Read kalabari Suku-saakị 50 Bible Online

Suku-saakị 50 - kalabari bible

Suku-saakị 50

¹Anịtẹso Josẹfụ nwẹnị ḅụụ sịẹma ọ̀ ḍa ọgọnọ gbin tẹ tẹmẹ-la ḅara kẹ owu-owu tẹ ọ̀ tọrụkuḅu nọnjị.

²Tẹ Josẹfụ tọn ori afịrịmẹnjịapụ ḅịrịapụ ma pịrịm, ini ọ̀ ḍa oju-akpakpa mẹ ḅụrụ ḅịa ḅara kẹ anị tẹlẹma-a. Anie ḅụ ḅịrịapụ ma Izirẹlị oju-akpakpa mẹ tẹlẹmam.

³Ḍin amesi anị tẹlẹma kpaịnma nwẹn ọkịm, gbala anị tẹlẹma tẹ anị kpaịn mẹ ye ḅụ ḅẹ tọnwa aị nwẹn ḅiim ẹrẹsị. Tẹ Ijiputi-ḅẹ-apụ ma ḍin tesi oyi finji (70) kẹ tẹmẹ-la ḅara kẹ ori owum.

⁴Ịn kẹ ò ḍuu ene ma ḅọrọ tẹso, Josẹfụ ẹkwẹn Fero warị-kpo mẹ pịrịm, tẹ ḅẹẹm, “Ọmịna atọrụḅio ḅụ à nwẹnị mịọkụ ḅẹlẹma ḍọkị-ẹrị-ẹrị, arị ọ́ tẹkẹm, ọmịnị ẹkwẹn Fero ḅeri ḅio suu ị̀ pịrịị, tẹ ḅẹẹm,

⁵ị̀ ḍa ị̀ mịẹtẹ à ye karị ḅara kẹ mininim, tẹ ḅẹẹm, ‘À fịị ḅẹ-yearị. Ì ḍuḅu tẹ Kenanị ama mẹ ḅụ à pẹlẹ pakama ị̀ ḅụụ pịrị wararị ḍuḅu mẹ ḅio mie ị́ ị̀ ḍiḅi ḅarị ye.’ Anịẹrẹsị, yee à mịọkụ mu ị̀ ḍa ḅe ḍiḅi, arị ị́ tẹkẹm anịtẹrẹmẹ à pịkịma-ḅo ḅa.”

⁶Fero nwẹnị pakịrị, “Ori ị́ mịẹtẹ í ye karị ḅara kẹ minini ḅara ḅụ muu, tẹ ị́ ḍa ḍiḅii.”

⁷Mie ḅụ Josẹfụ ọ̀ ḍa ḍiḅi ḅẹ mum, tẹ Fero afịrịmẹnjịapụ mamgba na, ọ̀ warị-kpo ḅẹ omongiapụ mamgba na, Ijiputi ama mẹ ḅẹ omongiapụ mamgba na,

⁸Josẹfụ warị-kpo mẹ na, ori owiapụ-amịnapụ ma na, ọ̀ ḍa warị-kpo mẹ na ọ̀ ḅụụ sọ tẹ mum; ịna awọmẹ na, ịna anana na oḅori na ogbo-ogbo ma na, ịna opu anama ogbo-ogbo ma na kịngẹ mie Gosẹnị ama mẹ ḅụ kirikọn yee.

⁹Kirimẹnjị-arụ na, asụ-dọkụapụ na sọ ọ̀ ḅụụ sọ tẹ mum; ori na mu inweni-ogbo mẹ gburo-gburo lamam.

¹⁰Ịn ḅo Etadi mgbọlị-afịaị sẹlẹ kiri mẹ tẹ Jodanị ọgọnọ-jụ simearị ye mẹ la tẹso, ịn kpọma oloku-oloku owu, tẹ kururu ḅara kẹ gburo-gburo owu kọnm, tẹ Josẹfụ sọnọma aḍin kẹ ḍụẹịn ḍuu amịẹaị mịẹ ọ̀ ḍa pịrịm.

¹¹Ama mẹ ḅio angarị apụ ma, Kenanị ḅẹ apụ ma, Etadi mgbọlị-afịaị sẹlẹ kiri ḅụ ḍụẹịn ḍuu ḅara mẹ ẹrị tẹso, in nwẹnị ḅẹẹ, “Miemẹ anie Ijiputi-ḅẹ-apụ ma ḅioḅu ḍụẹịn ḍuu ḅara.” Anịẹrẹsị in ye-yọ mẹ sịnm Ebẹlị-mizirehimụ; anị Jodanị mẹ ọgọnọ-jụ ḅụ emi.

