Read kalabari 1 Paka-aị 27 Bible Online

1 Paka-aị 27 - kalabari bible

1 Paka-aị 27

¹Mie Izirẹlịapụ ma aḍapụ ma awarị sịḅịdapụ ma na, ḅẹrẹtọn kịnị maa ẹndẹ oyia asi finji-finji na, kịnị sọnọa si sonioa si na pịrịarị apụ ma na, ịna afịrịmẹnjị-opuapụ inima tẹ fịrịmẹnjị amadaḅọ ḅe pịrị apụ ma ḅẹrẹ mamgba tẹ kpoo-kpo ma gboloma aị tẹ akalụ-akalụ ḅụ ḅo-ḅo tẹ so apụ ma kịẹn-ḅịḅị kụra mẹ ḅụ anie kịnị tẹra puku (24,000).

²Tarị akalụ mẹ ḅụ tarị kpo mẹ onyo-sẹịnḅọ anie Jasobiyamụ, Zabudiyẹlị owiḅọtụḅọ ḅe; ò kpo ḅụ sime apụ kịnị tẹra puku (24,000).

³Ori anie Pẹrẹzi ḅụụ ḅụ paka-ḅo ḅọ, tẹ tarị akalụ mẹ ḅụ ọmụ-ogbo mẹ ḅẹ ḅẹrẹtọn-apụ mamgba kẹ sịḅị-dam.

⁴Maaịn karama akalụ mẹ ḅẹ kpo mẹ onyo-sẹịnḅọ anie. Dodayị, Ahohi ḅụụ ḅụ paka-ḅo ḅọ ḅe; ò kpo ḅụ sime apụ kịnị tẹra puku (24,000). Ọ̀ palịḅọ Mịkịlọtị.

⁵Tẹrẹị karama ḅẹrẹtọnḅọ tẹ sime tẹrẹị karama akalụ mẹ pịrị-ḅọ anie Bẹnaya, Jehohada, agbamịẹḅọ ḅe owiḅọtụḅọ ḅe, sịḅịdaḅọ ḅara ḅụ, ò kpo mẹ ḅụ sime apụ kịnị tẹra puku (24,000).

⁶Ḅieḅe anie Bẹnaya ḅe tẹ kịnị suei ma ḅụ opu tomḅọ tẹ ḅẹrẹtọn kịnị suei ma pịrị ḅọ ḅe. Ori owiḅọtụḅọ Amizabadị anie ò kpo mẹ onyo-sẹịn ye.

⁷Asahẹlị, Johabụ iyimbere ḅe ini karamam, tẹ sime ini karama akalụ mẹ pịrịm, ọ̀ ḅọrọ tẹso ori owiḅọtụḅọ Zẹbadaya ò kiri ọkịm; ò kpo ḅụ sime apụ kịnị tẹra puku (24,000).

⁸Sọnọ karama ḅẹrẹtọnḅọ tẹ sime sọnọ karama akalụ mẹ pịrị-ḅọ anie Samutu, Izira ḅẹ ḅọ ḅe; ò kpo ḅụụ sime apụ kịnị tẹra puku (24,000).

⁹Sonio karama ḅọ tẹ sime sonio karama akalụ mẹ pịrị ḅọ anie Ịra, Tẹkowa ḅẹ Ikesi owiḅọtụḅọ ḅe; ò kpo ḅụụ sime apụ kịnị tẹra puku (24,000).

¹⁰Sọnọma karama ḅọ tẹ sime sọnọma karama akalụ mẹ pịrị-ḅọ anie Hẹlẹzị, Iferemu owiapụ-awọmẹ ma ḅẹ ḅọ, Pẹlọnị ḅẹ ḅọ ḅe; ò kpo ḅụ sime apụ kịnị tẹra puku (24,000).

¹¹Sime nine karama akalụ mẹ pịrị nine karama ḅọ anie Sibekayi, Husa ḅẹ ḅọ, Zera ḅẹ apụ ma ḅio ḅụ; ò kpo ḅụụ sime apụ kịnị tẹra puku (24,000).

