Read kalabari 1 Paka-aị 5 Bible Online

1 Paka-aị 5 - kalabari bible

1 Paka-aị 5

¹Rubẹnị Izirẹlị mgbe ḅe owiapụ-awọmẹ (ori anie mgbe, kụma ori ọ̀ ḍa iḅila pilemam ori ọ̀ ḍa ta mịẹ tẹ árị ọbọ-simam ẹrẹsị, ini ori mgbe-kiri mẹ saḅama kẹ Izirẹlị owiḅọtụḅọ Josẹfụ pịrịm, anị mịẹ tẹ paka-furo mẹ kẹ ọrụtọn ḅara ḅụ ịn ḅarị ori mgbe-kiri mẹ ọlọ kuroma-a.

²Juda ori na mịna owiapụ ma ḅụụ ọ̀ kụrọm, tẹ gbọrụ ama-da owiḅọtụḅọ ọ̀ ḅụụ ḅụ paka-ḅom ḅẹsọ, mgbe-kiri mẹ sime Josẹfụ pịrịm),

³Rubẹnị Izirẹlị mgbe ḅe owiapụ-awọmẹ ma anie Anọkụ na, Palụ na, Hẹzịrọnị na, Kami na.

⁴Jowẹlị owiapụ-awọmẹ anie: Sẹmaya na, Gọgụ na, Simeyi na,

⁵Mayịka na, Rehaya na, Bali na,

⁶Bẹra na anie oriḅe tẹ Tigilati-pilesa Asiriya ḅẹ amadaḅọ dogi-so mu omoni ḅara-ḅio su ḅọ ḅe; ori anie Rubẹnị furo-ḅẹ-apụ ma sịḅịdaḅọ.

⁷Ori amịnapụ ma ḅẹ furo-furo ma ịna paka-furo mẹ ḅụụ ḅụọ-ḅụọ sịḅịdapụ kẹ ọrụtọn ḅara koroma sakị in koroma ḅara anie Jehẹlị sịḅịdaḅọ na, Zẹkaraya na;

⁸Bẹla, Azazị owiḅọtụḅọ, pịkị Sịẹma taa-owiḅọtụḅọ, pịkị Jowẹlị ile-owiḅọtụḅọ ḅe. Rubẹnị furo-ḅẹ-apụ ma Arowa ḅụ anga ma-mu Nebo na Balị-mehọni na lam.

⁹Ịna opu anama ma Gilẹdị ama mẹ ḅio lolo-kamam ẹrẹsị, ori anga mu ịkpa mẹ sọ-muarị anga ḅụ ịrụa-saakịarị-anga, anie Yuferetisi pakịrị mẹ sọ lam.

¹⁰Sọlụ Ama-daarị eneḅaka ma ḅụ ini (owu kẹ Hagiri apụ ma paka tẹ) ịna nẹngịmam tẹ bebe Gilẹdị ḅụ ịrụa-saakịarị-anga mẹmgba ḅụ ịna akpụrụ-awarị ma ọkị angam.

¹¹Gadi owiapụ-awọmẹ na ịna ọgọnọ-jụ ḅụ Basani ḅẹ ama mẹ ḅụụ anga mu Salẹka jụjụ-ḅio lam.

¹²Sịḅịdaḅọ anie Jowẹlị, Safamu maaịn karamam. Janayị na, Basani ḅụ sime Safatị na.

¹³Ịna aḍapụ ma awarị ḅụ ịna mịnapụ ma paka ḅara anie Mayịkẹlị na, Mesulamu na, Sẹba na, Jorayị na. Akanị na, Ziya na, Ẹba na, ini sọnọma apụ.

¹⁴Mịna apụ ma anie Abiyẹlị Uri owiḅọtụḅọ, Jaroha owiḅọtụḅọ. Gilẹdị owiḅọtụḅọ, Mayịkẹlị owiḅọtụḅọ, Jesisayị owiḅọtụḅọ, Jado owiḅọtụḅọ, Buzu owiḅọtụḅọ ḅe.

¹⁵Ahi, Abidiyẹlị owiḅọtụḅọ, pịkị Guni taa-owiḅọtụḅọ ḅe anie ịna aḍapụ ma awarị ḅụ ịna sịḅịdaḅọ.

¹⁶Gilẹdị na, Basani na, anị ḅẹ ama ma na, pịkị Sarọnị ḅụ osuka sime akiri mamgba ḅụ in anga ḅinmam.

