Read kalabari Ẹsịta 4 Bible Online

Ẹsịta 4 - kalabari bible

Ẹsịta 4

¹Mọdịkaya paka tẹ aị mamgba naa fama tẹso, Mọdịkaya nwẹnị ori akapa kan tẹ kururu gotẹ akpụrụ ọkị sụa, pịkị fọọn ḅiri, tẹ paka opu ama mẹ ogboku mu, tẹ nwẹnị gele pọkọ kẹ lee-leema ye ḅụụ ḅụ akụ ḅara kẹ owu;

²gbọrụḅọ-sọ akpụrụ sụatẹ kẹ mẹnjị amadaḅọ ḅe ogigo-ḅọkọ sọ ḅịa ẹrẹsị ò mu mẹnjị amadaḅọ ḅe ogigo-ḅọkọ mẹ sọarị anga mẹ lam.

³Itu goyegoye tẹ amadaḅọ ḅe tọn ye na, ori oloko na ḅo la anga la anga, gburo-gburotẹ kururu na, ḅuru-ịmọ na, tẹmẹ-la owu kọn na, simini owu kọn na saakịm Juu-ḅẹ-apụ ma ogbo-ḅio ḅụ, tẹ ini ḅẹ opu anga akpụrụ sụa tẹ fọọn ḅio koro-simem.

⁴Ẹsịta fịrịmẹnjị-eremịna-awọmẹ na, á pootẹ fịrịmẹnjị-opuapụ na ḅo ḍuko á pịrị tẹso, amadaḅọ ta ma nwẹnị kpọma ḅụụ-ḅalaḅala; ori ori akpụrụ mẹ sin ḅẹ ḅara kẹ arị opu akapa kẹ Mọdịkaya sụa ḅẹ fịrịmam, kụma ori arị daa-ọkịa.

⁵Anịtẹso Ẹsịta nwẹnị fịrịma Ataki amadaḅọ ḅe pootẹ fịrịmẹnjị-opuapụ ma ḅẹ gbọrụḅọ, tẹ ịn tọn tẹ fịrịmẹnjị á pịrịarị ḅọ sịn, tẹ tọn ọ̀ pịrị ọ̀ Mọdịkaya ḍọkụma-mu tẹ miemẹ fiearị ye na, anị gotẹ mịẹarị ye na kẹ ò gbela nimi.

⁶Ataki nwẹnị paka opu ama mẹ ogboku amadaḅọ ḅe ogigo-ḅọkọ mẹ tọrọkọ ḅụ Mọdịkaya ḍọkụma-mu,

⁷tẹ Mọdịkaya nwẹnị ọ̀ ḅụụ paka aị mamgba ḍuko ọ̀ pịrị, na igbigi tọrụngbọ mẹ na tẹ Juu-ḅẹ-apụ ma ḅaa gotẹ Emanị mininitẹ gbẹẹ amadaḅọ ḅe igbigi koko anga ḅụ suu ḅẹ ye mẹ na.

⁸Mọdịkaya pịkị ịn ḅaa mẹ gotẹ Suza ḅụ kẹẹ paka-ḅo wararị oloko mẹ ḅẹ gbọrụ ḍiri kẹ ọ̀ pịrịm ọ̀ kẹ Ẹsịta ḍie tẹ anị ḍuko giregirema á pịrị tẹ á ḅẹẹ arị amadaḅọ ḅe ḍọkụma-mu tẹ ọ̀ ḅara ye ḅii tẹ arị atomi gotẹ ọ̀ tẹkẹẹ.

⁹Ataki nwẹnị mu Mọdịkaya ḍuko ye ḍuko Ẹsịta pịrị.

¹⁰Anịtẹso Ẹsịta nwẹnị ẹkwẹn Ataki pịrị tẹ ò ḍuko Mọdịkaya pịrị ḅarị fịrị kẹ ọ̀ fịrịma, tẹ ḅẹẹm,

¹¹“Amadaḅọ ḅe afịrịmẹnjịapụ mamgba na, amadaḅọ ḅe nyana itu-itu ma ḅụ simearị apụ ma nimi wararị mịnẹ, ḅẹẹ owiḅọ-owiḅọ anịanịa ḅẹẹ ẹrẹḅọ-ẹrẹḅọ tẹ ịn sịn-a ḅara kẹ amadaḅọ ḅe kala-ḅio mẹ ḅẹ sara-sime anga mẹ sọ-mu ḅọ mu ḅọ, kpọkpọ gbọrụ oloko mie emi ye; gbọrụ ḅara kẹ ini inimgba ḅaa ḅa, amadaḅọ ḅe ò golu-golu kụrọ mkpara mẹ ọlọtẹ kẹ mịẹtẹ mḅọ ḍumo ḅẹ ḅara kẹ da ḅọ sikima. Amadaḅọ ḅe ḅẹ ḅara kẹ amụ ini ị̀ sịn-a mịna ḍin suei ma ḅụ.”

¹²Ịn nwẹnị Ẹsịta ḍuko ye ḍuko Mọdịkaya pịrị.

¹³Anịtẹso, Mọdịkaya nwẹnị ḍuko ịn pịrị in pakịrị ḅịḅị kẹ pịkịma mu Ẹsịta pịrị, “Kẹ ḅiotọn ma mịnẹ ini osi Juu-ḅẹ-apụ mamgba ḅaa famatẹ ị́ amadaḅọ ḅe ama-da opu warị ḅio emi ẹrẹsị ini ị́ ḅaa ḅịa,

¹⁴Ị́ nwẹnị nwẹn pembe sakị ḅụ gbọsime simem ḅẹḅẹ jen ḅọkọ ḅụ ḅarasụa na, ḍụa-ḅọrọma na saakị paka-ḅo Juu-ḅẹ-apụ ma pịrị ḅa, kụma ị́yẹrị na, ị́ ḍa warị mẹ na fịị fa ḅa. Anịsakị tụḅọ nimi, nwẹn pembe sakị mẹ mie í gotẹ ḅo amadaḅọ ta sọ ye ḅoto!”

¹⁵Anịtẹrẹmẹ Ẹsịta nwẹnị ḍuko ịn pịrị ịn Mọdịkaya pakịrị,

¹⁶“Mu tẹ suza ḅụ ị́ ḍọkị-ẹrị Juu-ḅẹ-apụ mamgba kobiri tẹ ọmịnị ị̀ sịḅị gotẹ ḅuru-ịmọ, tẹ ḍin na, eneḅaka na ḅụ tẹra aḍin kẹ fịye fị ma, pịkị minji ḅuu ma. Yẹrị na, ị̀ fịrịmẹnjị-eremịna-awọmẹ ma na sọ ọ̀ mịẹ ḅara mịẹ ḅa. Anịtẹrẹmẹ àrị amadaḅọ ḅe ḍọkụma-mu ḅa, anị oloko mẹ na tụḅụrụ wararị ḅẹsọ; tẹ à fịị-faa fa, yee à fịị-faa.”

¹⁷Mọdịkaya nwẹnị anịtẹrẹmẹ mẹnjị-so, tẹ Ẹsịta tọn ọ̀ pịrị ye goyegoye mịẹ.