¹²Eseni karama ḅọ tẹ sime eseni karama akalụ mẹ pịrị-ḅọ anie Abiyeza, Anatọtị ḅẹ ḅọ, Benijamịnị ḅẹ apụ ma ḅio ḅụụ; ò kpo ḅụụ sime apụ kịnị tẹra puku (24,000).

¹³Oyi karama ḅọ tẹ sime oyi karama akalụ mẹ pịrị-ḅọ anie Maharayị, Nẹtofa ḅẹ ḅọ, Zera ḅẹ apụ ma ḅio ḅụ; ò kpo ḅụ sime apụ kịnị tẹra puku (24,000).

¹⁴Oyi gberie finji karama ḅọ tẹ sime oyi gbọrụ akalụ finji karama akalụ pịrị ḅọ anie Bẹnaya, Piratọnị ḅẹ ḅọ, Iferemu owiapụ-awọmẹ ma ḅụ ḅẹ ḅọ ḅe; ò kpo ḅụụ sime apụ kịnị tẹra puku (24,000).

¹⁵Oyi maaịn finji karama ḅọ tẹ sime oyi maa akalụ finji karama akalụ pịrị-ḅọ anie Hẹlịdayị, Nẹtofa ḅẹ ḅọ, Ọtụnịyẹlị ḅẹ apụ; ò kpo ḅụ sime apụ kịnị tẹra puku (24,000).

¹⁶Izirẹlị ḅẹ furo-furo ma ikelema-koro ḅụ mie anị sime-ḅara: Rubẹnị furo-ḅẹ-apụ kẹ sịḅịda ḅọ anie Ẹlịyeza, Zikiri owiḅọtụḅọ ḅe; Simiyọnị furo-ḅẹ-apụ kẹ sịḅịda ḅọ anie Sẹfataya, Mahaka owiḅọtụḅọ ḅe.

¹⁷Livayị furo-ḅẹ-apụ kẹ sịḅịda ḅọ anie Hasabaya, Kẹmụwẹlị owiḅọtụḅọ ḅe; Erọnị furo-ḅẹ-apụ kẹ sịḅịda ḅọ anie Zadọkụ.

¹⁸Juda furo-ḅẹ-apụ kẹ sịḅịda ḅọ anie Elihu, Devidi iyimbere amịnapụ ma ḅẹ gbọrụḅọ; Ịsaka furo-ḅẹ-apụ kẹ sịḅịda ḅọ anie Omuri, Mayịkẹlị owiḅọtụḅọ ḅe.

¹⁹Zẹbulọnị furo-ḅẹ-apụ kẹ sịḅịda ḅọ anie Isimaya, Obadaya owiḅọtụḅọ ḅe; Nafutali furo-ḅẹ-apụ kẹ sịḅịda ḅọ anie Jeremọtị, Azirẹlị owiḅọtụḅọ ḅe.

²⁰Iferemu furo-ḅẹ-apụ kẹ sịḅịda ḅọ anie Hosiya, Azaziya owiḅọtụḅọ ḅe; Manasẹ furo mẹ kẹ maa anga ḍiya ḅẹ gbọrụ pakịrị kẹ sịḅịda ḅọ anie Jowẹlị, Pedaya owiḅọtụḅọ ḅe;

²¹Manasẹ furo mẹ kẹ maa anga ḍiya ḅẹ gbọrụ pakịrị tẹ Gilẹdị ḅụ sime apụ ma sịḅịda ḅọ anie Ido, Zẹkaraya owiḅọtụḅọ ḅe; Benijamịnị furo-ḅẹ-apụ kẹ sịḅịda ḅọ anie Jasịyẹlị, Abụna owiḅọtụḅọ ḅe.

²²Danị furo-ḅẹ-apụ kẹ sịḅịda ḅọ anie Azarẹlị, Jerohamụ owiḅọtụḅọ ḅe. Mịna apụ ma anie Izirẹlị ḅẹ furo-furo ma ḅẹ tọrọkọ tarị apụ ma.

²³Devidi tomi ma kịẹn sakị, ọ̀ sịḅị ḅụ si kụra ḅụ iderima apụ kịẹn-a. Anị kẹ gotẹ ọkọ mịẹ ye KỊNỊNYANAḄỌ ḅe minini tẹẹ, ori Izirẹlị mịẹ tẹ ịn So-tọrụ ḅẹ lolia ḅin ḅara ḅin ḅa.

