Read kalabari 1 Amadapụ 8 Bible Online

1 Amadapụ 8 - kalabari bible

1 Amadapụ 8

¹Anịtẹrẹmẹ Amadaḅọ Sọlọmọnị Izirẹlị ḅẹ omongiapụ ma na, ibe-ibe ma kẹ sịḅịdapụ ma na, Izirẹlị ḅẹ apụ ma ḅẹ pụmbụ pụmbụ ma na furo-furo ma kẹ tọrọkọ-tarịapụ mamgba kobiri Jeruselemu ḅụ ọ̀ tọrọkọ ḅom, kẹ mịẹtẹ KỊNỊNYANAḄỌ ḅe Ọḅọkụ-Igbe mẹ ọkị tẹ kẹ Tamụnọ-warị mẹ ḅo-a ḅẹ ḅara Zayọnị, Devidi Opu ama mẹ ḅụ.

²Inimgba ḅo kobirim “Sịḅị-kikima-aị Alalị” fị sakị mẹ, kụra ḅẹ sọnọma akalụ ḅụ Ẹtanimu kẹ sịn akalụ mẹ.

³Izirẹlị ḅẹ omongiapụ mamgba kobiri tẹso, agbamịẹapụ ma Ọḅọkụ-Igbe mẹ saakịm,

⁴tẹ anị dogi Tamụnọ-warị mẹ ḅom. Livayị furo ḅẹ apụ ma na, agbamịẹapụ ma na pịkị KỊNỊNYANAḄỌ ḅe sime anga mẹ ḅẹ Akpụrụ-warị mẹ na anị ḅẹ kọrịnama kọrị aị mamgba na sọ sin tẹ kẹ Tamụnọ-warị mẹ ḅom.

⁵Amadaḅọ Sọlọmọnị na Izirẹlịapụ mamgba na nwẹnị Ọḅọkụ-Igbe mẹ tọrọkọ ḅụ kobiri tẹ kịẹn-ḅịḅị gburo-gburotẹ anana na opu anama na kẹ agba mịẹ — arị ḅakam, kịẹn-kịẹn ḅara ofori.

⁶Anịtẹrẹmẹ agbamịẹapụ ma Ọḅọkụ-Igbe mẹ dogi tẹ kẹ Tamụnọ-warị mẹ ḅio Fịafịa-tẹịn Yọ mẹ ḅụ Sẹrubimu ma suku-ḅio koromam.

⁷Ịna finjima-saratẹ apamba ma igbe mẹ na ịn kẹ anị dogi asịn ma na gbaịn korom.

⁸Ḅẹḅọ-ḅẹḅọ tẹ jen kpọkpọ gbọrụ anga ḅụ da-da Fịafịa-tẹịn Yọ mẹ tọrọkọ ḅụ sịẹsime ḅọ inetẹ sịn aḅịḅị ma ẹrị ḅa. (Mịmgbaa sọ sịn ma paa emii).

⁹Ọḅọkụ-Igbe mẹ ḅio jen gberie-sọ ofori, ḍụḅarị maa apakịrị ma tẹ Mozizi Sayịnayị Tụndụ ọgọnọ ḅụ kẹ anị anga koroma aị ma sikima tẹ, Izirẹlịapụ ma Ijiputi ḅụ paka-ḅoarị sakị KỊNỊNYANAḄỌ ḅe kẹ ịn paka-ḅoarị ogbo ini na ọḅọkụ fị aị ma.

¹⁰Agbamịẹapụ ma Tamụnọ-warị mẹ koroma-soarị ogbo oḅuto nwẹnị bẹkẹ-ḅara-ḅụ anị ḅio paka ḅin

¹¹KỊNỊNYANAḄỌ ḅe simearị anga ḅụ nwanam-nwanam-ma ḅịya pakarị bele mẹ gotẹ ini inetẹ ḅarị pịkị sọ-mu tẹ sime ịna pịrị kọrịnama sọ kọrị-a.

¹²Anịtẹso Sọlọmọnị nwẹnị tẹkẹ: “Ị́yẹrị KỊNỊNYANAḄỌ ịrụa mẹ kẹ So-tọrụ ḅụ koromam, anịsọ í kpiti So-tọrụ na kanakana na ḅio anga sẹlẹ-ọkịm.

¹³Mịọkụ arị iḅi-fịtẹ Tamụnọ warị nama sịẹma ị́ pịrị tẹẹ, sime ị́ pịrị tẹ ị́ anga gbamaso ḅarị anga.”

