Read kalabari 1 Amadapụ 21 Bible Online

1 Amadapụ 21 - kalabari bible

1 Amadapụ 21

¹Mịọkụ Nebọtị Jẹzirili ḅẹ ḅọ ḅe gbọrụ girepu-ḍụọ nyanam Sameriya ḅẹ amadaḅọ Ehabụ warị akaka.

²Miemẹ ḅọrọ tẹso, Ehabụ nwẹnị Nebọtị ḅẹẹ, “Ị́ girepu-ḍụọ mẹ kẹ ị̀ pịrịị, à kẹ ọgụ ḍụọ mịẹ, gbala anị ị̀ warị na kpeki wararị ẹrẹsị; anịsakị arị iḅi anị nẹngị jen girepu-ḍụọ kẹ anị kiri ḅụ ị́ pịrị ḅa, anịanịa anị nwẹnị ị́ ḅụụ ḅẹlẹ ḅarị ḅẹḅẹ arị anị la ḅẹ igbigi kẹ ị́ pịrị ḅa.”

³Kụma Nebọtị nwẹnị Ehabụ ḅẹẹ, “KỊNỊNYANAḄỌ minini tẹ arị ị̀ aḍapụ ma ḅụ à fị ḍuḅu mẹ kẹ ị́ pịrị!”

⁴Ehabụ nwẹnị ịganị na ḅio-si na ḅụ mẹnjị ọ̀ warị sọ, Nebọtị Jẹzirili ḅẹ ḅo ḅe kẹ ọ̀ ḅẹẹ ye sịḅị ẹrẹsị. Gbala ọ̀ ḅẹẹm, “Àrị ị̀ aḍapụ ma ḅụụ à fị ḍuḅu mẹ kẹ ị́ pịrị ḅịa.” Ọ̀ nwẹnị ori iḅila ọgọnọ ḅụ, ọ̀ tọrụ pịkị agbakuru ḅio da, tẹ ḅarị fịye fị-a ḅara kẹ ḅọlọlọ sime.

⁵Ọ̀ ta Jezibẹlị nwẹnị ọ̀ ḍọkụma-ḅo tẹ ọ̀ gbela, “í tiegotẹ ịganị tẹmẹ lama tẹ ḅarị fịye fị-a?”

⁶Ọ̀ nwẹnị á pakịrị, “À gbala ẹkwẹn Nebọtị Jẹzirili ḅẹ ḅọ ḅe pịrị tẹ ọ̀ ḅẹẹm, ‘Ị́ girepu-ḍụọ mẹ kẹ ị̀ pịrị à fẹ, anịanịa anị ị́ ḅụụ ḅẹlẹ ḅarị ḅẹḅẹ à jen girepu-ḍụọ kẹ anị kiri ḅụ ị́ pịrị;’ tẹ ọ̀ nwẹnị pakịrị, ‘Àrị ị̀ girepu-ḍụọ kẹ ị́ pịrị ḅịa.’ ”

⁷Ọ̀ ta Jezibẹlị nwẹnị ọ̀ ḅẹẹ, “Mịọkụ ị́yẹrị kọkọ Izirẹlị ḅẹ amadaḅọ? Saakị tẹ yefịị, ḅio kpọọ; Nebọtị Jẹzirili ḅẹ ḅọ ḅe girepu-ḍụọ mẹ à kẹ ị́ pịrị ḅa.”

⁸Anieḅụ à nwẹnị Ehabụ ẹrẹ kẹ ḍiri kẹẹ, kẹ arị mịẹ kụrọma ḅụ ye-oḅoloye kẹ arị oḅolo tẹ kẹ nwẹnị Nebọtị simearị opu ama mẹ ḅio ori na simearị omongiapụ ma na opu atomi ma na fịrịma.

