Read kalabari 1 Amadapụ 1 Bible Online

1 Amadapụ 1 - kalabari bible

1 Amadapụ 1

¹Mị sakị mẹ Amadaḅọ Devidi ori omongi lama tẹ, tẹ ori afịrịmẹnjịapụ ḅụụ gbaịn bịlangịdị kẹ ọ̀ gbaịn sọ, anị ḅarị ori oju ọfịrịmaa.

²Ọkọẹrẹsị ori afịrịmẹnjị-opuapụ nwẹnị ọ̀ ḅẹẹ, “Ị́yẹrị Amada-opu-nyanaḅọ, mininii wa gbọrụ iriawọ-tụḅọ ḍọkị-ḅo tẹ á sime tẹ í ḍikiḍiki. Árị ị́ akaka ḅụ monotẹ í oju ọfịrịma ḅa.”

³Ịn nwẹnị iḅi ẹrẹḅọtụḅọ ḍọkị Izirẹlị mẹmgba ikelema-koro ḅụ, tẹ nwẹnị Sunemu ḅụ ịn ḍọkịarị ẹrẹḅọtụḅọ ḅara ẹrị, árị ẹrẹ Abisagị, tẹ árị ọkị-ḅo tẹ kẹ amadaḅọ ḅe pịrịm.

⁴Árị iḅi lamam, tẹ sime tẹ amadaḅọ ḅe ḍikiḍiki tẹ pịkị fịrịmẹnjị ọ̀ pịrịm, kụma ori árị na gboloma-a.

⁵Mịọkụ mẹ Abusalọmụ fịị tẹ ḅẹẹ-sakị, Adonịja, Devidi na Agiti na iyi owiḅọtụḅọ ḅe anie omongiḅọ tẹịnḅọ ḍumo wararị apụ ma ḅụụ. Ọ̀ nwẹnị ọ̀ ḅụụ saakị-gelema tẹ ḅẹẹ, “Yẹrị mie amadaḅọ ḅe sọ ḅarị ḅọ.” Ọ̀ kpọma owiḅọ iḅi kọnm. Ọ̀ nwẹnị kirimẹnjị-arụ na, asụ-dọkụ-ọmụapụ na, pịkị kịnị amesi oyi finji tẹlẹma ọ̀ ḅụụ pịrị anie ọ̀ panmu ḅarị apụ.

⁶Ọ̀ ḍa Devidi jene-jene amụ ịganị ọ̀ pịrị ḅara ḅụ ò ḅio-sima tẹ ò gbela-a, “Í tiegotẹ nwẹn mịẹ mọ?” Anịsakị in wẹrịtẹ iyi ḅara ḅụ ori Abusalọmụ palịm.

⁷Ò Johabụ na ẹkwẹnm. (Johabụ ḅe iyingi Zeruya) ọ̀ pịkị Abịyata, agbamịẹḅọ ḅe sọ na ẹkwẹnm tẹ ịn nwẹnị minini ọ̀ pịrị mịnẹ ini ori na emii.

⁸Kụma Zadọkụ, agbamịẹḅọ ḅe na, Bẹnaya, Jehohada owiḅọtụḅọ ḅe na, Netanị ịkịankoroḅọ ḅe na, Simeyi na, Rehi na pịkị Devidi ḅụụ-ḍikiḍiki apụ ma na ini Adonịja ḅụ ofori.

⁹Gbọrụ ene ḅụ, Adonịja nwẹnị anana na, owi-nambulo na, pịkị ḅẹlẹkị sụa tẹ asambịrịma nambulo na kẹ Oronwi ịkụ kẹ sịn-arị Enrọgẹlị ngụngụḅa mẹ na kpeki anga ḅụ agba mịẹ. Ori amịnapụ ma na, Juda ḅẹ sịḅịdapụ ma na, ori ịn sịn famam.

¹⁰Kụma ori na gbọrụ iyingiḅọ-a tẹ gbọrụ ḍaḅọ iyi wararị Sọlọmọnị ḅe, anịanịa Netanị ịkịankoroḅọ ḅe, anịanịa Bẹnaya, anịanịa amadaḅọ ḅe ḅụụ-ḍikiḍiki apụ ma ḅụụ, gbọrụḅọ-sọ ọ̀ sịn-a.