¹⁴Tomi ma anịanga ḅụ sịẹsime wararị ogbo Amadaḅọ Sọlọmọnị ọ̀ tọrụ pịkị ịn dam tẹ ọ̀ nwẹnị Tamụnọ boma karị ịna ọgọnọ gbana.

¹⁵Ori mẹẹ, “Ọ́ KỊNỊNYANAḄỌ Izirẹlị Tamụnọ ḅe tokinii: Ori ò minini kẹ ị̀ ḍa Devidi pịrị ye mẹ kokom, ọ̀ ḅẹẹ sakị mịnẹ,

¹⁶‘Àrị Ijiputi ḅụ ị̀ atomi ma pakama-ḅo kụra-ḅio amụ à gbọrụ opu ama sọ sẹlẹ ọkị-a Izirẹlị mamgba ḅụ Tamụnọ warị nama na-iḅi anga ịn sunsin ị̀ pịrị ḅarị anga. Kụma àrị ị́ sẹlẹ-ọkịm, Devidi, ị́ ḅẹrẹtọn ị̀ atomi ma pịrị ḅarị ḅara.’ ”

¹⁷Tẹ Sọlọmọnị nwẹnị paa ẹkwẹn tọrọkọ mu, “Ị̀ ḍa Devidi gbọrụ Tamụnọ warị nama tẹ anị sime kẹ sunsin Izirẹlị ḅẹ KỊNỊNYANA-TAMỤNỌ ḅe pịrị ḅẹ ḅara tọn wẹrịm,

¹⁸kụma KỊNỊNYANAḄỌ ḅe ọ̀ ḅẹẹm, ‘Ị́ karakaram, ị́ warị nama ị̀ pịrị ḅẹ-ḅiiarị ḅara mẹ,

¹⁹kụma gbala-gbala ị́yẹrị rẹ anị nama ḅịa. Í owiḅọtụḅọ, ị́yẹrị ḅarana iyi owiḅọtụḅọ, mie ị̀ warị nama ḅarị ye.’

²⁰“Mịọkụ KỊNỊNYANAḄỌ ḅe ori ọ̀ ḅịḅị sima-a. Àrị ị̀ ḍa ḅe kiri ọkị tẹẹ, Izirẹlị ḅẹ amadaḅọ ḅara ḅụ, anịsakị Tamụnọ-warị mẹ nama tẹẹ, sunsin Izirẹlị ḅẹ KỊNỊNYANA-TAMỤNỌ ḅe pịrị mẹ gotẹ.

²¹À pịkị Tamụnọ-warị mẹ ḅio gbọrụ anga sọ pakama tẹẹ, KỊNỊNYANAḄỌ ḅe wamịna atẹngịapụ ma Ijiputi ḅụ ịn pakama-ḅo sakị ọ̀ kẹ ini na fị wararị ọḅọkụ mẹ ḅẹ ḍụḅarị-apakịrị ma simearị Ọḅọkụ-Igbe mẹ gotẹ.”

²²Anịtẹso bebe Izirẹlị ḅẹ tomina-ogbo mẹ tọrọkọ Sọlọmọnị nwẹnị mu KỊNỊNYANAḄỌ ḅe agbamịẹ-anga mẹ tọrọkọ ḅụ sịẹsime, tẹ ori aḅara finji so da

²³tẹ ḅẹẹ, “Yei KỊNỊNYANAḄỌ, Izirẹlịapụ tẹkẹarị Tamụnọ, So-ḅio ḅẹ ọgọnọ-jụ ḅụ na suku-ḅio ḅẹ kiri mẹ na ḅụ í pembema Tamụnọ ofori! Ị́ ị́ atomi ma na fị ọḅọkụ mẹ kokom tẹ ị́ ḅẹlẹma kẹ ịn ḍiem ini ịna bebe ḅioḅẹngbọ mẹmgba kẹ ị́ ḅịḅị poki tẹ ị́nịna anga sakị sakị

²⁴Ị́ kẹ ị̀ ḍa Devidi karịma ye mẹ ị́ anị koko tẹẹ; mịmgba ị́ ẹkwẹn-ḅịḅị mẹ goyegoye mịẹ suma tẹẹ.

