Read kalabari 1 Paka-aị 16 Bible Online

1 Paka-aị 16 - kalabari bible

1 Paka-aị 16

¹Ịn nwẹnị Tamụnọ Ọḅọkụ-Igbe mẹ ọkị-ḅo Devidi pike anị pịrị akpụrụ-warị mẹ ḅio anị sime na-iḅi ḅara kuroma tẹ ịn nwẹnị dọkịma-agba na dein-pịrị-agba na mie Tamụnọ tọrọkọ ḅụ.

²Devidi dọkịma-agba mẹ na, dein-pịrị-agba mẹ na mịẹ fama tẹso, ọ̀ nwẹnị KỊNỊNYANAḄỌ ḅe ẹrẹ ḅụ tomi ma boma,

³tẹ fịturu gbọrụ kpo gbọrụ kpo na, nama oḅolo-oḅolo na, ịn kẹẹ rezini sịn sịnmgbọlị kẹ mịẹ kịkị pakịrị-pakịrị ḍie tẹ kẹ Izirẹlị mẹmgba owiapụ na, ereme na pịrịm.

⁴Ọ̀ nwẹnị pịkị Livayị furo ḅẹ jen-apụ tọn KỊNỊNYANAḄỌ ḅe Ọḅọkụ-Igbe mẹ tọrọkọ sime tẹ fịrịmẹnjị, tẹ Tamụnọ ẹrẹ sịn, ịmịẹtẹ ḅẹẹ, tẹ KỊNỊNYANAḄỌ Izirẹlịapụ tẹkẹarị Tamụnọ ḅe tokini ḅẹ apụ

⁵Asafụ anie sịḅịdaḅọ, ọ̀ palị ḅọ anie Zẹkaraya, osi-apụ anie Jehẹlị na, Sẹmiramọtị na, Jaziyẹlị na, Matitaya na, Ẹlịyabụ na, Bẹnaya na, Obed-edọmụ na, Jehẹlị na, ọbọ ma na, alili ma na farị ḅa; Asafụ saịn-saịn-aị ma farị ḅa,

⁶tẹ Bẹnaya na, Jahazịyẹlị na agbamịẹapụ ma sịkọpẹlẹ-a ḅara kẹ ọdụ ofuro ḅa Tamụnọ Ọḅọkụ-Igbe mẹ tọrọkọ.

⁷Anịtẹrẹmẹ mie Devidi anị ene mẹ ḅụ tọn ye mịnẹ Asafụ na ori amịnapụ na ịmịẹtẹ ḅẹẹ nume su KỊNỊNYANAḄỌ ḅe pịrị.

⁸Yei, ịmịẹtẹ kẹ KỊNỊNYANAḄỌ ḅe ḅẹẹ, ori ẹrẹ sịịn, ọ̀ mịẹ aị ma ḍukoo, tomi ma ogbo ḅụ!

⁹Su ọ̀ pịrịị, tokini anume su ọ̀ pịrịị, ọ̀ ḅụụ-gbiripuma akọrịnama mamgba ḍuko tomi pịrịị!

¹⁰Ebube nyana ọ̀ fịafịa ẹrẹ ḅụ; Yee KỊNỊNYANAḄỌ ḅe ḍọkị apụ ma ḅioḅẹngbọ ḍereku!

¹¹KỊNỊNYANAḄỌ ḅe na ori ịnyọ na ḍọkịị, sịkọpẹlẹ-a ḅara kẹ ọ̀ tọrọkọ ḅo ḍọkịị!

¹²Ọ̀ kọrị tẹ ḅụụ-gbiripuma akọrịnama kẹ ḅiokoromaa, ọ̀ mịẹ ḅụụ-gbiripuma aị ma, ọ̀ kọn aḅẹrẹ ma,

¹³yei ọ̀ fịrịmẹnjịḅọ Ebiramụ ḅụụ paka-ḅo ḅọ, ọ̀ sẹlẹ-ọkị apụ, Jekọbụ awọmẹ!