¹¹Anịtẹso Netanị nwẹnị Sọlọmọnị iyingi Batisẹba ḍọkụma-mu tẹ á gbela, “Amụ ị́ naa-a mịnẹ Agiti owiḅọtụḅọ Adonịja amịna ḅụụ kẹ amadaḅọ mịẹ tẹ ḅara? Tẹ Amadaḅọ Devidi sọ anị gbolomaye nimi-a!

¹²Ị́ nwẹnị í ḍumo na í owiḅọtụḅọ Sọlọmọnị ḍumo na ḅọrọma ḅẹ-ḅiiarị ḅẹḅẹ, à ḅeri nụnụ ẹkwẹn kọn ị́ pịrị ḅa

¹³mịnẹ mị gbọrụ sakị so Amadaḅọ Devidi ḍọkụma-mu tẹ ò gbela, ‘yei Gburo-gburo Opuḅọ, ị́ tẹmẹ-la ḅara kẹ ị̀ karịmaa mịnẹ ì owiḅọtụḅọ Sọlọmọnị mie í kiri ọkị ḅarịye amada-kụlọ ḅụ? Tọ-ḅara mịẹ kụma Adonịja pịkị ḅo amadaḅọ mịẹarị?’ ”

¹⁴Tẹ Netanị nwẹnị pịkị ḍuko-sụa “Anịsakị ị́ paa Amadaḅọ ḅe na ẹkwẹn-arị ogbo, à mẹnjị sọ-ḅo ḅa tẹ ị́ ẹkwẹn-ḅịḅị ma mịẹ kụrọma ḅa.”

¹⁵Anieḅụ Batisẹba nwẹnị amadaḅọ ḅe mono-ḅio ḅụ sọ ori na ẹrị-a ḅẹ mu. Ori omongi lama tẹẹ, anịsakị Abisagị Sunemu ḅẹ ẹrẹḅọtụḅọ ma mie ò ḍikiḍikiarị ye.

¹⁶Batisẹba nwẹnị amadaḅọ ḅe tọrọkọ á sịḅị-tuu iderima, tẹ ọ̀ nwẹnị á gbela, “Í tiye ḅiiarị?”

¹⁷Á nwẹnị pakịrị, “Gburo-gburo Opuḅọ, ị́ kọkọ tẹmẹ la ḅara kẹ ị̀ karịma KỊNỊNYANAḄỌ ị́ Tamụnọ ḅe ẹrẹ ḅụ mịnẹ ì owiḅọtụḅọ Sọlọmọnị ḅe mie ama-da ḅarịye ị́ ḅọrọ tẹso ọkụma.

¹⁸Kụma Adonịja ḅo amadaḅọ sọ tẹ, tẹ ị́yẹrị sọ anị gboloma gberie-sọ nimi-a

¹⁹Ọ̀ tọnwa owi-nambulo na, anana na pịkị ḅẹlẹkị sụa tẹ asambịrịma nambulo na kẹ agba mịẹ tẹẹ, tẹ nwẹnị ị́ owiapụ-awọmẹ ma na, Abịyata, agbamịẹḅọ ḅe na, pịkị ḅẹrẹtọn ị́ ọmụ-ogbo mẹ pịrịarị ḅọ Johabụ na sịn kopini fịye mẹ suku mum, kụma í owiḅọtụḅọ Sọlọmọnị ori ọ̀ sịn-a.

²⁰Gburo-gburo Opuḅọ, Izirẹlịapụ mamgba í ḍikiarị ị́ amada-kụlọ mẹ ḅụ í kiri ọkị ḅarị ḅọ ḍuko ịn pịrị ḅarị ḅara.

²¹Ị́ nwẹnị ọkọ mịẹ-a ḅẹḅẹ, ị́ fịị gbọrụ sakị yẹrị na ì owiḅọtụḅọ Sọlọmọnị na ama-dẹrịapụ mịẹ ḅara mie ịn kẹ wa mịẹ ḅarị ḅara.”

