Read kalabari 2 Paka-aị 15 Bible Online

2 Paka-aị 15 - kalabari bible

2 Paka-aị 15

¹Tamụnọ Tẹmẹ ḅe ḅo Azaraya, Odẹdị owiḅọtụḅọ ḅe ọgọnọ gbanam,

²tẹ ọ̀ nwẹnị mẹnjị paka Asa na bịama ḅẹ mu, tẹ ọ̀ ḅẹẹ, “Asa na, Juda na, Benijamịnị na ọmịnị ì pokii: KỊNỊNYANAḄỌ ḅe ọmịnị na emi, ọmịnị ọ̀ ḅụụ ḅụ emi sakị goyegoye. Ọmịnị ọ̀ ḍọkị-ḍọkịị, ọmịnị akaka ḅụ ọmịnị ọ̀ ḍọkị-ẹrị ḅa, kụma ọmịnị ọ̀ sịkị-sịkị, ori ọ́ sịkị ḅa.

³Kẹ gotẹ ọkọ ḅẹẹarị, anị nangwọ sakị ọkị tẹ, Izirẹlị karakara Tamụnọ ḅe ḅụụ ofori, tẹ ye-toluma agbamịẹḅọ ofori, in pịkị oloko nyana-a.

⁴Kụma ịna ḅụụ-ḅalaḅala sakị in pịkị KỊNỊNYANAḄỌ Izirẹlịapụ tẹkẹarị Tamụnọ ḅe da tẹ ò dọkị sakị, ini ọ̀ ḍọkị ẹrịm ịna akaka ḅụ.

⁵Arị asakị ma ḅụ, mẹnjị-sọḅo ḅọ dein nyana-a, mẹnjị-paka ḅọ sọ dein nyana-a, gbala gburo-gburotẹ ḅụụ-fụkama aị ama-ama mamgba ḅio sime apụ ma ḅụụ emi tẹ ịna ḅụụ-fụkamarị ẹrẹsị.

⁶Ịn pakịrị-pakịrị puu saram, sịẹ na sịẹ na owu sọm, ama na ama na owu sọm, gbala Tamụnọ ḅụụ-ḅalaḅala ḅara-ḅara goyegoye kẹ ịna ḅụụ fụkamam ẹrẹsị.

⁷Kụma ọmịnị, ó ḅiokpọọ! Ọ́ ḍụkụ tẹ ọmịna aḅara kọrị-kọrị ma, kẹ gotẹ ọkọ ḅẹẹarị, ọmịna kọrịnama mẹ ini anị gbẹẹ ḅa.”

⁸Asa mịna ẹkwẹn-aḅịḅị ma anie Azaraya, Odẹdị owiḅọtụḅọ ḅe koro ịkịan mẹ naa tẹso, ọ̀ nwẹnị ḅiokpọ tẹ tọn-tọn oru ma tan-siin fama Juda na Benijamịnị na ama mamgba ḅụ, pịkị opu ama ma tẹ Iferemu tụndụ opu sịẹ mẹ ori ọkị tẹ ama ma na ḅụ, tẹ ọ̀ nwẹnị KỊNỊNYANAḄỌ ḅe agbamịẹ-anga mẹ tẹ Tamụnọ-warị ḅẹ mẹnjị-toluḅọrọ-anga mẹ tọrọkọ simearị ye mẹ tẹlẹma.

⁹Ọ̀ nwẹnị Juda na Benijamịnị mamgba na kobiri, pịkị Iferemu na, Manasẹ na, Simiyọnị na ḅụ ḅo ini na simearị apụ ma na kobiri ịna ḅụụ sụa, gbala gburo-gburotẹ kịẹn-ḅịḅị Izirẹlị koroma-so tẹ ḅo ọ̀ ḅụụ sọ tẹ, ini ẹrịm mịnẹ KỊNỊNYANAḄỌ ọ̀ Tamụnọ ḅe ori na emi ḅẹ ye ḅụ.

¹⁰Asa ama-da tẹ jei akụra karama kụra mẹ ḅẹ tẹra akalụ karama akalụ ḅụ in kobirim Jeruselemu ḅụ.

¹¹In nwẹnị anị ene mẹ ḅụ arị aị ma tẹ ọmụ ḅio ini ọkị-ḅo aị ma ḅụ pootẹ-nambulo, sọnọa asi ofori maa ẹndẹ (700) na, maa ẹndẹ oyia asi finji ofori, anana gbọrụ puku (7,000) na kẹ agba mịẹ KỊNỊNYANAḄỌ ḅe pịrị.

¹²Ịn nwẹnị ọḅọkụ fị mịnẹ ini ịna ḅioḅẹngbọ mamgba na, ịna tẹmẹ mamgba na kẹ KỊNỊNYANAḄỌ ịna ḍapụ ma Tamụnọ ḅe ḍọkị ḅa.

¹³Anieḅụ ḅẹḅọ-ḅẹḅọ tẹ KỊNỊNYANAḄỌ Izirẹlịapụ tẹkẹarị Tamụnọ ḅe ḍọkị ḅịa ḅọ goḅọ-goḅọ ini mḅọ ḅaa, mḅọ ḅọrọ asambịrịma ḅọ-o anịanịa omongi tẹ ḅọ-o; owiḅọ-o anịanịa ẹrẹḅọ sọ.

¹⁴In gele pọkọ kẹ ọḅọkụ mẹ fị KỊNỊNYANAḄỌ ḅe pịrịm, oloku ḅụ na ọdụ ofuro ḅụ na, pịkị ịfalị ofuro na ḅụ.

¹⁵Juda mẹmgba ọḅọkụ mẹ gotẹ ḍerekum; gbala ịna ḅioḅẹngbọ mẹmgba in nwẹn kẹ ye karị tẹ, pịkị ịna bebe kuroma mẹmgba kẹ ọ̀ ḍọkịm, tẹ ịn nwẹnị ịna ḅụụ ḅụ ọ̀ ḍọkị-ẹrị, tẹ KỊNỊNYANAḄỌ ḅe nwẹnị in ikelema-koro ḅụ ịnyọsara kẹ in pịrị.

¹⁶Ò iyingi Mahaka sọ, Amadaḅọ Asa amadaḅọ iyingiḅọ ḅara ḅụ á saakị-siinm, á fụḅara pakama Asẹra pịrị tẹ tọn-tọnye mịẹ tẹ ẹrẹsị. Asa á pakama fụḅara mẹ pẹlẹ-gbin tẹ, anị gbẹẹ tẹ dọkịmam Kidirọnị kuroro ḅụ.

¹⁷Kụma Izirẹlị ḅụ gele ayeyọ ma ini arị saakị pakama-a. Anịsọ ye kẹ Asa ḅioḅẹngbọ ḅụ ori ọlọ-ọlọ ọkụ ofori ò ḍumo-ene mamgba ḅụ.

¹⁸Ọ̀ nwẹnị seleḅa na, golu na, ye sụa ẹfẹrẹ na kẹ Tamụnọ warị mẹ ḅio ḅo, ọ̀ ḍa ịlọ suma ḍiepịrị-aị na, ò soku-ḅẹ ịlọ suma ḍiepịrị-aị na.

¹⁹Tẹ ọmụ ḅarị jen koro-a, nwenii Asa ama-da wararị kụra suei sọnọ akụra finji karama kụra mẹ lam.