Read kalabari Suku-saakị 39 Bible Online

Suku-saakị 39 - kalabari bible

Suku-saakị 39

¹Mịọkụ Isimẹlị furo-ḅẹ-apụ ma Josẹfụ kẹ so Ijiputi mum, tẹ Pọtifa, Fero opu fịrịmẹnjịḅọ, ye-yọ ḍikiḍiki ọmụapụ ma ḅẹ sịḅịdaḅọ ḅe, Ijiputi-ḅẹ-ḅọ Isimẹlị furo-ḅẹ-apụ ma tẹ ori ọkị anịjụ mu apụ ma ḅara ḅụ ọ̀ fẹẹ ọkịm.

²KỊNỊNYANAḄỌ ḅe Josẹfụ na emi tẹ ò ḅo mịẹ ye, mịẹ ye ḅara ḅẹ sọ ḅọ sọm; anịsakị ori ọ̀ sịḅịdaḅọ Ijiputi-ḅẹ-ḅọ ḅe warị emi,

³tẹ ọ̀ sịḅịdaḅọ ḅe nwẹnị ẹrị mịnẹ KỊNỊNYANAḄỌ ḅe ori na emi, anie ḅụ KỊNỊNYANAḄỌ ḅe mịẹtẹ ọ̀ mịẹ aị mamgba ori aḅara ḅụ lolom.

⁴Mie ḅụ Josẹfụ, Pọtifa ḍiki-tọrụ ḅụ ọ̀ fụḅara fị tẹ fịrịmẹnjị ọ̀ pịrịm, tẹ ọ̀ nwẹnị ọ̀ kẹ ò soku-ḅẹ warị ḍikiḍikiḅọ sọma, tẹ ọ̀ nyana aị mamgba kẹ ọ̀ ḅara sụa.

⁵Ori ọ̀ kẹ ọ̀ warị ḍikiḍikiḅọ sọma tẹ ọ̀ nyana aị mamgba kẹ ọ̀ ḅara sụa sakị mẹ ḅụ ọkị tọrọkọ mu ḅụ KỊNỊNYANAḄỌ ḅe Ijiputi-ḅẹ-ḅọ ḅe warị bomam Josẹfụ sịḅị gotẹ; KỊNỊNYANAḄỌ ḅe boma mẹ ye tẹ ori nyana aị mamgba ọgọnọ gbanam warị ḅio-o, ḍụọ ḅio-o.

⁶Mị-ḅara ḅụ ye tẹ ọ̀ nyana aị mamgba ọ̀ wẹrịso Josẹfụ pịrịm; ori emi nwẹn ḅẹẹ sakị, fịye tẹ ọ̀ fịarị ye sikima ori ọ̀ ḅụụ kẹ gberie-sọ gboloma-a. Mị sakị mẹ Josẹfụ owiḅọ iḅi kọn tẹ ḍiki-tọrụ ḅụ ḅụụ-ḅẹlẹma wararị.

⁷Sakị kẹlẹ ḅọrọ tẹso, ọ̀ sịḅịdaḅọ ta nwẹnị á tọrụ kolokolo Josẹfụ ọgọnọ gbana, tẹ ḅẹẹ, “Ị̀ na ḅọlọlọọ.”

⁸Kụma ọ̀ ḍụkụ-a tẹ nwẹnị ọ̀ sịḅịdaḅọ ta ma ḅẹẹ, “Ḍikii, àrị emi mẹ gotẹ ị̀ sịḅịdaḅọ ḅarị ḅụụ-ḅaa warị ḅio gberie-sọ pịrị-a, tẹ ye tẹ ori nyana ye goyegoye kẹ ị̀ ḅara sụa tẹ.

⁹Mị warị mẹ ḅio ọ̀ ḅarị ḍụḅa ị̀ nẹngị-a, ị́yẹrị ọ̀ ta gotẹ í sikima ọ̀ kẹ ì kikima gberie-sọ ofori; anịtẹrẹmẹ à tọ-ḅara kẹ mu Tamụnọ ḅụụ ḅụ nwẹn sime opu si-sịḅịḅio-sụa ḅẹ?”

¹⁰Karakaraye ene-ḅaaene-ḅaaene arị anị kẹ ẹkwẹn Josẹfụ pịrịm ḅẹsọ, ori árị na gbọrụ anga ḅụ sime-a, anịanịa árị na ḅọlọlọ.

