Read kalabari Suku-saakị 32 Bible Online

Suku-saakị 32 - kalabari bible

Suku-saakị 32

¹Jekọbụ ò muarị anga muarị tẹ Tamụnọ enjẹlị apụ ma ori na bịamam;

²tẹ Jekọbụ ini ẹrị tẹso, ọ̀ nwẹnị ḅẹẹ, “Miemẹ anie Tamụnọ ọmụ-ogbo!” Mie ḅụ ori ẹrẹ kẹ anị ye-yọ mẹ sịnm, Mahanahịmu[34].

³Jekọbụ nwẹnị ọ̀ tọrọkọ, tarị oku-mẹnjịapụ kẹ ori iyimbere Ịsọ fịrịma Idọmụ opu sịẹ mẹ ḅẹ gbọrụ ama Seya ḅụ,

⁴ịn tolumarị, “Mị-ḅara mie ọ́ kẹ ị̀ nyanaḅọ Ịsọ ḅẹẹ ḅarị ḅara! Mie ị́ fịrịmẹnjịḅọ Jekọbụ ḍuko yee, ‘Àrị igoni kẹ Lebanị ḍọkụma-mum tẹ sime nwenii mịọkụ lam;

⁵anịsakị à pootẹ-anambulo na, yedogi-anama na, anana ogbo-ogbo na, fịrịmẹnjị-owiapụ na, fịrịmẹnjị-eremịna-awọmẹ na nyana tẹ; anịsakị fịrịma tẹ ḍuko ị̀ nyanaḅọ ḅe pịrị mie à gotẹ oku mẹ fịrịma ye mịẹtẹ arị í ḍiki-tọrụ ḅụ tọrụ-ḅẹlẹ ḍọkị-ẹrị ḅarị ḅara.’ ”

⁶Oku-mẹnjịapụ ma nwẹnị pịkịma-ḅo Jekọbụ la, tẹ ḅẹẹm, “Wa mu í iyimbere Ịsọ lam, tẹ ori sọ owiapụ ẹndẹ (400) kẹ ọ̀ ḅụụ sụa tẹ ị́ na bịama ḅẹ ḅoarị.”

⁷Anịtẹso Jekọbụ nwẹnị kpọma ḅalafa, tẹ ḅụụ-ḅalaḅala, tẹ ọ̀ nwẹnị tomi ma tẹ ori na sime apụ ma na, anana ogbo-ogbo ma na, opu anama ogbo-ogbo ma na, ike-sụa-anama ma na kẹ maa kpo ḍie,

⁸kuromarị, “Ịsọ ḅo gbọrụ kpo la tẹ anị ḅaa fama-fama, osi kpo mẹ tẹ kirikọn wararị ye mẹ inetẹ mangị-so ḅa.”

⁹Anịtẹso Jekọbụ nwẹnị tẹkẹ tẹ ḅẹẹ, “Yei ị̀ ḍa Ebira-amụ na pịkị ì opu-ḍaḅọ Ayịzịkị na tẹkẹarị Tamụnọ! Yei, ị́yẹrị KỊNỊNYANAḄỌ ḅe tẹ ị̀ ḅẹẹm, ‘Pịkịma-so í opu sịẹ mẹ na, ị́ paka-furo mẹ na muu, anịsakị àrị iḅi kẹ ị́ mịẹ ḅa’ kẹ ị̀ ḅẹẹ ḅọ.

¹⁰Jike-a ḅẹlẹma mẹmgba na iḅi mẹmgba na tẹ ị́ nyana yẹrị ị́ fịrịmẹnjịḅọ pịrị ye mẹ ḅẹ ịrụ-tẹịn ye sọ à nyana gbẹẹ-a, kẹ gotẹ ọkọ ḅẹẹarị, ị̀ mkpara kịngẹ mie à kẹ mị Jodanị mẹ saḅa ye tẹ mịọkụ à ḅo maa kpoo mịẹ tẹ.

