Read kalabari Suku-saakị 49 Bible Online

Suku-saakị 49 - kalabari bible

Suku-saakị 49

¹Anịtẹso Jekọbụ nwẹnị ori owiapụ-awọmẹ sịn tẹ ḅẹẹ, “Ọmịnị ọmịna aḅụụ kobiri gboloma mịẹtẹ à tọrọkọ-jụ ḅo ḅarị ene ma ḅụ ọmịna aḅụụ paka ḅẹ ye ḍuko ọ́ pịrị ḅarị ḅara.”

²Ó kobiri tẹ pokii, yei Jekọbụ owiapụ-awọmẹ, tẹ ọmịna ḍaḅọ Izirẹlị naa.

³Rubẹnị, ị́yẹrị anie ị̀ tarị tụḅọ, ị̀ ịnyọ, pịkị ị̀ ịnyọ mẹ ḅẹ tarị sịnmgbọlụ, ḅụụ-tọn tẹịn ḅọ, pịkị kụrọ-tẹịn ḅọ.

⁴Minji gbọrụ ḅara sime-a ḅara ị́ nwẹn sime ḅa, ị́ mịẹye ḅụ sọ tẹịn ḅọ sọ ḅịa, gbala ị́ ị́ ḍa monoye kpọlịm ẹrẹsị, anịtẹso ị́ anị pilemam, ị́ anị mangịma-a!

⁵Simiyọnị na Livayị na anie owiapụ-amịnapụ; ịna okologie ma anie kụrọ amịẹaị mịẹ owuaị.

⁶Ịn ḅọị anga kọn-arị ẹkwẹn ma ḅụ à ḅịḅị suu ḅịa, Ịna kobiri sọ à mu ḅịa, Ịna ịganị ḅụ ịn kịnị ḅaam ẹrẹsị, Tẹ ịna tii tọrụ-ḅẹlẹ ḅụ nambulo aḅụọ pẹlẹ-siinm.

⁷Wori-nume sime ịna ịganị pịrịị, anị ḅalafama ḅakam ẹrẹsị Pịkị ịna owi ịganị sọ, anị guda-guda ḅakam ẹrẹsị, Àrị ịn gala-gala Izirẹlị mẹ ikelema ḅa, Anị ḅẹ atomi ma ogbo-ḅio ḅụ arị ịn wasama ḅa.

⁸Juda, ị́ owiapụ-amịnapụ í tokini ḅa; Ị́ ḅara kẹ ị́ na fịya-a apụ kọngọ ọlọ ḅa Ị́ ḍa owiapụ-awọmẹ ị́ tọrọkọ sịḅị-tuu ḅa

⁹Juda anie asambịrịma ọkụkụ; Ị́ ị́ pẹị ḅẹ nama mẹ ḅaa, tẹ pịkị-so tẹ, ì owiḅọtụḅọ Ọkụkụ sụụntẹ ḅọlọlọ ḅara kẹ ọ̀ ḅọlọlọm Ịyọrọ ọkụkụ sime-ḅara ḅụ, tụḅọ ḅiokpọ tẹ ò jikema ḅẹ?

¹⁰Ama-da mkpara mẹ Juda ḅụ sikima ḅịa, anịanịa ḅẹrẹtọnḅọ ḅụụ da mkpara mẹ ò furo-ḅẹ-apụ ḅụ so, nwenii sịẹ, sịẹ igbigi oso-oso ọ̀ pịrị ḅa; anịsakị tomi-kụlọkụlọ ma ọ̀ ḅịḅị poki ḅa.

¹¹Ori ori asambịrịma yedogi-nama kẹ kụrọ suku kpọm, Iḅitẹịn kụrọ mẹ suku ori ori owi asambịrịma yedogi-nama kpọm; Iru ḅio ori ori opu akapa sịkịrịm, Ọmbie awụ tọrụ ḅịya iru ḅio ori ọ̀ kapa sịkịrịm.

¹²Iru ori atọrụngbọ kẹ agụnkwọ ḅịyama ḅa, tẹ ndo-minji mịẹtẹ ori aka pịna-pịna ḅa.

¹³Zẹbulọnị opu tọrụ mẹ akaka ḅụ anga ḅa; Ori opu onwi-arụ ḅo-ḅo agba-pọkụ sọ ḅa, anịsakị ò kiri sara pakama mu Sayịdọnị la ḅa.

¹⁴Ịsaka anie kụrọtẹ yedogi-nama, tẹ anana ogbo ma ogbo ḅio ikiriarị

¹⁵Ori ẹrịm mịnẹ ịnyọsara yọ iḅim anịsakị kiri mẹ ḅụụ-ḅẹlẹmam mie ḅụ ori ori apana iderima yedogi pịrịm tẹ ḅo kụrọ kọrịnama ḅụ omoniḅọ sọm.

¹⁶Danị ḅẹrẹkọnḅọ sọ ori atomi pịrị ḅa, Izirẹlị ḅẹ afuro ma ḅẹ gbọrụ furo ḅara ḅụ.

