Read kalabari Suku-saakị 35 Bible Online

Suku-saakị 35 - kalabari bible

Suku-saakị 35

¹Tamụnọ nwẹnị Jekọbụ ḅẹẹ, “Saakịị, iwo so Bẹtẹlị mu tẹ anịjụ angaa; tẹ anị yọ ḅụ gbọrụ agbamịẹ-anga sịẹma Tamụnọ ḅe tẹ ị́ í iyimbere Ịsọ ḅụ ḍumo-mangị kọn sakị ḅụ ḅụụ pakama í ḍie ḅọ ḅe pịrịị.”

²Mie ḅụ Jekọbụ ọ̀ warị-kpo na, inimgba tẹ ori na sime apụ mamgba ḅẹẹm, “Ọmịnị ọmịna ogbo-ḅio simearị igoni atamụnọ ma, tan nguma, tẹ ọmịna aḅụụ mịẹ fịafịamaa, tẹ ọmịna opu akapa ḍimaa;

³anịtẹrẹmẹ ó yee wa saakị tẹ iwo so Bẹtẹlị mu, mịẹtẹ arị anị yọ ḅụ gbọrụ agbamịẹ-anga sịẹma Tamụnọ ḅe tẹ ị̀ ḅụụ-ḅalaḅala ene mẹ ḅụ ị̀ tẹkẹ pakịrị ḅọ ḅe, tẹ à mu anga, mu anga ḅụ ị̀ na sime ḅọ ḅe pịrị.”

⁴Mie ḅụ ini igoni atamụnọ tẹ ịn nyana aị mamgba na, ḅerisụaye tẹ ịn aḅeri sime aị ma na sin tẹ kẹ Jekọbụ pịrịm tẹ ori arị kẹ ịn kẹ oku nwẹn-sịn opu sịn tẹ Sẹkẹmụ na kpeki wararị ye suku ḅụ ḅọịm.

⁵Ịn mẹnjị ma-muarị ḅara ḅụ, Tamụnọ kẹ fịrịma tẹmẹ-naịn-naịn nwẹnị ḅo opu ama ma tẹ ini ikelema-koro wararị ama ma gbaịn, anie mịẹtẹ ịn Jekọbụ owiapụ-awọmẹ ma ḍuka-a.

⁶Tẹ Jekọbụ na tomi tẹ ori na sime apụ mamgba na ḅo Luzu (anie Bẹtẹlị) lam, aniemẹ tẹ Kenanị ama ḅụ simearị ye mẹ,

⁷tẹ anị yọ ḅụ ọ̀ nwẹnị gbọrụ agbamịẹ-anga nama tẹ ye yọ mẹ sịn Ẹlị-bẹtẹlị gbala anị yọ ḅụ mie ori ò iyimbere ḅụ ḍumo-mangị kọn sakị Tamụnọ amịna ḅụụ mịẹfinji ọ̀ pịrị ye ẹrẹsị.

⁸Tẹ Dibora, Ribeka dogi ḅọ ma fịịm, tẹ ini á kẹ Bẹtẹlị ḅụ suku-jụ da pakịrị anga ḅụ oku nwẹn-sịn opu sịn suku ḍiḅim; mie ḅụ ini ẹrẹ kẹ anị sịnm Alọnị-bakutu[37].

⁹Tamụnọ pịkị sin ḅụụ-pakama Jekọbụ ḍiem, tẹ ò bomam, ọ̀ Padani-aramụ (Mẹsopotemịya) ḅụ sime tẹ ḅo tẹso.

¹⁰Tamụnọ ọ̀ ḅẹẹm, “Ị́ ẹrẹ anie Jekọbụ ịn ḅarị jen-maaịn kẹ Jekọbụ kẹ ẹrẹ kẹ ị́ sịn ḅịa, kụma Izirẹlị anie ị́ fị ḅarị ye.” Mie ḅụ ori ẹrẹ ḅo Izirẹlị sọm.

¹¹Tamụnọ nwẹnị ọ̀ ḅẹẹ, “Yẹrị anie Kụrọmamgba nyana Tamụnọ (Ẹlị-Sadaị), awọ iyi tẹ kamaa, opu sịẹ anịsakị opu asịẹ ogbo-ogbo ị́ ḅụụ ḅụ paka-ḅo ḅa, tẹ amadapụ ị́ ḅụụ ḅụ paka-ḅo ḅa.

¹²Ama mẹ tẹ à kẹ Ebira-amụ na, Ayịzịkị na pịrị ama mẹ à kẹ ị́ pịrị ḅa, anịsakị ị́ ḅọrọ sakị arị ama mẹ kẹ í furo-ḅẹ-apụ pịrị ḅa.”

