Read kalabari 2 Paka-aị 21 Bible Online

2 Paka-aị 21 - kalabari bible

2 Paka-aị 21

¹Jehosafatị fịịm, tẹ ini ọ̀ kẹ ori aḍapụ ma na ḍiḅi gbolomam Devidi opu ama mẹ ḅio; ori owiḅọtụḅọ Jehoramụ nwẹnị ò kiri ḅụ ama-da.

²Ori owiapụ-amịnapụ nyanam, Jehosafatị owiapụ-awọmẹ ma: Azaraya na, Jehiyẹlị na Zẹkaraya na, Azarịyahu na, Mayịkẹlị na, Sẹfataya na — mịna apụ mamgba anie Juda ḅẹ amadaḅọ Jehosafatị owiapụ-awọmẹ ma.

³Ịna ḍaḅọ gburo-gburotẹ seleḅa na, golu na, ọ̀ nyana ḅụụ ḅụ yela aḍiepịrị-aị kẹ in pịrị, pịkị Juda ḅụ ọmụ gotẹ in mịẹ kụrọma wararị opu ama ma kẹ sụa in pịrịm; kụma ọ̀ sịẹ mẹ kẹ Jehoramụ pịrịm, ori ori mgbe ẹrẹsị.

⁴Jehoramụ ọ̀ ḍa emine mẹ kpọlị tẹ ini ọ̀ mịẹ pakama tẹso, ọ̀ nwẹnị okologie kẹ ori amịnapụ owiapụ mamgba ḅaa fama, pịkị Izirẹlị ḅẹ sịḅịdapụ ma ḅẹ ja apụ sọ kẹ sụa ḅaa.

⁵Jehoramụ sịḅị kụra suei maa kụra finji ḅọrọ tẹso, ò ḅo amadaḅọ sọm, tẹ ò Jeruselemu ḅụ nine akụra kẹ ama-dam.

⁶Ori Izirẹlị ḅẹ amadapụ mẹnjị-mẹnjị etela mẹ ḅụ mẹnjịm, Ehabụ warị mẹ wẹrịtẹ mịẹ ḅara, ọ̀ ta anie Ehabụ ẹrẹḅọtụḅọ ẹrẹsị. Ọ̀ nwẹnị KỊNỊNYANAḄỌ ḅe ḍiki-tọrụ ḅụ siye mịẹ.

⁷Anịsọ KỊNỊNYANAḄỌ ḅe Devidi warị mẹ fama ḅịa, ọḅọkụ mẹ tẹ ò Devidi na fị ye mẹ na, Anịngẹ-kụraḅio ọ̀ kẹ ori na ori awọmẹ na pịrị gbamaso ḅẹ karịma tẹ gbọrụ tọnjọ mẹ ẹrẹsị.

⁸Ọ̀ ḅụọ ḅụ mie Idọmụ, Juda ḅẹrẹtọn in pịrị ḅụ puu-so tẹ ịna soku-ḅẹ amadaḅọ nyana ye.

⁹Anịtẹso Jehoramụ nwẹnị ori ḅẹrẹtọn-apụ na, ò kirimẹnjị-ọmụarụ mamgba na kẹ saḅa-ḅọrọ tẹ ọ̀ nwẹnị ḍin ḅụ saakị tẹ mu Idọmụ ḅẹ apụ ma tẹ ori na ò kirimẹnjị-ọmụarụ ma ḅẹrẹtọn-apụ ma na ikelema-koro tẹ apụ ma ḅaa.

¹⁰Anieḅụ mịẹ Idọmụ kẹ Juda ḅẹrẹtọn in pịrị ḅụ puu-so ḅo mịmgba la ye. Anị sakị ḅụ mịẹ Libina sọ ọ̀ ḅẹrẹtọn ḅụ puu-so ye, ọ̀ KỊNỊNYANAḄỌ ori aḍapụ ma Tamụnọ ḅe sịkị tẹẹ ẹrẹsị.