²⁵Mịọkụ Yei KỊNỊNYANAḄỌ Izirẹlịapụ tẹkẹarị Tamụnọ, à tẹkẹm mịnẹ aniemẹ tẹ ị́ kẹ ị́ fịrịmẹnjịḅọ ị̀ ḍa Devidi karịma ye mẹ tẹ ḅẹẹm mịnẹ, ‘À gbala-gbala ị́ tọrụ-ogbo ḅụ kẹ ị́ gbarịma ḅịa gbọrụ owiḅọ ị́ ḅụụ ḅo Izirẹlị ḅẹ emine mẹ ọgọnọ lẹgị mẹ. Í owiapụ-awọmẹ ma nwẹnị paa ịna ḅụụ ẹbị ịna amịẹaị mamgba ḅụ tẹ ị̀ tọrọkọ mẹnjị ị́ wẹrịtẹ mẹnjị ḅara.’

²⁶Ọkọẹrẹsị, yei Izirẹlịapụ tẹkẹarị Tamụnọ, yee ị́ ẹkwẹn-ḅịḅị mẹ tẹ ị́ kẹ ị́ fịrịmẹnjịḅọ ị̀ ḍa Devidi karịma ye goyegoye ḅo karakaraye sọ.”

²⁷“Kụma Tamụnọ inetẹ tụkụma ḅara ḅụ tomikiri ḅụ anga ḅẹ? So mẹ ḅẹ geletẹịn So mẹ sọ ḍụḅa tẹ ị́ sọ ḅẹ ḅara sime-a; anieḅụ ndẹẹ mị Tẹkẹ-warị mẹ tẹ à nama ye mẹ ị́ sọ ḅẹ ḅara?

²⁸Anịsọ Yei KỊNỊNYANAḄỌ ị̀ Tamụnọ, yẹrị anie ị́ fịrịmẹnjịḅọ. Mịmgba yẹrị ị́ fịrịmẹnjịḅọ kọn-arị tẹkẹ mẹ naa tẹ àrị ị́ tọrọkọ ḅụ sime tẹ ḅiiarị aị ma mịẹ ị̀ pịrịị.

²⁹Ḍin na eneḅaka na ḅụ ị́ tọrụ mị tẹkẹ-warị mẹ ḅụ simee, mị yọ mẹ tẹ ị́ sẹlẹ-ọkịm sunsin ị́ pịrị ḅẹ anga mẹ. Ị̀ naa, à tọrụ kẹ mị tẹkẹ-warị mẹ da tẹ tẹkẹ sakị, tẹkẹ sakị.

³⁰Ị̀ atẹkẹ ma naa, pịkị ị́ atomi Izirẹlị ḅẹ apụ ma atẹkẹ ma sọ naa, ịn tọrụ kẹ mị yọ mẹ da tẹ tẹkẹ sakị. So-ḅio ị́ ama ḅụ wa naa, tẹ ị́ naa tẹ ḅẹḅẹ, si-wẹrịso wa pịrị.”

³¹“Tomḅọ si kẹ jụmọ mịẹm tẹ ini mḅọ kẹ mị Tẹkẹ-warị mẹ ḅio í agbamịẹ-anga mẹ tọrọkọ ḅụụ-pikima ḅẹ ḅom mịnẹ mḅọ mịẹye-ofori ḅẹḅẹ,

³²So-ḅio ḅụ naa, tẹ ị́ afịrịmẹnjịapụ apụ ma kọọn. Ḅẹrẹ-ḅarasii-ḅọ mẹ gbẹẹ fomu-ḅara kẹ mḅọ pịrịị, tẹ mịẹye-ofori ḅọ mẹ wẹrịso mḅọ so.”

³³“Ị́ atomi Izirẹlịapụ ị́ ḅụụ si mịẹm ẹrẹsị ini na fịya-a apụ ini inomam, anịtẹso ịn nwẹnị pịkị ị́ da tẹ mị Tẹkẹ-warị mẹ ḅo tẹ ḅụụ-iderima ḅara kẹ si-wẹrịso pịrị gotẹ ị́ tẹkẹ sakị goyegoye,

³⁴So-ḅio ḅụ ịn naa. Ị́ atomi asi ma wẹrịso ịn pịrị tẹ ịn pịkịma ị́ kẹ ịna atẹngịapụ ma pịrị ama mẹ ḅoo.”