¹⁷Mịna aị mamgba Jotamụ Juda ḅẹ amadaḅọ na Jerobohamụ Izirẹlị ḅẹ amadaḅọ ḅe na ḅe eneḅaka ma ḅụ ịn paka-afuro-furo ma ḅụụ ini arị kẹ ḍiri ḅio sụam.

¹⁸Rubẹnị ḅụụ paka-ḅo apụ ma na Gadi ḅụụ paka-ḅo apụ ma na, Manasẹ ḅụụ paka-ḅo ibe mẹ kẹ maa anga ḍiya ḅẹ gbọrụ pakịrị ịnyọ nyana tẹ ọmụ ḅio ekpeke na, okologie na dogiapụ na, iboli mẹ nụnụ gagama tẹ ḍiein tẹịn ḍin ḅara-ḅaatẹ apụ ḅụụ kịnị sọnọ apuku na, maaịn fa kịnị oyi maa ẹndẹ finji (44,760) na tẹlẹma fịrị pịrị wararị.

¹⁹Ịn nwẹnị owu kẹ Hagiri apụ ma na. Jetọ na, Nafisi na, Nodaḅụ na paka.

²⁰Owu mẹ ḅio ini owu Tamụnọ ḅe pịrịm ẹrẹsị ịn nwẹnị ḅarasụa nyana tẹ Hagiri apụ ma na ịna ḅụụ sọ apụ mamgba na nwẹnị ịn kẹ ḅara-ḅio ịn pịrị tẹ apụ sọ; anị kẹ gotẹ ọkọ mịẹ ye anie ịn ḅioḅẹngbọ kẹ Tamụnọ ḅe ḅụụ gbanam ẹrẹsị.

²¹Ịna anama ḅụụ, ike-sụa-nama ịn kẹẹ kamẹlị sịn anama ḅụ ịn sonio apuku na sọnọ ẹndẹ (50,000) na; anana puku asuei gbọrụ puku finji na sọnọ ẹndẹ (250,000) na, yedogi-anama sọnọ ẹndẹ (2,000) na, ḍumo tọrụ ḅụ kịnị oyi ma puku finji na kịnị oyi ẹndẹ (100,000) na ịn nwẹn dogi-som.

²²Anị kẹ gotẹ ọkọ mịẹ ye, ọmụ mẹ Tamụnọ ḅụụ emi ẹrẹsị tọnwa-apụ ḅaa ḅụụ fịịm. Ịn nwẹnị ịna sime anga mẹ ḅụụ anga nwenii ịn ḅo Amọnị ḅara mẹ kẹ ịn saakị sakị lam.

²³Manasẹ ḅụụ paka-ḅo ibe mẹ kẹ maa anga ḍiya ḅẹ gbọrụ pakịrị ḅụ sime apụ ma ama mẹ ḅio angam ịn kpọma ḍụḅa lamam kịẹn-ḅịḅị ḅụ tẹ Basani ḅụ anga mu Balị-hamọni na, Sẹnaya na, Amọnị Tụndụ na lam.

²⁴Mịna apụ ma anie ịna aḍapụ ma awarị sịḅịdapụ ma: Ẹfa na, Isi na, Ẹlịyẹlị na, Azarẹlị na, Jerimaya na, Hodavaya na, Jadịyẹlị na. Inima anie gburo-gburotẹ furo fụkama apụ, ereso apụ, tẹ ịna aḍapụ ma awarị kẹ sịḅịdapụ.

²⁵Kụma ịn nwẹnị ịna aḍapụ ma Tamụnọ ḅe ḅụụ mịẹ-irima, tẹ ama mẹ ḅio ḅẹ atomi ma oru-atamụnọ ma ḅụụ jen ḅụ sọ-mu jen la, anị aị ma tẹ Tamụnọ sima tẹ aị ma ịna tọrọkọ ḅụụ.

²⁶Anieḅụ Izirẹlịapụ tẹkẹarị Tamụnọ ḅe nwẹnị Pulu (ò jen ẹrẹ Tigilati-pilesa) Asiriya ḅẹ amadaḅọ ḅe tẹmẹ sịn-saakịma tẹ ọ̀ nwẹnị Rubẹnị na, Gadi na ḅụụ paka-ḅo apụ ma na, Manasẹ furo mẹ kẹ maa anga ḍiya ḅẹ gbọrụ pakịrị mẹ na dogi-so, tẹ ịn kẹ ḅo Hala na, Habọ na, Hara na, Gozanị Tọrụ akaka na ḅụụ koroma ḅo mịmgba lam.