Read kalabari Suku-saakị 46 Bible Online

Suku-saakị 46 - kalabari bible

Suku-saakị 46

¹Mie ḅụ Izirẹlị ye tẹ ọ̀ nyana aị mamgba kobiri tẹ Biyasẹba ḅom, tẹ tọnwa agba mịẹ ọ̀ ḍa Ayịzịkị Tamụnọ ḅe pịrịm.

²Tamụnọ nwẹnị ḍin ḅụ ịkịan ẹrị ḅara ḅụ ẹkwẹn Izirẹlị pịrị tẹ ọ̀ sịn, “Jekọbụ, Jekọbụ!” Tẹ ọ̀ nwẹnị pakịrị, “Mie yẹrịị, mịanga.”

³Anịtẹso ọ̀ nwẹnị ḅẹẹ, “Yẹrị anie Tamụnọ, ị́ ḍa Tamụnọ ḅe; Ijiputi mu mẹ go ḅalafa ma; kẹ gotẹ ọkọ ḅẹẹarị, arị ị́ ḅụụ ḅụ gburo-gburotẹ opu sịẹ pakama ḅa anị yọ ḅụ.

⁴Àrị ị́ na so Ijiputi mu ḅa, tẹ pịkị sin í ọkị-ḅo ḅa; anịsakị í Josẹfụ ḅara ḅụ emi ogbo ị́ atọrụngbọ gbaịn ḅa.”

⁵Anịtẹrẹmẹ Jekọbụ Biyasẹba ḅụ saakị pakam; tẹ Izirẹlị owiapụ-awọmẹ ịna ḍaḅọ Jekọbụ na, ịna ḍọkọḍọkọ-awọmẹ na, ịna sime-ereme na dogi som kirimẹnjị-arụ mẹ tẹ Fero kẹ ọ̀ sẹịn ḅẹ fịrịma arụ mẹ ḅio.

⁶Opu anama na, ngọ na tẹ Kenanị ama ḅụ ịn sọye ḅara ḅụ nyana aị na sọ ịn kẹ Jekọbụ na ò furo-ḅẹ-apụ na ḅụụ sụa ọkị so Ijiputi mum.

⁷Ori ori owiapụ-awọmẹ na, taa-owiapụ-awọmẹ na, eremịna-awọmẹ na, taa-eremịna-awọmẹ na kẹ ọ̀ ḅụụ sụa Ijiputi ḅom.

⁸Mịọkụ mịna ẹrẹ ma anie Izirẹlị furo-ḅẹ-apụ tẹ Ijiputi sọ-ḅo apụ ma ẹrẹ: Jekọbụ na ori iyia owiapụ-awọmẹ na, Rubẹnị, Jekọbụ tarị tụḅọ (mgbe),

⁹na Rubẹnị owiapụ-awọmẹ ma na: Hanọkụ na, Palụ na, Hẹzịrọnị na, pịkị Kami na.

¹⁰Simiyọnị owiapụ-awọmẹ ma anie: Jemuhẹlị na, Jamịnị na, Ohadi na, Jakini na, Zoha na, pịkị, Kenanị ḅẹ ẹrẹḅọ ma owiḅọtụḅọ Sahulu na

¹¹Livayị owiapụ-awọmẹ ma anie: Gasọnị na, Kohatị na, pịkị Mẹrarị na;

¹²Juda owiapụ-awọmẹ ma anie Ẹrị̀ na, Ọnanị na, Sẹla na Pẹrẹzi na pịkị Zera na (kụma Ẹrị̀ na, Ọnanị na Kenanị ama ḅụ fịịm); anịsakị Pẹrẹzi owiapụ-awọmẹ anie: Hẹzịrọnị na, Emulu na.

¹³Ịsaka owiapụ-awọmẹ ma anie: Tola na, Puva na Jasubu na, pịkị Simirọnị na.

¹⁴Zẹbulọnị owiapụ-awọmẹ ma anie: Sẹrẹdi na, Ẹlọnị na, pịkị Jalili na.

¹⁵Mịna owiapụ-awọmẹ ma anie Liya awọmẹ ma tẹ Padani-aramụ ḅụ arị iyi Jekọbụ pịrị apụ ma, ori ẹrẹḅọtụḅọ Dayịna kẹ ịna aḅụụ sụa; inimgba ori owiapụ-awọmẹ na, ori eremịna-awọmẹ na kịẹn-ḅịḅị ḅụ ini kịnị suei, tẹra apụ finji.

¹⁶Gadi owiapụ-awọmẹ ma anie Zifọnị na, Hagayi na, Suni na, Ẹzịbọnị na, Iri na, Arọdị na, pịkị Arili na.

¹⁷Asa owiapụ-awọmẹ ma anie: Imina na, Isiva na, Isivi na, Beriya na, pịkị ịna ịyịmbara Sera kẹ sụa. Anịsakị Beriya owiapụ-awọmẹ ma anie: Ẹba na, Malikịyẹlị na.

¹⁸Mịna ini apụ fa si ma anie Zilipa ma tẹ Lebanị kẹ ori ẹrẹḅọtụḅọ Liya pịrị ḅọ ma iyi Jekọbụ pịrị owiapụ-awọmẹ ma.

