Read kalabari 2 Paka-aị 31 Bible Online

2 Paka-aị 31 - kalabari bible

2 Paka-aị 31

¹Mịọkụ mịẹ mẹmgba fa fama tẹso, Izirẹlịapụ mamgba tẹ sime apụ ma paka Juda ḅẹ opu ama ma mum tẹ ịḅalị ma anyịma tẹ arị kẹ pakịrị-pakịrị puu, tẹ nwẹnị Asẹra oru-fụḅara mẹ pẹlẹ-gbin tẹ gele ayeyọ ma na, ebeka ma na kan sara Juda mẹmgba na, Benijamịnị na ḅụ, na Iferemu na Manasẹ na ḅụ nwenii ini arịmgba sima famam. Anịtẹrẹmẹ Izirẹlịapụ mamgba pịkịma-so ịna opu ama mum, ọrụḅọ-ọrụḅọ nwẹnị mḅọ nyana ye ḍọkụma-mu.

²Hẹzịkaya nwẹnị agbamịẹapụ ma na, Livayị furo-ḅẹ-apụ ma na kẹ kpoo-kpo ḍiema; agbamịẹapụ ma na, Livayị furo-ḅẹ-apụ ma na, ọrụ kpoo-kpo amịna fịrị nyanam, fịrị mẹ wẹrịtẹ sime-ḅara. Agbamịẹapụ ma na Livayị furo-ḅẹ-apụ ma na sime in pịrị yee anie dọkịma-agba mịẹ na, dein-pịrị-agba mịẹ na, KỊNỊNYANAḄỌ ḅe warị mẹ ḅẹ ogigo-aḅọkọ ḅụ ḅẹ fịrị mẹnjị na, ịmịẹtẹ ḅẹẹ na pịkị tokini anume su na.

³Amadaḅọ ḅe ò soku-ḅẹ nyana aị tẹ ọ̀ kẹ pịrị pakama aị anie, in kẹẹ dede na ḅoḅiri na, Ịnyọsara-Ene ḅụ na, ịwọ akalụ ḅụ na, KỊNỊNYANAḄỌ ḅe oloko mẹ ḅụ anị wẹrịtẹ kẹẹ wararị kopini afịaị ma na mịẹ ḅẹ dọkịma-agba mịẹ aị.

⁴Ọ̀ tọn Jeruselemu ḅụ simearị apụ ma pịrịm mịnẹ, kẹ mịẹ tẹ Agbamịẹapụ ma na, Livayị furo-ḅẹ-apụ ma na ịna ḅụụ kẹ KỊNỊNYANAḄỌ ḅe oloko mẹ pịrị gotẹ ini in nyana na-iḅi kiri kẹ in pịrị.

⁵Tọn ye mẹ wasama anga-anga ma la gbọrụ sakị, Izirẹlịapụ ma nwẹnị ịna sịnmgbọlụ ma ḅụ tarị mgbọlụ ma na, iru na, pulo na ḅẹm na, piri mẹ ḅio paka-ḅo aị mamgba ḅụ gburo-gburoma ye pịrị, tẹ nwẹnị gburo-gburoma ḅẹẹye-ḅẹẹye kẹ oyia akiri ḍiya tẹ gbọrụ kiri ọkị-ḅo.

⁶Izirẹlị na, Juda na ḅẹ apụ tẹ Juda ḅẹ opu ama ma ḅụ simearị apụ sọ opu anama na, anana na kẹ oyia akiri ḍiya tẹ gbọrụ kiri ọkị-ḅom, pịkị ịn mịẹ fịafịama tẹ sikima koroma KỊNỊNYANAḄỌ ịna Tamụnọ ḅe pịrị tẹ aị ma na, tẹ arị kẹ kpoo-kpo ḅụ tunduruma koromam.

⁷Tẹrẹị karama akalụ ḅụ in saakị kpoo-kpo ma tunduruma koromam, tẹ sọnọma akalụ karama akalụ ḅụ ini arị koroma famam.

⁸Hẹzịkaya na, sịḅịdapụ ma na ḅo kpoo-kpo ma ẹrị tẹso, ịn nwẹnị KỊNỊNYANAḄỌ ḅe na, ori atomi Izirẹlịapụ ma na boma.

⁹Hẹzịkaya nwẹnị kpoo-kpo ma gboloma ḅii-ḅịḅị kẹ agbamịẹapụ ma na, Livayị furo-ḅẹ-apụ ma na ḅii.

¹⁰Azaraya Sịḅịda-Agbamịẹḅọ ḅe, anie Zadọkụ warị ḅẹ ḅọ ḅe nwẹnị ọ̀ pakịrị, “In saakị mịna ḅarasụa aị ma kẹ KỊNỊNYANAḄỌ ḅe warị mẹ ḅio ḅo kụra ḅio wa fịye fị furo ḅinma tẹ, tẹ mana-mana ye kọnmam; gbala KỊNỊNYANAḄỌ ḅe ori atomi boma tẹ ẹrẹsị, anie mịẹ tẹ wa mị gburo-gburo ye mẹ kọnma tẹ koko ye”.

¹¹Anịtẹso Hẹzịkaya nwẹnị tọn in pịrị in KỊNỊNYANAḄỌ ḅe warị ḅio ḅụ ngọ-koko-aḅio tẹlẹmaa; tẹ ịn nwẹnị arị tẹlẹma.

