Read kalabari 1 Amadapụ 2 Bible Online

1 Amadapụ 2 - kalabari bible

1 Amadapụ 2

¹Devidi fịị ḅẹ tẹso, ọ̀ nwẹnị ori owiḅọtụḅọ Sọlọmọnị sịn, tẹ ò kunoma toluma-aị kẹ ò toluma:

²“À fịị ḅarị sakị mẹ ḅo laa tẹẹ. Ị́ ḅụụ ḅiokpọ nyana-a tẹ ye tọn-pẹlẹẹ,

³tẹ KỊNỊNYANAḄỌ ị́ Tamụnọ ḅe tọn ị́ pịrị aị mịẹ. Mozizi Oloko mẹ ḅio anị wẹrịtẹ kẹẹ wararị ḅara ḅụ ori oloko ma na ọ̀ tọn aị mamgba na ḅụ ọ̀ ḅịḅị pokii, mịẹtẹ í mu anga mu anga ḅụ ị́ mịẹ ye mịẹ ye lolo ḅarị ḅara.

⁴Ị́ ọ̀ ḅịḅị poki kụma, KỊNỊNYANAḄỌ ḅe ọ̀ karịmam mịnẹ ọ̀ mịẹ ḅarịye mẹ koko ḅa anịsakị mẹ tẹ ò ḍuko ị́ pịrịm mịnẹ ị̀ ḅụụ paka-ḅo apụ Izirẹlị ḅụ ḅẹrẹtọn ḅa ini ịna ḅụụ ẹbị tẹ minini nyana ḅara kẹ ịna ḅioḅẹngbọ na, tẹmẹ na kẹ ọ̀ tọn aị ma ḅụ ọ̀ ḅịḅị poki mu la sakị la sakị la ḅa.

⁵“Jen pịkị emi, í Johabụ kẹ ị̀ mịẹye kẹ ḅiokoroma ḅa, ori Izirẹlị ọmụ-ogbo ma ḅẹ maa ḅẹrẹtọn-apụ ḅaa ye mẹ, inima anie Naha owiḅọtụḅọ Abụna na pịkị Amasa, Jẹta owiḅọtụḅọ ḅe na. Ị́ ori dein sakị ḅụ ịn nini ḅara kẹ ḅiokoromam, ọmụ sakị ịn ḅaa wararị apụ gbẹẹfị ḅii gotẹ. Ọ̀ mịẹye-ofori atomi ḅaam, tẹ mịọkụ yẹrị ḅo ọ̀ mịẹ ye mẹ ḅẹ onyo-sẹịn tẹ anị pakama-ḅo tọrụsiẹrị ẹrịarị.

⁶Ị́ ị́ mịẹ ḅẹ ye nimi wararị; mininitẹ ò dein ḅụ so warị ḅẹ fị kọn ma.

⁷“Kụma iḅi-anga kẹ Bazilayị, Gilẹdị ḅụ ḅo ḅọ ḅe owiapụ-awọmẹ ma na angaa tẹ ịna ḍikiḍikii, gbala ini iḅi-anga kẹ ị̀nịna kọnm àrị iyimbere Abusalọmụ ḅụụ fịị mangị kọn-arị sakị ḅụ.

⁸Benijamịnị ḅụ simearị ama Bahurimu ḅụ ḅo wararị Giru owiḅọtụḅọ Simeyi sọ emi. Ori ì wori akụma lamam à Mahanahịmu mu ene, kụma ò Jodanị Tọrụ ḅụ ḅo ị̀ na bịama sakị, à KỊNỊNYANAḄỌ ḅe ẹrẹ ḅụ tẹmẹ-la ḅara kẹ ọ̀ karịmam mịnẹ arị ọ̀ ḅaa ḅịa.

