Read kalabari Suku-saakị 37 Bible Online

Suku-saakị 37 - kalabari bible

Suku-saakị 37

¹Jekọbụ ọ̀ ḍa igoni kẹ mẹnjị ma-mu bịan ama mẹ, anie Kenanị ama mẹ ḅio angam.

²Miemẹ anie Jekọbụ furo mẹ ḅụ ye paka ḅara. Josẹfụ sịḅị tẹra kụra fa si ḅọrọ tẹso, ori ori owiapụ-amịnapụ ḅụụ sọ tẹ anana na, oḅori ma na ḍikiḍikim; ori anie ịrụtẹ kalatụḅọ Biliya na, Zilipa na ọ̀ ḍa ereme ma owiapụ-awọmẹ ma ḅụ; tẹ Josẹfụ ịn mịẹarị si amịẹaị gbolomaye ọkị-ḅo ḍuko ịna ḍaḅọ pịrịm.

³Mịọkụ Izirẹlị Josẹfụ ḅẹlẹma ori awọmẹ osi apụ ma ḅụ ḅẹḅọ-ḅẹḅọ nẹngịm, ori anie ori omongi sakị ḅẹ owiḅọtụḅọ ẹrẹsị, tẹ ḅirima wararị ḅara nangwọtẹ vọrọrọ-kapa gbin ọ̀ pịrịm.

⁴Kụma ori amịnapụ owiapụ ḅo ẹrịm mịnẹ ịna ḍaḅọ ọ̀ ḅẹlẹma ori amịnapụ owiapụ mamgba nẹngịm tẹso, ini ò ḍiki-ḅioḅum, tẹ ḅarị inetẹ dein ḅara kẹ ẹkwẹn ọ̀ pịrị-a.

⁵Gbọrụ ḍin, Josẹfụ gbọrụ ḍawọ kọnm, tẹ ori anị ḍuko ori owiapụ-amịnapụ pịrị ye mẹ, ịn kẹ ò ḍiki-ḅioḅuarị ḅara nẹngị ḅara mie ịn kẹ ò ḍiki-ḅioḅu ye.

⁶Ori ịn ḅẹẹm, “Ọ́ mị ḍawọ mẹ tẹ à kọn ye mẹ pokii,

⁷Wamịnị-mgba ḍụọ ḅio emi tẹ mgbọlị-fịye kẹ puku-puku fịnarị, tẹ ḍikiarị kụma ị̀ mgbọlị-fịye puku mẹ nwẹnị saakị tụkụ tẹ sịẹsime. Ọmịna mgbọlị-fịye apuku ma nwẹnị sịẹ anị ikelema-koro tẹ sịḅị-tuu ì nye mẹ pịrị.”

⁸Ori amịnapụ ma nwẹnị ò gbela, Karakara-ḅara-ḅụ ị́ amadaḅọ sọ wa pịrị ḅẹ? Anịanịa, karakara-ḅara-ḅụ ị́ wamịna ḅụụ kụrọ nyana tẹ ḅẹrẹtọn wa pịrị ḅẹ? Mie ḅụ ori aḍawọ ma na, ori ẹkwẹn-aḅịḅị na gotẹ ịn nwẹnị ò ḍiki-ḅioḅu tarị ḅara nẹngị lama.

⁹Anịtẹso ọ̀ pịkị jen ḍawọ kọnm, tẹ anị ḍuko ori owiapụ-amịnapụ pịrị tẹ ḅẹẹm, “Ḍikii à jen ḍawọ kọnm, tẹ ẹrịm ịrụa mẹ na akalụ mẹ na oyi gbọrụ lolia finji na sịḅị-tuu iderima ị̀ pịrịarị.”

¹⁰Kụma ọ̀ miemẹ ḍuko ọ̀ ḍa na, ori owiapụ-amịnapụ na pịrị tẹso, ọ̀ ḍa nwẹnị ò ḍiki-ịganị, tẹ ọ̀ ḅẹẹ, “Mie ị́ nwẹn kọn ḍawọ ḅọrọ tọ ḍawọ? Yẹrị na, í iyingi na, ị́ owiapụ-amịnapụ na karakara-ḅara-ḅụ ḅo ị́ tọrọkọ sịḅị-tuu kiri lama ị́ pịrị ḅẹ?”

¹¹Ori owiapụ-amịnapụ ma nwẹnị miemẹ kẹ ori afana, kụma ọ̀ ḍa anị kẹ ò ḅioḅẹngbọ kokom.