¹⁴Ori anie KỊNỊNYANAḄỌ wamịna Tamụnọ ḅee; ori aḅẹrẹkọn ma tomikiri mẹmgba ḅụ emii,

¹⁵Ori ọḅọkụ bala gbamasoo, ọ̀ tọn ḅụọ maa ẹndẹ oyia asi finji pịrị ẹkwẹn mẹ,

¹⁶ori Ebira-amụ na fị ọḅọkụ mẹ, ò ye karị ḅara kẹ minini Ayịzịkị pịrị ye mẹ.

¹⁷Ọ̀ kẹẹ wararị oloko mịẹ kụrọma ḅara kẹ mịẹ kụrọma Jekọbụ pịrị ye mẹ, kẹ sime gbamaso ọḅọkụ ḅara kẹ Izirẹlị pịrị tẹ ḅẹẹm,

¹⁸“Kenanị ama mẹ à kẹ ọ́ pịrị ḅa, ḍiekiri ḅara ḅụ anị ọmịna-nye sọ ḅa.”

¹⁹Ịn kịẹn-ḅịḅị ḅụ boowa sakị, ini anị ḅio kpọngọlọ tẹ bịan apụ sọ tẹ,

²⁰gbọrụ sịẹ ḅụ ini ikele-ikele mu jen sịẹ la, gbọrụ atomi ḅụ sọ-mu Ja atomi la,

²¹ọ̀ ḍụkụ tẹ gbọrụḅọ-sọ ịn ponoma-a; Ori in gotẹ amadapụ ḍiki ịganị tẹ ḅẹẹm,

²²“À pulo kẹ sịḅị ḅụ sara tẹ kẹ ìnye mịẹ tẹ apụ ma, ọ́ ḅara kẹ in lama ma; ó ye kẹ ị̀ ịkịankoroapụ ma lama ma!”

²³Ó nume su KỊNỊNYANAḄỌ ḅe pịrịị, tomikiri mẹmgba! Ene-ḅaaene-ḅaaene ọmịnị ọ̀ ḅọrọma mẹ ḍuko-pakamaa.

²⁴Sịẹ-sịẹ ma ogboku ori ebube mịẹ pakamaa, tomi mẹmgba ogboku ọ̀ ḅụụ-buama akọrịnama mịẹ pakamaa!

²⁵Gbala KỊNỊNYANAḄỌ ḅe ọ̀ ḍụḅam ẹrẹsị opu ḅara kẹ ò tokini na-iḅim; tẹ ò ḍiki-ḅalafa oru-atamụnọ mamgba nẹngị na-iḅim.

²⁶Gbala tomi ma oru-atamụnọ mamgba Kpokobia famam ẹrẹsị kụma KỊNỊNYANAḄỌ ḅe So ma tẹmẹm.

²⁷Kụn na opu na ọ̀ tọrọkọ emi; ịnyọ na, ḍereku na ò sime anga emi.

²⁸Yei, tomina ere-furo, ó sime KỊNỊNYANAḄỌ ḅe pịrị ye mẹ kẹ ọ̀ pịrịị, ó boma na, ịnyọ na kẹ KỊNỊNYANAḄỌ ḅe pịrịị!

²⁹Sime KỊNỊNYANAḄỌ ḅe ẹrẹ pịrị boma mẹ kẹ ọ̀ pịrịị; agbamịẹye kẹ ọ̀ tọrọkọ ḅoo! KỊNỊNYANAḄỌ ḅe fịafịa mẹ ḅụ sunsin ọ̀ pịrị;

³⁰tomikiri mamgba, ọ̀ tọrọkọ jikee; tomikiri mẹ sịẹ-kụrọ wararị, gbala-gbala jike-jike-a.

³¹Yee So ma ḅioḅẹlẹ, tẹ Kiri mẹ ḍereku, tẹ yee ịn sịẹ ma ogboku ḅẹẹ: “KỊNỊNYANAḄỌ ḅe Ama-daarị.”

³²Yee tọrụ mẹ gụnụnụ, anị ḅin aị mamgba na anị na, yee piri mẹ saakị gele, anị ḅio sime ye na anị na!