¹¹Àrị ị́ tẹkẹm, ì iyimbere Ịsọ ḅara ḅụ ị̀ ḍụa-ḅọrọmaa, gbala arị ò ḍiki-ḅalafarị ẹrẹsị, anieofori ò ḅofa ḅo wamịnị-mgba, iyingiapụ ma na, awọmẹ ma na kẹ sụa ḅaa fama.

¹²Kụma ị́yẹrị mie ḅẹẹ ye, ‘Àrị iḅi kẹ ị́ mịẹ ḅa, tẹ mịẹtẹ í furo-ḅẹ-apụ tọrụ-minji ḅẹ onwi mẹ tẹ kịnị inetẹ kịẹn ḅịa ye mẹ sime-ḅara sime inweni-ogbo sọ ḅa.’ ”

¹³Mie ḅụ ori anị ḍin mẹ kẹ anị yọ ḅụ simem tẹ ọ̀ nyana aị ḅụ ọ̀ kẹ ò iyimbere Ịsọ pịrị ḅẹ ḍiepịrịye ọkịm,

¹⁴ịyọrọ oḅori oyia asi na, ekpe oḅori si amgbọ na, asambịrịma ịyọrọ anana oyia asi na, ejimina si amgbọ na,

¹⁵ndo pịrịarị ịyọrọ ike-sụa-anama suei na arị ndo kẹ pịrịarị kala aị ma kẹ sụa, ịyọrọ nambulo amesi na, owi-nambulo oyia amgbọ na, ịyọrọ yedogi-anama si amgbọ na, owi yedogi-anama oyia amgbọ na,

¹⁶Mịna aị ma ọ̀ nwẹn kẹ ori afịrịmẹnjịapụ ma ḅara sụam, ọrụḅọ-ọrụḅọ mḅọ nye na muu, tẹ ori afịrịmẹnjịapụ ma ḅẹẹm, “Ọmịnị ị̀ ḅọrọ tarị tọrọkọ, tọrọkọ muu, tẹ jen-jen ḅụ ḅelee.”

¹⁷Ọ̀ nwẹnị tọrọkọ-tarịḅọ ḅe toluma, “Ì iyimbere Ịsọ ị́ na bịama tẹ í gbelam, ‘í sime tụḅọ pịrị? Ị́ tọ-anga muarị? Anịsakị ị́ tọrọkọ simearị aị ma tụḅọ aị?’ gbela sakị,

¹⁸anị sakị ḅụ ị́ pakịrị ḅa, ‘arị sime ị́ fịrịmẹnjịḅọ Jekọbụ pịrịm; arị aị ma anie kẹ ị̀ nyanaḅọ Ịsọ fịrịma ḍiepịrị-aị; anịsakị miemẹ sikima, ori sọ wamịna ọḅụjụ ḅoarị.’ ”

¹⁹Ọ̀ pịkị mị-ḅara mẹ kẹ maaịn karama ḅọ ḅe na, tẹrẹị karama ḅọ ḅe na, inimgba tẹ nama ma deema muarị apụ ma ḍuka-mu apụ ma tolumam, “Gbọrụ ḅara mẹ mie ó ḍuko Ịsọ pịrị ḅarịye ọmịnị ori na bịama sakị,

²⁰tẹ ọ́ pịkị ḍuko ḅa, ‘Miemẹ sikima ị́ fịrịmẹnjịḅọ Jekọbụ sọ wamịna ọḅụjụ emi.’ ” Ò gbala ḅiokoromam, “Mị ḍiepịrịye mẹ tẹ à kẹ ị̀ tọrọkọ tarị fịrịma ye mẹ ò ḅioḅẹngbọ deinma ḅa, anịtẹrẹmẹ à mu ọ̀ tọrụkuḅu ẹrị ḅa, ẹbịsịya ori ị̀ daa-ọkị ḅa.”

