Read kalabari Ẹsịta 2 Bible Online

Ẹsịta 2 - kalabari bible

Ẹsịta 2

¹Ma aị ma ḅọrọ famatẹ, ịganị mẹ Amadaḅọ Ayasụrọsị ḅụụ dein tẹso, ọ̀ nwẹnị Vasịtị na, á mịẹ ye mẹ na, sụa arị ẹngbẹsẹ tẹ oloko mẹ na kẹ ḅiokoroma.

²Anịtẹso amadaḅọ ḅe afịrịmẹnjịapụ tẹ ori na sime tẹ fịrịmẹnjị ọ̀ pịrịarị apụ nwẹnị ḅẹẹ, “Yee ini iḅi-fịtẹ ḅụụ-gboloa eremịna-awọmẹ ḍọkị pakama-ḅo amadaḅọ ḅe pịrị.

³Yee amadaḅọ ḅe ori ama-da kụrọ ḅẹ itu-itu mamgba ḅụ fịrịmẹnjị-opuapụ tọn tẹ ḅụụ-gboloa eremịna-awọmẹ mamgba kobiri tẹ kẹ Suza sịḅịda ama mẹ ḅio ereme kobiritẹ simearị warị mẹ mu Igayị, pootẹ amadaḅọ ḅe opu fịrịmẹnjịḅọ tẹ ereme ma onyo-sẹịnḅọ ḅe suku-ḅio ḅụ; ọmịnị ịna kụnụ olo kẹ ịn pịrị.

⁴Anịsakị yee ẹrẹḅọtụḅọ ma tẹ amadaḅọ ḅe ḅụụ ḅẹlẹ ḅọ ḅẹlẹ ḅọ Vasịtị kiri ọkị tẹ amadaḅọ ta sọ.” Miemẹ amadaḅọ ḅe ḅụụ ḅẹlẹm, tẹ ori ọkọ mịẹm.

⁵Suza, sịḅịda ama mẹ ḅio Juu-ḅẹ-ḅọ tẹ Mọdịkaya nwẹn-sịn ẹrẹ fị ḅọ simem, Jayẹ owiḅọtụḅọ, Simeyi taa-tụḅọ, Benijamịnị furo ḅẹ Kisi ile ḅe.

⁶Nebukadineza, Babịlọnị ḅẹ Amadaḅọ ḅe Jeruselemu ḅụ Jekonaya, Juda ḅẹ amadaḅọ ḅe dogi-so sakị kun-apụ ma ogbo-ḅio ọ̀ kẹ sụa dogi-so ḅọ ḅe.

⁷Ori Adasa, anie Ẹsịta, ọ̀ ḍa iyimbere ẹrẹḅọtụḅọ ma ḍikiḍiki pakama ḅom; á gbala da-na-iyingi-na nyana-a ẹrẹsị. Ẹrẹḅọtụḅọ ma iḅi-fịtẹ ḅụụ-ḅẹlẹma ḅara simem, tẹ á ḍa-na-iyingi-na fịị tẹso, Mọdịkaya nwẹnị arị ọkị ò soku-ḅẹ ẹrẹḅọtụḅọ sọma.

⁸Anieḅụ ini amadaḅọ ḅe tọn ye mẹ na ori oloko mẹ na kẹ kpokpo gbolo tẹ tọnwa eremịna-awọmẹ mu Suza sịḅịda ama mẹ ḅio kobirim. Igayị, anie onyo-sẹịn ereme pịrị ḅọ ḅe ḅara-ḅio in simem. Ịn nwẹnị Ẹsịta sọ ọkị kẹ ama-da opu warị mẹ ḅio mu, tẹ á kẹ Igayị pịrị.

⁹Ẹrẹḅọtụḅọ ma ọ̀ ḅụụ ḅẹlẹ tẹ ọ̀ nwẹnị ḍiki-ḅụụjịrị nyana á pịrị tẹ fọnya á kụnụ olo na, fịye ḅụ á ḍiekiri na kẹ á pịrị, tẹ ori ama-da opu warị mẹ ḅio sẹlẹ-ọkị sọnọma eremịna-awọmẹ na arị na kẹ ereme kobiri tẹ simearị warị mẹ ḅio iḅi tẹịn anga ḅụ koroma.

¹⁰Ẹsịta amụ arị atomi, anịanịa á paka ḅara ḍuko-a, gbala Mọdịkaya á ḅẹẹm á mịẹtẹ kịnị anị nimi ma ẹrẹsị.

¹¹Ene-ḅaaene-ḅaaene Mọdịkaya mu-mu ereme kobiri tẹ simearị warị mẹ nụngọ ḅụ mẹnjịm, Ẹsịta sime-ḅara na, á mịẹarị ḅara na nimi ḅẹ ḅara.

¹²Oyi maa akalụ finji ọkịm, anie in oloko ḅara ḅụ tọnm mịnẹ in ereme ma mịẹ tẹlẹma tẹ ịna oju ḅụụ ḅẹlẹma; sonio akalụ ịn nwẹn kẹ ịn kẹ maha sịn-arị ḅẹlẹma kụnụarị pulo ọmbịm, tẹ sonio akalụ kẹ pịkị ẹnyị na eremịna kụnụ-olo na ọmbịm. Sakị mẹ ḅọrọ tẹso, eremịna-awọmẹ ma gbọrụḅọ gbọrụḅọ Amadaḅọ Ayasụrọsị ḍọkụma-mum.

