Read kalabari Suku-saakị 3 Bible Online

Suku-saakị 3 - kalabari bible

Suku-saakị 3

¹Mịọkụ piri-ḅio-ḅẹ nama tẹ KỊNỊNYANA-TAMỤNỌ ḅe tẹmẹ-aị ma ḅụ oronwi ḅe ḅụ aka na epele na tẹịnm. Ọ̀ nwẹnị ẹrẹḅọ ma gbela, “Karakara-ḅara-ḅụ, Tamụnọ ori ọ́ ḅẹẹ mịnẹ ḍụọ mẹ ḅio ḅẹ asịn ma ḅẹ gberie ḅụ sọ ó ye fị ma?”

²Ẹrẹḅọ ma nwẹnị oronwi ḅe pakịrị, “Wa inetẹ ḍụọ mẹ ḅio ḅẹ asịn ma ḅẹ sịnmgbọlụ ma fị ḅa,

³kụma Tamụnọ ḅẹẹm, ‘sịn mẹ tẹ ḍụọ mẹ karakara ogboku simearị ye mẹ ḅẹ sịnmgbọlụ mẹ ọ́ fị ma, ḅara sọ ọ́ kẹ anị lama ma, anieofori ó ḅofa fịị.’ ”

⁴Kụma oronwi ḅe nwẹnị á ḅẹẹ, “Karakaraye, ọ́ fịị ḅịa.

⁵Kẹ gotẹ ọkọ ḅẹẹarị, Tamụnọ nimi wararị mịnẹ ọmịnị anị fị gbọrụ sakị ọmịna atọrụngbọ finji ḅa tẹ ọ́ Tamụnọ kịka ḅa, iḅiye-na-siye-na nimi ḅụ.”

⁶Mie ḅụ ẹrẹḅọ ma sịn mẹ fị ḅụ ḅụụ-ḅẹlẹma wararị ḅara na, ḍiki-tọrụ ḅụ anị pọkọsọlịma la ḅara na ẹrị, anịsakị mịẹtẹ tomḅọ ye-nimi ḅụ mḅọ anị ḅii ḅa, anịtẹso á nwẹnị anị ḅẹ sịnmgbọlụ ọkị fị, tẹ pịkị anị ḅụ kẹlẹ kẹ á di sọ pịrị, tẹ ọ̀ nwẹnị fị.

⁷Anịtẹso ini maa apụ mamgba atọrụngbọ nwẹnị finji fama, tẹ ịn nwẹnị lekirim mịnẹ ịn paụ wararị, tẹ ịn nwẹnị ịla ịnyịnya ọkị tẹ gbin gboloma tẹ kẹ ịna aḅụụ kikima.

⁸Anị ḅẹ ḅoḅiri-so, ịn nwẹnị KỊNỊNYANA-TAMỤNỌ ḅẹ ḍụọ mẹ ḅio mẹnjịarị ye ḅẹ ọwụ naa, tẹ ama-na-ere-na ma nwẹnị ḍụọ mẹ ḅio ḅẹ asịn ma ogboku ịna aḅụụ ḅọị KỊNỊNYANA-TAMỤNỌ ḅe tọrọkọ.

⁹Kụma KỊNỊNYANA-TAMỤNỌ ḅe nwẹnị owiḅọ ḅe sịn, tẹ ọ̀ gbela, “Ị́ tọ-anga emi?”

¹⁰Tẹ ọ̀ nwẹnị pakịrị, “Àrị ị́ ọwụ naam ḍụọ mẹ ḅio, tẹ à nwẹnị ḅalafa tẹ ị̀ ḅụụ ḅọị, gbala à paụ wararị ẹrẹsị.”

¹¹Tamụnọ nwẹnị gbela, “Tụḅọ ḍuko ị́ pịrị mịnẹ ị́ paụ wararị? À tọn ị́ pịrịm fị ma nwẹn ḅẹẹ sịn mẹ ḅẹ sịnmgbọlụ ị́ fị tẹ?”

¹²Owiḅọ ḅe nwẹnị pakịrị, “Ẹrẹḅọ ma tẹ ị́ kẹ ị̀ pịrịm ị̀ na simee nwẹn ḅẹẹ ḅọ ma sịn mẹ ḅẹ sịnmgbọlụ kẹ ị̀ pịrịm, tẹ à fịm.”

¹³Anịtẹso KỊNỊNYANA-TAMỤNỌ ḅe nwẹnị ẹrẹḅọ ma gbela, “Miemẹ tẹ ị́ nwẹn mịẹ ye mẹ ḅọrọ tiye?” Á nwẹnị pakịrị, “Oronwi ḅe oḅori kẹ ị̀ sịn tẹ àrị anị fịm.”

