Read kalabari 2 Samụẹlị 16 Bible Online

2 Samụẹlị 16 - kalabari bible

2 Samụẹlị 16

¹Devidi kẹlẹ kẹ mẹnjị tụndụ mẹ sịḅị ọgọnọ mẹ ḅọrọ tẹso, Mẹfibosẹtị fịrịmẹnjịḅọ Ziba nwẹnị fịturu kpo oyia asi na, samụnọtẹ-girepu (anie ịn kẹ resini sịn-arị ye) ḅẹ lịkalị sọnọa asi na, ịrụa kụra sakị ḅẹ asịnmgbọlụ ḅẹ sọnọa asi na, iru ḅin wararị gbọrụ nama-apara akpa na kẹ maa yedogi-anama ọgọnọ gbana tẹ kẹ ḅo ori na bịama.

²Amadaḅọ ḅe nwẹnị Ziba gbela, “Í tiegotẹ mịna aị ma ọkị-ḅo?” Ziba nwẹnị pakịrị, “Yedogi-anama ma sime amadaḅọ ḅe warị-kpo mẹ kẹ dọkụ na koro na pịrịm, ịrụa kụra sakị ḅẹ asịnmgbọlụ ma sime asawọ ma fị pịrịm; anịsakị iru mẹ sime ịkpa mẹ ḅio ịnyọ-pọkọta apụ ḅuu pịrịm.”

³Amadaḅọ ḅe nwẹnị gbela, “Ị́ sịḅịdaḅọ Sọlụ taa-owiḅọtụḅọ Mẹfibosẹtị ḅe ọ̀ tọ-anga emi?” Ziba nwẹnị amadaḅọ ḅe pakịrị, “Ḍikii, ò Jeruselemu ḅụ emi, gbala ọ̀ ḅẹẹm, ‘Mịmgba mie Izirẹlị warị mẹ ị̀ ḍa ama-da mẹ pịkịma ị̀ pịrị ḅarị ene.’ ”

⁴Anịtẹso amadaḅọ ḅe nwẹnị Ziba ḅẹẹ, “Ọkọọ ḅẹḅẹ, mịọkụ ye mamgba tẹ sime Mẹfibosẹtị pịrị aị goyegoye í nye.” Ziba nwẹnị pakịrị, “À kụn kẹ ị́ pịrịm, yee à sakị mamgba í ḍiki-tọrụ ḅụ ḍiki-ḅụụjịrị ḍọkị-ẹrị ị̀ nyana amadaḅọ.”

⁵Amadaḅọ Devidi ḅo Bahurimu la tẹso, Sọlụ warị mẹ ḅẹ furo mẹ ḅẹ gbọrụ owiḅọ nwẹnị anị anga paka-ḅo, oriḅe ẹrẹ anie Simeyi, Gera owiḅọtụḅọ ḅe; tẹ ò ḅo ḅara mie ọ̀ saakị sịkọpẹlẹ-a ḅara kẹ gboo na, karị na ye.

⁶Ọ̀ nwẹnị ḍụḅarị apakịrị pakịrị kẹ Devidi na, Amadaḅọ Devidi afịrịmẹnjịapụ mamgba na gbin, tomi mamgba na, kụrọ nyana tẹ opu atomi mamgba na ori ama-ḅara na, ori ere-ḅara na ḅụ emi.

⁷Simeyi gboo-na-karị-naarị ḅara ḅụ, ori mẹẹ, “Mẹnjị-soo, mẹnjị-soo, ị́yẹrị kịnị-ḅa-sofị, ị́yẹrị papaa tomḅọ!

⁸KỊNỊNYANAḄỌ ḅe ị́ ọgọnọ Sọlụ warị mẹ ọmbie mẹmgba gbẹẹfị ḅii tẹ, oriḅe sime-kiri mẹ tẹ ị́ ọkị tẹ ama-daarị ḅọ ḅe; anịsakị KỊNỊNYANAḄỌ ḅe ama-da mẹ kẹ í owiḅọtụḅọ Abusalọmụ ḅara-ḅio ọ̀ pịrị tẹ. Ḍikii, í sima sara ye mẹ ị́ ọgọnọ emi, ị́yẹrị anie kịnị-ḅa-sofị.”

⁹Anịtẹso Abisahị, Zeruya owiḅọtụḅọ ḅe nwẹnị amadaḅọ ḅe ḅẹẹ, “Ḅie fịtẹ obiri ḅe tiegotẹ ye karị, karị ị̀ nyana amadaḅọ ḅe pịrị ḅẹ? Yee à saḅa mu, tẹ ọ̀ sịḅị pẹlẹ-siin.”

