Read kalabari 2 Samụẹlị 22 Bible Online

2 Samụẹlị 22 - kalabari bible

2 Samụẹlị 22

¹Devidi mị nume mẹ ḅẹ ẹkwẹn-aḅịḅị ma kọn KỊNỊNYANAḄỌ ḅe pịrịm ene mẹ tẹ KỊNỊNYANAḄỌ ḅe ori na fịya-a apụ mamgba ḅara ḅụ na, Sọlụ ḅara na ḅụ ọ̀ ḍụa-ḅọrọma sakị.

²Ori mẹẹ: KỊNỊNYANAḄỌ ḅe anie ị̀ ịkụ, ị̀ owu-kụrọnịḅọ, pịkị ị̀ ḍụa-ḅọrọmaḅọ.

³Ị̀ Tamụnọ, ị̀ ịkụ, ḅụụ ḅụ à ḅụụ ḅọịarị ḅọ, ị̀ ekpeke, ị̀ ḅọrọma ịfalị ḅe, ị̀ kụrọtẹ ḅọị anga pịkị ị̀ ḅụụ ḅọị yọ, ị̀ ḅọrọmaḅọ; ị́yẹrị ye kẹ kịnị lama ye ḅụ ị̀ ḅọrọmam.

⁴À KỊNỊNYANAḄỌ ḅe tẹ tokini gbẹ ḅọ ḅe tẹkẹm, anịsakị ori ị̀ ḅọrọmam, ị̀nịna fịya-a apụ ma aḅara ḅio.

⁵Gbala fị ọnụngọ ma kuro ì ikelemam, gbọrsịḅị ḅioḅẹlẹ fama owi-minji ị̀ gbaịnm;

⁶Fị dogi-ḅoarị ọhọm ị̀ gbori-ikelemam, tẹ ḍuḅu mẹ ḍịẹịn tuu sara ị̀ pịrịm.

⁷Ị̀ ḅụụ-ḅalaḅala ḅụ à KỊNỊNYANAḄỌ ḅe sịnm. Ị̀ Tamụnọ ḅe mie à sịn ḅọọ. Ọ̀ tẹkẹ warị ḅụ ori ị̀ pọkọ naam, tẹ ì owu ḅo ori aḅeri lam.

⁸Anịtẹso kiri mẹ kpoo tẹ kụrọm; So ma sukutarị-aḍụḅarị ma jikem, tẹ puum, gbala ori ịganịm ẹrẹsị.

⁹Ọ̀ nini ḅụ onwi turee-tureema paka iwom, tẹ ye gulugulumarị fịnị ọ̀ ḅịḅị paka-ḅom; kamarị anyịmgbọ ọ̀ ḅụụ kọrị pakam.

¹⁰Ò so ma tumam, tẹ ideri-ḅom; furu-kịtịpụtẹ kanakana ori aḅụọ suku-ḅio simem.

¹¹Ọ̀ gbọrụ sẹrobu ọgọnọ ḅụ dọkụm, tẹ fiinm; kụrọ fẹrụ mẹ apamba ọgọnọ ḅụ ini ori ẹrịm.

¹²Ọ̀ kanakana pakama ọ̀ ḅụụ ikelemam, ọ̀ sịḅị kikima ye anie kobiri tẹ minji kpiti So-tọrụ.

¹³Ọ̀ tọrọkọ ḅịyarị bele mẹ ḅụ, kamarị anyịmgbọ kọrị pakam.

¹⁴KỊNỊNYANAḄỌ ḅe So-ḅio so-alagba tẹịnm, tẹ Geletẹịn Ḅọ ḅe ọ̀ pọkọ kẹ ẹkwẹnm.

¹⁵Tẹ ori okoro-ḍiein ma fịrịma pakamam, tẹ ịn gala-galamam; so ḅalapụm, tẹ ịn mangịm.

¹⁶KỊNỊNYANAḄỌ ḅe ḍiki ịganị mẹ ḅụ, ò nini ḅẹ ọwụ mẹ ḅẹ fie-paka ḅụ tomikiri mẹ ḅẹ sukutarị-aḍụḅarị ma ḅara kikima-a, anịtẹso tomi opu tọrụ mẹ ḅẹ akuḅu ma ẹrịm.

¹⁷Gele yọ ḅụ ò sime tẹ ḅo lam, ori ị̀ ọkịm, ori owolo mẹ ḅio ị̀ nụnụ pakama-ḅom.