¹⁴Anịtẹso KỊNỊNYANA-TAMỤNỌ ḅe nwẹnị oronwi ḅe ḅẹẹ, “Í miemẹ mịẹ tẹ ẹrẹsị opu anama mamgba na, piri-ḅio-ḅẹ anama mamgba na ḅụ ị́yẹrị wori tẹ ḅọ sọ tẹẹ; furo-furo mie ị́ kẹ ikiri ḅarịye, anịsakị fọọn mie ị́ fị ḅarịye í ḍumo-ene mamgba ḅụ.

¹⁵À fịya-a kẹ ị́yẹrị na, ẹrẹḅọ ma na ogboku koroma ḅa, pịkị í furo-ḅẹ-ḅọ na, á furo-ḅẹ-ḅọ na; á furo-ḅẹ-ḅọ ị́ sịḅị fomu kọsịma ḅa, anịsakị ị́yẹrị mḅọ ḅụọ-tongu gbọn ḅa.”

¹⁶Tamụnọ nwẹnị ẹrẹḅọ ma ḅẹẹ, “À mịẹtẹ ị́ ḅụụ-fụka gburo-gburo ḅa fura ḅụ; akụ ḅụ ị́ awọ iyi ḅa, anịsọ ị́ í di ẹrị gotẹ ḅio-sẹsẹ nyana ḅa anịsakị ọ̀ ḅẹrẹtọn ị́ pịrị ḅa.”

¹⁷Anịsakị ori owiḅọ ḅe ḅẹẹm, “Ị́ ị́ ta ma ḅịḅị poki tẹ sịn mẹ tẹ à tọn ị́ pịrịm fị ma nwẹn ḅẹẹ sịn mẹ ḅẹ ye fịm ẹrẹsị, í gotẹ kiri mẹ wori tẹẹ; í ḍumo-ene mamgba ḅụ ị́ lịlị tẹrẹmẹ ị́ anị ḅụ paka-ḅo ye fị ḅa.

¹⁸Nangị na kịnị temiarị osuka na mie anị pakama pakama-ḅo ị́ pịrị ḅarị ye; anịsakị piri-ḅio-ḅẹ asịn mie ị́ fị ḅarị ye.

¹⁹Ị́ kụrọma kọrịnama kọrị tẹ ị́ tọrụkuḅu imo sụa tẹrẹmẹ í fịye nyana tẹ fị ḅa, nwenii ị́ pịkịma kiri mẹ mu ḅa, gbala anị ḅụ mie í ḅo ye; ị́yẹrị anie fọọn, anịsakị fọọn mie ị́ pịkị pịkịma mu ḅarị ye.”

²⁰Adamụ nwẹnị ọ̀ ta ma sịn Ivu, gbala arị anie tomi mamgba iyingiḅọ ẹrẹsị.

²¹Tẹ KỊNỊNYANA-TAMỤNỌ ḅe nama oju ḅẹ apara opu akapa gbin tẹ kẹ Adamụ na ọ̀ ta Ivu na pịrị tẹ kẹ ịn sụam.

²²Anịtẹso KỊNỊNYANA-TAMỤNỌ ḅe nwẹnị ḅẹẹ, “Ḍikii, mịna tomi ma ḅo wamịna aḅụụ ḅẹ gbọrụḅọ kịka tẹẹ, iḅiye-na-siye-na nimi ḅụ. Wa ḍụkụ tẹ ịn ḅara-sụnma mu ḍumo pịrị sịn mẹ ḅẹ sịnmgbọlụ ọkị fị tẹ ḍumo gbamaso ḅịa.”

²³Anịẹrẹsị KỊNỊNYANA-TAMỤNỌ ḅe Ideni ḅẹ ḍụọ mẹ ḅio in dee pakamam, in mu kiri mẹ tẹ ini ịn tẹmẹ kiri mẹ tẹlẹma, tẹlẹma tẹ fịaị ḍiḅii.

²⁴Ò tomi ma dee pakama tẹ ịn kẹ Sẹrubimu sịn enjẹlị ḅe na, kọrịarị okologie tẹ pịkị, pịkị pakịrị goyegoye daarị ye na kẹ Ideni ḅẹ ḍụọ mẹ ḅẹ ịrụa-saakịarị-anga anga mẹ ḅụ koromam, mịẹtẹ ọ̀ ḅọrọ mu ḍumo pịrị sịn mẹ laarị etela mẹ ḍikiḍiki ḅẹ ḅara.