²⁴Johabụ, Zeruya owiḅọtụḅọ ḅe saakị kịẹnm, kụma ọ̀ kịẹn fama-a; anịsọ miemẹ gotẹ ịganị ḅo Izirẹlị ọgọnọ gbanam tẹ kịẹn-ḅịḅị mẹ Amadaḅọ Devidi mịẹ aị ma ḅụ kẹẹ sụa sọ ịn sụa-a.

²⁵Azimavẹtị, Adiyẹlị owiḅọtụḅọ ḅe anie amadaḅọ ḅe nyana aị sime anga mamgba ḍikiḍiki onyo-sẹịn ye; anịsakị opu sịẹ mẹ na, opu ama ma na, kala-ama ma na, kụrọtẹ gele awarị ma na ḅio sime aị mamgba ḍikiḍiki onyo-sẹịnḅọ anie Jonatanị, Uzaya owiḅọtụḅọ ḅe;

²⁶inima tẹ ḍụọ kọrịarị apụ ma kẹ kiri sokuarị aị mamgba ḍikiḍiki onyo-sẹịnḅọ anie Eziri, Kẹlubu owiḅọtụḅọ ḅe;

²⁷mgbusu-aḍụọ ma ḍikiḍiki onyo-sẹịnḅọ anie Simeyi, Rama ḅẹ ḅọ ḅe; anịsakị mgbusu-aḍụọ ma ḅụ paka-ḅo iru mẹ kẹ kokoarị kiri suku-ḅio ḅẹ awarị ma ḍikiḍiki onyo-sẹịnḅọ anie Zabidi, Sefamụ ḅẹ ḅọ ḅe.

²⁸Sẹfẹla ḅụ ịn kẹ olivu na, sịkamọ na sịn opu asịn ma ḍikiḍiki onyo-sẹịnḅọ anie Balị-hanani, Gede ama ḅẹ ḅọ ḅe; anịsakị pulo koko anga ma ḍikiḍiki onyo-sẹịnḅọ anie Johasị.

²⁹Sarọnị ḅụ sime anana-ogbo ma ḍikiḍiki onyo-sẹịnḅọ anie Sitirayị, Sarọnị ḅẹ ḅọ ḅe; anịsakị tụndụ ogboku ma ḅụ sime anama-ogbo ma ḍikiḍiki onyo-sẹịnḅọ anie Safatị, Adilayi owiḅọtụḅọ ḅe.

³⁰Ike-sụa-anama ma ḍikiḍiki onyo-sẹịnḅọ anie Obili, Isimẹlị ḅẹ ḅọ ḅe; anịsakị yedogi-anama ma ḅẹ ịyọrọ ma ḍikiḍiki onyo-sẹịnḅọ anie Jedaya, Mẹrọnọtị ḅẹ ḅọ ḅe; anana na, oḅori ogbo-ogbo ma na ḍikiḍiki onyo-sẹịnḅọ anie Jazizi, Agirayiti ḅọ ḅe.

³¹Mịna apụ mamgba anie Amadaḅọ Devidi nyana aị ḅio-koruapụ.

³²Jonatanị, Devidi ḍa iyimbere anie nimi kẹ kịnị tolumaḅọ. Oriḅe anie yefieye naa ḅọ, pịkị ḍiri-kẹẹḅọ; ori na Jaziyẹlị, Akimoni owiḅọtụḅọ ḅe na ye kẹ amadaḅọ ḅe owiḅọtụḅọ ḅe tolumam.

³³Ayitofẹlị anie nimi kẹ amadaḅọ ḅe tolumaḅọ, Husayi, Akayịtị ḅọ ḅe anie amadaḅọ ḅe ikiaḅọ.

³⁴Jehohada, Bẹnaya owiḅọtụḅọ ḅe, na Abịyata na, Ayitofẹlị kiri ḍimam. Johabụ anie ḅẹrẹtọn amadaḅọ ḅe ọmụ-ogbo mẹ pịrị ḅọ.