¹²Mị-ḅara mie ori owiapụ-awọmẹ ma mịẹ ọ̀ pịrị ḅara, ọ̀ tọn ịn pịrị ḅara ḅụ;

¹³kẹ gotẹ ọkọ ḅẹẹarị, ori owiapụ-awọmẹ ma ò dogi so. Kenanị ama mẹ mum, tẹ ọ̀ kẹ Makịpẹla piri mẹ ḅụ ḅẹ fukuru mẹ ḅio ḍiḅim, Mamụrẹ ḅụ ịrụa-saakịarị-anga mẹ ḅụ, aniemẹ tẹ Ebira-amụ nyana tẹ kẹ ḍụẹịn ḍiḅi ḅẹ ẹrẹsị Ẹfụrọnị Itayịti pụmbụ ḅẹ ḅọ ḅe ḅara ḅụ kẹ piri mẹ na sụa fẹẹ ye mẹ.

¹⁴Josẹfụ ọ̀ ḍa ḅe ḍiḅi fama tẹso, ori ori owiapụ-amịnapụ ma na, inweni-mgba tẹ ori na ọ̀ ḍa ḍiḅi ḅẹ mu apụ ma na pịkịma Ijiputi mum.

¹⁵Josẹfụ owiapụ-amịnapụ ma ịna ḍaḅọ fịị tẹ mẹ ẹrị tẹso, ịn nwẹnị ḅẹẹ, “Anị inetẹ mịẹ ḅa mịnẹ Josẹfụ wa ḍiki-ḅioḅu ḅa, tẹ si tẹ wa kẹ ọ̀ mịẹ aị mamgba kẹ pịkị wa gbẹẹ ḅa.”

¹⁶Mie ḅụ ịn nwẹnị oku kẹ Josẹfụ fịrịma, tẹ ḅẹẹm, “Ị́ ḍa miemẹ tọn tẹrẹmẹ ọ̀ fịịm,

¹⁷‘Ó Josẹfụ ḅẹẹ, àrị ị́ tẹkẹm ị́ owiapụ-amịnapụ mịẹ-irima mẹ na, ịna si mẹ na wẹrịsoo, gbala ịn siye kẹ ị́ mịẹm ẹrẹsị.’ Anịsakị mịọkụ wa ị́ tẹkẹm, ị́ aḍapụ ma Tamụnọ ḅe afịrịmẹnjịapụ ma mịẹ-irima mẹ wẹrịsoo.” Ịn ḍuko ọ̀ pịrị tẹso, Josẹfụ nwẹnị tẹmẹ-la ḅara kẹ owu.

¹⁸Ori owiapụ-amịnapụ ma sọ anịtẹrẹmẹ ḅom, tẹ ọ̀ tọrọkọ ḅịkị-koro, tẹ ḅẹẹm, “Ḍikii wamịnị anie í omoniapụ.”

¹⁹Kụma Josẹfụ nwẹnị ịn ḅẹẹ, “Ọ́ ḅalafa ma, kẹ gotẹ ọkọ ḅẹẹarị, à ḅọrọ Tamụnọ kiri ḅụ emi?

²⁰Ọmịnị kụma, ó siye tọn ị̀ pịrịm, kụma Tamụnọ anị kẹ iḅiye sọmam, mịẹtẹ anị ḍumo wararị tọnwa atomi ḍumoma ḅẹ ḅara, ịn wẹrịtẹ mịmgba ḅụ sime-ḅara.

²¹Anie ḅụ ọ́ ḅalafa ma, arị ọmịnị na, ọmịna ḍọkọḍọkọ-awọmẹ na ḍikiḍiki ḅa.” Ọ̀ mị-ḅara kẹ ịn ḅiokpọma tẹ ịn dedemam.

²²Mị-ḅara ḅụ Josẹfụ na ọ̀ ḍa warị-kpo mẹ na Ijiputi ḅụ angam; tẹ Josẹfụ kụra sọnọa si oyi finji (110) kẹ ḍumo-simem.

²³Josẹfụ ḍumo mu Iferemu awọmẹ ḅụ tẹrẹị karama ḅụọ (anie taa na, ile na, ọsịkịsịkị na) ẹrịm. Manasẹ owiḅọtụḅọ Mekiya awọmẹ sọ Josẹfụ in ẹrịm.

²⁴Josẹfụ nwẹnị ori amịnapụ ma ḅẹẹ, “À fịị ḅẹ-yearị, kụma Tamụnọ ḅo ḅarasụa ọ́ pịrị ḅa, tẹ mị ama mẹ ḅio ọ́ pakama ama mẹ tẹ ò ye karị ḅara kẹ minini Ebira-amụ na, Ayịzịkị na, Jekọbụ na pịrị ama mẹ mu ḅa.”

²⁵Anịtẹso Josẹfụ Izirẹlịapụ ma na ọḅọkụ fịm, tẹ ḅẹẹm, Tamụnọ ḅo ḅarasụa ọ́ pịrị ḅa, anịsakị ọ́ mịanga ḅụ ị̀ mgbe ma dogi so ḅa.

²⁶Mie ḅụ Josẹfụ fịịm, kụra sọnọa si oyi finji ọ̀ sịḅị ḅọrọ tẹso, tẹ ini ori oju-akpakpa mẹ ḅụrụ ḅịa ḅara kẹ anị tẹlẹma kpaịnma tẹ kẹ Ijiputi ḅụ ḍụẹịn igbe ḅio sụa wẹrịm.