²²Á paa ẹkwẹn-arị ogbo mie Netanị ḅo amadaḅọ ḅe warị mẹ la yee.

²³Ịn nwẹnị ḍuko amadaḅọ ḅe pịrị mịnẹ ịkịankoroḅọ ḅe anị yọ ḅụ emi, tẹ Netanị nwẹnị mẹnjị sọ-mu tẹ amadaḅọ ḅe tọrọkọ ḅụ sịḅị-tuu iderima.

²⁴Anịtẹso ọ̀ nwẹnị ḅẹẹ, “yei Gburo-gburo Opuḅọ, í ḍuko pakama tẹ mịnẹ amada-kụlọ ḅụ Adonịja mie í kiri ọkị ḅarịye?

²⁵Mị gbọrụ ene mẹ ḅụ ò mu tọnwa ḅẹ owi-anambulo na, anana na, pịkị ḅẹlẹkị sụa tẹ asambịrịma anambulo na kẹ agba mịẹ tẹẹ. Í owiapụ-awọmẹ mamgba na, Johabụ ḅẹrẹtọn ị́ ọmụ-ogbo mẹ pịrịarị-ḅọ ḅe na, pịkị Abịyata agbamịẹḅọ ḅe na ọ̀ nwẹn sịnm. Mị gbọrụ sakị mẹ ḅụ, ini ori na kopini afịaị fị-fị tẹ olokuarị, ‘Amadaḅọ Adonịja ḍumo nangwọmaa!’

²⁶Kụma Sịḅịdaḅọ, yẹrị ori ị̀ sịn-a, anịanịa Zadọkụ agbamịẹḅọ ḅe, anịanịa Bẹnaya anịanịa Sọlọmọnị sọ.

²⁷Mie-mẹmgba Ị́yẹrị Gburo-gburo Opuḅọ ḅe ḅịḅị sọ, tẹ ị́ afịrịmẹnjị-opuapụ ma sọ í ḍuko ịn pịrị-a amada-kụlọ ḅụ í kiri ọkị ḅarị ḅọ?”

²⁸Amadaḅọ Devidi nwẹnị ḅẹẹ, “Ọ́ Batisẹba ḅẹẹ á pịkị sọ-ḅoo.” Á nwẹnị ḅo ò tọrọkọ sịẹsime.

²⁹Anịtẹso ọ̀ nwẹnị á ḅẹẹ, “À ḍumo wararị KỊNỊNYANAḄỌ ḅe tẹ ị̀ ḅụụ-fụka mamgba ḅio ị̀ ḍụa-ḅọrọma ḅọ ḅe ḅụụ kẹ í karịmarị mịnẹ,

³⁰KỊNỊNYANAḄỌ Izirẹlịapụ tẹkẹarị Tamụnọ ḅe ẹrẹ ḅụ à kẹ ị́ karịma ye mẹ à nwẹn koko ḅa mịmgba mẹ ḅụ, mịnẹ í owiḅọtụḅọ Sọlọmọnị mie amada-kụlọ ḅụ ì kiri mẹ ọkị ḅarịye.”

³¹Batisẹba nwẹnị á sịḅị-tuu iderima tẹ ḅẹẹ, “Yee ị̀ nyanaḅọ Amadaḅọ ḅe ḍumo gbamaso!”

³²Anịtẹso Amadaḅọ Devidi nwẹnị fịrịma Zadọkụ, agbamịẹḅọ ḅe na, Netanị, ịkịankoroḅọ ḅe na, pịkị Bẹnaya na sịn. Ịn sọ-ḅo laa tẹso,

³³Ọ̀ nwẹnị ịn ḅẹẹ, “Ọmịnị ị̀ warị ḅio kọrịnama kọrịarị opu apụ ma ọkịị; tẹ ọ́ mịẹtẹ Sọlọmọnị à kẹ dọkụarị kụrọ-sịḅịsụa-asụ ḅe dọkụ, tẹ ọmịnị ọ̀ paan Giyọnị ngụngụḅa mẹ muu.

