Read kalabari 2 Amadapụ 24 Bible Online

2 Amadapụ 24 - kalabari bible

2 Amadapụ 24

¹Ori Ama-daarị eneḅaka ḅụ mie Nebukadineza Babịlọnị ḅẹ amadaḅọ ḅe ḅo Juda gbaịn tẹ fọịn yee, tẹ Jehohakịmụ nwẹnị tẹra kụra kẹ ọ̀ fịrịmẹnjịḅọ so; anịtẹso ọ̀ nwẹnị pịkị tẹ sịḅị-kụrọma ọ̀ pịrị

²anieḅụ KỊNỊNYANAḄỌ ḅe nwẹnị Babịlọnị ḅe ọmụ-ogbo ma na, Siriya ḅẹ ọmụ-ogbo ma na, Mohabụ ḅẹ ọmụ-ogbo ma na, Amọnị ḅẹ ọmụ-ogbo ma na kẹ ọ̀ fịrịma mịẹtẹ ịn mu Juda fama ḅẹ ḅara, KỊNỊNYANAḄỌ ḅe ẹkwẹn-ḅịḅị mẹ wẹrịtẹ ori afịrịmẹnjị-ịkịankoroapụ ma ḅịḅị ḅụ ḍuko ḅara.

³Karakara-ḅara-ḅụ miemẹ Juda ḅụụ ḅụ pakam, KỊNỊNYANAḄỌ ḅe tọn ḅara ḅụ, kẹ ò ḍiki-tọrụ ḅụ ịn saakị-siin, Manasẹ wẹrịtẹ mịẹ asi mamgba gotẹ,

⁴na pịkị mịẹye-ofori apụ tẹ ọ̀ ḅaa ye mẹ. KỊNỊNYANAḄỌ ḅe mị si mẹ wẹrịso ọ̀ pịrị ḍụkụ-a.

⁵Mịọkụ kirikọntẹ Jehohakịmụ amịẹaị na, ọ̀ mịẹ aị mamgba na, Juda Amadapụ Ma Aḅụụ Paka-aị Ḍiri mẹ ḅio kẹẹ wararị.

⁶Anieḅụ Jehohakịmụ fịịm, tẹ ori owiḅọtụḅọ Jehohakịnị nwẹnị ò kiri ḅụ ama-da.

⁷Ijiputi ḅẹ amadaḅọ ḅarị jen kẹ ori ama ḅio mẹnjị paka-ḅo-a, gbala Babịlọnị ḅẹ amadaḅọ sime ọ̀ pịrị anga mamgba Ijiputi ḅẹ Kuroro mẹ ḅụ ọkị mu Yuferetisi tọrụ mẹ la ọkị fama tẹ.

⁸Jehohakịnị ḅo amadaḅọ so sakị ọ̀ sịḅị maa kụra fa si ḅọrọ tẹ, ọ̀ nwẹnị Jeruselemu ḅụ tẹra akalụ kẹ ama-da. Ò iyingi ẹrẹ Nehusuta, Jeruselemu ḅẹ Ẹlịnetanị ẹrẹḅọtụḅọ ma.

⁹Ọ̀ KỊNỊNYANAḄỌ ḅe ḍiki-tọrụ ḅụ siye mịẹm, ọ̀ ḍa wẹrịtẹ mịẹ ḅara mamgba.

¹⁰Anịsakị mẹ ḅụ mie Babịlọnị ḅẹ amadaḅọ Nebukadineza fịrịmẹnjịapụ ḅo owu kẹ Jeruselemu paka ḅẹ tẹ anị ikelema-koro ye.

