Read kalabari Suku-saakị 28 Bible Online

Suku-saakị 28 - kalabari bible

Suku-saakị 28

¹Anịtẹso Ayịzịkị nwẹnị Jekọbụ sịn tẹ ò boma, tẹ tọn ọ̀ pịrị, “Kenanị ḅẹ ereme ma ḅẹ gbọrụ ẹrẹḅọ sọ sime ma.

²Saakịị, so Padani-aramụ (anie Mẹsopotemịya) ḅụ Bẹtụwẹlị í iyingi ḍa warị muu; tẹ anịjụ Lebanị í iyingi iyimbere ḅe eremịna-awọmẹ ma ḅụ taḅọ ḅara kẹ gbọrụḅọ ọkị simee.

³Kụrọmamgba Nyana Tamụnọ ḅe í boma tẹ mịẹtẹ ị́ awọ iyi, tẹ ị́ mịẹtẹ ị́ kama, mịẹtẹ í ḅo tọnwa ḅẹ atomi-kụlọkụlọ ogbo sọ ḅẹ ḅara.

⁴Yee ọ̀ kẹ Ebira-amụ pịrị boma mẹ kẹ ị́yẹrị na, í furo-ḅẹ-apụ na sọ kẹ ị́ ḅụụ sụa pịrị, mịẹtẹ ama mẹ tẹ Tamụnọ kẹ Ebira-amụ pịrị tẹ ọmịnị igoni ḅara kẹ angarị ama mẹ ọ́ nwẹn ọkị nyana ḅẹ ḅara.”

⁵Mị-ḅara mie Ayịzịkị kẹ Jekọbụ fịrịma pakama ḅara; tẹ ò so Padani-aramụ ḅụ Aremịya ḅẹ Bẹtụwẹlị owiḅọtụḅọ Lebanị, Jekọbụ na Ịsọ na iyingiḅọ Ribeka iyimbere ḅe ḍọkụma-mum.

⁶Mịọkụ Ịsọ ẹrị tẹ mịnẹ Ayịzịkị Jekọbụ boma tẹ, tẹ ọ̀ fịrịma pakama Padani-aramụ mu tẹ ori anịanga gbọrụ ẹrẹḅọ ọkị sime ḅẹ so tẹ, anịsakị ọ̀ wẹrịtẹ ò boma ḅara ọ̀ tọn ọ̀ pịrịm, “Kenanị ḅẹ ereme ma ḅụụ gbọrụ ẹrẹḅọ sọ sime ma,”

⁷anie ḅụ Jekọbụ ọ̀ ḍa na, ò iyingi na ḅịḅị poki tẹ so Padani-aramụ mu tẹẹ.

⁸Mie ḅụ Ịsọ ẹrị tẹso, mịnẹ ọ̀ ḍa Ayịzịkị Kenanị ḅẹ ereme ḅẹlẹma-a,

⁹Ịsọ nwẹnị so Isimẹlị ḍọkụma-mu, tẹ ọ̀ nyana ereme ma sikima Ebira-amụ owiḅọtụḅọ Isimẹlị ẹrẹḅọtụḅọ Mehalalị, Nebahọtị ịyịmbara ma ọkị sime.

¹⁰Jekọbụ Biyasẹba ḅụ so tẹ tọrụ kẹ Eranị da-mum.

¹¹Ọ̀ nwẹnị ḅo gbọrụ anga la tẹ anị ḍin mẹ kẹ anịanga sime, gbala ịrụa mẹ tuuideri tẹ ẹrẹsị. Ọ̀ nwẹnị ye-yọ mẹ ḅụ simearị aḍụḅarị ma ḅẹ gbọrụ ye ọkị tẹ kẹ ọ̀ sịḅị saakị tẹ anịjụ ḅọlọlọ tẹ mono.

¹²Ọ̀ nwẹnị ḍawọ mịnẹ kiri mẹ ọgọnọ gbọrụ ẹbẹtọnjịye emi tẹ anị ḅẹ sịḅị mu so la wararị; tẹ ẹrịm Tamụnọ enjẹlị apụ anị ọgọnọ kpọlị mẹnjị iwo-na-ideri-naarị.