¹⁰Kụma amadaḅọ ḅe nwẹnị ḅẹẹ, “Àrị ọmịnị na tọ mịẹ ye nyana ọmịnị Zeruya owiapụ-awọmẹ. KỊNỊNYANAḄỌ ḅe ọ̀ ḅẹẹm, ‘Ye karị karị Devidi pịrịị,’ gotẹ ọ̀ karịarị ọkụma, tụḅọ anịtẹrẹmẹ ḅẹẹ ḅẹ, ‘Í tiegotẹ nwẹn mịẹ?’ ”

¹¹Tẹ Devidi nwẹnị Abisahị na, ori afịrịmẹnjịapụ mamgba na ḅẹẹ, “Ḍikii, yẹrị ḅarana iyi owiḅọtụḅọ mie ị̀ ḅaa ḅẹ ḍọkịarị ye, anị nwẹnị mịọkụ tọ-ḅara na gbasị ḅara kẹ ḅie Benijamịnị furo-ḅẹ-ḅọ ḅe na sime ḅa! Ọ̀ wẹrịsoo, tẹ yee ọ̀ karị; kẹ gotẹ ọkọ ḅẹẹarị, KỊNỊNYANAḄỌ ḅe ọ̀ ḅẹẹm.

¹²Sosi-ọkụma KỊNỊNYANAḄỌ ḅe toluma ị̀ ḅụụ-fụka mẹ ḍiki ḅa, anịsakị anieḅụ KỊNỊNYANAḄỌ ḅe mịmgba ị̀ ọgọnọ ḅụ mị karịye mẹ gotẹ iḅi kẹ ị̀ gbẹẹ ḅa.”

¹³Anieḅụ Devidi na, ori atomi na opu etela mẹ ḅụ mẹnjịma mum. Simeyi nwẹnị tụndụ mẹ akaka ori na dama-dama; tẹ ọ̀ mẹnjịma muarị ḅara ḅụ, ye karị ọ̀ pịrị-pịrị tẹ ḍụḅarị apakịrị-apakịrị kẹ ò gbinm, pịkị lịka kẹ ọ̀ sarama mum.

¹⁴Amadaḅọ ḅe na, ori atomi tẹ ori na sime apụ mamgba na ḅo Jodanị mẹ akaka la sakị ịnyọ ịn ta tẹẹ, tẹ ori anị anga ḅụ sime tẹ ịnyọsaram.

¹⁵Mịọkụ Abusalọmụ na, tomi mamgba Izirẹlịapụ ma na ḅo Jeruselemu lam, anịsakị Ayitofẹlị ori na sọ tẹ ḅom.

¹⁶Tẹ Usayị, Akayịtị ḅọ, Devidi ikiaḅọ ḅe ḅo Abusalọmụ la tẹso, Usayị nwẹnị oloku tẹ Abusalọmụ ḅẹẹ, “Nangwọ ḍumo sime amadaḅọ ḅe pịrịị! Nangwọ ḍumo sime amadaḅọ ḅe pịrịị!”

¹⁷Abusalọmụ nwẹnị Usayị ḅẹẹ, “Mie ị́ nyana ị́ ikiaḅọ Devidi pịrị sịḅị-tuu mẹ? Í tiegotẹ ị́ ikiaḅọ na so-a?”

¹⁸Tẹ Usayị nwẹnị Abusalọmụ pakịrị, “Ẹn-ẹn, kẹ gotẹ ọkọ ḅẹẹarị, oriḅe tẹ KỊNỊNYANAḄỌ ḅe na, mịna atomi ma na, Izirẹlịapụ mamgba na sẹlẹ-ọkị tẹ ḅọ ḅe mie à sime pịrị ḅarị ḅọ, anịsakị ori na, ị̀ na mie sime ḅarịye.

¹⁹Sọ tẹ paka ḅara ḅụ, à fịrịmẹnjị tụḅọ pịrị na-iḅi? Anị ori owiḅọtụḅọ ḅe sọ na-iḅi-a? À wẹrịtẹ fịrịmẹnjị ị́ ḍa pịrị ḅara, mie à fịrịmẹnjị ị́ pịrị ḅarị ḅara.”

²⁰Anịtẹso Abusalọmụ nwẹnị Ayitofẹlị ḅẹẹ, “Ị́ datụkụma nimi ẹkwẹn kọn wa pịrịị; wa tiye mịẹ ḅẹ?”

²¹Ayitofẹlị nwẹnị Abusalọmụ ḅẹẹ, “So ị́ ḍa ịgwa-ereme ma tẹ ò koromam warị mẹ ḍikiḍiki kẹ ḅẹẹ apụ ma ḍọkụma-ḍọkụma-muu, anịsakị Izirẹlị mẹmgba naa ḅa mịnẹ ị́ ị́ ḅụụ kẹ ị́ ḍa na fịya-a ḅọ sọma tẹẹ, anịsakị anị nwẹnị ịnyọ kẹ tomi mamgba tẹ ị́ ḅụụ emi apụ ma aḅara pịrị ḅa.”

²²Anieḅụ ịn nwẹnị warị-isun mẹ ọgọnọ akpụrụ-warị pike Abusalọmụ pịrị, tẹ Abusalọmụ nwẹnị so ọ̀ ḍa ịgwa-ereme ma ḍọkụma-ḍọkụma-mu Izirẹlị mẹmgba tọrụ-ogbo ḅụ.

²³Arị ene ma ḅụ datụkụma nimi ẹkwẹn tẹ Ayitofẹlị kọn aị ma, gbala Tamụnọ ḅịḅị ḅii ḅara ḅụ ḅo ẹkwẹn-aḅịḅị sime-ḅara simem; anị ḅara mie Devidi ḅụụ-o, Abusalọmụ ḅụụ-o, Ayitofẹlị datụkụma nimi ẹkwẹn mamgba yela ḅara.