Read kalabari 2 Paka-aị 25 Bible Online

2 Paka-aị 25 - kalabari bible

2 Paka-aị 25

¹Amazaya sịḅị si sọnọa akụra finji ḅọrọ tẹso ọ̀ saakị ama-dam, tẹ gbọrụ kụra fa suei (29) kẹ Jeruselemu ḅụ ama-dam. Ò iyingi ẹrẹ Jehohadanị, Jeruselemu ḅẹ ḅọ ma.

²Ọ̀ KỊNỊNYANAḄỌ ḅe tọrụ ḅụ kuraye mịẹm, anịsọ ye kẹ ọlọ-ọlọ ọkụ ofori ḅioḅẹngbọ ḅụ-a.

³Ama-da kụrọ mẹ ọ̀ ḅara sọ gbọrụ sakị mie ori ori afịrịmẹnjịapụ ma tẹ ọ̀ ḍa amadaḅọ ḅe ḅaa apụ ma ḅaa yee.

⁴Kụma ori ịna awọmẹ ḅaa-a, anị Mozizi ḍiri mẹ ḅio oloko mẹ ḅụ wẹrịtẹ kẹẹ ḅara anịjụ mẹ tẹ KỊNỊNYANAḄỌ ḅe tọnm, “Ịn ḍapụ-na-iyingiapụ-na ḅaa ma, awọmẹ ma mịẹ asi gotẹ, pịkị awọmẹ ma ḅaa ma, ḍapụ-na-iyingiapụ-na mịẹ asi gotẹ; kụma ọrụḅọ-ọrụḅọ mḅọ ḅarana mịẹ si ḅẹ fịị kọn ḅa.”

⁵Anịtẹso Amazaya nwẹnị Juda ḅụ tomi ma kobiri tẹ ịn kẹ ḍa warị-warị ḅụ ḅẹrẹtọn kịnị maa ẹndẹ oyia asi finji-finji na, kịnị sọnọa si sọnọa si na pịrịarị apụ ma kẹ ọrụtọn koroma Juda na Benijamịnị na mamgba ḅụ. Si kụra sịḅị ḅụ ḅọrọtẹ apụ ḅụ ọkị iwo ọ̀ nwẹn pekele sẹlẹ ọkịm, tẹ ḍọkị ẹrịm mịnẹ, sẹlẹ paka-ḅo tẹ ọmụgbin na-iḅi tẹ, inetẹ sụḅa na, ekpeke na dogi ḅarị apụ anie kịnị tẹra puku ofori puku amesi na kịnị oyia ẹndẹ (300,000).

⁶Ọ̀ pịkị Izirẹlị ḅụ seleḅa pakịrị tẹra puku ofori puku amesi na pakịrị oyia ẹndẹ (300,000) kẹ ḅiokpọtẹ ọmụgbin ḅara-ḅaatẹ kịnị oyi maa puku finji na kịnị oyia ẹndẹ (100,000) ọkọm.

⁷Kụma gbọrụ Tamụnọ tomḅọ nwẹnị ọ̀ ḍọkụma-ḅo tẹ ọ̀ ḅẹẹ, “yei amadaḅọ, ḍụkụ tẹ Izirẹlị ọmụ-ogbo mẹ ị́nịna mu ma, kẹ gotẹ ọkọ ḅẹẹarị, KỊNỊNYANAḄỌ ḅe ori Izirẹlị na, mịna Iferemu ḅẹ apụ mamgba na ofori.

⁸Kụma ị̀ nwẹnị ḅiotọnm mị ḅọkọ rẹ mịẹ ị̀ kẹ ọmụ ḅio kụrọ ḅarịye ḅẹḅẹ, Tamụnọ ị́nịna fịya-a apụ ma tọrọkọ ì sukuruma-gbin ḅa; kẹ gotẹ ọkọ ḅẹẹarị, Tamụnọ kụrọ nyana wararị kẹ ḅarasụa, anịanịa sukuruma-gbin.”

⁹Amazaya nwẹnị Tamụnọ tomḅọ ḅe ḅẹẹ, “Kụma wa tọ-ḅara kẹ à kẹ Izirẹlị ọmụ-ogbo mẹ pịrị tẹ seleḅa pakịrị tẹra puku ofori puku amesi na pakịrị oyia ẹndẹ (300,000) mẹ na mịẹ ḅẹ?” Tamụnọ tomḅọ ḅe nwẹnị pakịrị, “KỊNỊNYANAḄỌ ḅe inetẹ ḅẹlẹma mịẹ mẹ nẹngị ye kẹ ị́ pịrị ḅa.”

