Read kalabari 2 Samụẹlị 23 Bible Online

2 Samụẹlị 23 - kalabari bible

2 Samụẹlị 23

¹Mịọkụ ma aị ma anie Devidi kunoma ẹkwẹn-aḅịḅị ma: Devidi, Jese owiḅọtụḅọ ḅe ḅịḅị ḅụ paka-ḅo opu nimi ẹkwẹn mẹ, tomḅọ ḅe tẹ ịn saakị-gelema wararị ḅọ ḅe opu nimi ẹkwẹn mẹ, Jekọbụ Tamụnọ; ḅe pulo kẹ sịḅị ḅụ sara ḅọ ḅe, Izirẹlị ḅẹ ḅẹlẹ anume ma suu ḅọ ḅe:

²KỊNỊNYANAḄỌ ḅe Tẹmẹ ḅe ị̀ ḅụụ ḅụ ẹkwẹn-arị; ori ẹkwẹn-ḅịḅị mẹ ị̀ ḅẹlẹ ọgọnọ emi,

³Izirẹlị ḅẹ Tamụnọ ḅe ẹkwẹn tẹ, Izirẹlị Ịkụ ḅe ị̀ ḅẹẹ tẹ: gbọrụḅọ karakara ḅara kẹ ḅẹrẹtọn tomi pịrị sakị goyegoye, tẹ Tamụnọ mangịma ḅụ ḅẹrẹtọn-arị ḅẹḅẹ,

⁴ori ịn ọgọnọ dede bele paka-ḅo ḅara kẹ ḅịya-pakam kpiti So-tọrụ ofori dede-ḅio otuka puu-paka ḅara eene tẹ mịẹ tẹ osuka kiri mẹ ḅụ so-paka ḅara.

⁵Karakara-ḅara-ḅụ ị̀ warị mẹ ọkọ kẹ Tamụnọ ḅụụ sịẹsime-a? Kẹ gotẹ ọkọ ḅẹẹarị, ò sime gbamaso ọḅọkụ kẹ ị̀ na fị tẹẹ, ye mamgba ḅụ tọọn tẹ, kpaịn wararị. Kẹ gotẹ ọkọ ḅẹẹarị, ị̀ ḅarasụa mamgba na, à ḅii aị ma na ḅụ ọ̀ mịẹ tẹ à lolo ḅịa?

⁶Kụma Tamụnọ ḅụụ ḅụ ofori apụ mamgba, nangị tẹ ịn kẹ gbin nguma tẹ aị sime-ḅara simem; gbala kịnị inetẹ ḅara kẹ ịn saakị ọkị ḅịa ẹrẹsị;

⁷kụma tomḅọ tẹ ḅara kẹ ịn lama ḅarị ḅọ, anie ikulele na, sụḅa na kẹ ḅụụ tẹlẹma wararị ḅọ, anịsakị ịkatakirikọn-a-ḅara kẹ fịnị ịn dọkịma ḅa.

⁸Mịna apụ ma anie kụrọ nyana tẹ opu atomi ma tẹ Devidi nyana apụ ma ẹrẹ: Josẹbụ-basẹbẹtị, Takẹmọnị ḅẹ ḅọ ḅe; ori anie “Tẹra apụ Ma” ḅẹ sịḅịdaḅọ; ori ọ̀ sụḅa kẹ gbọrụ owu ḅio kịnị maa ẹndẹ (800) na owu sọm inima tẹ ọ̀ ḅaa apụ ma.

⁹Kụrọ-nyanatẹ opu “Tẹra apụ Ma” ogboku ọ̀ palị ḅọ anie Ẹlịyeza, Ahohi Dodo owiḅọtụḅọ ḅe. Ò Devidi na simem ịn Filisiteniapụ ma tẹ owu gotẹ anịjụ kobiri apụ ma kụrọ daaḍiki sakị, tẹ Izirẹlịapụ ma ọḅụ-na-isemam.

¹⁰Ọ̀ saakị tẹ Filisiteniapụ ma pẹlẹ-pẹlẹ-ḅaa nwenii ọ̀ ḅara kọrị-kọrịm, tẹ okologie mẹ ọ̀ ḅara na oḅolom; KỊNỊNYANAḄỌ ḅe anị ene opu owu-ḅara-iḅi kọrịnama kọrịm; tẹ tomi ma ọ̀ ḅọrọ tẹso pịkịma fịtẹ-apụ ma oju ḅẹ aị ma siin siin ọkị ngẹrị gotẹ mum.