¹³KỊNỊNYANAḄỌ ḅe anị ọgọnọ-jụ akaka ḅụ sịẹsime tẹ nwẹnị ḅẹẹ, “Yẹrị anie KỊNỊNYANAḄỌ ḅee, ị́ aḍapụ Ebira-amụ na Ayịzịkị na sịḅị-tuu pịrị Tamụnọ ḅe; kiri mẹ tẹ ị́ ḅọlọlọ simearị anga mẹ à kẹ ị́yẹrị na, ị́ furo-ḅẹ-apụ na pịrị ḅa;

¹⁴anịsakị í furo-ḅẹ-apụ kiri-ḅio ḅẹ fọọn mẹ ḅin ḅara ḅin ḅa, tẹ í wasama mu ịrụa-ideriarị-anga mẹ na, ịrụa-saakịarị-anga mẹ na, ọgọnọ-jụ mẹ na, suku-jụ mẹ na ḅụ sara ḅa; anịsakị ị́ ḅụụ ḅụ mie tomikiri mẹ ḅẹ afuro mamgba boma nyana ḅarị ye.

¹⁵Ḍikii, arị ị́ na emii, tẹ í mu anga, mu anga ḅụ ị́ wẹrị kpaịnma ḅa, tẹ pịkị ị́ kẹ mị ama mẹ ḅo ḅa; kẹ gotẹ ọkọ ḅẹẹarị, arị ị́ koroma-so ḅịa nwenii arị aniemẹ tẹ à ḍuko ị́ pịrị tẹ ye mẹ mịẹ ḅa.”

¹⁶Anịtẹso Jekọbụ nwẹnị ọ̀ kọn-arị mono mẹ ḅụ naa-saakị tẹ ḅẹẹ, “Tụkụma ḅara ḅụ KỊNỊNYANAḄỌ ḅe mịanga ḅụ ori emi, tẹ arị anị nimi-a.”

¹⁷Tẹ ọ̀ nwẹnị ḅalafa tẹ ḅẹẹ, “Mịanga mẹ tọ-ḅara na gbasị ḅara kẹ ḅalafama! Mịanga mẹ Tamụnọ warị mẹ sikima jen anga; anịsakị miemẹ anie so ogigo-ḅọkọ mẹ.”

¹⁸Mie ḅụ Jekọbụ dede-funfun ḅụ saakịm, tẹ ḍụḅarị mẹ tẹ ọ̀ kẹ ọ̀ sịḅị saakị ye mẹ ọkị ogbo da ḅeriye ḅara pikem, tẹ pulo kẹ anị sịḅị saram.

¹⁹Ọ̀ nwẹnị ẹrẹ kẹ anịjụ mẹ sịn Bẹtẹlị[19]; kụma tarị-pịrịpịrị-ḅụ ịn kẹ anịjụ sime opu ama mẹ sịn ẹrẹ Luzu.

²⁰Anịtẹso Jekọbụ nwẹnị ịlọ minini, tẹ ḅẹẹm, “Tamụnọ nwẹnị ị̀ na sime, tẹ mị etela mẹ tẹ à mẹnjịarị ye mẹ ḅụ ị̀ wẹrị kpaịnma, tẹ fịye kẹ ị̀ pịrị fị, pịkị kapa kẹ ị̀ pịrị sụa,

²¹tẹ mịẹtẹ dein ḅụ à pịkị pịkịma ị̀ ḍa warị ḅom ḅẹḅẹ, anịrẹ KỊNỊNYANAḄỌ ḅe ị̀ Tamụnọ sọ ḅa;

²²anịsakị mị ḍụḅarị mẹ tẹ à saakị ogbo da ḅeriye ḅara sịẹma ye mẹ, Tamụnọ warị sọ ḅa, tẹ ḅẹẹye-ḅẹẹye tẹ ị́ kẹ ị̀ pịrị ḅarị aị mamgba à kẹ oyia akiri ḍiya ḅa tẹ gbọrụ kiri kẹ ị́ pịrị ḅa.”