Read kalabari Ẹzịra 10 Bible Online

Ẹzịra 10 - kalabari bible

Ẹzịra 10

¹Ẹzịra tẹkẹarị, si-goarị, owuarị tẹ ọ̀ ḅụụ sịẹma-sịẹma Tamụnọ warị mẹ tọrọkọ gbin-arị sakị, owiapụ na, ereme na, awọmẹ na gburo-gburotẹ kobiri-ogbo Izirẹlị ḅụ kobiri tẹ paka ọ̀ ḍọkụma-ḅom; gbala tomi ma akụ ye ḅụụ la ḅara kẹ tẹmẹ-la owu kọnm ẹrẹsị

²Ẹlamụ owiapụ-awọmẹ ma ḅụụ Sekanaya, Jeyẹlị owiḅọtụḅọ ḅe nwẹnị ẹkwẹn Ẹzịra pịrị, “Wa wamịna Tamụnọ ḅụ nyana minini kan tẹ, tẹ ama ḅẹ atomi ma ḅụụ igoni ereme ma na sime tẹẹ, kụma mịọkụ mẹ sọ kẹ Izirẹlị ḅụ miemẹ gboloma ye mẹ mịẹ ḅẹ ḅara ḅẹ ḅiokpọ emi.

³Anị ẹrẹsị yee wa wamịna Tamụnọ na mịna ereme ma na ịna awọmẹ mamgba na dee ḅẹ ọḅọkụ fị, ị̀ nyanaḅọ ḅe na, wamịna Tamụnọ tọn ye mẹ ḅụ ḅụụ-sẹkịmarị apụ ma na toluma ye mẹ wẹrịtẹ sime-ḅara; anịsakị yee anị oloko mẹ wẹrịtẹ sime-ḅara mẹ mịẹ.

⁴Saakị, kẹ gotẹ ọkọ ḅẹẹarị, miemẹ anie ị́ kọrịnama, anịsakị wa ị́nịna emi; kụrọ sịẹ tẹ anị mịẹ”.

⁵Anịtẹso Ẹzịra nwẹnị saakị tẹ tọrọkọ tarị agbamịẹapụ ma na, Livayị furo-ḅẹ-apụ ma na, Izirẹlị mẹmgba na mịẹtẹ ini ọḅọkụ mẹ fịm.

⁶Anị tẹrẹmẹ Ẹzịra nwẹnị Tamụnọ warị mẹ tọrọkọ saakị-so Jehohananị, Ẹlịyasibu owiḅọtụḅọ ḅe kala-ḅio sọ, ò fịye fị-a pịkị minji ḅuu-a ḅara kẹ ḍin mẹ ḅụ sime ḅama anga mẹ; anị kẹ gotẹ ọkọ mịẹ ye, ori omoni ḅara-ḅio paka-ḅo apụ ma nyana-a minini mẹ kururuarị ẹrẹsị.

⁷In nwẹnị kpo-kpo gbolo Juda na Jeruselemu na ḅụ mịnẹ omoni ḅara-ḅio paka-ḅo apụ mamgba ḅo Jeruselemu ḅụ kobirii,

⁸anịsakị ḅẹḅọ-ḅẹḅọ tẹ tẹra aḍin ḅụ ḅo la-a ḅọ goḅọ-goḅọ, fịrịmẹnjị-opuapụ ma na omongiapụ ma na tọn ḅara ḅụ, mḅọ nyana ye mẹmgba in tan-ọkị fama ḅa, tẹ omoni ḅara-ḅio paka-ḅo apụ ma tomina-ogbo mẹ ḅio mḅọ tọrụ fama ḅa.