³³Anị sakị piri-ḅio-ḅẹ asịn ma nume-su ḅa ḍereku ḅụ, KỊNỊNYANAḄỌ ḅe tọrọkọ ḅụ gbala ò tomikiri mẹ kọn ḅẹ ḅom ẹrẹsị

³⁴Ịmịẹtẹ kẹ KỊNỊNYANAḄỌ ḅẹẹ, gbala ori iḅim ẹrẹsị; gbala ò jike-a ḅẹlẹma mẹ, sime gbamasom ẹrẹsị

³⁵Pịkị ḅẹẹ, “Yei Tamụnọ, wamịna ḅọrọmaḅọ, wa ḍụa-ḅọrọmaa, wa kobiri tẹ wa ḅọrọmaa, sịẹ-sịẹ ma ogboku, mịẹ tẹ wa ịmịẹtẹ kẹ ị́ fịafịa ẹrẹ ḅẹẹ, tẹ í tokini mẹ wamịna opu sọ ḅẹ ḅara.

³⁶Boma sime KỊNỊNYANAḄỌ, Izirẹlịapụ tẹkẹarị Tamụnọ ḅe pịrị, sime gbamaso ḅụ mu gbamaso la!” Anịtẹso tomi mamgba nwẹnị ḅẹẹ, “Amẹnị” tẹ KỊNỊNYANAḄỌ ḅe tokinim.

³⁷Anieḅụ Devidi nwẹnị Asafụ na ori amịnapụ na kẹ KỊNỊNYANAḄỌ ḅe ọḅọkụ mẹ ḅẹ Ọḅọkụ-Igbe mẹ tọrọkọ ḅụ kuroma ịn sime tẹ sakị mẹmgba Ọḅọkụ-Igbe mẹ tọrọkọ ene-ḅaaene-ḅaaene fịrịmẹnjị ḅẹ ḅara ene-ene ḅụ anị mịẹ ḅẹ ḅii ḅara ḅii ḅara,

³⁸pịkị Obed-edọmụ na ori amịnapụ maa apụ fa kịnị atesi oyi finji ma na, Jedutuni owiḅọtụḅọ Obed-edọmụ na, Hosa na anie ogigo-ḅọkọ ḍikiḍikiapụ.

³⁹Ọ̀ nwẹnị Zadọkụ agbamịẹḅọ ḅe na, ori amịnapụ agbamịẹapụ ma na wẹrịso Gibiyọnị ḅụ gele yọ mẹ tẹ ịn KỊNỊNYANAḄỌ ḅe gotẹ nama tẹ Ọḅọkụ-Igbe mẹ kẹ wẹrị anga mẹ ḅụ,

⁴⁰mịẹ tẹ ịn dọkịma-agba mịẹarị anga mẹ ḅụ ịn sịkọpẹlẹ-a ḅara kẹ dọkịma-agba mịẹ-mịẹ KỊNỊNYANAḄỌ ḅe pịrị ḅẹ ḅara dede na ḅoḅiri na ḅụ anị wẹrịtẹ KỊNỊNYANAḄỌ ḅe oloko mẹmgba tẹ ọ̀ tọn Izirẹlị pịrị ḅara ḅụ kẹẹ wararị ḅara.

⁴¹Hemanị na, Jedutuni na, kirikọntẹ ịn giregire ḅara kẹ ẹrẹgo tẹ KỊNỊNYANAḄỌ ḅe jike-a ḅẹlẹma tẹ sime gbamaso ye mẹ gotẹ ịmịẹtẹ ḅẹẹ ḅẹ apụ ma ini na emi.

⁴²Hemanị na Jedutuni na, ọdụ ofuro na saịn-saịn farị na kụrọ nyanam, na osi afarị-aị ma na anịḅẹ fịafịa nume-su sakị la-la. Jedutuni owiapụ-awọmẹ ma ini ịn tọn ogigo-ḅọkọ mẹ pịrịm.

⁴³Anịtẹrẹmẹ tomi mamgba ḅụọ-ḅụọ nwẹnị so amịna warị mu; tẹ Devidi nwẹnị so ọ̀ warị-kpo mẹ boma ḅẹ mu.