Read kalabari Suku-saakị 26 Bible Online

Suku-saakị 26 - kalabari bible

Suku-saakị 26

¹Ịnụ mẹ tẹ Ebira-amụ ene ma ḅụ paka ḅọrọ tẹ ye mẹ sikima, mị sakị mẹ ḅụ ịnụ pakam, tẹ Ayịzịkị so Gira mu tẹ Abimẹlẹkị, Filisiteniapụ ma amadaḅọ ḅe ḍọkụma-mum.

²KỊNỊNYANAḄỌ ḅe nwẹnị ḅụụ pakama ò ḍie tẹ ḅẹẹ, “Ideri Ijiputi mu ma, ama mẹ tẹ à ḍuko ị́ pịrị ḅarị ama mẹ ḅio angaa,

³Igoni mẹ kẹ mị ama mẹ bịan, anịsakị arị ị́ na sime ḅa, tẹ í boma ḅa, kẹ gotẹ ọkọ ḅẹẹarị, mịna ama mamgba à kẹ ị́yẹrị na, í furo-ḅẹ-apụ na pịrị ḅa, anịsakị à ye karị ḅara kẹ minini ị́ ḍa Ebira-amụ pịrị ye mẹ à nwẹn mịẹ ḅa.

⁴À mịẹtẹ í furo-ḅẹ-apụ kama tẹ So-tọrụ ḅẹ alolia ma ḅin ḅara ḅin ḅa; tẹ mịna ama mamgba kẹ í furo-ḅẹ-apụ pịrị ḅa; anịsakị í furo-ḅẹ-apụ ḅụụ ḅụ tomikiri mẹ ḅẹ opu asịẹ mamgba ḅọrọ tẹ boma nyana ḅa,

⁵gbala Ebira-amụ ị̀ ḅịḅị poki tẹ à tọn koroma aị ma na, à ḅẹẹm mịẹ nwẹn ḅẹẹ aị ma na mịẹ, tẹ pịkị à sụa wararị kẹẹtẹ oloko na, kẹẹ-a aị na kokom ẹrẹsị.”

⁶Mie ḅụ Ayịzịkị Gira ḅụ koro angam.

⁷Ama mẹ ḅẹ owiapụ ma ọ̀ ta gbolomaye kẹ ò gbela tẹso, ọ̀ nwẹnị ḅẹẹ, “Árị anie ị̀ ịyịmbara” “Árị anie ị̀ ta,” ḅẹẹ mẹ ọ̀ ḅalafamam, ò kuromarị ama mẹ ḅẹ owiapụ ma Ribeka sịḅị gotẹ ḅofa ọ̀ ḅaa ḅarị ḅoto; gbala ḍiki-tọrụ ḅụ árị iḅi lama wararị ẹrẹsị.

⁸Ayịzịkị anịanga kẹlẹ sime tẹso, Abimẹlẹkị, Filisiteniapụ ma amadaḅọ ḅe nwẹnị ikiḅa-ḅọkọ ḅụ toluma ḍiki tẹ Ayịzịkị ọ̀ ta Ribeka na ḅụụ-loloma-ti kọn-arị ye ẹrị.

⁹Mie ḅụ Abimẹlẹkị nwẹnị Ayịzịkị sịn, tẹ ḅẹẹ, “Ḍikii, árị ma anie ị́ ta; ndẹẹ í inetẹ ḅẹẹ ḅẹ ḅara, árị anie ị̀ ịyịmbara?” Ayịzịkị nwẹnị ọ̀ pakịrị, “Gbala à kuromam, à ḅofa á sịḅị gotẹ fịị ḅarị ḅoto.”

¹⁰Abimẹlẹkị nwẹnị ḅẹẹ, “Miemẹ tẹ ị́ kẹ wa mịẹ ye mẹ ḅọrọ tiye? Mimgbe tomi ma ḅẹ gbọrụḅọ sarasara ḅara ḅụ ị́ ta na mono gboloma tẹ, tẹ ị́ ḅẹrẹ-ḅarasii dogi ḅo wa pịrị tẹ.”