¹⁰Anịtẹso Amazaya nwẹnị Iferemu ḅụ ọ̀ ḍọkụma-ḅo ọmụ-ogbo mẹ wẹrịso tẹ in pịkị pịkị-so ama mum. In nwẹnị kpọma ye ḅụụ-ḅẹsọọ nyana Juda pịrị, tẹ kụrọ ịganị ḅụ pịkịma-so ama mu.

¹¹Kụma Amazaya nwẹnị ḅiokpọ nyana tẹ ori atomi ma kẹ tọrọkọ tarị tẹ Fụn Tụndụ ogboku mẹ mu tẹ Seya ḅẹ apụ ma ḅụụ kịnị gbọrụ puku, sọnọ ẹndẹ finji (10,000) ḅaa,

¹²Juda ḅẹ apụ ma pịkị ḍumo tọrụ ḅụ jen kịnị gbọrụ puku na sọnọ ẹndẹ finji (10,000) kuun-ọkị tẹ kẹ gbọrụ ịkụ ọgọnọ mu tẹ ịn kẹ gbin koromam ịkụ mẹ ọgọnọ-jụ ḅụ; ịn nwẹnị ịkụ mẹ akaka ma bịnya-bịnya tẹ anị nwẹnị inimgba pẹlẹ-ḅaa.

¹³Kụma ọmụ-ogbo mẹ ḅẹ apụ tẹ Amazaya fịrịma pịkị tẹ ḍụkụ tẹ ori na owu mẹ mu-a apụ ma nwẹnị Juda opu ama ma Sameriya ḅụ sọ-mu Bẹtị-horoni la koro tẹ ịna ḅụụ kịnị sọnọma ẹndẹ, oyia asi finji ḅaa, tẹ ḅẹlẹma ye fọịn ọkị lama.

¹⁴Amazaya Idọmụ ḅẹ apụ ma ḅaa fama tẹ ḅo sakị ò Seya ḅẹ apụ ma oru-atamụnọ ma kẹ ḅom, tẹ arị kẹ ori atamụnọ ḅara wẹrịtẹ sunsin arị pịrị-pịrị tẹ agba mịẹ-mịẹ arị pịrịarị.

¹⁵Anị ẹrẹsị KỊNỊNYANAḄỌ ḅe nwẹnị Amazaya ḅụụ ịganị nyana tẹ gbọrụ ịkịankoroḅọ kẹ ọ̀ fịrịma, oriḅe tẹ ọ̀ ḅẹẹm, “í tiegotẹ pịkịma gbọrụ atomi atamụnọ tẹ ì ḅara ḅụ amịna tomi ḍu ḅọrọma-a atamụnọ ma ḍọkụma-mu?”

¹⁶Kụma amụ ori ẹkwẹn pẹlẹ-a ogbo amadaḅọ ḅe nwẹnị ọ̀ ḅẹẹ, “Wa ị́ kẹ nimi kẹ amadaḅọ ḅe tolumaḅọ sọma tẹ? Dasịẹma! Í tiegotẹ fịị ḅio sọ na-iḅi?” Anieḅụ ịkịankoroḅọ ḅe dasịẹmam, kụma ọ̀ ḅẹẹm, “À nimi wararị mịnẹ Tamụnọ ị́ ḅaa ḅẹ tọn pẹlẹ tẹ, ị́ miemẹ mịẹ tẹ, pịkị à kẹ í toluma ye mẹ poki-a ẹrẹsị.”

¹⁷Anịtẹso Juda ḅẹ amadaḅọ Amazaya nwẹnị ori atomi na ḅịḅị-ọkịya. Ọ̀ nwẹnị oku kẹ Izirẹlị ḅẹ amadaḅọ Jehohazị, anie Jehohahazị owiḅọtụḅọ, pịkị Jehu taa-owiḅọtụḅọ ḅe fịrịma tẹ ḅẹẹ, “Ḅoo, yẹrị na ị́nịna owu sọ.”