⁹Ḍiri mẹ ḅio à kẹẹ ye, “ó kpo-kpo gboloo, tẹ gbọrụ ene kẹ ḅuru-ịmọọ; ó Nebọtị kẹ gele anga ḅụ koroma tomi ma ogboku ḅụ;

¹⁰Ye-ḅụ-ofori maa apụ ọ́ nwẹn pakama ḅo tẹ ori na dama-dama tẹ simee, tẹ yee in ye kẹ ọ̀ sịḅị sẹịn, tẹ ḅẹẹ, ‘ị́ Tamụnọ na amadaḅọ ḅe na wori tẹẹ.’ Anịtẹso ọmịnị ori ọkị paka opu ama mẹ ḅio, tẹ ḍụḅarị kẹ ò gbin ḅaa.”

¹¹Ori opu ama mẹ ḅio ori na simearị omongiapụ ma na opu atomi ma na nwẹnị Jezibẹlị ḍuko ḅara mịẹ, á wẹrịtẹ kẹ in fịrịma ḍiri mẹ ḅio anị kẹẹ ḅara.

¹²Ịn gbọrụ ene ḅẹ ḅuru-ịmọ kẹ kpo-kpo gbolom, tẹ tomi ma ogboku Nebọtị kẹ gele anga ḅụ koromam.

¹³Iderimatẹ maa apụ ma nwẹnị ḅo ori na dama-dama tẹ lẹgị tẹ ye kẹ Nebọtị sịḅị sẹịn tomi ma tọrọkọ ḅụ ḅẹẹarị, “Nebọtị Tamụnọ na amadaḅọ ḅe na worim.” Anieḅụ ịn nwẹnị opu ama mẹ ḅio ọ̀ pakama, tẹ ḍụḅarị kẹ ò gbin ḅaa.

¹⁴Anịtẹso ịn nwẹnị ḅịḅị kẹ Jezibẹlị fịrịma, tẹ ḅẹẹm, “Ịn ḍụḅarị kẹ Nebọtị gbin tẹ ọ̀ fịị tẹẹ.”

¹⁵Jezibẹlị naam mịnẹ in ḍụḅarị kẹ Nebọtị gbin tẹ ọ̀ fịị tẹ ḅẹẹ gbọrụ sakị, Jezibẹlị nwẹnị Ehabụ ḅẹẹ, “Saakịị, mu ị́ fẹ ḅẹ tẹ Nebọtị Jẹzirili ḅẹ ḅọ ḅe kẹ ị́ dẹrị ḍụkụ-a girepu-ḍụọ mẹ ọkị nyana-a, gbala Nebọtị ọ̀ ḅarị ḍumo-a, kụma ọ̀ fịị tẹẹ.”

¹⁶Ehabụ naam mịnẹ Nebọtị fịị tẹ ḅẹẹ gbọrụ sakị, ọ̀ nwẹnị saakị, ideri-mu Nebọtị Jẹzirili ḅẹ ḅọ ḅe kụrọ mẹ ḍiki tẹ anị nyana ọkị ḅẹ ḅara.

¹⁷Anịtẹso KỊNỊNYANAḄỌ ḅe nwẹnị ẹkwẹn Ịlayịja Tisibi ḅẹ ịkịankoroḅọ ḅe pịrị tẹ ḅẹẹ,

¹⁸“Saakịị, mu Ehabụ Izirẹlị ḅẹ amadaḅọ tẹ Sameriya ḅụ simearị ḅọ ḅe na bịamaa. Ọ̀ Nebọtị girepu-ḍụọ mẹ ọkị ḅẹ tẹ anị ḅio ḅụ emi.

¹⁹Anịsakị ị́ ọ̀ ḅẹẹ ḅa mie yẹrị KỊNỊNYANAḄỌ ḅe ò gbela ḅara, ‘í Nebọtị ḅaa tẹ pịkị ò nye ọkị nyana ḅẹ tẹ mọ?’ Ị́ pịkị ọ̀ ḅẹẹ ḅa, ‘obiri Nebọtị ọmbie mẹ mẹnị anga mẹ ḅụ, mie obiri ị́ ọmbie sọ mẹnị ḅarị anga!’ ”

²⁰Ehabụ Ịlayịja ẹrị tẹso, ọ̀ nwẹnị Ịlayịja gbela, “yei ị̀ na fịya-a ḅọ, í ḅo ị̀ ḍọkị ẹrị tẹ?” Ọ̀ nwẹnị pakịrị, “À ḅo ị́ ḍọkị ẹrị tẹẹ, gbala ị́yẹrị ḅe ị́ ḅụụ kẹ KỊNỊNYANAḄỌ ḅe ḍiki-tọrụ ḅụ siye mịẹ mẹ dẹrịma tẹ ẹrẹsị.