¹⁸Ị̀ na fịya-a kụrọ ḅọ ḅe ḅụ, ori ị̀ ḍụa-ḅọrọmam, inima tẹ ì ḍiki-ḅioḅẹlẹ-a apụ ma; gbala ị̀ ḅụụ ḅụ in kụrọ ḅakam ẹrẹsị.

¹⁹Ị̀ ḅụụ-fụka ene mẹ ḅụ ịn ḅo ị̀ jụụm; kụma KỊNỊNYANAḄỌ ḅe anie ì ḍụa ye.

²⁰Ori ị̀ kẹ finjimatẹ anga ḅom, ori ị̀ ḍụa-ḅọrọmam, gbala ori ị̀ ḅụụ ḅioḅẹlẹ nyanam ẹrẹsị.

²¹KỊNỊNYANAḄỌ ḅe ị̀ karakara sime-ḅara ḍiki ị̀ gbẹẹm; ori ị̀ aḅara ma ḅẹ fịafịa la ḅara ḍiki ị̀ gbẹẹm.

²²Kẹ gotẹ ọkọ ḅẹẹarị, à KỊNỊNYANAḄỌ etela ma kokom tẹ si-sịḅịḅio-sụa ḅara ḅụ ị̀ Tamụnọ ḅụ ḅele-a.

²³Kẹ gotẹ ọkọ ḅẹẹarị, ori ọ̀ kụrọ ḅụ tọn aị mamgba ị̀ tọrọkọ emi, tẹ ori oloko kẹẹ wararị aị ma ḅụ amụ à pịkị akaka da-a.

²⁴Ọ̀ tọrọkọ, kẹ ye kẹ ị̀ ọlọ-ọlọ ye ofori, tẹ ḅẹrẹ-ḅarasii ḅụ ị̀ ḅụụ ọlọ-sịẹmam.

²⁵Anịẹrẹsị KỊNỊNYANAḄỌ ḅe ị̀ karakara sime-ḅara ḍiki ị̀ gbẹẹ tẹ, ò ḍiki-tọrụ ḅụ ị̀ fịafịa wẹrịtẹ sime-ḅara.

²⁶Sịḅị-tuu apụ ma, ị́ sịḅị-tuu ḅara kẹ ḅụụ kẹ ịn ḍiem, ye kẹ ọlọ-ọlọ ọkụ ofori ḅọ ḅe, ye kẹ ọlọ-ọlọ ọkụ ofori ḅara kẹ ị́ ḅụụ kẹ ò ḍiem.

²⁷Pikiri-a ḅọ ḅe, ị́ pikiri-a ḅara kẹ ḅụụ kẹ ò ḍiem, fangala wararị ḅọ ḅe, í penge ḅara kẹ ḅụụ kẹ ò ḍiem.

²⁸Ị́ ḅụụ iderima atomi ḍụa-ḅọrọmam, kụma ị́ atọrụngbọ ḅụụ-gelema ḅọ ḅe iderim ḅẹ tẹ ori ọgọnọ gbanam.

²⁹Yei KỊNỊNYANAḄỌ karakara-ḅara-ḅụ ị́yẹrị anie ị̀ tọnjọọ anịsakị ị̀ Tamụnọ, ori ị̀ kanakana mịẹ belemam.

³⁰Karakara-ḅara-ḅụ, ị́ ḅụụ mie arị inetẹ ọmụ-ogbo kọsịma ḅarịye tẹ ị̀ Tamụnọ ḅụụ, inetẹ onu fiin saḅa ḅarịye.

³¹Ḅị Tamụnọ ḅe — ori etela karakara gbasịm; KỊNỊNYANAḄỌ ḅe karịma ye mẹ anie karakaraye; ori anie ekpeke sọ inima tẹ ọ̀ ḅụụ ḅio ḅụụ ḅọị apụ mamgba pịrị ḅọ.

³²KỊNỊNYANAḄỌ ḅe sikima kụma, tụḅọ Tamụnọ? Anịsakị wamịna Tamụnọ ḅe sikima kụma ịkụ anie tụḅọ?

³³Ḅị Tamụnọ ḅe anie ị̀ kụrọtẹ ḅụụ ḅọị anga, tẹ mịẹ tẹ gberie-sọ ì etela la-a.

³⁴Ori ị̀ aḅụọ kẹ tụḅụra aḅụọ pembe aḅụọ sọmam, tẹ gele ayọ ma ọgọnọ ḍụkụ tẹ ye ị̀ la-a.

