅụ ini ẹrẹ kẹ ọ̀ sịnm Ịsọ.

²⁶Anịtẹrẹmẹ ori iyimbere paka-ḅom tẹ Ịsọ ḅụọ-tongu ọlọ-sịẹma wararị; mie ḅụ ini ẹrẹ kẹ ọ̀ sịnm Jekọbụ. Ayịzịkị ini iyi sakị ọ̀ sịḅị kụra atesi ḅọrọ tẹ.

²⁷Owiapụ-awọmẹ ma ḍụḅa paka-ḅo sakị, Ịsọ anie nama tẹịn aka nimi lamatẹ ḅọ, piri-kọn-fịḅọ, anịsakị Jekọbụ anie akpụrụ-warị ḅio yaụ-simearị ḅọ.

²⁸Ayịzịkị Ịsọ ḅelemam, ori ọ̀ ḅaa-ḅaa ḅoarị anama ma ḅụ nama pẹịarị ẹrẹsị; kụma Ribeka Jekọbụ ḅẹlẹmam.

²⁹Sakị ḅẹ gbọrụ sakị ḅụ, Jekọbụ ọḍụ sọarị ogbo Ịsọ piri-ḅio paka-ḅom, tẹ ḅuru ọ̀ tarị ḅaa tẹ,

³⁰tẹ Ịsọ nwẹnị Jekọbụ ḅẹẹ, “Anị awụ ḅịyarị pikiritẹ fịye mẹ ḅụ kẹlẹ kẹ ị̀ pịrị à fị, gbala ḅuru ị̀ tarị ḅaa tẹ ẹrẹsị!” (Anịẹrẹsị ini ẹrẹ kẹ ọ̀ sịnm Idọmụ[13].)

³¹Jekọbụ nwẹnị pakịrị, “Tarị í omongi-kiri mẹ kẹ ị̀ dẹrịị.”

³²Ịsọ nwẹnị pakịrị, “À fịị ḅẹ-yearị, omongi kiri mẹ ḅọrọ tiye mịẹ ị̀ pịrị ḅẹ?”

³³Jekọbụ nwẹnị pakịrị, “Tarị mịmgba omongi kiri mẹ karị ị̀ pịrịị.” Mie ḅụ Ịsọ omongi kiri mẹ karị Jekọbụ pịrịm, tẹ ori omongi kiri mẹ kẹ Jekọbụ dẹrịm.

³⁴Anịtẹso Jekọbụ fịturu na, pikiritẹ fịye mẹ ḅụ kẹlẹ kẹ ọ̀ pịrị tẹ ọ̀ kẹ ḅalịm, tẹ minji ḅuu tẹ Saakị tẹ so ò muarị anga mum. Mị-ḅara mie Ịsọ kẹ ori omongi kiri mẹ ḍiki-sima ḅara.