¹¹Ọ̀ palị ḅọ anie Sama, Harari ḅẹ Agi owiḅọtụḅọ ḅe. Filisiteniapụ ma Lehi ḅụ ịn kẹ pẹya sịn sịnmgbọlụ so-paka ḅin wararị gbọrụ kiri ḅụ kobirim. Izirẹlịapụ ma nwẹnị Filisiteniapụ ma ḅụ ḍumo-mangị kọn.

¹²Kụma ori ọ̀ sịẹ kiri ḅụ sịẹsimem kiri mẹ ḅẹ ogboku ḅụ, tẹ sịẹ anị pịrịm, tẹ Filisiteniapụ ma ḅaam; tẹ KỊNỊNYANAḄỌ ḅe opu owu-ḅara-iḅi kọrịnama kọrịm.

¹³Anị ḅo fịye-soku sakị mẹ kpeki tẹso, sịḅịda “Kịnị Suei Ma” ḅẹ tẹra apụ nwẹnị ideri Devidi ḍọkụma-mu Adulamụ ḅẹ fukuru mẹ ḅụ, Filisiteni ḅẹ ọmụgbin-apụ gbọrụ itu Rẹfayimu ḅẹ Tụndụ Ogboku ḅụ akpụrụ-warị pike tẹ kobiri wararị ogbo.

¹⁴Anị sakị mẹ ḅụ Devidi kụrọ-tẹịn anga mẹ ḅụ emi, tẹ Filisiteni ḅẹ ọmụ-ogbo mẹ pịkị anị sakị mẹ ḅụ Bẹtịlịhẹmụ ḅụ emi.

¹⁵Devidi nwẹnị ye pọkọ-tarị lama ḅara kẹ ḅẹẹ, “yei, mimgbe gbọrụḅọ paa Bẹtịlịhẹmụ ḅẹ suḅe mẹ tẹ ogigo-ḅọkọ mẹ akaka simearị ye mẹ ḅio minji ḍuu ḅo ị̀ pịrị ḅuu ḅẹ ọkụma!”

¹⁶Anịtẹso kụrọ nyana tẹ opu “Tẹra apụ Ma” nwẹnị Filisiteni ḅẹ ọmụ-ogbo akpụrụ-warị mẹ kan tolu mu, tẹ Bẹtịlịhẹmụ ḅẹ suḅe mẹ tẹ ogigo-ḅọkọ mẹ akaka simearị ye mẹ ḅio minji mẹ ḍuu-ọkị tẹ anị ọkị-ḅo Devidi pịrị. Kụma ori anị ḅụ minji ḅuu-a, ori anị kẹ sara nguma KỊNỊNYANAḄỌ ḅe pịrịm,

¹⁷tẹ ḅẹẹm, “Yei KỊNỊNYANAḄỌ, yẹrị-yaa, mịnẹ yẹrị miemẹ mịẹ ḅa. À tomi ma tẹ fịị kẹ ịna sịḅị-ogbo gbana tẹ mu apụ ma ọmbie ḅuu ḅẹ?” Anịẹrẹsị ori anị ḅuu-a. Kụrọ-nyanatẹ opu “Tẹra apụ Ma” ma aị ma mịẹm.

¹⁸Mịọkụ Abisahị, Johabụ iyimbere, Zeruya owiḅọtụḅọ ḅe anie “Kịnị Suei Ma” sịḅịdaḅọ. Ori ọ̀ sụḅa kẹ kịnị jeia asi na owu sọm, tẹ ịn ḅaam, tẹ “Tẹra apụ Ma” sikima, tẹ gbọrụ ẹrẹ fịm.

¹⁹“Kịnị Suei Ma” ḅụ ori kụn nyana tẹịnm; tẹ ḅo ḅẹrẹtọn ịn pịrị ḅọ sọm; kụma ò kụn nyana mu “Tẹra apụ Ma” na gbasị-a.

²⁰Bẹnaya, Jehohada owiḅọtụḅọ, Kabuzili ḅẹ owu-kụrọnịḅọ ḅe ori anie pịkị jen gburo-gburotẹ amịẹaị mịẹ ḅọ. Ò Mohabụ ḅẹ maa ḅeri ḅẹrẹ naa-a opu owu koro na apụ ḅaam. Eene-mgbọ sara tẹso, ḅẹ gbọrụ ene ḅụ, ọ̀ pịkị ideri koro gbọrụ olulu ḅio mu ọkụkụ gbọrụmgbọ ḅaam.

