Read kalabari Ẹsịta 7 Bible Online

Ẹsịta 7 - kalabari bible

Ẹsịta 7

¹Anieḅụ amadaḅọ ḅe na, Emanị na nwẹnị Amadaḅọ Ta Ẹsịta sọọ kopini afịaị ma fị ḅẹ mu.

²Maaịn karama ene mẹ ḅụ ịn pịkị iru ḅuuarị ogbo, amadaḅọ ḅe nwẹnị siin Ẹsịta gbela, “Amadaḅọ Ta Ẹsịta, í tiye ḅiiarị? Àrị anị kẹ ị́ pịrị ḅa. Í tiye ḅiiarị? Ị̀ ama-da kụlọ mẹ laa ḅara kẹ maa anga ḍiya ḅẹ gbọrụ anga ḅii sọ, à kẹ ị́ pịrị ḅa.”

³Anịtẹso Amadaḅọ Ta Ẹsịta nwẹnị pakịrị, “yei Amadaḅọ, à nwẹnị í ḍiki-tọrụ ḅụ ḍiki-ḅụụjịrị ḍọkị-ẹrị tẹ, tẹ anị amadaḅọ ḅe ḅụụ ḅẹlẹ-ḅẹlẹ, yee à ḅiiarị ḅara ḅụ ì ḍumo ị́ nwẹn kẹ ị̀ pịrị, anịsakị ị̀ atomi ma ḍumo sime à ḅii ḅara ḅụ.

⁴Kẹ gotẹ ọkọ ḅẹẹarị, ini yẹrị na, ị̀ atomi ma na dẹrị tẹ, ịn wa ḅaa fama, wa ninii, tẹ wamịna tọrụ fama. Ịn nwẹnị owiapụ-o, ereme-o wa kẹ papaa omoni-sọ ḅara dẹrị namịna arị ẹkwẹn ḅịa; kẹ gotẹ ọkọ ḅẹẹarị, wamịna ḅụụ-fụka mẹ à kẹ amadaḅọ ḅe nyana ḅẹ fa mẹ na tọnma ḅịa.”

⁵Anịtẹso Amadaḅọ Ayasụrọsị nwẹnị Ẹsịta Ama-da Ẹrẹḅọ ma gbela, “Anị ḅọ ḅe tụḅọ, anịsakị ọ̀ tọ-anga emi, tẹ nwẹn sime ye kẹ ḅiokoroma ḅẹ?”

⁶Ẹsịta nwẹnị pakịrị, “Ḅaa ḅọkọ kẹ kịnị ḍọkị ḅọ, tẹ kịnị na fịya-a ḅọ! Ḅie si-sịḅịḅio-sụa Emanị ḅe ori-a!” Anịtẹso Emanị nwẹnị amadaḅọ ḅe na, amada-ẹrẹḅọ ma na tọrọkọ ḅụ tẹmẹ-naịn-naịn ḅụ sọ.

⁷Amadaḅọ nwẹnị ịganị ḅụ virikama kopini afịaị ma suku-saakị tẹ mẹnjị ama-da opu warị mẹ ḅẹ ḍụọ mẹ ḅio sọ-mu, kụma Emanị ẹrịm mịnẹ amadaḅọ ḅe siye kẹ ḅiotọn ọ̀ pịrị tẹ ẹrẹsị sime tẹ mịẹtẹ ò ḍumo-sime ḅẹ ḅara gotẹ Amadaḅọ Ta Ẹsịta tẹkẹarị.

⁸Amadaḅọ ḅe ama-da opu warị mẹ ḅẹ ḍụọ mẹ ḅio pịkịma ịn sime tẹ iru ḅuu sime anga mẹ ḅo ḅara na Emanị ḅịkị Ẹsịta lẹgị sime nangwọtẹ lẹgịye mẹ ọgọnọ koro ḅara na nwẹnị kura paka, tẹ amadaḅọ ḅe nwẹnị oloku pakama tẹ ḅẹẹ, “Ori ị̀ tọrọkọ ere kẹ amada-ẹrẹḅọ ma kan ḅẹ tẹ ