Read kalabari 2 Paka-aị 8 Bible Online

2 Paka-aị 8 - kalabari bible

2 Paka-aị 8

¹Si kụra gbasị mịẹ Sọlọmọnị kẹ KỊNỊNYANAḄỌ ḅe warị mẹ na, ò soku-ḅẹ warị mẹ na nama ye.

²Sọlọmọnị pịkị siin Huramụ kẹ ọ̀ pịrị opu ama ma nama tẹ Izirẹlịapụ ma kẹ arị ḅio koromatẹ ini angam.

³Sọlọmọnị Hamatị-zoba mum, tẹ anị ọkịm.

⁴Ori ịkpa ḅio Tadịmọ sịn opu ama mẹ namam, tẹ pịkị ngọ koko opu ama mamgba tẹ Hamatị ḅụ ọ̀ nama aị ma namam.

⁵Ọ̀ pịkị siin ọmụ gotẹ onu nama ọgọnọ-jụ ḅẹ Bẹtị-horoni na suku-jụ ḅẹ Bẹtị-horoni opu ama ma ikelema tẹ ogigo-aḅọkọ na kụrọtẹ ẹngbẹsẹ na sụam.

⁶Belatị na Sọlọmọnị nyana ngọ koko opu ama mamgba na, ò kirimẹnjị-ọmụarụ emi opu ama mamgba na, ori asụ-dọkụ-ọmụapụ simearị opu ama na, Sọlọmọnị Jeruselemu na Lẹbanọnị na, ò suku-ḅio simearị ama nama ḅẹ ḅii-ye ḅii-ye gbọrụ ḅara mẹ kẹ ori arị nama.

⁷Hitahiti apụ na, Amọrayịtị apụ na, Pẹrịzayịtị apụ na, Hivayịtị apụ na, Jebusayịtị apụ na ḅụụ kọn apụ tẹ Izirẹlị ḅụ ḅo-a,

⁸Kụma in paka ḅara ḅụ ama mẹ ḅio ḅẹ apụ ḅụụ kọn apụ inima tẹ Izirẹlịapụ ma ḅaa apụ — mịna apụ ma mie Sọlọmọnị kụrọ kọrịnama kẹ pịrị tẹ kọrị apụ; anị ḅara mịẹ in kọrị ḅo mịmgba la ḅara.

⁹Kụma Izirẹlị ḅe apụ ma ḅụ Sọlọmọnị kẹ omoniapụ sọma ọ̀ kọrịnama pịrị ḅọ ofori; ini anie ọmụ gbin apụ na, ọ̀ kọrịnama kọrị opu apụ na, ò kirimẹnjị-ọmụarụ ma ḅẹrẹtọn-apụ na, ori asụ-dọkụ-ọmụapụ na.

¹⁰Mịna apụ ma anie Amadaḅọ Sọlọmọnị kọrịnama kẹ sịḅịda kịnị oyia asi, mesi oyi finji ma (250) tẹ tomi ma ḅụụ kụrọ kọn apụ ma.

¹¹Sọlọmọnị, Devidi opu ama mẹ ḅụ Fero ẹrẹḅọtụḅọ ọkị-ḅo tẹ kẹ ọ̀ nama á pịrị warị ḅio sunm, ọ̀ kẹ gotẹ ọkọ mịẹ ye, ori mẹẹ, “ị̀ ta Izirẹlị ḅẹ amadaḅọ Devidi warị mẹ ḅio anga ḅịa, kẹ gotẹ ọkọ ḅẹẹarị, KỊNỊNYANAḄỌ ḅe Ọḅọkụ-Igbe mẹ ḅo laa anga laa anga anie fịafịa anga.”

¹²Anịtẹso Sọlọmọnị nwẹnị mẹnjị-toluḅọrọ-anga mẹ tọrọkọ ọ̀ nama KỊNỊNYANAḄỌ ḅe pịrị agbamịẹ-anga mẹ ọgọnọ dọkịma-agba mịẹ KỊNỊNYANAḄỌ ḅe pịrị,

¹³Ene-ene ḅẹ kọrịnama mẹ ḅii ḅara ḅii ḅara Mozizi agba mịẹ oloko mẹ wẹrịtẹ sime-ḅara ḅụ, Ịnyọsara-Ene ma na, ịwọ akalụ ene ma na, ịrụa kụra ḅụ kopini afịaị fị tẹra sakị ma ḅụ — anie sun-a fịturu kopini afịaị fị sakị mẹ na, feni anga-anga ḅụ fịarị kopini afịaị ma na, Ọḅọkụ-Igbe mẹ sime akpụrụ-awarị mẹ ḅẹ kopini afịaị na.

¹⁴Ò ḍa Devidi wẹrịtẹ tọn koroma ḅara, ori agbamịẹapụ itu-itu ma tọn ịna fịrị pịrịm, tẹ Livayị furo-ḅẹ-apụ ma na tọnm, ịna tokinii fịrị akiri ma na, agbamịẹapụ ma tọrọkọ ḅụọ-ḅụọ nyana tẹ ogigo-aḅọkọ ma pịrịm; gbala mịẹ Devidi, Tamụnọ tomḅọ ḅe tọn tẹ ḅara.

¹⁵Anịsakị amadaḅọ ḅe tọn kẹ agbamịẹapụ ma na, Livayị furo-ḅẹ-apụ ma na pịrị ye sikima ḅẹẹye-ḅẹẹye ḅụ na, ngọ-koko-aḅio ma na gboloma ye ḅụ in jen mịẹ-a.

¹⁶Mị-ḅara mịẹ Sọlọmọnị kọrịnama mamgba kọrị fama ḅara KỊNỊNYANAḄỌ ḅe warị mẹ ḅụ, sukutarị-ḍụḅarị koroma ene mẹ ḅụ ọkị mu anị kọrị fama sakị la. Mịẹ KỊNỊNYANAḄỌ ḅe warị mẹ nama kara ḅara.

¹⁷Anịtẹso Sọlọmọnị nwẹnị so tọrụ mẹ akaka ḅụ Eziyọnị-geba na Ẹlọtị na mu, Idọmụ ama mẹ ḅio.

¹⁸Huramụ nwẹnị ori afịrịmẹnjịapụ ḅụụ ḅụ onwi-arụ na, tọrụ mẹ nimi apụ na kẹ ò fịrịma, tẹ ịn nwẹnị Sọlọmọnị afịrịmẹnjịapụ na so Ọfaya mu, tẹ anịjụ golu akpo-kpo maa puku fa puku ninea si oyi finji, na kpoo jeia ẹndẹ (1,350,000) na ọkị-ḅo Amadaḅọ Sọlọmọnị pịrị.