³⁵“Ị́ atomi ma ị́ ḅụụ si mịẹ tẹ ẹrẹsị í nwẹnị eene mẹ ọlọ-sịẹma, anịtẹso ịn nwẹnị si ḅụ pịkị tẹ tọrụ kẹ mị Tamụnọ tẹkẹ-warị mẹ da tẹ simini ḅara ḅụ ị́ tẹkẹ sakị goyegoye,

³⁶So-ḅio ḅụ ịn naa. Amadaḅọ ḅe na Izirẹlịapụ ma na asi ma wẹrịso ịn pịrị. Kuraye mẹ kẹ ịn toluma tẹ ịn mịẹ. Anịtẹso ọkụma, eene kẹ mie ị́ ama mẹ fịrịmaa, ị́ kẹ ị́ atomi pịrịm ịn gbọrsịḅị angaa tẹ nyanaa ḅẹ ama mẹ.”

³⁷“Ịnụ anịanịa ama-gbaịn-si-obi, anịanịa obi ḅara-ḅara ama mẹ koro, anịanịa ị́ atomi ma na fịya-a apụ owu kẹ ịna opu ama ma ḅẹ gberie paka, anịanịa erise fẹrụ fie, anịanịa igurube, anịanịa amụ pamba-sụa-a ẹpẹrụmẹrụgụ ḍiḅi tẹ so-pakarị afịaị ma ḅaa fama sakị,

³⁸ịna ḅụụ ḅẹ gbọrụḅọ, anịanịa Izirẹlịapụ mamgba tẹkẹ ḅara tẹkẹ ḅara, tẹ ḅii ḅara ḅii ḅara ọrụḅọ-ọrụḅọ nwẹnị mḅọ ḅioḅẹngbọ ḅụ mḅọ ḅụụ-fụka lekiri tẹ amịna aḅara sụn-pakama tẹ kẹ mị Tamụnọ Tẹkẹ-warị mẹ dam ḅẹḅẹ,

³⁹í simearị í so-amakiri mẹ ḅio ịna tẹkẹ mẹ pokii, tẹ naa. Si-wẹrịso in pịrị tẹ ḅarasụa ịn pịrịị. Ị́yẹrị ngẹrị tomḅọ ḅioḅẹngbọ ḅẹ kuroma ḅio sime ye nimim. Ḅụọ-ḅụọ gbẹẹ ḅara kẹ ḅụọ-ḅụọ na mịẹ,

⁴⁰mịẹtẹ ị́ atomi ma sakị mẹmgba ị́ ḅịḅị poki ḅarị ḅara ini ị́ kẹ wamịna atẹngịapụ ma pịrị ama mẹ ḅio anga ḅarị ene mamgba ḅụ.”

⁴¹“Anị gbọrụ ḅara ḅụ, igoniḅọ tẹ ị́ atomi Izirẹlị ḅẹ apụ ma ḅụ ḅẹ ḅọ-a ḅọ nwẹnị jen ala-jụ ḅio ḅẹ gbọrụ opu sịẹ ḅụ ị́ ẹrẹ mẹ gotẹ ḅo ḅoo,

⁴²gbala ini ị́ gburo-gburotẹ ẹrẹ mẹ na, ị́ ḍụḅa ḅụra tẹ ḅara mẹ na, gburo-gburotẹ akọrịnama ma tẹ ị́ kọrị aị ma naa tẹ tọrụ kẹ mị Tẹkẹ-warị mẹ daa tẹ tẹkẹ tẹkẹ,

⁴³So-ḅio í sime anga mẹ ḅụ sime tẹ igoniḅọ ḅe gotẹ ị́ sịn aị mamgba mịẹ ọ̀ pịrịị; kẹ mịẹtẹ tomi kiri ḅẹ apụ mamgba ị́ ẹrẹ nimii, tẹ í ḍiki-ḅalafaa ḅẹ ḅara, ị́ atomi Izirẹlịapụ ma mịẹ ḅara, anịsakị ịn nimi ḅa mịnẹ mị warị mẹ tẹ à nama ye mẹ ị́ ẹrẹ ịn nwẹn kẹ anị sịnm.”

⁴⁴“Ị́ tọn ị́ atomi pịrịm, mu inina fịya-a apụ na ọmụ gbin, tẹ ịn nwẹnị tọrụ kẹ mị opu ama mẹ tẹ ị́ sẹlẹ-ọkị tẹ mị Tẹkẹ-warị mẹ tẹ à nama ị́ pịrị tẹ ye mẹ daa tẹ tẹkẹ tẹkẹ,

⁴⁵ịna atẹkẹ ma pokii. So-ḅio ḅụ ịn naa, tẹ owu-ḅara-iḅi kẹ ịn pịrịị.”