¹⁹Jekọbụ ta Resẹlị iyi owiapụ-awọmẹ ma anie: Josẹfụ na, Benijamịnị na.

²⁰Anịsakị ini Ijiputi ama ḅụ Manasẹ na, Iferemu na iyi Josẹfụ pịrịm, inima tẹ Pọtifẹra, Ọnị anịanịa Ẹliopolisi ḅẹ agbamịẹḅọ ḅe ẹrẹḅọtụḅọ Asẹnatị iyi ọ̀ pịrị apụ ma.

²¹Anịsakị Benijamịnị owiapụ-awọmẹ ma anie Bila na, Bika na, Asịbẹlị na, Gira na, Nahamanị na, Iyi na, Rosi na, Mupimu na, Upimu na, pịkị Adi na.

²²Mịna apụ ma anie Resẹlị owiapụ-awọmẹ ma tẹ ini iyi Jekọbụ pịrị apụ ma, inimgba ngei apụ fa jei.

²³Danị owiḅọtụḅọ anie Usimu.

²⁴Nafutali owiapụ-awọmẹ ma anie: Jazịyẹlị na, Guni na, Jiza na, pịkị Silemu na.

²⁵Mịna apụ ma anie Biliya, árịma tẹ Lebanị kẹ ori ẹrẹḅọtụḅọ Resẹlị pịrị ḅọ ma owiapụ-awọmẹ ma, anịsakị arị iyi Jekọbụ pịrị apụ inimgba sọnọma apụ.

²⁶Jekọbụ owiapụ-awọmẹ ma sime-ereme ma sikima, tomi tẹ ò soku ḅụ da-da paka-ḅo tẹ Ijiputi sọ-mu apụ inimgba ini apụ ofori kịnị atesi oyi finji (66),

²⁷anịsakị Josẹfụ owiapụ-awọmẹ ma tẹ Ijiputi ḅụ ini iyi ọ̀ pịrị apụ maa apụ; Jekọbụ warị mẹ ḅẹ atomi mamgba tẹ Ijiputi ḅụ sọ-ḅo apụ kịnị atesi oyi finji (70).

²⁸Jekọbụ nwẹnị tarị ọ̀ tọrọkọ Juda kẹ Josẹfụ fịrịma ò mu Gosẹnị ḅụ ori na ẹrịyaa; tẹ ịn ḅo Gosẹnị ama mẹ la.

²⁹Anịtẹso Josẹfụ ò kirimẹnjị-arụ tẹlẹma tẹ ḅụkụlọ Gosẹnị ḅụ ọ̀ ḍa Izirẹlị na bịama ḅẹ mum; ịn ḅo bịama gbọrụ sakị Josẹfụ amịna ḅụụ pakam ọ̀ pịrị, tẹ ọ̀ kọngọ fịnama tẹ ọ̀ kọngọ ḅụ sime tẹ tẹmẹ-la ḅara kẹ owu alamam.

³⁰Izirẹlị nwẹnị Josẹfụ ḅẹẹ, “Àrị ị́ tọrụkuḅu ẹrị tẹ, tẹ nimi tẹ mịnẹ ị́ paa ḍumo-sime wararị nwẹn ḅẹẹ sakị, yee mịọkụ à nwẹnị fịị.”

³¹Anịtẹso Josẹfụ nwẹnị ori owiapụ-amịnapụ ma na, ọ̀ ḍa warị-kpo mẹ na ḅẹẹ, “à mu ḍuko Fero pịrị tẹ ọ̀ ḅẹẹ ḅa, ‘ị̀ owiapụ-amịnapụ na, ị̀ ḍa warị-kpo na tẹ Kenanị ama ḅụ sime-sime apụ ma ị̀ ḍọkụma-ḅo tẹẹ,

³²anịsakị mịna atomi ma anie nama ḍikiḍikiapụ, kẹ gotẹ ọkọ ḅẹẹarị, ini anie ḅẹẹ kụra-ḅio opu anama ḍikiḍikiapụ; anịsakị ini ịna anana na, oḅori ogbo-ogbo ma na, ịna opu anama ogbo-ogbo ma na, ye tẹ ịn nyana aị mamgba na ọkị-ḅo tẹ.’

³³Fero ọ́ sịn, tẹ ọ́ kọrị-kọrị tẹ kẹ angarị kọrịnama tiye kẹ ó gbela-gbela,

³⁴ọmịnị ọ̀ pakịrị ḅa, ‘ị́ afịrịmẹnjịapụ anie ḅẹẹ kụra-ḅio, wamịna asambịrịma sakị kụra-ḅio ọkị-ḅo mịọkụ la ḅụ wamịnị na wamịna ḍaḅọ anie opu anama ḍikiḍikiapụ,’ mịẹtẹ ó Gosẹnị ama ḅio anga ḅarị ḅara; kẹ gotẹ ọkọ ḅẹẹarị, Ijiputi-ḅẹ-apụ nama ḍikiḍikiḅọ goḅọ-goḅọ tọn-arị.”