¹²Ori owiapụ-amịnapụ mị sakị mẹ ḅụ osuka kẹ ịna ḍaḅọ anana ogbo pịrị fị ḅẹ mum Sịkẹmụ ḅụ.

¹³Izirẹlị nwẹnị Josẹfụ ḅẹẹ, “Sịkẹmụ ḅụ mie í amịnapụ owiapụ osuka kẹ anana ogbo mẹ pịrị fịarị ye anị-a? Ḅoo, àrị ị́ kẹ ịn fịrịma ḅa.” Josẹfụ nwẹnị ọ̀ ḍa pakịrị, “Mie yẹrịị mịanga.”

¹⁴Mie ḅụ ọ̀ ḍa nwẹnị ọ̀ ḅẹẹ, “Mịọkụ mu í owiapụ-amịnapụ ma ye ini na sime-ḅara ḍikii, anana ogbo mẹ kpaịn wararị ḅoto, tẹ pịkị ḅịḅị da ḅo ị̀ pịrị.” Mie ḅụ ori Hẹbụrọnị tụndụ ogboku mẹ ḅụ ọ̀ fịrịma tẹ ò ḅo Sịkẹmụ lam.

¹⁵Ò piri mẹ ḅio mẹnjị ikelekelearị ogbo gbọrụ owiḅọ nwẹnị ori ẹrị; tẹ owiḅọ ḅe nwẹnị ò gbela, “Í tiye ḍọkịarị?”

¹⁶Ọ̀ nwẹnị pakịrị, “Àrị ì owiapụ-amịnapụ ḍọkịarị, àrị ị́ tẹkẹm, ịn sime tẹ osuka kẹ anana ogbo mẹ pịrị fịarị anga ḍuko ị̀ pịrịị.”

¹⁷Owiḅọ ḅe nwẹnị ḅẹẹ, “Ịn so tẹ, gbala ịn ḍukaarị tẹ à naam, ‘Ó yee wa so Dotanị mu’ ” Mie ḅụ Josẹfụ ori amịnapụ owiapụ ma ḍọkịma-mu Dotanị ḅụ ịn ḍọkị-ẹrịm.

¹⁸Ịn nwẹnị sụma-jụ ḅụ ori ẹrị tẹ ḅaa-ḅẹrẹ-ḅiya ọ̀ pịrị tẹrẹmẹ ò ḅo ịn kpekim.

¹⁹Ịn nwẹnị jụmọ-jụmọ ḅẹẹ, “Ḅie ḍawọ kọn-kọn ḅọ ḅe mịanga ḅoarị.

²⁰Mịọkụ ó ḅoo, yee wa ọ̀ ḅaa tẹ kẹ mịna olulu ma ḅe gberie ḅio gbin su; anị sakị wa ḅẹẹ ḅa mịnẹ piri-ḅio-ḅẹ nama ọ̀ ḅaa guluguluma tẹ, anịsakị wa ọ̀ kọn aḍawọ ma paka ḅẹ ḅara ḍiki ḅa.”

²¹Kụma Rubẹnị anị naa tẹso, ọ̀ nwẹnị ịna ḅara ḅụ ọ̀ ḍụa pakama-ḅo, tẹ ḅẹẹm, “Ó yee wa ò ḍumo mẹ wẹrịso.”

²²Tẹ Rubẹnị nwẹnị ịn ḅẹẹ, “Ọmịnị ọmbie ọsụma ma; ọmịnị ọ̀ kẹ wakị mị olulu mẹ ḅio suu, mị ịkpa mẹ ḅio, kụma ọ́ ḅara kẹ ọ̀ lama ma,” mịẹtẹ ori inetẹ ịna ḅara ḅụ ọ̀ ḍụa pakama-ḅo tẹ ọ̀ pịkịma mu ọ̀ ḍa pịrị ḅẹ ḅara.

²³Mie ḅụ Josẹfụ ḅo ori owiapụ-amịnapụ ma la tẹso, ịn nwẹnị ori oju ḅirima wararị ḅara nangwọtẹ vọrọrọ-kapa mẹ tẹ ọ̀ sụa ye mẹ sin,

²⁴tẹ ịn nwẹnị ori ọkị tẹ ọ̀ kẹ gbọrụ olulu ḅio wakị su. Olulu mẹ ḅio gbọrụ ye so ofori, minji anị ḅio ofori.