¹¹Kụma gbọrụ ene ḅụ, gbọrụḅọ-sọ warị ḅio ofori, tẹ ọ̀ warị ḅio sọ ọ̀ kọrịnama kọrị ḅẹ mu tẹso,

¹²á nwẹnị ọ̀ sụa opu kapa ḅụ ori ọlọ-sịẹma, tẹ ḅẹẹm, “Ị̀ na ḅọlọlọọ.” Kụma ọ̀ nwẹnị ori opu kapa mẹ sin á ḅara-ḅio sụa tẹ ḍumo-mangị kọn warị mẹ ḅio paka.

¹³Tẹ ori ọ̀ kapa sin á ḅara-ḅio sụa tẹ ḍumo-mangị kọn warị mẹ ḅio paka ye ẹrị tẹso,

¹⁴á nwẹnị oloku á warị mẹ ḅio simearị owiapụ ma sịn tẹ ịn ḅẹẹ, “Ọmịnị ẹrịị, ò mu Hiburu ḅẹ ḅọ ọkị-ḅo wamịna ogbo-ḅio su tẹ wa wọlọ ḅẹ ḅo tẹ ị̀ na gboloma ḅẹ ḅara kẹ ọ̀ sọ ị̀ dama-ḅom, tẹ à gele pọkọ kẹ oloku pakamam;

¹⁵tẹ ori à gele pọkọ kẹ oloku pakama ye mẹ maa tẹso, ori ọ̀ kapa sin ị̀ pịrị tẹ warị mẹ ḅio mangị paka-som.”

¹⁶Anịtẹso árị ọ̀ kapa mẹ kẹ árị akaka koroma wẹrị nwenii á di warị ḅom.

¹⁷Anịtẹso á nwẹnị gbọrụ ịlụkụ mẹ gbaa ọ̀ pịrị, tẹ ḅẹẹm, “Hiburu ḅẹ fịrịmẹnjịḅọ, oriḅe tẹ ị́ ọkị-ḅo wamịna ogbo-ḅio su ḅọ ḅe ị̀ wọlọ ḅẹ sọ-ḅom,

¹⁸Kụma arị ị̀ pọkọ saakị tẹ oloku gbọrụ sakị, ori ọ̀ kapa sin koroma ị̀ pịrị tẹ warị mẹ ḅio mangị pakam.”

¹⁹Josẹfụ sịḅịdaḅọ ẹkwẹn-aḅịḅị ma tẹ ọ̀ ta ḍuko ọ̀ pịrị aị ma naa fama tẹso, arị mẹẹ. “Mị-ḅara mie í omoniḅọ ḅe kẹ ị̀ mịẹ ḅara” mie ọ̀ gbọrsịḅị ịganị fama ye.

²⁰Josẹfụ sịḅịdaḅọ nwẹnị ori ọkị tẹ kẹ ini amadaḅọ ḅe ikoliapụ kẹ wẹrịarị anga ḅụ ọ̀ kẹ ikoli ḅio su, tẹ ori ikoli ḅio simem.

²¹Kụma KỊNỊNYANAḄỌ ḅe Josẹfụ na simem, tẹ ò jike-a ḅelema mẹ kẹ ò ḍiem ikoli-warị mẹ ḍikiḍikiarị ḅọ ḅe tọrụ ḅụ.

²²Tẹ ikoli-warị mẹ ḍikiḍikiarị ḅọ ḅe nwẹnị ikoliapụ ma tẹ ikoli mẹ ḅio simearị apụ mamgba saakị kẹ Josẹfụ ḅara sụa; anịsakị anịjụ mịẹ ye goyegoye ori mie anị mịẹ ye;

²³ḅẹẹye-ḅẹẹye tẹ Josẹfụ ḍikiḍikiarị ye goyegoye ḅụ ikoli-warị mẹ ḍikiḍikiarị ḅọ ḅe anị ḅụ gberie-sọ ḍiki-a, gbala KỊNỊNYANAḄỌ ḅe ori na emi ẹrẹsị, anịsakị ye tẹ ọ̀ mịẹ ye goyegoye KỊNỊNYANAḄỌ ḅe mịẹtẹ anị Lolom.