⁹Kụma gbala-gbala í ò fomu-a ḅara kẹ ọ̀ wẹrịso ma. Ị́ ị́ mịẹ ḅẹ ye nimi wararị, anịsakị ị́ ẹrị nyanam mịnẹ ị́ ọ̀ ḅaam.”

¹⁰Devidi fịịm tẹ ini ọ̀ kẹ Devidi Opu ama mẹ ḅụ ḍiḅim.

¹¹Ọ̀ kụra amesi kẹ ama-dam, ọ̀ sọnọma akụra kẹ Hẹbụrọnị ḅụ sime tẹ ḅẹrẹtọnm, tẹ pịkị kụra asuei tẹra kụra finji kẹ Jeruselemu ḅụ ḅẹrẹtọnm.

¹²Sọlọmọnị amada-kụlọ ḅụ ọ̀ ḍa Devidi kiri ọkịm anịsakị ori ama-da kụrọ mẹ ini iḅiọkụ anị mịẹ pakama lamam.

¹³Anịtẹso Adonịja ò iyingi Agiti nwẹnị Sọlọmọnị iyingi Batisẹba ḍọkụma-mu. Á nwẹnị gbela, “Ikia ḅara kẹ í ḅọ toluma ì ḍiki ḅẹ ḅọ mọ?” Ọ̀ nwẹnị pakịrị, “Ọkọọ,”

¹⁴anịtẹso ọ̀ nwẹnị kẹ sụa, “Àrị ị́ ḅara ḅụ gbela ḅarịye emii.” Á nwẹnị gbela, “Anie tiye?”

¹⁵Ọ̀ nwẹnị pakịrị, “Í nimi wararị mịnẹ mimgbe à ḅo amadaḅọ sọ tẹẹ, anịsakị Izirẹlị ḅụ ḅẹḅọ-ḅẹḅọ sọ anị kẹ ḅiotọnm. Kụma kịrị ḅara mie anị kẹ paka ye, tẹ ì iyimbere ḅe ḅo amadaḅọ sọ ye, gbala anie KỊNỊNYANAḄỌ ḅe kẹ anị ḅii ḅara.

¹⁶Anịsakị ye ḅụ ḅẹ gberie mie à ḅii ḅẹ mịẹarị; sisi anị mịẹ ị̀ pịrị mẹ sịkị ma.” Batisẹba nwẹnị gbela, “Anie tiye?”

¹⁷Ọ̀ nwẹnị pakịrị, “Sisi Amadaḅọ Sọlọmọnị ḅẹẹ — à nimi wararị ị́ ḅụụ ọ̀ sịkị ḅịa — ò minini ị̀ pịrị tẹ arị Abisagị, Sunemu ḅẹ ẹrẹḅọtụḅọ ma na sime taḅọ ḅara ḅụ.”

¹⁸Á nwẹnị pakịrị, “Iḅi lamam, àrị ẹkwẹn amadaḅọ ḅe pịrị ị́ pịrị ḅa.”

¹⁹Ọkọẹrẹsị Batisẹba nwẹnị Adonịja gotẹ ẹkwẹn amadaḅọ ḅe pịrị ḅẹ tẹ ọ̀ ḍọkụma-mu. Amadaḅọ ḅe nwẹnị sịn-ḅịḅị kẹ ò iyingi pịrị ḅẹ ẹrẹsị saakị sịẹsime tẹ sịḅị-tuu kẹ á pịrị. Anịtẹrẹmẹ ọ̀ nwẹnị ori emine ọgọnọ ḅụ lẹgị-sime, tẹ ịn nwẹnị pịkị jen lẹgịye ọkị-ḅo tẹ á nwẹnị anị kẹ ori ama-ḅara anga ḅụ lẹgị-sime.

²⁰Á nwẹnị ḅẹẹ, “Àrị ị́ ḅara ḅụ boowa gbọrụ ḍiki-ḅụụjịrị ḅii ḅẹ ḍọkịarị; sisi anị mịẹ ị̀ pịrị mẹ sịkị ma.” Ọ̀ nwẹnị gbela, “Anie tiye, iyingiḅọ? Anị mịẹ ị́ pịrị mẹ à sịkị ḅịa.”