²¹Ọ̀ gbọrụ Ijiputi ḅẹ iḅi-fịtẹ opu owiḅọ ḅaam. Ijiputi-ḅẹ-ḅọ ḅe ọ̀ ḅara ḅụ gbọrụ sụḅa ọlọm, kụma Bẹnaya gbọrụ mkpara mie ọ̀ kẹ ideri ọ̀ ḍọkụma-mu ye, tẹ Ijiputi-ḅẹ-ḅọ ḅe ḅara sụḅa mẹ pụkọ-ọkị, tẹ ò soku-ḅẹ sụḅa mẹ kẹ ọ̀ ḅaam.

²²Bẹnaya, Jehohada owiḅọtụḅọ ḅe ma aị ma mịẹm, tẹ kụrọ-nyanatẹ opu “Tẹra apụ Ma” sikima, tẹ gbọrụ ẹrẹ fịm.

²³“Kịnị Suei Ma” ogboku ọ̀ kụn nyanam, kụma ọ̀ kụn nyana mu “Tẹra Apụ” ma na gbasị-a. Tẹ Devidi ọ̀ kẹ ọ̀ ḅụụ-ḍikiḍiki apụ ma sịḅịdaḅọ sọmam.

²⁴Asahẹlị, Johabụ iyimbere ḅe anie “Kịnị Suei Ma” ḅẹ gbọrụḅọ; Ẹlịhananị, Bẹtịlịhẹmụ ḅẹ Dodayị owiḅọtụḅọ ḅe na.

²⁵Harọdị ḅụ ḅo Sama na, Ẹlịka na,

²⁶Paliti ḅụ ḅo Hẹlẹzị na, Tẹkowa ḅụ ḅo Ịra Ikesi owiḅọtụḅọ ḅe na,

²⁷Anatọtị ḅẹ Abiyeza na, Mẹbunayị, Usatị ḅụ ḅo ḅọ ḅe na,

²⁸Zalimọnị, Ayọ ḅụ ḅo ḅọ ḅe na, Nẹtofa ḅẹ Maharayị na,

²⁹Nẹtofa ḅẹ Bẹnaya owiḅọtụḅọ Hẹlẹbụ ḅe na, Gibiya, Benijamịnị furo-ḅẹ-apụ ma ḅẹ Ribayị owiḅọtụḅọ Itayi ḅe na,

³⁰Piratọnị ḅẹ Bẹnaya na, Gahasi ḅẹ akuroro ma ḅẹ Hidayị ḅe na,

³¹Abi-alịbọnị, Ịkpa ḅio ḅẹ ele mẹ ḅẹ ḅọ ḅe na, Bahurimu ḅẹ Azimavẹtị na,

³²Salịboni ḅẹ Ẹlịyaba na, Jonatanị, Jasẹnị owiapụ-awọmẹ ma ḅẹ ḅọ ḅe na,

³³Sama, Harari ḅẹ ḅọ ḅe na, Sararị Harari ḅẹ ḅọ ḅe owiḅọtụḅọ Ayihamụ ḅe na,

³⁴Ẹlịfẹlẹtị, Maka ama ḅẹ Ahasịbayị owiḅọtụḅọ ḅe na, Ẹlịyamụ, Gilo ama ḅẹ Ayitofẹlị owiḅọtụḅọ ḅe na,

³⁵Kamẹlị ama ḅẹ Hẹziro na, Abi ama ḅẹ Parayị na,

³⁶Zoba ḅẹ Netanị owiḅọtụḅọ Igalị ḅẹ na, Beni, Gadi ḅẹ ḅọ ḅe na,

³⁷Zẹlẹkị, Amọnị furo-ḅẹ-ḅọ ḅe na, ọmụ-aị dogi Johabụ anie Zeruya owiḅọtụḅọ ḅe pịrị ḅọ Naharayị, Biyarọtị ama ḅẹ ḅọ ḅe na,

³⁸Jataya ḅụ ḅo Ịra na, Garẹbụ na,

³⁹Yuraya, Hitahiti ḅọ ḅe na; inimgba ini tẹra apụ fa kịnị amesi.