¹³Ẹrẹḅọtụḅọ ma mị-ḅara kẹ sọ amadaḅọ ḅe ḍọkụma-muarị sakị mẹ ereme kobiritẹ simearị warị mẹ ḅio arị ọkị kẹ ama-da opu warị mẹ mu ḅẹ ḅii ye ḅii ye ịn kẹ á pịrịm.

¹⁴Ḅoḅiri ḅụ á mu ḅa, tẹ dede-ḅio árị ọḅụ pịkị Sesigazị amadaḅọ ḅe pootẹ fịrịmẹnjịḅọ ḅe ḍọkụma-mu ḅa, anie amadaḅọ ḅe oloapụ ma ḍikiḍikiarị ḅọ ḅe, ereme kobiritẹ simearị maaịn karama warị mẹ ḅụ. Á ḅarị jen-maaịn kẹ sọ amadaḅọ ḅe ḍọkụma-mu ḅịa, árị amadaḅọ ḅe ḅụụ-ḅẹlẹm tẹ ini árị ẹrẹ kẹ á sịn ḅo sikima.

¹⁵Anị ḅo Abiyẹlị, Mọdịkaya ḍa iyimbere ḅe ẹrẹḅọtụḅọ Ẹsịta, anie Mọdịkaya kẹ ò soku-ḅẹ ẹrẹḅọtụḅọ sọma ḅọ ma, so amadaḅọ ḅe ḍọkụma-mu ḅẹ sakị laa tẹso, Igayị amadaḅọ ḅe ḅụụ fịtẹ opu fịrịmẹnjịḅọ ḅe tẹ ereme ma onyo-sẹịnḅọ ḅe kẹ á daa-karakarama ye sikima, á gberie-sọ ḅii-a. Ẹsịta mịọkụ ḅụ tọrụngbọ kẹ arị ẹrị apụ mamgba ḅụụ-ḅẹlẹm.

¹⁶Akalụ mẹ tẹ ịn kẹ Tibẹtị sịn akalụ mẹ ḅẹ oyi aḍin karama ene ḅụ ịn Ẹsịta ọkị kẹ ama-da opu warị mẹ ḅio Amadaḅọ Ayasụrọsị ḍọkụma-mu tẹso, ori ama-da ḅụ sọnọma kụra karama kụra ḅụ,

¹⁷amadaḅọ ḅe nwẹnị Ẹsịta ḅẹlẹma ereme mamgba nẹngị tẹ ò ḍiki-tọrụ ḅụ á ḍiki-ḅụụjịrị na, ọkụrụkụrụ na nyana ḅụụ-gboloa eremịna-awọmẹ mamgba nẹngị, anị mịẹtẹ ọ̀ nwẹnị ama-da sun mẹ kẹ á sịḅị sure tẹ á kẹ amadaḅọ ta mịẹ Vasịtị kiri ḅụ.

¹⁸Anịtẹso amadaḅọ ḅe nwẹnị gburo-gburotẹ afịaị sọ sara ori asịḅịdapụ na, fịrịmẹnjịapụ mamgba na pịrị; anie Ẹsịta sọ sara afịaị. Ọ̀ nwẹnị pịkị kpo-kpo gbolo itu-itu ma ḅụ tẹ ịnyọsara kẹ ịn pịrị, pịkị amadaḅọ ḍie na-iḅi aḍiepịrị-aị kẹ kịnị pịrị.

¹⁹Ịn maaịn karama sakị kẹ amụ ḅụụ-gboloa eremịna-awọmẹ ma kobiri gboloma sakị, Mọdịkaya amadaḅọ ḅe ogigo-ḅọkọ ḅụ lẹgị-sime wararị.

²⁰Mịọkụ Ẹsịta mịẹtẹ kịnị amụ á paka ḅara anịanịa arị atomi nimi-a, Mọdịkaya wẹrịtẹ tọn á pịrị ḅara ḅụ, anị kẹ gotẹ ọkọ mịẹ ye, Ẹsịta Mọdịkaya ḅịḅị pokim paa ori á ḍikiḍiki pakama-ḅo sakị á wẹrịtẹ ọ̀ ḅịḅị poki poki ḅara.

²¹Arị ene ma ḅụ, Mọdịkaya amadaḅọ ḅe ogigo-ḅọkọ ḅụ lẹgị-sime wararị ogbo, Bigitani na, Tẹrẹsị na, amadaḅọ ḅe pootẹ opu fịrịmẹnjị maa apụ, tẹ mẹnjị-ḅọrọ-anga mẹ ḍikiḍikiapụ ma nwẹnị ḅo ịganị tẹ Amadaḅọ Ayasụrọsị ḅaa ḅẹ ḅara ḍọkị.

²²Mọdịkaya nwẹnị miemẹ nimi tẹ anị ḍuko Ẹsịta amadaḅọ ta ma pịrị, tẹ Ẹsịta nwẹnị Mọdịkaya ẹrẹ ḅụ anị ḍuko amadaḅọ ḅe pịrị.

²³Ini anị ḅio ḍọkị ḍiki tẹ ḍọkị-ẹrịm ọkọọ ḅẹẹ ye ḅụ maa owiapụ ma ịn kịnị-kpọḅaaye ọgọnọ ịn kpọ-ḅaam; tẹ anị kẹ amadaḅọ ḅe itu mẹ ḅio Paka-aị kẹẹ sụarị Ḍiri mẹ ḅio kẹẹm.