⁴⁶“Ịn nwẹnị ị́ ḅụụ ḅụ si mịẹ-mịẹ, gbala si mịẹ mịẹ-a gbọrụ tomḅọ sọ ofori — tẹ ị́ nwẹnị ịna ḅụụ ịganị nyana, tẹ nwẹnị ịn kẹ kịnị na fịya-a gbọrụḅọ ḅara-ḅio suu, tẹ in nwẹnị kun-ḅara ḅụ ịn dogi-so kịnị-na-fịya-a ḅọ mẹ ama mu, ḅọrọ ala anga-o, kpeki anga ḅụ-o,

⁴⁷ị́ atomi ma atẹkẹ pokii. Ịn nwẹnị anị ama mẹ ḅio sii ḅụ pịkị in sime si ḅara na ịn sụa tẹ si-sịḅịḅio na ḍuko-pakamarị tẹ ị́ tẹkẹ tẹkẹ, yei KỊNỊNYANAḄỌ ịna atẹkẹ naa.

⁴⁸Ịn nwẹnị anị ama mẹ ḅio karakara ḅara na tẹmẹ-la ḅara na kẹ si ḅụ pịkị ḅẹḅẹ, tẹ tọrụ kẹ mị ama mẹ tẹ ị́ kẹ wamịna atẹngịapụ ma pịrị ye mẹ, anie mị opu ama mẹ tẹ ị́ sẹlẹ-ọkị tẹ mị Tẹkẹ-warị mẹ tẹ arị í gotẹ nama ye mẹ da tẹ tẹkẹ tẹkẹ,

⁴⁹anị rẹ ịna atẹkẹ ma pokii. Ị́ ama, So-ḅio ḅụ ịn naa, tẹ ọkụrụkụrụ nyana ịn pịrịị.

⁵⁰Ịna asi mamgba wẹrịso ịn pịrịị, pịkị ịn sịḅị-kụrọma ị́ pịrị ye mẹmgba na, tẹ inina fịya-a apụ ma mịẹtẹ ini iḅi-anga kẹ ini na kọọn.

⁵¹Ini ma anie ị́ ḅara-kuḅu ḅẹ atomi, tẹ Ijiputi ḅụ ị́ pakama-ḅo apụ ma, anị kọrịarị orumo mẹ ḅio.”

⁵²“Kụrọmamgba Nyana KỊNỊNYANAḄỌ mimgbe ị́ sakị mamgba ḍiki-ḅụụjịrị tọrụ kẹ ị́ atomi Izirẹlị ḅẹ apụ ma na, ịna amadaḅọ na ḍiki tẹẹ, tẹ ịn ḅarasụa gotẹ ị́ sịn sakị sịn sakị ḅụ ịna atẹkẹ ma naa.

⁵³Tomi mamgba ḅụ mie ị́ ịn sẹlẹ-ọkị tẹ kẹ ị́ ḅara-kuḅu ḅẹ atomi mịẹ yee, ị́ wẹrịtẹ ị́ fịrịmẹnjịḅọ Mozizi ḅụ ḍuko ịn pịrị ḅara ị́ wamịna atẹngịapụ ma pakama-ḅo sakị Ijiputi ḅụ, yei KỊNỊNYANA-TAMỤNỌ.”

⁵⁴Sọlọmọnị KỊNỊNYANAḄỌ ḅẹ tẹkẹ fama tẹso, ọ̀ nwẹnị agbamịẹ-anga mẹ tọrọkọ ḅụ sịẹsime, ori ori aḅara ma saakị-gelema tẹ anịngẹ-kụraḅio kparakị sime anga mẹ ḅụ

⁵⁵Ọ̀ nwẹnị gele pọkọ ḅụ oloku tẹ Tamụnọ aboma ḅii kẹ anị anga ḅụ kobiri apụ mamgba pịrị. Ori mẹẹ,

⁵⁶“Ọ́ KỊNỊNYANAḄỌ ḅẹ tokinii, oriḅe tẹ ọ̀ wẹrịtẹ dein kẹ ori atomi ma karịmam ọ̀ kẹ ịn pịrị ḅa ḅẹẹ tẹ kẹ ịn pịrị tẹ ḅọ ḅe. Ori ọ̀ fịrịmẹnjịḅọ Mozizi ḅụụ ḅụ ḅọrọtẹ ḅara sarasara ḅụ ò minini aị mamgba, ori arị mịẹ tẹẹ.