³⁴Anị yọ ḅụ Zadọkụ agbamịẹḅọ ḅe na, Netanị ịkịankoroḅọ ḅe na pulo kẹ ọ̀ sịḅị saraa Izirẹlị ḅẹ amadaḅọ ḅara ḅụ. Anịsakị ọmịnị ọdụ mẹ ofuro tẹ oloku, ‘Ḍumo nangwọmaa Amadaḅọ Sọlọmọnị!’

³⁵Tẹ ọmịnị ori ọḅụ ḍuka pịkị mị yọ ḅoo, anịsakị mie ò ḅo ì emine ọgọnọ ḅụ lẹgị ḅarịye. Ori mie amada-kụlọ ḅụ ì kiri ọkị ḅarịye, gbala ori mie à sẹlẹ-ọkị ḅọ ḅẹrẹtọn kẹ Izirẹlị na Juda na pịrị ḅarị ḅọ.”

³⁶Bẹnaya, Jehohada owiḅọtụḅọ ḅe nwẹnị pakịrị, “Anị ọkọ simee, anịsakị KỊNỊNYANAḄỌ ị́ Tamụnọ ḅe anị mịẹ kụrọmaa.

³⁷KỊNỊNYANAḄỌ ḅe kẹ wẹrịtẹ Ị́yẹrị Gburo-gburo Opuḅọ ḅe na sime-ḅara, ọ̀ pịkị ọkọ kẹ Sọlọmọnị sọ na simee, tẹ mịẹtẹ ori ama-da mẹ lolo kẹ í nye mẹ ḅioju nẹngị.”

³⁸Anieḅụ Zadọkụ na, Netanị na, Bẹnaya na, pịkị amadaḅọ ḅe ḅụụ-ḍikiḍiki apụ ma na nwẹnị Sọlọmọnị kẹ Amadaḅọ Devidi kụrọ-sịḅịsụa-asụ ḅe ọgọnọ lẹgịmatẹ ọ̀ paan Giyọnị ngụngụḅa mẹ mu.

³⁹Zadọkụ nwẹnị KỊNỊNYANAḄỌ ḅe tọrọkọ Akpụrụ-warị mẹ ḅio ori ọkị-ḅo wararị olivu pulo ḅio ḅụ simearị ịfalị mẹ ọkị tẹ pulo mẹ kẹ Sọlọmọnị sịḅị sara. Ịn nwẹnị ọdụ mẹ ofuro, tẹ tomi mamgba nwẹnị oloku, “Amadaḅọ Sọlọmọnị, ḍumo nangwọmaa!”

⁴⁰Anịtẹso inweni-mgba nwẹnị ori ọḅụ ḍuka ḍereku oloku kọnma, fulutu ofuro-ofuro tẹ ye-yọ mẹ fiema kiri mẹ jikemarị.

⁴¹Adonịja na ori igoniapụ na kopini afịaị ma fị-famarị ogbo, ịn nwẹnị ye-yọ fiearị ye mẹ naa. Johabụ ọdụ mẹ naa tẹso, ọ̀ nwẹnị gbela, “Opu ama mẹ ḅio mẹmgba nwẹn fiearị ye mẹ anị tiye fiearị?”

⁴²Tẹrẹmẹ ori ẹkwẹn fama Abịyata agbamịẹḅọ ḅe owiḅọtụḅọ Jonatanị ḅo la tẹẹ. Adonịja nwẹnị ḅẹẹ, “Sọ-ḅoo. Ị́yẹrị anie iḅi tomḅọọ, sosi ị́ iḅi-oku kẹ ḅoarị.”

⁴³Jonatanị nwẹnị ḅẹẹ, “À sịn-a àrị iḅi-oku kẹ ḅom. Ori Gburo-gburo Opuḅọ Amadaḅọ Devidi Sọlọmọnị kẹ amadaḅọ mịẹ tẹẹ.