²¹Mie KỊNỊNYANAḄỌ ḅe kẹ ị́ ḅẹẹ yee, ‘À siye kẹ ḅo ị́ ọgọnọ gbana ḅa; àrị ịkatakirikọn-a-ḅara kẹ ị́ ọfịn siin ḅa. Ehabụ, ị́ ḅụụ àrị owiḅọ goḅọ-goḅọ pẹlẹ-siin ḅa Izirẹlị mẹ ḅụ, anị ḍaḅọ-tụḅọ-o, anịanịa furo-tụḅọ-o.

²²Àrị ị́ warị mẹ kẹ Nebatị owiḅọtụḅọ Jerobohamụ warị na, Ahija owiḅọtụḅọ Bahasa warị na mịẹ ḅara mịẹ ḅa, ịganị mẹ tẹ ị́ sịn-saakịma tẹ pịkị mịẹ tẹ Izirẹlị si mịẹ ye mẹ ẹrẹsị.’ ”

²³Jezibẹlị gbolomaye ḅụ KỊNỊNYANAḄỌ ḅe pịkị ḅẹẹm, “Jẹzirili mẹ ḅio mie obiri Jezibẹlị pẹị ḅarịye.

²⁴Sime Ehabụ pịrị tẹ opu ama mẹ ḅio fịị ḅọ fịị ḅọ, obiri mḅọ pẹị ḅa; anịsakị ò gboloma ḅọ tẹ ama mẹ ḅio paka tẹ fịị ḅọ fịị ḅọ, So-tọrụ ḅẹ afeni ma mḅọ pẹị ḅa.”

²⁵Gbọrụḅọ-sọ ofori, Ehabụ amịna ḅụụ kẹ KỊNỊNYANAḄỌ ḅe ḍiki-tọrụ ḅụ si amịẹaị mịẹ dẹrịma ḅara kẹ mḅọ ḅụụ dẹrịma ḅọ ofori, oriḅe tẹ ọ̀ ta Jezibẹlị sukuruma mu su ḅọ ḅe.

²⁶Ọ̀ ḅẹlẹma tọn-tọn ḅara kẹ oru ḍukamẹnjịm, Amọrayịtị apụ ma wẹrịtẹ mịẹ ḅara, inima tẹ KỊNỊNYANAḄỌ ḅe Izirẹlịapụ ma tọrọkọ ḅụ saakị-siin apụ ma.

²⁷Ehabụ mịna ẹkwẹn-aḅịḅị ma naa fama tẹso, ọ̀ nwẹnị ọ̀ kapa kan tẹ akpa kẹ sụa, ḅuru-ịmọ, akpa kẹ kiri dee tẹ mono, tẹ simini ḅara sime tẹ mẹnjị ma ḅọrọ.

²⁸KỊNỊNYANAḄỌ ḅe nwẹnị Ịlayịja Tisibi ḅẹ ḅọ ḅe ḅẹẹ,

²⁹“Ehabụ ị̀ tọrọkọ ọ̀ ḅụụ iderima tẹ ḅara ị́ ẹrị tẹ? Ori ị̀ tọrọkọ ọ̀ ḅụụ iderima tẹ ẹrẹsị, à ḅarị ò ḍumo-ene ma ḅụ siye mẹ kẹ ḅo ḅịa; kụma ori owiḅọtụḅọ ḅe ḍumo-ene ma ḅụ mie à siye mẹ kẹ ọ̀ warị ọgọnọ ḅụ gbana ḅarịye.”