⁹Anịtẹso tẹra aḍin ma ḅụ Juda na Benijamịnị na ḅụ sime apụ mamgba nwẹnị mu Jeruselemu ḅụ kobiri, eseni akalụ karama akalụ mẹ ḅẹ oyi maaịn finji karama ene ḅụ in kobirim. Tomi mamgba Tamụnọ warị mẹ tọrọkọ finjima wararị ogboku mẹ ḅụ lẹgị-simem tẹ koroarị ikutẹ eene mẹ na mị ḅẹrẹ mẹ na gotẹ ḅụụ-sẹkịmarị.

¹⁰Ẹzịra agbamịẹḅọ ḅe nwẹnị saakị tẹ in ḅẹẹ, “Ọ́ mẹnjị iri tẹ mu igoni ereme na sime tẹ Izirẹlị mịẹ gbẹẹ-a aị ma mịẹ suma tẹ.

¹¹Anị ẹrẹsị, ọ́ mịọkụ ọmịna asi ma ḍuko pakama KỊNỊNYANAḄỌ ọmịna ḍapụ ma Tamụnọ ḅe pịrị, tẹ ọ̀ tọn ye mịẹ; ọmịnị ama mẹ ḅẹ apụ ma na, igoni ama ḅẹ ereme sime na ḅụ ọmịna ḅụụ ḅelemaa.”

¹²Anịtẹso, kobiri-ogbo mẹmgba nwẹnị gele pọkọ kẹ oluku tẹ pakịrị, “ọkọọ, wa ị́ ḅẹẹ ḅara mịẹ ḅa.

¹³Kụma tọnwa tomi emi, anịsakị ikutẹ eene pịkị koroarị sakị, wa ḅarị inetẹ etela ogbo sịẹsime ḅịa. Miemẹ anie gbọrụ ene, anịanịa maa ene ḅẹ kọrịnama-a; kẹ gotẹ ọkọ ḅẹẹarị, wa gburo-gburoma mị ḅẹrẹ mẹ ḅụ mẹnjị iri tẹ.

¹⁴Yee wamịna fịrịmẹnjị-opuapụ ma onyo-sẹịn bebe kobiri-ogbo mẹ pịrị; yee wamịna opu ama mamgba ḅụ, inima tẹ igoni ereme ọkị sime apụ ị́ pẹlẹ sakị-sakị ḅụ ḅo, anịsakị opu ama ḅẹ omongiapụ na, ḅẹrẹkọn-apụ ma na ini na ḅoo; nwenii mị ḅẹrẹ mẹ ḅụ wamịna Tamụnọ ḅalafama ịganị mẹ wamịna ḅụụ pịkị so”

¹⁵Jonatanị, Asahẹlị owiḅọtụḅọ ḅe na Jazẹya, Tikiva owiḅọtụḅọ ḅe na anie miemẹ na tụḅụrụ ye, tẹ Mesulamu na Sabetayị Livayị furo-ḅẹ-ḅọ na nwẹnị in mịẹ kụrọma.

¹⁶Anịtẹso omoni ḅara-ḅio pịkịma-ḅo apụ ma nwẹnị ọkọ mịẹ. Ẹzịra agbamịẹḅọ ḅe nwẹnị ḍa awarị-warị asịḅịdapụ ma ḅụụ kịnị tọn ịna ḍapụ awarị ma wẹrịtẹ sime-ḅara ḅụ tẹ ẹrẹ kẹ gbọrụḅọ-gbọrụḅọ sịn. Oyi akalụ karama akalụ mẹ ḅẹ tarị eneḅaka ḅụ in lẹgị-sime tẹ ḅẹrẹ mẹ sime-ḅara ḍikim;

¹⁷tẹ ḅo tarị akalụ mẹ ḅẹ tarị ene la sakị, in ḅo owiapụ ma tẹ jen ama ḅẹ ereme sime apụ mamgba ḅẹrẹ naa fama tẹ.

¹⁸Agbamịẹapụ owiapụ-awọmẹ ḅụ jen ama ḅẹ ereme sime tẹ in ḍọkị-ẹrị apụ Jozadakị owiḅọtụḅọ Jọsụwa owiapụ-awọmẹ na ori amịnapụ ḅụụ Masẹya na, Ẹlịyeza na, Jaribu na, Gedalaya na.