¹¹Mie ḅụ Abimẹlẹkị tomi mamgba ḅeri nụnụm, tẹ ḅẹẹm, “Ḅẹḅọ-ḅẹḅọ, tẹ ḅara kẹ ḅị owiḅọ ḅe, anịanịa ọ̀ ta lama ḅọ, lama ḅọ ini mḅọ ḅaa ḅa.”

¹²Tẹ Ayịzịkị anị ama mẹ ḅụ sime tẹ fịaị ḍiḅim tẹ anị gbọrụ kụra mẹ ḅụ ò ḍiḅi aị ma ḅẹ kiri sọnọa si nwẹn sokum. KỊNỊNYANAḄỌ ḅe ò bomam.

¹³Owiḅọ ḅe nwẹnị ḅo ngọ kọn, tẹ sọye mie tọrọkọ, tọrọkọ mu nwenii ò ḅo ngọ-kọn lama ḅọ sọm.

¹⁴Ọ̀ tọnwa oḅori na anana ogbo-ogbo na, opu anama ogbo-ogbo na, tọnwa afịrịmẹnjịapụ nyana tẹ opu warị-kpo nyanam, anị mịẹtẹ Filisiteniapụ ma afana kẹ ọ̀ ḍọkịm.

¹⁵Mịọkụ ọ̀ ḍa Ebira-amụ ḍumo wararị ene ma ḅụ suḅe tẹ ori afịrịmẹnjịapụ soku asuḅe mamgba Filisiteniapụ ma arị kiki tẹ lịka kẹ arị pụnma famam.

¹⁶Anịtẹso Abimẹlẹkị nwẹnị Ayịzịkị ḅẹẹ, “Wamịna ḅụ soo; kẹ gotẹ ọkọ ḅẹẹarị, ị́ ḅẹlẹma kụrọ nyana wa nẹngị tẹ.”

¹⁷Mie ḅụ Ayịzịkị anịanga som, tẹ mu Gira tụndụ ogboku ḅụ akpụrụ-warị pike tẹ, anịanga angam.

¹⁸Ayịzịkị nwẹnị pịkị sin minji ḍuu asuḅe ma tẹ ọ̀ ḍa Ebira-amụ ḍumo wararị ene ma ḅụ ịn soku aị ma soku; gbala Filisiteniapụ ma Ebira-amụ fịị tẹso, arị ḍuu kikim; tẹ ọ̀ nwẹnị ẹrẹ mẹ tẹ ḍaḅọ ḅe kẹ arị koro ẹrẹ ma kẹ arị sịn.

¹⁹Kụma Ayịzịkị afịrịmẹnjịapụ tụndụ ogboku mẹ ḅụ suḅe mẹ soku tẹ anịjụ minji mẹnjịarị ḅuu minji suḅe ḍọkị-ẹrị tẹso,

²⁰Gira ḅẹ nama ogbo-ogbo ḍikiḍikiarị apụ ma nwẹnị Ayịzịkị nama ḍikiḍikiapụ na kamụ-sọ, tẹ ḅẹẹm, “Minji mẹ wamịna nye.” Mie ḅụ ọ̀ nwẹnị ẹrẹ kẹ suḅe mẹ kuro Ẹsẹkị[14], gbala ini ori na ịgbanịyam ẹrẹsị.

²¹Anịtẹso ịn nwẹnị pịkị jen suḅe soku, tẹ ịn pịkị aniemẹ sọ gotẹ kamụ-sọm; mie ḅụ ori ẹrẹ kẹ anị kurom, Sitina[15]

²²Ọ̀ nwẹnị anịjụ ḅụ mẹnjị ḅele tẹ jen suḅe soku, tẹ ịn ḅarị aniemẹ gotẹ kamụ-sọ-a. Mie ḅụ ori ẹrẹ kẹ anị kurom, Rehoboti[16]. Ọ̀ nwẹnị ḅẹẹ, “Mịọkụ KỊNỊNYANAḄỌ ḅe kiri pakama wa pịrị tẹẹ, anịsakị wa ama mẹ ḅio sime tẹ lolo-kama ḅa.”