¹³Anịtẹso Tamụnọ ò sime tẹ ori na ẹkwẹn sime anga mẹ ḅụ iwo som.

¹⁴Jekọbụ nwẹnị ọ̀ Tamụnọ na ẹkwẹn sime anga mẹ ḅụ gbọrụ ḍụḅarị kẹ sịẹma tẹ iru agba mịẹ anị ọgọnọ sara, tẹ pulo kẹ anị ọgọnọ saram.

¹⁵Mie ḅụ Jekọbụ ẹrẹ kẹ anị yọ mẹ tẹ Tamụnọ ori na ẹkwẹn yọ mẹ sịnm Bẹtẹlị.

¹⁶Anịtẹso ịn nwẹnị Bẹtẹlị ḅụ saakị tẹ mẹnjị; tẹ amụ ini Ifiratị kpeki-a tẹ paa sụma wararị ogbo iyi Resẹlị lam, tẹ anị á ḅụụ kụrọm.

¹⁷Arị iyi akụ mẹ ḅụ simearị ogbo, ere-iyimaḅọ ma nwẹnị á ḅẹẹ, “Ḅalafa ma, kẹ gotẹ ọkọ ḅẹẹarị, mịọkụ í jen owiḅọtụḅọ nyana ḅẹ tẹ.”

¹⁸Tẹ árị ịnyọ biin ḅẹ-yearị ogbo — gbala á fịịm ẹrẹsị — á nwẹnị ẹrẹ kẹ ọ̀ sịn Bẹnị-oni[38]; kụma ọ̀ ḍa ẹrẹ kẹ ọ̀ sịnm Benijamịnị[39].

¹⁹Mie ḅụ Resẹlị fịịm, tẹ ini á kẹ Ifiratị, anie Bẹtịlịhẹmụ mu etela ḅụ ḍiḅim,

²⁰tẹ Jekọbụ nwẹnị á ḍuḅu ọgọnọ ḅụ gbọrụ ḅeriye saakị sịẹma; anie Resẹlị ḍuḅu mẹ ḍie-pakamarị ḅeriye, aniemẹ tẹ anịjụ sime ḅo mịmgba la ye mẹ.

²¹Izirẹlị paa mẹnjịma mum, tẹ Migidali-ẹda kụrọtẹ gele-warị mẹ mẹnjị iwo ḅụ ori akpụrụ-warị sịẹmam.

²²Izirẹlị anị ama mẹ ḅio angarị ogbo mie Rubẹnị ọ̀ ḍa ịgwa-ẹrẹḅọ Biliya na tii, tẹ árị ọbọ-simam, tẹ Izirẹlị anị gbolomaye naam tẹ ịganị ḅụramam. Mịọkụ Jekọbụ iyi owiapụ-awọmẹ ini oyi maa owiapụ-awọmẹ finji.

²³Liya owiapụ-awọmẹ anie: Rubẹnị (Jekọbụ mgbe anie Tarị Tụḅọ) na, Simiyọnị na, Livayị na, Juda na, Ịsaka na, Zẹbulọnị na.

²⁴Resẹlị owiapụ-awọmẹ anie: Josẹfụ na, Benijamịnị na.

²⁵Resẹlị fịrịmẹnjị-ẹrẹḅọ Biliya owiapụ-awọmẹ anie: Danị na, Nafutali na.

²⁶Liya fịrịmẹnjị-ẹrẹḅọ Zilipa owiapụ-awọmẹ anie: Gadi na, Asa na. Mịna apụ ma anie Jekọbụ owiapụ-awọmẹ ma tẹ Padani-aramụ ḅụ ini iyi ọ̀ pịrị apụ ma.

²⁷Jekọbụ so ọ̀ ḍa Ayịzịkị ḍọkụma-ḅom Mamụrẹ anịanịa Kiriyati-aba (anie Hẹbụrọnị) ḅụ, Ebira-amụ na, Ayịzịkị na anga yọ mẹ.

²⁸Anị sakị mẹ ḅụ Ayịzịkị sịḅị ḅọrọ aḍin anie kụra esenia si (180).

²⁹Tẹ Ayịzịkị ịnyọ biin tẹ ọ̀ fịịm tẹ ini ò kobiri mu ori atomi pịrịm ori omongi tẹ tọnwa aḍin ọ̀ sịḅị ḅọrọm; tẹ ori owiapụ-awọmẹ Ịsọ na, Jekọbụ na ò ḍiḅim.