Read kalabari 2 Amadapụ 12 Bible Online

2 Amadapụ 12 - kalabari bible

2 Amadapụ 12

¹Jehu Izirẹlị ḅụ ama-da tẹ sọnọma kụra karama kụra ḅụ mie Johasị saakị Juda da ye, tẹ Jeruselemu ḅụ sime tẹ kụra amesi kẹ ama-dam. Ò iyingi ẹrẹ Zibiya, Biyasẹba ḅẹ ḅọ.

²Johasị ò ḍumo-ene mamgba ḅụ KỊNỊNYANAḄỌ ḅe tọrụ ḅụ kuraye mịẹm, gbala Jehohada agbamịẹḅọ ḅe ọ̀ mịẹ na-iḅi ye kẹ ò tolumam ẹrẹsị.

³Anịsọ oru mịẹapụ ma gele ayeyọ ma ịna aḅara ḅụụ ini arị ọkị-a tẹ ịn paa agba mịẹ-mịẹ tẹ kụnụaị dọkịmarị gele ayeyọ ma ḅụ.

⁴Johasị nwẹnị agbamịẹapụ ma ḅẹẹ, “Ịn kẹ KỊNỊNYANAḄỌ ḅe warị ḅoarị fịafịa aị ma ḅẹ igbigi mamgba — anị ịn pẹlẹ tomḅọ sịḅị-sịḅị pịrị igbigi-o, tomḅọ ḅioḅẹngbọ ḅụ pẹlẹ ḅụụ pịrị igbigi-o, tomḅọ ḅioḅẹlẹ ḅụ kẹ KỊNỊNYANAḄỌ ḅe warị-ḅio sọ-ḅo igbigi sọ,

⁵yee agbamịẹapụ ma ọrụḅọ-ọrụḅọ mḅọ na ḅụụ-kuraḅọ ḅara arị daa-ọkị, tẹ kẹ KỊNỊNYANAḄỌ ḅe warị mẹ ḅụ tẹlẹma ḅii tẹ ịn ḍọkị-ẹrị anga goyegoye tẹlẹma.”

⁶Kụma ọkị-ḅo Amadaḅọ Johasị ḅụọ mẹ ḅụ si tẹra kụra finji la, agbamịẹapụ ma gberie-sọ tẹlẹma-a KỊNỊNYANAḄỌ ḅe warị mẹ ḅụ.

⁷Ọkọẹrẹsị Amadaḅọ Johasị nwẹnị Jehohada agbamịẹḅọ ḅe na, osi agbamịẹapụ ma na sịn kobiri tẹ ịn ḅẹẹ, “Ó tiegotẹ warị mẹ tẹlẹma-a? Ọkọẹrẹsị mịọkụ ọ́ ḅarị ọmịnị na ḅụụ kura-a apụ ḅara jen kẹ igbigi daa-ọkị ma, kụma ọmịnị anị kẹ koroma KỊNỊNYANAḄỌ ḅe warị mẹ tẹlẹma mẹ pịrị.”

⁸Anieḅụ agbamịẹapụ ma nwẹnị minini mịnẹ in ḅarị kịnị aḅara igbigi da ḅịa, ịn pịkị ḅarị warị mẹ tẹlẹma ḅịa.

⁹Anịtẹso Jehohada agbamịẹḅọ ḅe nwẹnị gbọrụ igbe ọkị, anị ḅẹ ḅịḅị-gbaịnye mẹ tolu tẹ anị kẹ agbamịẹ-anga mẹ ḅẹ akaka mẹnjị KỊNỊNYANAḄỌ ḅe warị sọ-muarị ḅọ mẹ ama-ḅara anga ḅụ koroma; tẹ kọrịnama ḅụ simearị agbamịẹḅọ ḅe nwẹnị ịn kẹ KỊNỊNYANAḄỌ ḅe warị mẹ ḅoo igbigi goyegoye kẹ anị ḅio sụa ḅa.

¹⁰Ini ẹrịm igbigi igbe mẹ ḅio gburo-gburo sakị sakị, amadaḅọ ḅe ḍiri-kẹẹḅọ na, Sịḅịda-Agbamịẹḅọ ḅe na ḅo tẹ nwẹnị KỊNỊNYANAḄỌ ḅe warị mẹ ḅio in ḍọkị-ẹrị igbigi mẹ kịẹn tẹ anị kẹ akpa-akpa ḅio fịna ḅa.