²³Anịjụ ḅụ ori iwo so Biyasẹba mum.

²⁴Anị gbọrụ ḍin mẹ ḅụ KỊNỊNYANAḄỌ ḅe ḅụụ pakama ò ḍie tẹ ḅẹẹm, “Yẹrị anie ị́ ḍa Ebira-amụ Tamụnọ ḅee. Ḅalafa ma; kẹ gotẹ ọkọ ḅẹẹarị, ị̀ fịrịmẹnjịḅọ Ebira-amụ gotẹ arị ị́ na emi, tẹ í boma ḅa, tẹ mịẹtẹ í furo-ḅẹ-apụ lolo-kama ḅa.”

²⁵Anie ḅụ ori anịanga gbọrụ agbamịẹ-anga nama tẹ sunsin KỊNỊNYANAḄỌ ḅe pịrịm, tẹ anịanga ori akpụrụ-warị pikem. Tẹ anịjụ ḅụ Ayịzịkị afịrịmẹnjịapụ gbọrụ suḅe sokum.

²⁶Anịtẹso Abimẹlẹkị nwẹnị Ahuzatị, datụkụma ẹkwẹn kọn ọ̀ pịrịarị ḅọ ḅe na, Fịkọlị, ori ọmụ-ogbo ḅẹ sịḅịdaḅọ ḅe na kẹ ọ̀ ḅụụ sụa tẹ Gira ḅụ sime tẹ Ayịzịkị dama-mu.

²⁷Ayịzịkị nwẹnị ịn gbela, “Ó tiegotẹ ị̀ dama-ḅo, ọmịnị sọ ẹrịarị mịnẹ ọmịnị ị̀ ḍiki-ḅioḅuarị tẹ ọmịna ḅụ ị̀ fịrịma ḅelema tẹ?”

²⁸Ịn nwẹnị pakịrị, “Wa giregire ḅara kẹ ẹrịm mịnẹ KỊNỊNYANAḄỌ ḅe ị́ na emi; anie ḅụ wa ḅẹẹm, yee ị́yẹrị na, wamịnị na ogboku wa ye karị koroma, tẹ yee wa ị́ na ọḅọkụ fị,

²⁹mịnẹ iḅiye sikima, wa ḅara kẹ ị́ lama-a, pịkị gberie-sọ kẹ ị́ lama-a tẹ dein ḅụ ị́ fịrịma ḅelema ḅara mẹ ị́yẹrị sọ ye kẹ kịnị lama ye kẹ wa mịẹ ḅịa.”

³⁰Mie ḅụ ò kopini afịaị sọ ịn pịrịm, tẹ ịn fịm, pịkị ḅuum.

³¹Dede-ḅio ịn nwẹnị ḅaaso kẹ saakị tẹ ye mẹ karị jụmọ-jụmọ pịrị; tẹ Ayịzịkị ịn ḅọrọma pakama tẹ ini ịna etela dam, anịsakị dein ḅụ ini ò koroma-som.

³²Anị gbọrụ ene mẹ ḅụ Ayịzịkị afịrịmẹnjịapụ ḅo suḅe mẹ tẹ ịn soku ye mẹ gbolomaye ḍuko ọ̀ pịrịm tẹ ọ̀ ḅẹẹm, “Wa minji ẹrị tẹẹ.”

³³Ọ̀ nwẹnị anị sịn Sẹba[17]. Anịẹrẹsị ọkị-ḅo mịmgba la opu ama mẹ ẹrẹ, Biyasẹba.

³⁴Ịsọ sịḅị kụra amesi ḅọrọ tẹso, ọ̀ nwẹnị Itayịti ḅẹ Beheri ẹrẹḅọtụḅọ Juditị na sime, pịkị Itayịti ḅẹ Ẹlọnị ẹrẹḅọtụḅọ Basẹmatị na sime.

³⁵Tẹ ịn nwẹnị mịẹtẹ ḍumo akụ Ayịzịkị na, Ribeka na pịrị.