Read kalabari 2 Paka-aị 9 Bible Online

2 Paka-aị 9 - kalabari bible

2 Paka-aị 9

¹Mịọkụ Sẹba ḅẹ amada-ẹrẹḅọ ma Sọlọmọnị ereso naa tẹso, á nwẹnị kụrọtẹ ḅii-aḅịḅị kẹ ò daaḍiki ḅẹ tẹ Jeruselemu ḅo. Á gburo-gburo ḅara kẹ ye sụa aị na, ike-sụa-anama na, kẹ ẹnyị na, gburo-gburotẹ golu na, yela aḍụḅarị na dogi-ḅom. Á ḅo Sọlọmọnị la tẹso, á nwẹnị á ḅioḅẹngbọ sime ye mẹmgba ḍuko Sọlọmọnị pịrị.

²Sọlọmọnị nwẹnị arị ḅii-aḅịḅị mamgba pakịrị; mie kụma Sọlọmọnị ḅụụ kikimatẹ ḅọịtẹ ori inetẹ giregirema ḍuko finji á pịrị-a ye ofori.

³Tẹ Sẹba ḅẹ amada-ẹrẹḅọ ma Sọlọmọnị nimi mẹ na, ọ̀ nama wararị warị mẹ na,

⁴ò dẹbịlẹ ọgọnọ ḅẹ fịye mẹ na, ọ̀ fịrịmẹnjịapụ opu apụ ma lẹgị ḅara mẹ na, ori afịrịmẹnjịapụ wẹrịtẹ fịrị mẹnjịarị ḅara na, in sụa kapa na, ò minji-ḅuuye dogi wararị apụ na in sụa kapa na, KỊNỊNYANAḄỌ ḅe warị mẹ ḅụ mịẹ dọkịma-agba ẹrị tẹso, á tẹmẹ nwẹnị á ḅụụ faa.

⁵Á nwẹnị amadaḅọ ḅe ḅẹẹ “í amịẹaị na, í nimi na, tẹ ị̀ ama jụ ḅụ in ḍuko tẹ à naa ye mẹ karakara ye,

⁶kụma arị in ḍuko ì pịrị aị ma minini-a nwenii à ḅo tẹ ḅarana ì atọrụngbọ kẹ arị ẹrị tẹ, anịsakị ḍikii, í nimi mẹ gburo-gburo la ḅara kẹ maa anga ḍiya ḅẹ gbọrụ pakịrị sọ in ḍuko ì pịrị-a; í in ḍuko tẹẹ à naa ḅara mẹ nẹngịm.

⁷Ḅioḅẹlẹ sime í sime-ereme ma pịrịm! Ḅioḅẹlẹ sime í afịrịmẹnjịapụ ma pịrịm, inima tẹ sịkọpẹlẹ-a ḅara kẹ í tọrọkọ sịẹsime sime tẹ í nimi mẹ naarị apụ ma.

⁸Boma sime kẹ KỊNỊNYANAḄỌ ị́ Tamụnọ ḅe pịrị, ori ḅe tẹ í ḅụụ ḅụ ḅioḅẹlẹ nyana tẹ ị́ kẹ amadaḅọ ḅara ḅụ ori emine ọgọnọ gbana tẹ kẹ KỊNỊNYANAḄỌ ị́ Tamụnọ ḅe pịrị ḅo ḅe! Anị kẹ gotẹ ọkọ mịẹ ye, Tamụnọ Izirẹlị ḅẹlẹmam, tẹ in mịẹ pakama gbamaso ḅẹm, mịẹ ori ị́ kẹ amadaḅọ sọma in pịrị ye, mịẹ tẹ í karakara ḅẹrẹ kọn pịkị karakara mịẹ ḅẹ ḅara”

⁹Anịtẹso à nwẹnị golu kpo-kpo amesi, sọnọ apuku finji (360,000) na, gburo-gburo lama tẹ ḅara kẹ ẹnyị na, yela aḍụḅarị na kẹ ọ̀ pịrị: tẹrẹmẹ ḅo mị sakị mẹ la ḅụ Sẹba ḅẹ amada-ẹrẹḅọ kẹ Amadaḅọ Sọlọmọnị pịrị ẹnyị ma pembe ẹnyị ofori.

¹⁰Arị aị ma sikima, Huramụ afịrịmẹnjịapụ na Sọlọmọnị afịrịmẹnjịapụ na tẹ Ọfaya ḅụ golu kẹ ḅo apụ ma, ịn kẹ alịgọmụ sịn-arị sịn na, yela aḍụḅarị na kẹ ḅom.

¹¹Tẹ amadaḅọ ḅe ịn kẹ alịgọmụ sịn-arị sịn mẹ kẹ KỊNỊNYANAḄỌ ḅe warị ḅụ na amadaḅọ ḅe warị ḅụ na ḅụọ sịẹma kpọlị iwo ye namam; ọ̀ pịkị kẹ alili na, ọbọ na ye tẹ kẹ nume-suapụ ma pịrịm; tẹrẹmẹ ḅo anị sakị mẹ la Juda ḅẹ ama mẹ ḅio gbala-gbala amụ ini arị sime-ḅara sime aị ẹrị-a.

¹²Amadaḅọ Sọlọmọnị Sẹba ḅẹ amada-ẹrẹḅọ ma ḅii aị mamgba kẹ á pịrịm, árị ọkị-ḅo kẹ amadaḅọ ḅe pịrị aị ma sikima tẹ árị ịgbanị ye goyegoye. Anịtẹrẹmẹ árị na árị afịrịmẹnjịapụ na pịkịma árị ama mum.

¹³Gbọrụ kụra ḅụ Sọlọmọnị nyana golu anie golu kpo-kpo gbọrụ puku fa puku oyia asi mesi oyi finji na, puku jeia ẹndẹ na (1,998,000)

¹⁴tuḅokọn apụ na, ja sịẹ ḅẹ ngọ-sẹma-dẹrị opu tuḅo sikima; Arebịya ḅẹ amadapụ mamgba na, ama mẹ ḅẹ ḅẹrẹtọn-apụ ma na pịkị golu na seleḅa na ọkị-ḅo Sọlọmọnị pịrịm.

¹⁵Amadaḅọ Sọlọmọnị ḅakụtẹ golu kẹ ḍụḅa-ḍụḅatẹ ekpeke oyia asi tẹmẹm; ḅakụtẹ golu kpo ẹndẹ, oyia asi finji in nwẹn kẹ gbọrụ ekpeke gbọrụ ekpeke tẹmẹm.

¹⁶Ò ḅakụtẹ golu kẹ pịkị ekpeke jeia asi tẹmẹm; golu kpo jeia asi gbọrụ ekpeke gbọrụ ekpeke ḅụ sọm; tẹ amadaḅọ ḅe arị kẹ Lẹbanọnị Opu piri mẹ ḅẹ warị ḅio koromam.

¹⁷Amadaḅọ ḅe ọdụ kẹ gbọrụ ḍụḅatẹ ọdụ emine mịẹm, tẹ karakara golu sọọ-sara anịmgba gbaịnm.

¹⁸Emine mẹ ḅụ, ḅụọ sịẹma kpọlị iwo sonio anga emi na ḅụọ-suku koroma golu kala ịkasiye na, ini arịmgba mịẹ emine mẹ ḅụ oḅolo wararị; lẹgị-sime anga mẹ ḅẹ maa akaka ma ḅụ ḅara gbana ye emi, tẹ maa ọkụkụ ḅara gbana aị ma akaka sịẹsime wararị,

¹⁹anịsakị oyi maa ọkụkụ finji ḅụọ sịẹma sonio anga ḅẹ maa kunoma ma ḅụ gbọrụ ọkụkụ, gbọrụ ọkụkụ sịẹsime wararị. Gbọrụ amakiri ḅụ sọ amụ in gbala-gbala anị sime-ḅara sime ye mịẹ-a.