¹⁹In nwẹnị ịna ereme ma na siya mẹ minini, tẹ anana ogbo ḅụ gbọrụ ejimina kẹ ḅẹrẹ ịna ḅara si agba mịẹm.

²⁰Ịma owiapụ-awọmẹ ḅụ Hanani na Zẹbadaya na.

²¹Arimu owiapụ ḅụ: Masẹya na, Ịlayịja na, Sẹmaya na, Jehẹlị na, Uzaya na.

²²Pasọ owiapụ-awọmẹ ḅụ Elionaị na, Masẹya na, Isimẹlị na, Natanịyẹlị na, Jozabadị na, Elasa na.

²³Livayị furo-ḅẹ-apụ ma ḅụ Jozabadị na, Simeyi na Kelaya (anie Kẹlita) na, Pẹtaya na, Juda na, Ẹlịyeza na.

²⁴Nume-suapụ ma ḅụ: Ẹlịyasibu. Ogigo-aḅọkọ ḍikiḍikiapụ ma ḅụ: Salumu na, Tẹlẹmụ na, Uri na.

²⁵Izirẹlị ḅụ: Parọsị owiapụ-awọmẹ ḅụ: Ramaya na, Izaya na, Malikịja na, Mijamini na, Ẹlịyeza na, Hasabaya na, Bẹnaya na.

²⁶Ẹlamụ owiapụ-awọmẹ ḅụ: Matanaya na, Zẹkaraya na, Jehẹlị na, Abidi na, Jeremọtị na, Ịlayịja na.

²⁷Zatu owiapụ-awọmẹ ḅụ: Elionaị na, Ẹlịyasibu na, Matanaya na, Jeremọtị na, Zabadi na, Aziza na.

²⁸Bebayị owiapụ-awọmẹ ḅụ: Jehohananị na, Hananaya na, Zabayị na, Atilayị na.

²⁹Bani owiapụ-awọmẹ ḅụ: Mesulamu na, Maluku na, Adahaya na, Jasubu na, Sịyẹlị na, Jeremọtị na.

³⁰Pahati-mohabụ owiapụ-awọmẹ ḅụ: Adina na, Kẹlalị na, Bẹnaya na, Masẹya na, Matanaya na, Bẹzalẹlị na, Binuhi na, Manasẹ na.

³¹Arimu owiapụ-awọmẹ ḅụ: Ẹlịyeza na, Isija na, Malikịja na, Sẹmaya na, Simiyọnị na,

³²Benijamịnị na, Maluku na, Sẹmariya na.

³³Asumu owiapụ-awọmẹ ḅụ: Matẹnayị na, Matata na, Zabadi na, Ẹlịfẹlẹtị, Jeremayị na, Manasẹ na, Simeyi na.

³⁴Bani owiapụ-awọmẹ ḅụ: Mahadayi na, Amụramụ na, Yuyẹlị na,

³⁵Bẹnaya na, Bedeya na, Keluhi na,

³⁶Vanịya na, Mẹrẹmọtị na, Ẹlịyasibu na,

³⁷Matanaya na, Matẹnayị na, Jasu na.

³⁸Binuhi owiapụ-awọmẹ ḅụ: Simeyi na,

³⁹Selemaya na, Netanị na, Adaya na,

⁴⁰Makịnadebayị na, Sasayị na, Sarayị na,

⁴¹Azarẹlị na, Selemaya na, Sẹmariya na,

⁴²Salumu na, Amaraya na Josẹfụ na.

⁴³Nebo owiapụ-awọmẹ ḅụ: Jehiyẹlị na, Matitaya na, Zabadi na, Zebina na, Jowẹlị na, Bẹnaya na.

⁴⁴Mịna apụ mamgba igoni ama ḅẹ ereme simem, tẹ in siya tẹ ini na ịna awọmẹ na deem.