³⁵Ò ye kẹ ị̀ aḅara toluma ọmụ pịrịm, mịẹ tẹ ị̀ aḅara kọngọ inetẹ ojo iboli anda ḅẹ ḅara.

³⁶Ị́yẹrị ị́ ḅọrọma ekpeke mẹ kẹ ị̀ pịrị tẹ anịsakị ị́ ḅarasụa ị̀ mịẹ gburo-gburomam,

³⁷Ì suku-ḅio í ḅele anga kẹ ị̀ mẹnjị aḅụọ ma pịrịm tẹ ị̀ aḅụọ sịnịnị-a.

³⁸Arị ị̀ na fịya-a apụ ḍukam, tẹ ịn ḅaam, tẹ pịkị ọḅụ daa nwenii ịn fịị fama.

³⁹Arị ịn ḅaa famam; arị in temi toluma tẹ mịẹ tẹ ịn saakị-a; ini ị̀ aḅụọ-suku ḅịkị korom.

⁴⁰Gbala ị́yẹrị ịnyọ kẹ ì ḅiri pono owu mẹ pịrịm ẹrẹsị; ị́yẹrị mie mịẹ tẹ ị̀ na fịya-a tẹ owu kẹ ị̀ paka apụ ì suku-ḅio ḅile yee.

⁴¹Ị́yẹrị ị̀ na fịya-a apụ ma mịẹ tẹ ini ọḅụ pịkị ì gbin tẹ mangịm inima tẹ ì ḍiki-ḅioḅẹlẹ-a apụ ma, tẹ arị ịn ḅaa famam.

⁴²Ịn ḍikim, kụma ịn ḅọrọma ḅẹ gbọrụḅọ-sọ ofori, ịn KỊNỊNYANAḄỌ ḅe tẹkẹm, kụma ori ịna tẹkẹ pakịrị-a

⁴³Àrị ịn pẹlẹ kọsịma tẹ ịn kiri mẹ ḅẹ fọọn kịkam, àrị ịn gbẹẹ kọsịmam, tẹ etela ma ḅẹ lịka nanga ḅara kẹ ịn nangam.

⁴⁴Tomi ma na, ịna ịgbanịya ḅụ ị́ ị̀ ḍụa-ḅọrọmam; sịẹ-sịẹ ma kẹ sịḅịdaḅọ ḅara kẹ ị́ ị̀ wẹrịm; tomi tẹ à nimi-a apụ fịrịmẹnjị ị̀ pịrịm.

⁴⁵Igoniapụ ḅo-ḅo sịḅị-tuu ị̀ pịrịm; ini ị̀ naa gbọrụ sakị, ini ị̀ ḅịḅị pokim.

⁴⁶Igoniapụ tẹmẹ fuku-faam, tẹ ịna fọnya ḅụ, ịn ḅụụ-sẹkị na ḅom.

⁴⁷KỊNỊNYANAḄỌ ḅe ḍumo-sime wararị, anịsakị boma sime ị̀ ịkụ ḅe pịrị, gele sime ị̀ Tamụnọ ḅe pịrị, ị̀ ḅọrọma ịkụ ḅe,

⁴⁸Tamụnọ ḅe tẹ gbẹẹfị ḅii ị̀ pịrị ḅọ ḅe, tẹ tomi iderima ị̀ ḅụọ suku-ḅio wẹrị ḅọ ḅe,

⁴⁹oriḅe tẹ ị̀ na fịya-a apụ ḅara ḅụ ị̀ pakama-ḅo ḅọ ḅe ị́yẹrị ị̀ saakị-gelema ì ḍiki-ḅioḅẹlẹ-a apụ ma nẹngịmarị ị́yẹrị ị̀ ḍụa-ḅọrọmam ye kẹ kịnị lama apụ ma aḅara ḅụ

⁵⁰Yei KỊNỊNYANAḄỌ, miemẹ gotẹ arị í tokini gelema ḅa sịẹ, sịẹ ma ogbo-ḅio tẹ tokini anume su-su ị́ ẹrẹ pịrị ḅa.

⁵¹Gburo-gburotẹ owu-ḅara-iḅi ò nwẹn kẹ ori amadaḅọ pịrịm, tẹ jike-a ḅẹlẹma nyana ori pulo kẹ sịḅị ḅụ sara tẹ ḅọ ḅe pịrịm, anie Devidi na, ọ̀ ḅụụ paka-ḅo apụ na mu ḅẹẹ-sakị ḅẹẹ-sakị la.