²¹Á nwẹnị pakịrị, “Yee iyimbere Adonịja Abisagị na simee taḅọ ḅara ḅụ.”

²²Amadaḅọ ḅe nwẹnị gbela, “Í tiegotẹ ị̀ ḅẹẹ àrị Abisagị kẹ ọ̀ pịrị? Ị́ pịkị inetẹ anị gbọrụ ḅara ḅụ ị̀ ḅara ḅii ḅa àrị emine mẹ sọ kẹ ọ̀ pịrịị. Mịna aị mamgba sikima, ori anie ì iyimbere omongiḅọ, tẹ Abịyata, agbamịẹḅọ ḅe na Johabụ na ọ̀ pakịrị ḅụ emii!”

²³Anịtẹso Sọlọmọnị nwẹnị KỊNỊNYANAḄỌ ḅe ẹrẹ ḅụ tẹmẹ-la ḅara kẹ nwẹnị karịma, “Yee Tamụnọ ị̀ tẹịn ḅaa arị Adonịja mịẹtẹ ori ò ḍumo kẹ ò gotẹ ị̀ ḅara miemẹ ḅiiarị ye mẹ gbẹẹ-a ḅẹḅẹ!

²⁴KỊNỊNYANAḄỌ ḅe iḅiọkụ ị̀ mịẹ pakama tẹẹ, ị̀ ḍa Devidi emine mẹ ọgọnọ ḅụ; ori ọ̀ karịma ye mẹ koko tẹ sịẹ mẹ kẹ yẹrị na ị̀ ḅụụ paka-ḅo apụ na pịrị tẹẹ. À ḍumo wararị KỊNỊNYANAḄỌ ḅụụ ye karịm mịnẹ mịmgba mẹ ḅụ Adonịja fịị ḅa!”

²⁵Ọkọẹrẹsị Amadaḅọ Sọlọmọnị nwẹnị tọn Bẹnaya Jehohada owiḅọtụḅọ ḅe pịrị, tẹ ọ̀ nwẹnị mẹnjị paka tẹ mu Adonịja ḅaa.

²⁶Anịtẹso Amadaḅọ Sọlọmọnị nwẹnị Abịyata agbamịẹḅọ ḅe ḅẹẹ, “So Anatọtị í paka-ḅo opu sịẹ mẹ ḅụ ị́ ama muu. Ị́ fịị na-iḅim, kụma à mịọkụ ị́ ḅaa ḅịa, gbala ị́yẹrị mie KỊNỊNYANAḄỌ Ọḅọkụ-Igbe mẹ ḍikiḍiki sime ye ị́ ị̀ ḍa Devidi na simearị sakị, anịsakị ọ̀ la ḅụụ-fụka mamgba pịkị ị́yẹrị sọ lam.”

²⁷Anịtẹso Sọlọmọnị nwẹnị Abịyata dee-siin agbamịẹ KỊNỊNYANAḄỌ ḅe pịrị kọrịnama mẹ ḅụ, anieḅụ ọ́ KỊNỊNYANAḄỌ ḅe ḍuko ye mẹ mịẹ tẹẹ, anie Silo ḅụ KỊNỊNYANAḄỌ ḅe kẹ agbamịẹḅọ Ịlayị na ọ̀ ḅụụ paka-ḅo apụ na ḅẹ ye gboloma ye mẹ ḅo karakaraye sọ tẹẹ.

²⁸Johabụ paka tẹ ye mẹ naam. (Ori Adonịja ḅụ simem, kụma ori Abusalọmụ ḅụụ sọ-a) Anịẹrẹsị ọ̀ nwẹnị mangị KỊNỊNYANAḄỌ ḅe simearị Akpụrụ-warị mẹ ḅio sọ-mu tẹ agbamịẹ-anga mẹ ịkọlị ma ọlọ-sịẹma.