¹¹Ori afịrịmẹnjịapụ anị ikelema-koro wararị ogbo mie ori Nebukadineza Babịlọnị ḅẹ amadaḅọ ḅe opu ama mẹ ḅo ye;

¹²Jehohakịnị Juda ḅẹ amadaḅọ ḅe nwẹnị ọ̀ ḅụụ na, ò iyingi na, ori afịrịmẹnjịapụ na, ori owiapụ-awọmẹ na, ori amada-warị mẹ ḅio fịrịmẹnjịarị-opuapụ ma na sịkị Babịlọnị ḅẹ amadaḅọ ḅe pịrị. Ori ama-da tẹ ninea akụra karama kụra ḅụ Babịlọnị ḅẹ amadaḅọ ori ọkịm ikoliḅọ ḅara ḅụ

¹³tẹ KỊNỊNYANAḄỌ ḅe sakị pịrị ḍuko ḅara ḅụ, KỊNỊNYANAḄỌ ḅe warị ḅio ḅẹ ngọ mẹmgba na, amadaḅọ ḅe warị ḅio ḅẹ ngọ mẹmgba na dogi-so, tẹ KỊNỊNYANAḄỌ ḅe Tẹkẹ-warị ḅio sime golu-golu ayesụaị tẹ Sọlọmọnị Izirẹlị ḅẹ amadaḅọ ḅe tẹmẹ-aị mamgba kẹ pakịrị-pakịrị puu.

¹⁴Igoin-tẹịn apụ (ingirigiri atomi) ma sikima, Jeruselemu ḅụ in kun-so apụ amadapụ owiapụ-awọmẹ mamgba na, ḅiokpọtẹ ọmụgbin ḅara-ḅaatẹ opu atomi na kịnị gbọrụ puku sọnọ ẹndẹ finji (10,000) na, ḅara-ḍịn apụ mamgba na, ikulele-tẹmẹapụ na; kirikọnḅọ ofori.

¹⁵Ò kun-ḅara ḅụ amadaḅọ Jehohakịnị na, amadaḅọ ḅe iyingi na, ori ereme na, ori opu fịrịmẹnjịapụ na, ama mẹ ḅẹ sịḅịdapụ ma na dogi-so Babịlọnị mum Jeruselemu ḅụ.

¹⁶Babịlọnị ḅẹ amadaḅọ ḅe ye na gbasị opu atomi mamgba kịnị tẹra ẹndẹ fa si, na kịnị oyia asi (7,000) na, ḅara-ḍịn apụ na ikulele-tẹmẹapụ na kịnị maa ẹndẹ oyia asi finji (1,000) kẹ ḅom kun-ḅara ḅụ; inimgba ịnyọ nyana tẹ ọmụ mu gbẹẹ apụ.

¹⁷Babịlọnị ḅẹ amadaḅọ ḅe nwẹnị Jehohakịnị ḍa iyimbere Matanaya kẹ ò kiri ḅụ amadaḅọ mịẹ, tẹ ori ẹrẹ ḍima tẹ Zẹdẹkaya kẹ ọ̀ sịn.

¹⁸Zẹdẹkaya sịḅị si gbọrụ kụra finji ḅọrọ tẹso ò ḅo amadaḅọ sọm, tẹ oyi gbọrụ kụra finji kẹ Jeruselemu ḅụ ama-dam. Ò iyingi ẹrẹ Amutalị, Libina ḅẹ Jerimaya ẹrẹḅọtụḅọ.

¹⁹Ò Jehohakịmụ wẹrịtẹ mịẹ ḅara mẹmgba mịẹm tẹ KỊNỊNYANAḄỌ ḅe ḍiki-tọrụ ḅụ siye mịẹm.

²⁰Anị kẹ gotẹ ọkọ mịẹarị KỊNỊNYANAḄỌ ḅe ịganị mẹ ḅo gbọrụ ḅiri la sakị, ọ̀ nwẹnị ọ̀ tọrọkọ ḅụ Jeruselemu na Juda na kẹ wakị nguma. Zẹdẹkaya nwẹnị sịḅị-kụrọma Babịlọnị ḅẹ amadaḅọ ḅe pịrị.