¹⁸Jehohazị Izirẹlị ḅẹ amadaḅọ ḅe nwẹnị oku mẹ pakịrị Juda ḅẹ amadaḅọ Amazaya fịrịma, “Lẹbanọnị ḅẹ gbọrụ nangị oku kẹ Lẹbanọnị ḅẹ ịn kẹ Sida sịn gbọrụ sịn fịrịma tẹ ḅẹẹm, ‘ị́ ẹrẹḅọtụḅọ kẹ ì owiḅọtụḅọ pịrị simee.’ Tẹ Lẹbanọnị ḅẹ piri nama nwẹnị mẹnjị ḅọrọ tẹ nangị mẹ nanga ḅaa.

¹⁹Ị́yẹrị mẹẹ, ‘ḍikii àrị Idọmụ ḅaa tẹẹ’, tẹ sịḅị ḍụḅa ḅụ ị́ ị́ ḅioḅẹngbọ kẹ opu tọn tẹ. Kụma mịọkụ mẹ kẹ ama ọgọnọ sime; í tiegotẹ ị́ ḅịkịma ḅẹ ḅẹrẹ pakamarị, mịẹ tẹ ị́ ḅịkị tẹ pịkị Juda kẹ sụa ḅịkị ḅẹ ḅara?”

²⁰Kụma Amazaya poki ḍụkụ-a; anị gbala Tamụnọ ḅe ḅụụ ḅom ẹrẹsị, mịẹ tẹ ori ịn kẹ ị́nịna fịya-a apụ ḅara-ḅio su ḅẹ ḅara, kẹ gotẹ ọkọ ḅẹẹarị, Idọmụ ḅẹ atamụnọ ma in nwẹn ḍọkị tẹ ẹrẹsị.

²¹Anieḅụ Izirẹlị ḅẹ amadaḅọ Jehohazị nwẹnị paka mu; tẹ ori na, Amazaya Juda ḅẹ amadaḅọ na nwẹnị Bẹtị-semesi, sime Juda pịrị ye-yọ ḅụ owu ḅụ jụmọ-jụmọ na ẹrị-a.

²²Izirẹlị Juda nẹngịmam, tẹ ọrụḅọ-ọrụḅọ nwẹnị ḍumo-mangị kọnm so mḅọ ama mu.

²³Jehohazị Izirẹlị ḅẹ amadaḅọ nwẹnị Amazaya Juda ḅẹ amadaḅọ, Ahazaya owiḅọtụḅọ Johasị owiḅọtụḅọ ḅe kuun-ọkị Bẹtị-semesi ḅụ, tẹ ọ̀ kẹ Jeruselemu ḅo, tẹ nwẹnị Jeruselemu onu mẹ ḅụ Iferemu Ogigo-ḅọkọ mẹ ḅụ ọkị mu Ịkọlị ḅẹ Ogigo-ḅọkọ mẹ la ḅụ gbọrụ ẹndẹ na oyia aḅụọ-kuḅu finji (200 m) kẹ nangwọ ye kan sara.

²⁴Ọ̀ nwẹnị golu na, seleḅa na mamgba pịkị namakọrịaị mamgba tẹ Tamụnọ warị mẹ ḅio in ḍọkị-ẹrị aị ma tẹ Obed-edọmụ suku-ḅio sime aị ma ọkị so; ọ̀ pịkị amadaḅọ warị mẹ ḅẹ ngọ ma na, pịkị pakịrị apụ ma na ọkịm, tẹ nwẹnị pịkịma-so Sameriya mu.

²⁵Johasị Juda ḅẹ amadaḅọ ḅe owiḅọtụḅọ Amazaya jei akụra kẹ ḍumo simem Jehohahazị Izirẹlị ḅẹ amadaḅọ ḅe owiḅọtụḅọ Jehohazị fịị ḅọrọ tẹso.

²⁶Mịọkụ kirikọntẹ Amazaya amịẹaị ḅụ tarịye ḅụ ọkị mu kunomaye la, Juda na Izirẹlị na Amadapụ ma ḍiri mẹ ḅio kẹẹ-a?

²⁷KỊNỊNYANAḄỌ ḅe ḅụụ ọ̀ pịkị-so sakị mẹ mie in ḅẹrẹ-ḅiya ọ̀ pịrị ye Jeruselemu ḅụ, tẹ ọ̀ nwẹnị ḍumo-mangị kọn Lakisi mu. Kụma in fịrịma Lakisi mum, tẹ anịjụ ọ̀ ḅaam.

²⁸In nwẹnị asụ ọgọnọ ò dogi ḅo; tẹ Devidi opu ama mẹ ḅio ịn nwẹnị ọ̀ kẹ ori aḍapụ ma na ḍiḅi gboloma.