⁵⁷KỊNỊNYANAḄỌ wamịna Tamụnọ ḅe ọ̀ wẹrịtẹ wamịna atẹngịapụ ma na sime-ḅara; ọ̀ wa wẹrịso ma, pịkị wa kẹ gbin-koroma so ma;

⁵⁸ọ̀ wa mịẹtẹ wa ọ̀ ḅịḅị poki apụ sọọ, mịẹtẹ wa sakị mamgba ò ḅiiarị wa ḍumo kọn ḅẹ ḅara kẹ anga ḅẹ ḅara, tẹ oloko mamgba na ọ̀ tọn wamịna atẹngịapụ ma pịrị aị mamgba koko.

⁵⁹Yee KỊNỊNYANAḄỌ wamịna Tamụnọ ḅe sakị mamgba goyegoye ḅụ mị tẹkẹ mẹ na kịrị aị ma tẹ arị ọ̀ ḅara ḅụ ḅii aị ma kẹ ḅiokoroma. Yee sakị mamgba ori ọkụrụkụrụ nyana kẹ Izirẹlịapụ ma na ịna amadaḅọ na pịrị, ene-ḅaaene-ḅaaene ḅụ ịn mịẹ ḅẹ ọkụ ofori ḅara kẹ ḅiiarị aị ma.

⁶⁰Anịsakị mị-ḅara ḅụ mie tomikiri ḅẹ opu asịẹ mamgba nimi ḅarịye mịnẹ KỊNỊNYANAḄỌ ḅe ngẹrị anie Tamụnọ — jen tamụnọ ofori.

⁶¹Yee ọmịnị ori atomi sakị mamgba KỊNỊNYANAḄỌ wamịna Tamụnọ ḅe ḅụụ minini nyana tẹ mịmgbaa ọ́ wẹrịtẹ mịẹ ḅara mẹ kẹ ori oloko ma na ọ̀ tọn-aị ma na poki.”

⁶²Anịtẹso Amadaḅọ Sọlọmọnị na Izirẹlịapụ mamgba na nwẹnị tọnwa agba mịẹ KỊNỊNYANAḄỌ ḅe pịrị.

⁶³Sọlọmọnị nambulo maa apuku na jei ẹndẹ (22,000) na, anana jei apuku (120,000) na kẹ gbọrụḅụụ-sime-agba mịẹm. Mị-ḅara mẹ mie amadaḅọ ḅe na Izirẹlị ḅe apụ mamgba na kẹ Tamụnọ warị mẹ finji KỊNỊNYANAḄỌ ḅẹ pịrị ḅara.

⁶⁴Anị gbọrụ ene mẹ ḅụ mie amadaḅọ ḅe pịkị KỊNỊNYANAḄỌ ḅe warị mẹ tọrọkọ sime nụngọ mẹ ogboku mẹ mịẹ fịafịama ye, anịtẹrẹmẹ ọ̀ nwẹnị anịanga tọnwa sịnmgbọlị na, nama ḅẹlẹkị na kẹ bebe tẹ gbọrụḅụụ-sime-agba mịẹ. Ò miemẹ mịẹm gbala ojo-ikulele kẹ nama wararị agbamịẹ-anga mẹ ịrụ ḅakam ẹrẹsị kẹ ma agba mamgba mịẹ ḅụ.

⁶⁵Anịjụ Tẹkẹ-warị mẹ ḅụ, mie Sọlọmọnị na Izirẹlịapụ mamgba na sọnọma ḍin kẹ anịsakị ḅẹ alalị mẹ fị yee. KỊNỊNYANAḄỌ wamịna Tamụnọ ḅẹ tọrọkọ tọnwa-tọnwa ḅẹ atomi ala-jụjụ-ḅio “Mẹnjị-Ḅọrọ Hamatị Mu Anga” mẹ ọgọnọ-jụ ḅụ ideri-ḅo suku-jụ Ijiputi akaka ḅụọ kẹ mẹnjị-ḅọrọarị kuroro mẹ la ḅụ ḅom.

⁶⁶Ninea ḍin karama ene ḅụ, Sọlọmọnị nwẹnị tomi ma kẹ ịna ama fịrịma. Inimgba ò tokinim tẹ nwẹnị ḅioḅẹlẹ ḅụ so ịna ama mu, anie KỊNỊNYANAḄỌ ḅe kẹ ọ̀ fịrịmẹnjịḅọ Devidi na ori atomi Izirẹlịapụ ma na boma aboma mamgba gotẹ.