Read kalabari Suku-saakị 45 Bible Online

Suku-saakị 45 - kalabari bible

Suku-saakị 45

¹Anịtẹso Josẹfụ ḅarị inetẹ inima tẹ ori akaka sịẹ wararị apụ mamgba tọrọkọ ḅụ ọ̀ ḅụụ ọlọ-a, tẹ nwẹnị oloku tẹ ḅẹẹ, “Mịẹtẹ sime ḅọ, sime ḅọ à sime anga ḅụ paka-so.” Mie ḅụ Josẹfụ amịna ḅụụ mịẹtẹ ori owiapụ-amịnapụ ma ò nimi sakị gbọrụḅọ-sọ ofori.

²Tẹ Josẹfụ tẹmẹ-la ḅara kẹ oloku-oloku owum, anị mịẹtẹ Ijiputi-ḅẹ-apụ ma anị naam, tẹ Fero warị-kpo mẹ anị naam.

³Josẹfụ nwẹnị ori owiapụ-amịnapụ ma ḅẹẹ, “Yẹrị anie Josẹfụ ḅee. Ị̀ ḍa ọ̀ paa ḍumo wararị?” Kụma ori owiapụ-amịnapụ ma inetẹ gberie-sọ kẹ ọ̀ pakịrị-a gbala ọ̀ tọrọkọ ḅụ ịna ekpe tukutukum ẹrẹsị.

⁴Mie ḅụ Josẹfụ nwẹnị ori owiapụ-amịnapụ ma ḅẹẹ, “Àrị ọ́ tẹkẹm, ọ́ sọma ḅo ì kpekii” Tẹ ịn nwẹnị sọma ḅọ kpeki. Ọ̀ nwẹnị ḅẹẹ, Yẹrị anie ọmịna iyimbere Josẹfụ oriḅe tẹ ọ́ dẹrị Ijiputi ḅio suu ḅọ ḅe.

⁵Mịọkụ ọ́ ḅarị ọmịnị ị̀ kẹ mịanga dẹrịm ẹrẹsị tẹmẹ-naịn-naịn, anịanịa ịganị nyana ọmịna aḅụụ pịrị ma; kẹ gotẹ ọkọ ḅẹẹarị, Tamụnọ ḍumo wẹrị kpaịnma ḅẹm ẹrẹsị, ọmịna tọrọkọ tarị ị̀ kẹ fịrịmam.

⁶Kẹ gotẹ ọkọ ḅẹẹarị, mịna maa akụra ma ḅụ ịnụ ama mẹ ḅio emi, sọnọa akụra tẹ kịnị fịye ḍiḅi ḅẹ kiri tẹlẹma, anịanịa fịye soku ḅịa sakị paa emi.

⁷Tẹ Tamụnọ kẹ tomikiri ḅụ kọn kalịye mẹ wẹrị kpaịnma ọmịnị na, simearị tọnwa-apụ na wẹrị ḍumoma ọ́ pịrị gotẹ ị̀ kẹ ọmịna tọrọkọ tarị fịrịmam.

⁸Anie ḅụ ọmịnị ị̀ kẹ mị yọ mẹ fịrịma-a, kụma Tamụnọ; anịsakị ori ị̀ kẹ opu-fịrịmẹnjịḅọ sọma Fero pịrị tẹẹ, pịkị kịnịnyanaḅọ sọma ọ̀ warị mẹmgba pịrị tẹ pịkị ị̀ kẹ ḅẹrẹtọnḅọ sọma Ijiputi ama mẹmgba pịrị tẹẹ.

⁹“Ọ́ fọnya mịẹ, tẹ so ị̀ ḍa ḍọkụma-mu tẹ ọ̀ ḅẹẹ mie í owiḅọtụḅọ Josẹfụ ḅẹẹ ḅara: ‘Tamụnọ ị̀ kẹ kịnịnyanaḅọ sọma Ijiputi mẹmgba pịrị tẹẹ. Ị̀ ḍọkụma-ḅoo, sakị fama ma.

¹⁰Gosẹnị nwẹn-sịn ama ḅụ mie ị́ anga tẹ ị̀ na kpeki ḅarị ye; ị́yẹrị na, ị́ awọmẹ na, ị́ ataa-awọmẹ na, ị́ anana na oḅori ogbo-ogbo ma na, ị́ anama ogbo-ogbo ma na, ye tẹ ị́ nyana aị mamgba na,

¹¹anịsakị anị yọ ḅụ mie à ye nyana tẹ kẹ í ḍikiḍiki ḅarị ye, kẹ gotẹ ọkọ ḅẹẹarị, ịnụ sọnọa akụra paa tọrọkọ-jụ kọn wararị; anieofori ị́yẹrị na, ị́ warị-kpo na, ị́ ḅụụ sime aị mamgba ḅofa igoin.’ ”

¹²Mịọkụ ọmịnị ọmịna atọrụngbọ kẹ ẹrịarị, anịsakị ị́yẹrị iyimbere Benijamịnị sọ ẹrịarị, mịnẹ yẹrị mie ị̀ ḅịḅị finji tẹ ẹkwẹn ọ́ pịrịarị ye.