¹⁷Danị etela akaka ḅẹ ododo sọ ḅa, kpakụrụtẹ etela mẹ ḅẹ si ododo, tẹ asụ ḅe ḅụọ-tongu gbọn ye ḅe, anie ḅụ ọ̀ dọkụarị ḅọ ḅe ḅịkị ọḅụ dam

¹⁸Ị́ ḅọrọma mẹ mie à koruarị ye, yei KỊNỊNYANAḄỌ.

¹⁹Ama gbaịntẹ fọịn kụrọ atomi Gadi gbaịn-koro ḅa, kụma ori pịkị ịn ḍuka tẹ ịn mangị ḅa.

²⁰Asa kiri iḅi afịaị pakama-ḅo ḅa, anịsakị ori amadapụ fị na-iḅi afịaị ḅara pakama-ḅo ḅa.

²¹Nafutali anie sịḅị nyana ḅara kẹ mangịarị tụḅụra tẹ ḅụụ-ḅẹlẹma awọmẹ iyiarị ḅọ.

²²Josẹfụ anie sịnmgbọlụ sụa — opu sịn ịkpangị, ngụngụḅa akaka ḅẹ sịnmgbọlụ sụa opu sịn ịkpangị, ori ịkpangị sụa pakama onu mẹ saḅamam.

²³Iboli tẹịn ḍin apụ ma ḅalafama ḅara kẹ owu kẹ ọ̀ pakam, ịn ḅẹlẹma ọ̀ tẹịn, tẹ ọ̀ ḅụụ-fụkama lamam;

²⁴Anịsọ ori iboli jike-a, Jekọbụ Kụrọ-nyana Gbọrụḅọ ḅe aḅara, ọ̀ ḅara-kọngọ mịẹ kụrọmam, Anana ḍikiḍikiḅọ ḅe, Izirẹlị Ịkụ ḅe ẹrẹ ḅụ.

²⁵Ị́ ḍa Tamụnọ ḅe tẹ ḅarasụa ị́ pịrị ḅarị ḅọ ḅe ḅụ, Kụrọmamgba Nyana Tamụnọ ḅe tẹ í boma ḅarị ḅọ ḅe ḅụ, ị́ ọgọnọ-jụ ḅụ simearị so mẹ ḅẹ aboma na, pokolo yọ mẹ ḅẹ aboma tẹ suku-ḅio dẹẹ wararị aị ma na, ndo ma na, furo ma na ḅẹ aboma ma na nyana ḅarị ye

²⁶Sịnmgbọlị na fịlawa na aboma, Elemu sakị ḅẹ tụndụ ma ḅẹ aboma, Sime-gbamaso atụndụ ma ọgọnọ ideri-ḅo ḅụụ-ḅẹlẹma aị. Yee mịna aboma ma Josẹfụ sịḅị ọgọnọ gbana, Ori owiapụ-amịnapụ ma ḅụ kịrị ḅele ḅọ ḅe anjị ḅụ.

²⁷Benijamịnị anie opu fịye fị kụrọ nama, Dede-ḅio pẹị anama ma ḅaa, ḅaa sararị, tẹ ḅoḅiri ḅụ arị ḍiearị.

²⁸Mịna apụ mamgba anie Izirẹlị ḅẹ oyi maa afuro finji ma; anịsakị miemẹ anie ịna ḍaḅọ kọn ịn pịrị ẹkwẹn ori ịn boma sakị ḅụ, ori ọrụḅọ-ọrụḅọ gbẹẹ boma kẹ mḅọ bomam.

²⁹Anịtẹso ọ̀ nwẹnị tọn ịn pịrị tẹ ịn ḅẹẹ, “Ala-a à fịị ḅa, tẹ ị̀ atẹngịapụ ma sime anga mu ḅa. Ọmịnị ị̀ kẹ ị̀ aḍapụ ma ḅụụ sụa tẹ Ịfụrọnị Itayịti ḅọ ḅe piri mẹ ḅio simearị fukuru mẹ ḅio ì ḍiḅii.

³⁰Anị fukuru mẹ anie Makịpẹla ḅụ Mamụrẹ ḅẹ ịrụa-saakịarị-anga ḅụ simearị ye mẹ, Kenanị sịẹ mẹ ḅio. Ebira-amụ anị kẹ piri mẹ na sụa tẹ ḍụẹịn ḍiḅi gotẹ Ịfụrọnị Itayịti ḅọ ḅe ḅara anị fẹẹm.

³¹Anịanga mie ini Ebira-amụ na ọ̀ ta Sera na ḍiḅi yee, anịanga mie ini Ayịzịkị na ọ̀ ta Ribeka na ḍiḅi yee, anịsakị anịanga mie à pịkị Liya ḍiḅi yee.

³²Piri mẹ na fukuru mẹ tẹ anị ḅio simearị ye mẹ na Itayịti apụ ma ḅara Ebira-amụ anị fẹẹm.”

³³Jekọbụ ọ̀ tọn ori owiapụ-awọmẹ ma pịrị ḅẹ aị tọn fama tẹso, ori ori aḅụọ saakị monoye mẹ ọgọnọ gbanam, tẹ ọ̀ fịịm.