²⁹Anịḅẹ ini-mẹẹ mu Amadaḅọ Sọlọmọnị la tẹẹ mịnẹ Johabụ mangị Akpụrụ-warị mẹ ḅio sọ mu tẹ agbamịẹ-anga mẹ ḅụ emi ḅẹ ye ḅụ, Sọlọmọnị nwẹnị fịrịmẹnjịḅọ fịrịma Johabụ ḍọkụma-mu tẹ ò gbela ò gotẹ mangị agbamịẹ-anga mẹ mu yee. Johabụ nwẹnị pakịrị mịnẹ ọ̀ mangị mu KỊNỊNYANAḄỌ ḅe sụam gbala ọ̀ Sọlọmọnị ḍiki-ḅalafarị ẹrẹsị. Anieḅụ Amadaḅọ Sọlọmọnị nwẹnị Bẹnaya fịrịma ò mu Johabụ ḅaa.

³⁰Ọ̀ nwẹnị KỊNỊNYANAḄỌ ḅe simearị anga ḅẹ Akpụrụ-warị mẹ mu tẹ nwẹnị Johabụ ḅẹẹ. “Amadaḅọ ḅe tọn ị́ pịrị tẹẹ, paka-ḅoo.” Johabụ nwẹnị pakịrị, “Ẹn-ẹn, à mị anga sime tẹ fịị ḅa.” Bẹnaya nwẹnị pịkị-so amadaḅọ ḅe ḍọkụma-mu tẹ Johabụ ḍuko ye ḍuko ọ̀ pịrị.

³¹Sọlọmọnị nwẹnị pakịrị, “Johabụ ḍuko ye mịẹ. Ọ̀ ḅaa tẹ ò ḍiḅii. Anịtẹrẹmẹ mie kịnị ḅarị onyo kẹ ị́yẹrị ḅe anịanịa Devidi ḅuu paka-ḅo apụ ma ḅụụ gbọrụḅọ-sọ sịḅị sẹịn ḅịa ye Johabụ muu mịẹye-ofori atomi ḅaa ye mẹ.

³²Johabụ kọn wararị nini ma tẹ ị̀ ḍa Devidi ḅe sọ nimi-a ye mẹ KỊNỊNYANAḄỌ ḅe arị kẹ Johabụ fomu ḅa. Johabụ mịẹye-ofori ḅẹ iḅi ọ̀ nẹngị maa atomi ḅaam: Abụna, Naha owiḅọtụḅọ ḅe tẹ ḅẹrẹtọn Izirẹlị ọmụ-ogbo mẹ pịrị sime ḅọ ḅe na Amasa, Jẹta owiḅọtụḅọ ḅe tẹ ḅẹrẹtọn Juda ọmụ-ogbo mẹ pịrị sime ḅọ ḅe na.

³³Johabụ kẹ ịn kọn nini mẹ anịḅẹ fomu-ḅara ori na, ọ̀ ḅụụ paka-ḅo apụ mamgba ọgọnọ gbana gbamaso ḅa. Kụma KỊNỊNYANAḄỌ ḅe mịẹye-mịẹye ḅụ iḅi kẹ Devidi ḅụụ paka-ḅo apụ tẹ ori emine mẹ ọgọnọ lẹgị ḅọ lẹgị ḅọ pịrị ḅa.”

³⁴Anịtẹso Bẹnaya, Jehohada owiḅọtụḅọ ḅe KỊNỊNYANAḄỌ ḅe simearị Akpụrụ-warị mẹ mu tẹ Johabụ ḅaam, tẹ ịn nwẹnị ọ̀ kẹ ori ama mu tẹ ịkpa ḅio ò ḍiḅim.