¹²In nwẹnị ye-mingirima-a ḅara kẹ ịn kẹ ḅarasụa aị ma na, nyana-oyi-ḅụụ-gberie mẹ na, in sikima koroma fịafịatẹ aị ma na kẹ ḅo ye koko aḅio ma ḅio sunm. Sịḅịda opu fịrịmẹnjịḅọ ḅe tẹ arị onyo-sẹịnḅọ Kọnanaya, Livayị furo-ḅẹ-ḅọ ḅe, ò iyimbere Simeyi ọ̀ ḅụụ maaịn karamam;

¹³Anịsakị Hẹzịkaya amadaḅọ ḅe na Azaraya Sịḅịda-Agbamịẹḅọ ḅe na tọn ḅara ḅụ Jehẹlị na, Azazaya na, Nahatị na, Asahẹlị na, Jeremọtị na, Jozabadị na, Ẹlịyẹlị na, Isimakaya na, Mahatị na, Bẹnaya na kọrịnama-ḍikiḍikiapụ sọm, Kọnanaya na ò iyimbere Simeyi na suku ḅio.

¹⁴Kore, Imina owiḅọtụḅọ, Livayị furo-ḅẹ-ḅọ ḅe tẹ ịrụa-saakịarị-anga ḅẹ ogigo-ḅọkọ mẹ ḍikiḍikiarị ḅọ ḅe kịnị tọn pịrị-a ḅara kẹ mịẹ Tamụnọ pịrịarị agba ma da, tẹ ḍie tẹ sikima KỊNỊNYANAḄỌ ḅe pịrị ḅẹ kiri na, kẹ agba mịẹ fịafịa tẹịn yọ mẹ pịrị ḅẹ akiri mẹ onyo-sẹịnm.

¹⁵Agbamịẹapụ ma simearị opu ama ma ḅụ Ideni na, Minihamini na, Jọsụwa na Sẹmaya na, Amaraya na, Sekanaya na ḅarasụa agbamịẹḅọ ḅe pịrị ḅụ ye mingirima-a ḅara kẹ gbasịma ye ḍie ịna mịnapụ omongiapụ na, asawọ na pịrịm, kpoo-kpo ḅụ.

¹⁶Paka furo ḅụ tẹra kụra saakị iwo sịḅị ḅụ ḅọrọtẹ ịn kẹ ḍiri ḅio sụa owiapụ ma tẹ kpoo-kpo ḅụ KỊNỊNYANAḄỌ ḅe warị mẹ sọ tẹ ene-ene ḅẹ kọrịnama sime-ḅara ḅụ sime anị kpo mẹ pịrị fịrị mẹ mẹnjị ḅarị apụ mamgba ḅụ in kịnị sikima-a.

¹⁷Ịna ḍapụ awarị ma wẹrịtẹ sime-ḅara ḅụ mịẹ ini agbamịẹapụ ma kẹ ḍiri ḅio sụa ḅara; Livayị furo-ḅẹ-apụ ma kụma, ịna kọrịnama wẹrịtẹ kpoo-kpo ḅụ sime-ḅara si kụra saakị iwo sịḅị ḅụ ḅọrọtẹ apụ mịẹ ẹrẹ sụa ye.

¹⁸Agbamịẹapụ ma, ịna ḍọkọḍọkọ-awọmẹ mamgba na, ịna sime-ereme na, ịna owiapụ-awọmẹ na, ịna eremịna-awọmẹ na, bebe tomina-ogbo mẹ na mịẹ ịn kẹ ḍiri ḅio sụa yee; gbala in minini nyana ḅara ḅụ ịna ḅụụ wẹrị fịafịamarị ẹrẹsị.

¹⁹Erọnị owiapụ-awọmẹ, agbamịẹapụ ma tẹ sime ịna opu ama ma pịrị tẹ sime wenimgba pịrị aḍụọ-kiri ma ḅụ angarị apụ ma, kịrị-kịrị opu ama ma ḅụ owiapụ emi, ini ẹrẹ kẹ sịn tẹ gbọrsịḅị sime ḍiekiri ma ḍiema-ḍiema agbamịẹ owiapụ ma ogboku na, ḅẹḅọ-ḅẹḅọ tẹ Livayị furo-ḅẹ-apụ ma ogboku ḅụ ẹrẹ sụa apụ ma pịrịarị apụ.

²⁰Mị-ḅara mịẹ Hẹzịkaya Juda mẹmgba ikelema-koro ḅụ mịẹ ḅara; tẹ ọ̀ nwẹnị KỊNỊNYANA-TAMỤNỌ ḅe tọrọkọ iḅiye na, kuraye na, minini nyana ḅara na kẹ ye mịẹ ḅọ sọ.

²¹Anị sakị ori ò ḅioḅẹngbọ mẹmgba kẹ Tamụnọ warị ḅẹ fịrị ḅụ ọ̀ saakị tẹ kọrị ḅẹ ye goyegoye kọrịm, tẹ oloko mẹ na, tọn wararị aị ma na wẹrịtẹ sime-ḅara kẹ ọ̀ Tamụnọ ḍọkịarị tẹ lolom.