⁴⁴Ọ̀ Zadọkụ na, Netanị na, Bẹnaya na amadaḅọ ḅe ḍikiḍikiapụ ma na fịrịma tẹ ini ọ̀ paan mum. Ini ọ̀ mịẹ tẹ ori amadaḅọ ḅe kụrọ-sịḅịsụa-asụ ḅe dọkụm,

⁴⁵tẹ Zadọkụ na Netanị na nwẹnị Giyọnị ngụngụḅa mẹ ḅụ pulo kẹ ọ̀ sịḅị sara amadaḅọ ḅara ḅụ. Anịtẹso inweni-mamgba nwẹnị ḍereku oloku kọnma opu ama mẹ ḅio sọ-mu tẹ anị nwẹnị mịọkụ gbala ye-yọ mẹ fiemarị. Anie mị gbọrụ sakị ọ́ naa ye-yọ fiema mẹ.

⁴⁶Sọlọmọnị anie mịọkụ amadaḅọ ḅee.

⁴⁷Tiye pịkị kọn, amadaḅọ ḅe warị ḅẹ fịrịmẹnjị-opuapụ ma sọ mu mangịma ḅụ Ori Gburo-gburo Opuḅọ Amadaḅọ Devidi tokini tẹ ḅẹẹm, ‘Yee ị́ Tamụnọ ḅe mịẹtẹ jen-a jen-a Sọlọmọnị ḅe ereso ị́ nẹngị, tẹ pịkị mịẹtẹ Sọlọmọnị ama-da mẹ lolo í nye nẹngị.’ Anịtẹso Amadaḅọ Devidi nwẹnị ori iḅila ọgọnọ ḅụ sunsin ḅụ sịḅị-tuu,

⁴⁸tẹ nwẹnị tẹkẹ, ‘Ó yee wa KỊNỊNYANAḄỌ ḅe tokinii, Izirẹlịapụ tẹkẹarị Tamụnọ ḅe, oriḅe tẹ mịmgba mịẹtẹ ị̀ ḅụụ paka-ḅo apụ ma ḅẹ gbọrụḅọ ḅo amada-kụlọ ḅụ ì kiri ọkị tẹ minini tẹ yẹrị sọ ì ḍumo sime tẹ anị ẹrị ye mẹ!’ ”

⁴⁹Anịtẹso Adonịja na ori igoniapụ na nwẹnị ḅalafaa, tẹ inimgba nwẹnị saakị so, ọrụḅọ-ọrụḅọ nwẹnị ọrụ-jụjụ da.

⁵⁰Adonịja gburo-gburo ḅara kẹ Sọlọmọnị ḍiki-ḅalafa ḅụ nwẹnị KỊNỊNYANAḄỌ ḅe simearị Akpụrụ-warị mẹ ḅio sọ-mu tẹ nwẹnị agbamịẹ-anga mẹ ịkọlị ma ọlọ-sịẹma.

⁵¹Ịn nwẹnị ḍuko Amadaḅọ Sọlọmọnị pịrị mịnẹ Adonịja ò ḍiki-ḅalafa ḅụ mu agbamịẹ-anga mẹ ịkọlị ma ọlọ-sịẹma wararị, tẹ nwẹnị ḅẹẹ, “Tarịye à ḅii ḅa Amadaḅọ Sọlọmọnị ḅụụ-pikima ị̀ pịrị mịnẹ ori ị̀ kẹ fịị ḅụ su ḅịa.”

⁵²Sọlọmọnị nwẹnị pakịrị, “Ọ̀ nwẹnị ì minini tẹ ị̀ ḅẹlẹmam ḅẹḅẹ, ọ̀ sịḅị-ḅẹ-inume sọ ḅara la ḅịa; kụma ori ọkọ mịẹ-a ḅẹḅẹ, ọ̀ fịị ḅa.”

⁵³Amadaḅọ Sọlọmọnị nwẹnị anịtẹso fịrịma Adonịja sịn agbamịẹ-anga mẹ ḅụ tẹ ini ori ọkị-ḅom. Adonịja nwẹnị amadaḅọ ḅe ḍọkụma-mu tẹ ọ̀ tọrọkọ sịḅị-tuu iderimam, tẹ amadaḅọ ḅe nwẹnị ọ̀ ḅẹẹ, “Í inetẹ so warị mu ḅa.”