¹¹Anie sikima, ọ̀ pịkị gele ayeyọ pakamam Juda ḅẹ tụndụ opu sịẹ mẹ ḅụ, tẹ Jeruselemu ḅụ angarị apụ ma toluma mu minini nyana-a ḅụ su, pịkị mịẹ tẹ Juda etela-irim.

¹²Ịlayịja ịkịankoroḅọ ḅe nwẹnị ḍiri kẹẹ tẹ kẹ Jehoramụ fịrịma tẹ ḅẹẹ, “Mie KỊNỊNYANAḄỌ ị́ ḍa Devidi Tamụnọ ḅe ḍuko yee, ‘ị́ ị́ ḍa Jehosafatị anịanịa Asa, Juda ḅẹ amadaḅọ ḅe mẹnjị etela ma ḅụ mẹnjị-a,

¹³kụma Izirẹlị ḅẹ amadapụ ma etela ḅụ mẹnjị tẹ Juda na, Jeruselemu na ḅụ angarị apụ ma toluma mu minini nyana-a ḅụ su tẹẹ, Ehabụ warị mẹ wẹrịtẹ Izirẹlị toluma mu minini nyana-a ḅụ su ḅara. Ị́ pịkị ị́ owiapụ-amịnapụ, ị́ ḍa warị ḅẹ apụ ma tẹ iḅi ị́ nẹngị apụ ma sọ ḅaa ye mẹ ẹrẹsị;

¹⁴ḍikii, KỊNỊNYANAḄỌ ḅe gburo-gburotẹ fomu-ḅara kẹ ị́ atomi na, ị́ awọmẹ na, í sime-ereme na, ị́ nyana aị mamgba ọgọnọ gbana ḅa.

¹⁵Ị́yẹrị ḅioju kụma, ị́ kụrọ tẹ furo-obi kọn ḅa, obi mẹ í furo sunma ḅa, ene-ḅaaene-ḅaaene.’ ”

¹⁶KỊNỊNYANAḄỌ ḅe nwẹnị Filisiteniapụ ma na, Arabụ ḅẹ apụ ma na, tẹ Ẹtịyopịya na kpeki wararị apụ ma ịganị sịịn saakị Jehoramụ pịrị.

¹⁷In nwẹnị ḅo Juda gbaịn tẹ in fọịn, tẹ sime amadaḅọ ḅe warị pịrị tẹ in ḍọkị-ẹrị aị mamgba na, ò sime-ereme na, ori owiapụ-awọmẹ na sọ dogi-so. Ori owiapụ-awọmẹ ḅụụ Jehohahazị asambịrịma tẹịn owiḅọtụḅọ ḅe sikima in kọnma ọ̀ pịrị owiḅọtụḅọ ofori.

¹⁸Mịẹ mẹmgba ḅọrọ tẹso, KỊNỊNYANAḄỌ ḅe gwọọ gwọọ-a furo obi kẹ ò fomum ò furo ḅio.

¹⁹Sakị kẹlẹ mu tẹ maa akụra kunoma ḅiri ḅụ, obi mẹ gotẹ ò furo nwẹnị sun, tẹ gburo-gburotẹ fụka ye ḅụ ọ̀ fịịm. Kụn pịrị ḅara ḅụ tọnọ-tọnọ fịnị mẹ tẹ in tọnọ ori aḍapụ ma pịrị ḅara pembe fịnị ori atomi tọnọ ọ̀ pịrị-a.

²⁰Ọ̀ sakị ama-da sakị ọ̀ sịḅị kụra suei maa kụra finji ḅọrọ tẹ, tẹ ò nine akụra kẹ Jeruselemu ḅụ ama-dam. Gbọrụḅọ-sọ ọ̀ fịị tẹ so ye mẹ owu-a. Devidi opu ama mẹ ḅio ini ò ḍiḅim, kụma amadapụ ma aḍuḅu ma ḅio-a.