¹¹Anịtẹrẹmẹ ịn nwẹnị iku tọn nimi tẹ igbigi mẹ kẹ tọrụ kẹ KỊNỊNYANAḄỌ ḅe warị mẹ ḍikiarị Kọrịnama kọrị apụ ma pịrị ḅa; tẹ ini anị kẹ aka-kọn-apụ ma na, warị nama apụ ma na tẹ KỊNỊNYANAḄỌ ḅe warị mẹ ḅẹ kọrịnama kọrịarị apụ ma,

¹²bụlọkụ warị nama apụ ma na, ḍụḅarị pẹlẹ apụ ma na gbẹẹ ḅa, anị gbọrụ ḅara ḅụ ini opu asịn ḅiri na, ịn pẹlẹ pakama-ḅo tẹ aḍụḅarị pakịrị-pakịrị na fẹ ḅa ịn kẹ ịn tẹlẹmarị warị mẹ ḅụ kọrịnama kọrịarị aị.

¹³Kụma mị igbigi mẹ tẹ ịn kẹ KỊNỊNYANAḄỌ ḅe warị ḅo ye mẹ ḅụ seleḅa akọpụ-o, bọlị-o, ọdụ-o, anịanịa kẹ tọnjọ tẹlẹma aị, anịanịa golu anịanịa seleḅa kẹ mịẹ ẹfẹrẹ sọ ịn tẹmẹ-a

¹⁴kẹ gotẹ ọkọ ḅẹẹarị, arịmgba ịn kẹ KỊNỊNYANAḄỌ ḅe warị mẹ tẹlẹma na anị ḅẹ kọrịnama kọrị arị apụ na pịrịm.

¹⁵Anịsakị inima tẹ ini igbigi mẹ kẹ pịrị tẹ kẹ kọrịnama kọrị apụ ma gbẹẹ ḅẹ apụ ma ḅara sọ ịn kịẹnye ḅii-a, gbala in ye mingirima-a ẹrẹsị

¹⁶Ḅẹrẹ-ḅarasii agbamịẹ-aị ḅụ ḅo igbigi na si agbamịẹ-aị ḅụ ḅo igbigi na in kẹ KỊNỊNYANAḄỌ ḅe warị-ḅio sọ-ḅoa; anị sime kẹ agbamịẹapụ ma pịrịm.

¹⁷Anie Azẹlị, Siriya amadaḅọ mu Gati na owu-sọ tẹ anị ọkị sakị. Kụma ò ḅo tọrụ kẹ Jeruselemu da tẹso,

¹⁸Johasị Juda ḅẹ amadaḅọ nwẹnị ịlọ suma ḅụ Jehosafatị na, Joramụ na, Ahazaya ori aḍapụ Juda ḅẹ amadapụ ma sikima koroma aị ma na, ò soku ḅe ịlọ suma aị na tẹ KỊNỊNYANAḄỌ ḅe ngọ-koko-ḅio ḅio ịn ḍọkị-ẹrị golu mamgba na, amadaḅọ ḅe warị ḅio sime aị mamgba tan tẹ kẹ Azẹlị Siriya ḅẹ amadaḅọ ḅe fịrịma. Anịtẹrẹmẹ mie Azẹlị Jeruselemu ḅụ pịkị-so ye.

¹⁹Mịọkụ kirikọntẹ Johasị ye-mịẹ-ḅara na, ọ̀ mịẹ aị mamgba na ịn kẹ Juda Amadapụ Ma Aḅụụ Paka-aị Ḍiri mẹ ḅio kẹẹ wararị.

²⁰Johasị afịrịmẹnjịapụ nwẹnị saakị tẹ ḅẹrẹ-ḅiya ọ̀ pịrị tẹ Milo warị-ḅio ḅụ ọ̀ ḅaa, ideri Sẹla mu etela ḅụ.

²¹Ori afịrịmẹnjịapụ Simiyatị owiḅọtụḅọ Jozaka na, Sọma owiḅọtụḅọ Jehozabadi na mie ò fomu-gbin ye, anieḅụ ọ̀ fịịm. Ịn nwẹnị Devidi opu ama mẹ ḅio ọ̀ kẹ ori aḍapụ ma na ḍiḅi, tẹ ori owiḅọtụḅọ Amazaya nwẹnị ḅo ò kiri ḅụ ama mẹ da.