²⁵Anịtẹso ịn nwẹnị ḅo fịye fị ḅẹ tẹ lẹgị-sime. Ịn tọrụ saakị ḍiki sakị, ini Isimẹlị furo ḅẹ tuḅokọn-apụ ẹrịm, ịn Gilẹdị ḅụ sime tẹ ḅoarị, ịna ike-sụa-anama ḅẹlẹma sịn ḅụ paka-ḅoarị ye-oḅolo-aị na, fụka-ye deinma olo na, ḍụẹịn tẹlẹma kụnụaị na dogi tẹ ịna etela ḅụ so Ijiputi muarị.

²⁶Anịtẹso Juda nwẹnị ori owiapụ-amịnapụ ma ḅẹẹ, “Anị tọ sọye mịẹ wa pịrị wa nwẹnị wamịna iyimbere ḅe ḅaa tẹ ori ọmbie ḅọị kụma?

²⁷Ó ḅoo, yee wa ọ̀ kẹ Isimẹlị furo-ḅẹ-apụ ma dẹrị tẹ yee wamịna ḅara ori ọgọnọ gbana apụ sọma, kẹ gotẹ ọkọ ḅẹẹarị, ori anie wamịna iyimbere, wamịna oju meni.” Tẹ ori owiapụ-amịnapụ ma ọ̀ ḅịḅị pokim.

²⁸Anịtẹso Midiyanị ḅẹ tuḅokọn-apụ ḅo anịanga ḅọrọm, tẹ ịn nwẹnị olulu mẹ ḅio Josẹfụ pakama-ḅo tẹ ọ̀ kẹ seleḅa si apakịrị kẹ Isimẹlị furo-ḅẹ-apụ ma dẹrị; tẹ ịn Josẹfụ ọkị so Ijiputi mum.

²⁹Rubẹnị pịkịma olulu mẹ mum tẹ ẹrịm mịnẹ Josẹfụ ḅarị olulu mẹ ḅio ofori tẹso, ọ̀ nwẹnị ori akapa nụnụ kan,

³⁰tẹ pịkịma ori owiapụ-amịnapụ ḍọkụma-mu, tẹ ḅẹẹ, “Tụḅọ ḅe anịjụ ọ̀ ḅarị ofori, anịsakị yẹrị, à nwẹnị tọ-anga da ḅẹ?”

³¹Anịtẹso ịn nwẹnị Josẹfụ kapa mẹ ọkị, tẹ gbọrụ oḅori ḅaa, tẹ nwẹnị kapa mẹ kẹ ọmbie mẹ kpeleki,

³²tẹ ḅirima wararị ḅara nangwọtẹ vọrọrọ-kapa mẹ kẹ fịrịma, tẹ anị ọkị-ḅo ịna ḍaḅọ pịrị tẹ ḅẹẹ, “Mie wa ḍọkị-ẹrị ye, mịọkụ ḍikii, í owiḅọtụḅọ ḅe kapa ḅọrọ anị-o, anịanịa anị-a ḅoto.”

³³Ọ̀ nwẹnị anị lekiri tẹ ḅẹẹ, “Ì owiḅọtụḅọ ḅe kapa mẹ anịị, piri-ḅio-ḅẹ nama ọ̀ ḅaa guluguluma tẹ; ḅio-maaịn-tọn-a ḅara ḅụ, Josẹfụ ini ọ̀ kanị-kọsịma tẹ.”

³⁴Anịtẹso Jekọbụ ori opu akapa nụnụ kan, tẹ akpa kẹ ò ḅiri ḅụ ịnwaịn, tẹ tọnwa ḅẹ aḍin kẹ ori owiḅọtụḅọ ḅe kururum.

³⁵Ori owiapụ-awọmẹ mamgba na, ori eremịna-awọmẹ mamgba na saakị ḅo ò dedemam, kụma ò dedema naa ḍụkụ-a, tẹ ḅẹẹm, “Ẹn-ẹn, à kururu ḅụ fị tẹ ini ì owiḅọtụḅọ ḅe na ị̀nịna ḍiḅi ḅa.” Mị-ḅara mie ọ̀ ḍa kẹ tẹmẹ-la ḅara kẹ ori owu ḅara.

³⁶Mịọkụ Midiyanị ḅẹ apụ ma ọ̀ kẹ mu Ijiputi ḅụ Fero opu fịrịmẹnjịḅọ Pọtifa ye-yọ ḍikiḍiki ọmụapụ ma sịḅịdaḅọ ḅe dẹrị tẹ.