¹³Ọmịnị Ijiputi ḅụ à nyana kụn gbolomaye mẹmgba na, ye tẹ ọ́ tọrụngbọ kẹ ẹrị tẹ aị mamgba gbolomaye ḍuko ị̀ ḍa pịrị nyanam. Ọ́ fọnya mịẹ tẹ ị̀ ḍa kẹ mị yọ ḅoo.

¹⁴Anịtẹso ọ̀ nwẹnị ori iyimbere Benijamịnị kọngọ fịnama tẹ tẹmẹ-la ḅara kẹ owu tẹ Benijamịnị sọ ọ̀ kọngọ ḅụ owum.

¹⁵Tẹ ọ̀ nwẹnị ori owiapụ-amịnapụ mamgba ḅịḅị nọnjị, tẹ ịna ọgọnọ sime tẹ tẹmẹ-la ḅara kẹ owu; tẹ aniemẹ ḅọrọ tẹso, ori owiapụ-amịnapụ ma na, ori na ẹkwẹn.

¹⁶Fero warị ḅụ pakaye mẹ gboloma ẹkwẹn ịn nwẹn naa tẹso, mịnẹ “Josẹfụ owiapụ-amịnapụ ḅo tẹ” nwẹn ḅẹẹ ye mẹ nwẹnị iḅiọkụ Fero na, ori afịrịmẹnjịapụ na ḅioḅẹlẹma lama.

¹⁷Tẹ Fero nwẹnị Josẹfụ ḅẹẹ, “Ị́ owiapụ-amịnapụ ma ḅẹẹ, ‘Ịn miemẹ mịẹ: ini ịn dogi ḅarị aị kẹ ịna yedogi-anama ọgọnọ gbana tẹ pịkịma-so Kenanị ama mẹ muu;

¹⁸tẹ ị́ ḍa na ị́ warị kpo-kpo ma na ọkị tẹ ị̀ ḍọkụma-ḅoo, anịsakị arị Ijiputi ama mẹ ḅẹ iḅitẹịn anga kẹ ị́ pịrị ḅa, tẹ ị́ ama mẹ ḅẹ ḅẹlẹkị mẹ taḅa ḅa.’

¹⁹Pịkị tọn ịn pịrị ini Ijiputi ama ḅụ kirimẹnjị-arụ ọkịị, kẹ ịna ḍọkọḍọkọ-awọmẹ na, ịna sime-ereme na sẹịn, tẹ ịna ḍaḅọ ọkị tẹ ḅo.

²⁰Ọ́ gbọrụ kuroma sọ nyana ó koroma-so aị pịrị ma, kẹ gotẹ ọkọ ḅẹẹarị, Ijiputi ama mẹmgba ḅụ iḅitẹịn kiri mẹ sime ị́ pịrịm.”

²¹Izirẹlị owiapụ-awọmẹ ma ọkọ mịẹm tẹ Josẹfụ Fero tọn ḅara ḅụ kirimẹnjị-arụ kẹ ịn pịrịm, tẹ etela ḅụ ịn fị ḅẹ fịye na sọ kẹ ịn pịrịm.

²²Ọ̀ pịkị gbọrụ ịwọ kapa kẹ inimgba ḅụ gbọrụḅọ, gbọrụḅọ pịrịm; kụma ò seleḅa pakịrị jeia si na, sọnọ ịwọ akapa na kẹ Benijamịnị pịrịm.

²³Ọ̀ kẹ ọ̀ ḍa fịrịma aị: ori Ijiputi ḅụ paka-ḅo iḅi-aị kẹ oyi ayedogi-anama ọgọnọ sẹịn kpolimam, ọ̀ pịkị oyi ịyọrọ yedogi-anama ọgọnọ sịnmgbọlị na, fịturu na, fịaị na sẹịn kpolimam, ọ̀ ḍa etela ḅụ fị ḅẹ afịaị.

²⁴Anịtẹso ori ori owiapụ-amịnapụ ma fịrịma tẹ ịn som; ịn soarị ogbo ọ̀ nwẹnị ịn ḅẹẹ, “Etela-ogbo ọ́ kamụ-sọ ma.”

²⁵Mie ḅụ ini Ijiputi ḅụ paka-som, tẹ ḅo Kenanị ama ḅụ ịna ḍaḅọ Jekọbụ lam.

²⁶Ịn nwẹnị ḍuko ọ̀ pịrị, “Josẹfụ paa ḍumo wararị, anịsakị ori anie ḅẹrẹtọn Ijiputi ama mẹmgba pịrịarị ḅọ.” Jekọbụ nwẹnị ḅarị tẹmẹ nyana-a ḅara sime, gbala ori ịn minini-a ẹrẹsị.

²⁷Kụma ini ẹkwẹn mamgba tẹ Josẹfụ kọn ịn pịrị aị ma ḍuko ọ̀ pịrị fama, tẹ ò kirimẹnjị-arụ ma tẹ Josẹfụ kẹ fịrịmam kẹ ò dogi ḅoo nwẹn ḅẹẹ aị ma ẹrị tẹso, ịna ḍaḅọ Jekọbụ tẹmẹ ḅo ọ̀ ḅụụ sọ tẹ ọ̀ naa-ḅom.

²⁸Tẹ Izirẹlị nwẹnị ḅẹẹ, “Iḅi tẹ; ì owiḅọtụḅọ Josẹfụ paa ḍumo wararị; à mu ori ẹrị tẹrẹmẹ à fịị ḅa.”