³⁵Amadaḅọ ḅe nwẹnị Johabụ kiri mẹ ḅụ Bẹnaya kẹ koroma tẹ ọ̀ ḅẹrẹtọn kẹ ọmụ-ogbo mẹ pịrịm tẹ nwẹnị pịkị Zadọkụ agbamịẹḅọ ḅe kẹ Abịyata kiri koromam.

³⁶Anịtẹso amadaḅọ ḅe nwẹnị fịrịma Simeyi sịn tẹ ọ̀ ḅẹẹ, “Mịangaa Jeruselemu ḅụ gbọrụ warị namaa, tẹ kẹ ị́ ḅụụ pịrịị. Anị ḅio angaa, tẹ ḅarị opu ama mẹ wẹrịso ma.

³⁷Ị́ mịẹarị ogbo ama mẹ wẹrịso mu Kidirọnị kuroro mẹ saḅa ḅọrọ gbọrụ sakị, karakara-ḅara-ḅụ ị́ fịị ḅa — anịsakị ị́ sịḅị ḅẹ ọmbie ị́ sịḅị ḅụ sime ḅa.”

³⁸Simeyi nwẹnị pakịrị, “Gburo-gburo Opuḅọ, iḅi lamam.” Anieḅụ ọ̀ nwẹnị nangwọ sakị kẹ Jeruselemu ḅụ anga.

³⁹Anị sime-ḅara sime-ḅara ḅẹsọ tẹra kụra ḅọrọ tẹso, Simeyi maa omoniapụ nwẹnị mangị-so Gati ḅẹ Amadaḅọ Akisi, anie Mahaka owiḅọtụḅọ ḅe ḍọkụma-mu. Simeyi ịn Gati ḅụ emii mẹ naa tẹso,

⁴⁰ọ̀ nwẹnị ori asụ tẹlẹmatẹ Gati ḅụ Amadaḅọ Akisi ḍọkụma-mu, mu ori omoniapụ ma ḍọkị ḅẹ ḅara. Ori ịna ḍọkị-ẹrị tẹ ịn pịkịma ama ḅom.

⁴¹Sọlọmọnị, Simeyi Jeruselemu wẹrịso tẹ Gati mum tẹ pịkị pịkịma-ḅo ye mẹ naa tẹso,

⁴²ọ̀ nwẹnị ḅịḅị kẹ ọ̀ fịrịma-ḅo tẹ ḅẹẹ, “Àrị ị́ mịẹ tẹ í mininim KỊNỊNYANAḄỌ ḅe ẹrẹ ḅụ mịnẹ í Jeruselemu wẹrịso ḅịa. Tẹ à nwẹnị í ḅeri nụnụ mịnẹ ị́ mịẹarị ogbo ọkọ mịẹm ḅẹḅẹ, karakara-ḅara-ḅụ ị́ fịị ḅa. Ị́ anị minini tẹ ḅẹẹ-a mịnẹ ị́ ị̀ ḅịḅị poki ḅẹ?

⁴³Í tiegotẹ í minini ye mẹ kaan tẹ ḅarị à tọn ị́ pịrị ye mẹ ḅụ ị̀ ḅịḅị poki-a?

⁴⁴Ị́ kẹ ị̀ ḍa Devidi mịẹ wararị kura-a aị ma ị́ arị nimi lama wararị. KỊNỊNYANAḄỌ ḅe anị gotẹ í fomu ḅa.

⁴⁵Kụma ori ì boma ḅa tẹ mịẹtẹ Devidi ama-da kụrọ mẹ ye ḅụụ laa ḅara kẹ sime gbamaso ḅa.”

⁴⁶Anịtẹso amadaḅọ ḅe tọn Bẹnaya Jehohada owiḅọtụḅọ ḅe pịrịm, tẹ ọ̀ mẹnjị paka tẹ mu Simeyi ḅaam. Sọlọmọnị mịọkụ busunu ḅara kẹ ḅẹrẹtọnḅọ sọ tẹẹ.