Read kalabari 1 Paka-aị 10 Bible Online

1 Paka-aị 10 - kalabari bible

1 Paka-aị 10

¹Mịọkụ Giliboha Tụndụ ọgọnọ ḅụ Filisiteniapụ ma Izirẹlị na owu-sọm; Izirẹlịapụ ma Filisiteniapụ ma tọrọkọ mangị tẹ ini in ḅaam.

²Filisiteniapụ ma Sọlụ na ori owiapụ-awọmẹ ma na nẹngịma tẹ Jonatanị na, Abinadabụ na, Malikisuwa Sọlụ owiapụ-awọmẹ ma ḅaam.

³Owu mẹ kpọma Sọlụ ponomam; iboli-tẹịn-apụ ma nwẹnị ori ẹrị tẹ tẹịn tẹ ye kẹ ọ̀ lama.

⁴Anịtẹso Sọlụ nwẹnị ori ọmụ-aị dogiḅọ ḅe ḅẹẹ, “Ị́ okologie siin, tẹ kẹ ì temi, anieofori mịna ḅụụ pẹlẹ-a apụ ma ḅofa ḅo ị̀ kẹ kpọọti.” Kụma ori ọmụ-aị dogiḅọ ḅe ḍụkụ-a; ò gburo-gburo ḅara kẹ ḅalafaam ẹrẹsị. Ọkọẹrẹsị Sọlụ nwẹnị ori okologie siin tẹ anị ọgọnọ ḅịkị-koro.

⁵Ori ọmụ-aị dogiḅọ ḅe Sọlụ fịị tẹ ẹrị tẹso, ori so nwẹnị ori okologie siin tẹ anị ọgọnọ ḅịkị-koro tẹ fịị.

⁶Mị-ḅara mie Sọlụ na, ori tẹra owiapụ-awọmẹ na, ọ̀ warị mẹmgba na fịị gboloma ḅara.

⁷Tụndụ Ogboku mẹ ḅụ sime Izirẹlịapụ mamgba ọmụ-ogbo mẹ mangị tẹ ye mẹ ẹrị tẹ, mịnẹ Sọlụ na, ori tẹra owiapụ-awọmẹ na fịị tẹ ḅẹẹ ye ḅụ ini ịna opu ama ma sịkị tẹ mangị-som; tẹ Filisiteniapụ ma ḅo arị ḅio angam.

⁸Anị ḅẹ ene-ḅaa ḅụ Filisiteniapụ ma fịtẹ-apụ ma oju ḅẹ aị siin ọkị ḅẹ ḅo tẹso, ịn nwẹnị Sọlụ na ori tẹra owiapụ-awọmẹ na ḍọkị-ẹrị ịn Giliboha Tụndụ ọgọnọ ḅụ ḅịkị-koro wararị.

⁹Ịn nwẹnị ori oju sime aị siin, ọ̀ sịḅị pẹlẹ-siin, tẹ ori owuaị na anị na ọkị, tẹ oku kẹ Filisiteni ḅẹ ama mamgba fịrịma ikelema mịnẹ ịn mị iḅi oku mẹ ḍuko tẹ kẹ tomi mamgba na ịna oru mamgba na pịrị.

¹⁰Ịn nwẹnị ori owuaị ma kẹ ịna oru-atamụnọ ma tẹkẹ-awarị ḅio koroma, tẹ ọ̀ sịḅị mẹ kẹ Degọnị tẹkẹ-warị ḅio koroma.

¹¹Kụma Gilẹdị ḅụ simearị Jabẹsị ḅẹ apụ mamgba Filisiteniapụ kẹ Sọlụ mịẹ aị mamgba naa tẹso,

¹²ḅiokpọ tẹ ịnyọ nyana apụ mamgba nwẹnị saakị tẹ mu Sọlụ na, ori owiapụ-awọmẹ ma na oju-akpakpa ma ọkị Jabẹsị ḅo. Ini ịna mgbe ma kẹ Jabẹsị ḅụ oku nwẹn siin opu sịn suku ḅụ ḍiḅim tẹ sọnọma aḍin kẹ ḅuru-ịmọm.

¹³Mị-ḅara mie Sọlụ kẹ ọ̀ nyana-a minini ḅụ fịị ḅara. Ọ̀ KỊNỊNYANAḄỌ ḅe ḅụụ minini nyana-a, anie ḅụ ọ̀ KỊNỊNYANAḄỌ ḅe tọn ye mẹ koko-a, tẹ pịkị mu tẹmẹ sịn apụ ḅara daa-karakarama ḍọkịm,

¹⁴ọ̀ KỊNỊNYANAḄỌ ḅe ḅụ daa-karakarama ḍọkị ḅẹ nakara. Anịẹrẹsị KỊNỊNYANAḄỌ ḅe ọ̀ ḅaam, tẹ ama-da mẹ saḅama tẹ kẹ Jese owiḅọtụḅọ Devidi pịrịm.