Read kalabari Suku-saakị 8 Bible Online

Suku-saakị 8 - kalabari bible

Suku-saakị 8

¹Kụma Tamụnọ Noha na, piri-ḅio-ḅẹ anama mamgba na, opu anama mamgba na tẹ ori na opu arụ mẹ ḅio sime aị ma kẹ ḅiokoromam. Tẹ Tamụnọ mịẹtẹ fẹrụ tomikiri mẹ ḅụ fiem, tẹ minji mẹ saakị ọmọ iderim;

²pokolo ayeyọ ma ḅẹ ngụngụḅa ma na, so ma ḅẹ ikiḅa-aḅọkọ ma na gbaịnm, so ma ḅio ḅụ sararị eene mẹ daasịẹm,

³tẹ tomikiri mẹ ḅụ minji mẹ sịkọpẹlẹ-a ḅara kẹ ọmọm. Ḍin sọnọma si oyi finji (150) mẹ ḅẹ kunoma ḅụ minji mẹ kẹlẹ iderimam.

⁴Sọnọma akalụ karama akalụ mẹ ḅẹ tẹra aḍin fa si karama eneḅaka ḅụ opu arụ mẹ ḅo Araratị ḅẹ tụndụ ma ọgọnọ gbanam.

⁵Minji mẹ paa ọmọ iderima-iderima-iderima nwenii mu oyi akalụ karama akalụ mẹ lam; oyi akalụ karama akalụ mẹ ḅẹ tarị eneḅaka ḅụ tụndụ ma asịḅị paka, paka-ḅo tẹ kịnị ẹrịm.

⁶Ḍin amesi ḅo ḅọrọ tẹso, Noha nwẹnị ikiḅa-ḅọkọ mẹ tẹ opu arụ mẹ ḅụ ọ̀ sụa ye mẹ finji,

⁷tẹ nwẹnị ịn kẹ revini sịn gbọrụ opu feni fịrịma pakama feni ḅe fiin-fiin ikelema-ikelema nwenii minji mẹ kiri mẹ ḅụ fa kpalịkpalị tẹ kiri mẹ samụnọm.

⁸Anịtẹso ọ̀ nwẹnị olosịkịya fịrịma pakama mịẹtẹ ò mu ḍiki ḅẹ ḅara minji mẹ kiri mẹ ọgọnọ iderima tẹ ḅoto,

⁹kụma olosịkịya ḅe sịẹ ḅẹ gbọrụ anga sọ ḍọkị-ẹrịa tẹ ọ̀ ḍọkụma-ḅo ḅẹ ḅara kẹ pịkịma opu arụ mẹ ḅom, gbala minji mẹ paa tomikiri mẹ ḅụ kọpụ wararị ẹrẹsị. Anie ḅụ Noha ọ̀ ḅara sụn-pakama tẹ olosịkịya ḅe kuun-ọkị tẹ ori ọkị-ḅo opu arụ mẹ ḅio sunm.

¹⁰Noha jen sọnọma aḍin kẹ korum, tẹ pịkị sin opu arụ mẹ ḅio olosịkịya ḅe fịrịma pakamam;

¹¹tẹ ḅoḅiri-so ḅụ olosịkịya ḅe nwẹnị fiin pịkị ọ̀ ḍọkụma-ḅo, anịsakị ḍikii, ori ọ̀ ḅịḅị ḅụ ori ịwọma kaịn ọkị wararị gbọrụ olivu ịnyịnya kpopu wararị; anie ḅụ Noha nimim mịnẹ minji mẹ iderima tẹ tomikiri mẹ ḅụ.

¹²Anịtẹso ọ̀ nwẹnị pịkị jen sọnọma aḍin kẹ koru, tẹ nwẹnị olosịkịya ḅẹ fịrịma pakama anịsakị ọ̀ ḅarị jen-maaịn kẹ pịkịma ọ̀ ḍọkụma-ḅoa.

¹³Noha sịḅị kụra gbọrụ ẹndẹ oyia asi finji na gbọrụ kụra karama kụra mẹ ḅẹ tarị akalụ mẹ ḅẹ tarị ene ḅụ minji mẹ kiri mẹ ḅụ fa kpalịkpalịm. Noha nwẹnị ịn kẹ opu arụ mẹ gbaịn ye mẹ sin tẹ ḍiki, nwẹnị ẹrị mịnẹ kiri mẹ sakị samụnọ tẹẹ.

¹⁴Maaịn karama akalụ mẹ ḅẹ, tẹra aḍin fa suei eneḅaka ḅụ kiri mẹ gbọrsịḅị samụnọm.

¹⁵Anịtẹso Tamụnọ nwẹnị Noha ḅẹẹ,

¹⁶“Ị́yẹrị na, ị́ ta na, í owiapụ-awọmẹ na, í owiapụ-awọmẹ ma sime-ereme na kẹ ị́ ḅụụ sụa tẹ opu arụ mẹ ḅio koro-ḅoo.

¹⁷Ḍumo wararị ye goyegoye tẹ ị́nịna simearị meni sụa aị mamgba anie feni amẹẹ na, nama amẹẹ na, ikiriarị ye tẹ kiri mẹ ọgọnọ sime tẹ ikiri-ikiri ye goyegoye kẹ ị́ ḅụụ sụa koro-ḅoo, mịẹtẹ ịn tọnwa ḅara kẹ kiri mẹ ọgọnọ ye kọn fị, tẹ tomikiri mẹ ḅụ iyi tẹ lolo-kama ḅẹ ḅara.”

¹⁸Mie ḅụ Noha ori owiapụ-awọmẹ na, ọ̀ ta na, ori owiapụ-awọmẹ ma sime-ereme na kẹ ọ̀ ḅụụ sụa tẹ koro-som.

¹⁹Anịsakị piri-ḅio-ḅẹ nama goyegoye na ikiriarị ye goyegoye na; feni goyegoye na, ye goyegoye tẹ kiri mẹ ọgọnọ mẹnjị-mẹnjị ye goyegoye ogbo-ogbo ḅụ opu arụ mẹ ḅio mẹnjị-mẹnjị korom.

²⁰Anịtẹso Noha nwẹnị gbọrụ agbamịẹ-anga nama KỊNỊNYANAḄỌ ḅe pịrị, tẹ fịafịatẹ nama goyegoye na, fịafịatẹ feni goyegoye na ḅụ ye ọkị tẹ kẹ dọkịma-agba mịẹ agbamịẹ-anga mẹ ọgọnọ.

²¹Tẹ agba mẹ ḅẹ kụnụ mu KỊNỊNYANAḄỌ ḅe la tẹso, KỊNỊNYANAḄỌ ḅe nwẹnị ò ḅioḅẹngbọ ḅụ ḅẹẹ, “À ḅarị jen-maaịn kẹ tomḅọ sịḅị gotẹ kiri mẹ wori ḅịa, kẹ gotẹ ọkọ ḅẹẹarị, tomḅọ kala-sakị kụra-ḅio ò ḅioḅẹngbọ ḅụ siye sikima ò jen kẹ ḅiokoroma-a; à pịkị ḅarị gbala-gbala jen kẹ ḍumo warị ye goyegoye ḅaa guluguluma ḅịa à mịọkụ mịẹ tẹ ḅara mẹ.

²²Tomikiri mẹ simearị sakị goyegoye, fịye ḍiḅi sakị, na, fịye soku sakị na; oḅoku na, ọfịrị na ịrụa kụra sakị na, fẹngụ sakị na; eneḅaka na, ḍin na ḅarị kunoma ḅịa.”