²¹Mie ḅụ ḍiepịrịye mẹ tarị ḅọrọ tọrọkọ, tọrọkọ mum; tẹ oriḅe ḅioju anị ḍin mẹ ḅụ akpụrụ-warị mẹ ḅio simem.

²²Anị gbọrụ ḍin mẹ ḅụ Jekọbụ ori amaa ereme na, ọ̀ fịrịmẹnjị maa ereme ma na, ori awọmẹ oyi gbọrụḅọ finji ma na ọkị, tẹ kpongbo mịẹ tẹ ḅụọ kẹ saḅa anga ḅụ Jabọkụ Tọrụ mẹ mẹnjị saḅam.

²³Ori ini ọkị fịrịma tẹ ịn tọrụ mẹ saḅam, anị gbọrụ ḅara ḅụ ye tẹ ọ̀ nyana ye goyegoye ịn kẹ saḅam,

²⁴tẹ Jekọbụ ngẹrị ọḅụkọnm; tẹ gbọrụ owiḅọ nwẹnị ḅo ori na egelege sọ nwenii ene kẹlẹ kọnm ḅaa tẹ.

²⁵Owiḅọ ḅe ẹrịm mịnẹ ori inetẹ Jekọbụ gbin-a tẹso, ọ̀ nwẹnị ḅara kẹ Jekọbụ igo ḅụ pọị-so wararị anga mẹ lama, tẹ ori owiḅọ ḅe na egelege mẹ sọarị ogbo anị nwẹnị gbisini.

²⁶Anịtẹso owiḅọ ḅe nwẹnị ḅẹẹ, “Ị̀ wẹrịso à so, gbala ene mẹ finjiarị.” Kụma Jekọbụ nwẹnị pakịrị, “Ị́ ì boma-a sime-ogbo, à ḍụkụ tẹ í so ḅịa.”

²⁷Tẹ ọ̀ nwẹnị Jekọbụ gbela, “Tiye ị́ ẹrẹ?” Jekọbụ nwẹnị pakịrị, “Ị̀ ẹrẹ Jekọbụ.”

²⁸Anịtẹso owiḅọ ḅe nwẹnị ḅẹẹ, “Jekọbụ ḅarị jen-maaịn kẹ ị́ ẹrẹ sọ ḅịa, kụma Izirẹlị[35]; gbala ị́ Tamụnọ na tomi na owu sọ tẹ ịn nẹngịma tẹ ẹrẹsị.”

²⁹Anịtẹso Jekọbụ nwẹnị ò ḅẹẹ, “Àrị ị́ tẹkẹm, ị́ ẹrẹ go ị̀ pịrịị.” Kụma ọ̀ nwẹnị gbela, “Í tiegotẹ ị̀ ẹrẹ kẹ ì gbelarị?” Tẹ anịjụ ḅụ ò Jekọbụ bomam.

³⁰Mie ḅụ Jekọbụ ẹrẹ kẹ anị ye-yọ mẹ sịnm Pẹnụwẹlị[36] tẹ ḅẹẹm, “À gbala tọrụkuḅu kẹ Tamụnọ ḅe na ẹrịya-ẹrịya tẹẹ, anịsọ à paa ḍumo sime tẹ kpaịn wararị.”

³¹Ọ̀ paa mẹnjị Pẹnụwẹlị ḅọrọarị ogbo otuka puu-pakam, ori igo mẹ gotẹ ori ekeli-ekeli mẹnjịarị.

³²Anịẹrẹsị ọkị-ḅo mịmgba mẹ la sọ Izirẹlịapụ meni mẹ tẹ igo ḅụ pokolo wararị anga mẹ ḅụ simearị meni mẹ ịn pẹị-pẹị-a, gbala Jekọbụ igo ḅụ pọị-so wararị anga mẹ ḅẹ meni mẹ ḅụ mie ọ̀ ḅara kẹ Jekọbụ lama ye ẹrẹsị.