²⁰Amadaḅọ Sọlọmọnị minji-ḅuu-aị mamgba, in golu kẹ arịmgba tẹmẹ famam; in pịkị karakara golu kẹ Lẹbanọnị Opu piri mẹ ḅẹ warị mẹ ḅio ḅẹ ye sụa aị mamgba tẹmẹm. Sọlọmọnị ene ma in seleḅa kẹ ye-sịn-a.

²¹Gbala Huramụ afịrịmẹnjịapụ amadaḅọ ḅe opu onwi-arụ ma kẹ Tasịsị mu-mu ḅoarị; anịsakị tẹra akụra goyegoye ḅụ Tasịsị ḅẹ opu onwi-arụ ma golu na, seleḅa na, ọdụ na, ngẹrị-mẹnjị-ḅụkọ na, ogunu na kẹ ḅo-ḅom ẹrẹsị.

²²Mị-ḅara ḅụ Amadaḅọ Sọlọmọnị ngọ kọn, pịkị ye-nimi kẹ tomikiri mẹ ḅụ sime amadapụ mamgba nẹngịm.

²³Tomikiri mẹ ḅẹ amadapụ mamgba nwẹnị Sọlọmọnị sime anga ḅo tẹ ò nimi mẹ tẹ KỊNỊNYANAḄỌ ḅe kẹ ò ḅioḅẹngbọ suu wẹrị wararị ye mẹ naa dọkị.

²⁴In ḅo-ḅo tẹ tọnwa ḍiepịrị-aị — anie seleḅa na golu na kẹ tẹmẹ-aị na, opu akapa na, ọmụ-aị na, sịn ḅụ paka ḅoarị ḅẹlẹma kụnụarị ye mẹ na, ẹnyị na, asụ na pịkị kụrọ-sịḅịsụa-asụ na kẹ ḅo ọ̀ pịrịm kụra-kụra ḅụ.

²⁵Sọlọmọnị asụ na, kirimẹnjị-ọmụarụ na koko anga ḅẹ oyi ẹndẹ (4,000) na, asụ-dọkụ-ọmụapụ ḅụụ kịnị ẹndẹ suei (12,000) na nyanam, inima tẹ ọ̀ kẹ kirimẹnjị-ọmụarụ simearị opu ama ma na, Jeruselemu ḅụ na koroma amadaḅọ ḅe pịrị apụ ma.

²⁶Anịsakị ò ḅẹrẹtọn amadapụ mamgba tẹ Yuferetisi ḅụ sime apụ ma ḅụụ ọkị mu Filisiteni ḅẹ ama ma ḅụ mu Ijiputi akaka la pịrịm.

²⁷Amadaḅọ ḅe nwẹnị mịẹ tẹ seleḅa ḍụḅarị jua ḅara jua Jeruselemu ḅụ, tẹ ịn kẹ sida sịn-arị sịn mẹ pịkị sịkamọ sịn Juda atụndụ ḅio ḅin ḅara ḅinm.

²⁸Anịsakị Ijiputi na, ama mamgba na ḅụ, in asụ fịrịma-fịrịma ḅo Sọlọmọnị pịrịm.

²⁹Mịọkụ tarịye ḅụ mu kunomaye la, Sọlọmọnị amịẹaị ḅụ kirikọntẹ ịn kẹ ịkịankoro Netanị mịẹ aị ḅẹ ḍuko-aị na, Ayija Silo ḅẹ ḅo ḅe koro ịkịan ḅụ na, Ido, so-ḅịrịḅọ ḅe Jerobohamụ, Nebatị owiḅọtụḅọ ḅe gboloma ịkịan mẹ ḅụ kẹẹ wararị aị ma ḅio arị ofori?

³⁰Sọlọmọnị Jeruselemu ḅụ sime tẹ kụra amesi kẹ Izirẹlị mẹmgba ḅụ ama-dam.

³¹Sọlọmọnị nwẹnị fịị, tẹ ini ò ḍiḅim ọ̀ ḍa Devidi opu ama mẹ ḅụ; tẹ ori owiḅọtụḅọ Rehobohamụ ò kiri ọkị tẹ ama-dam.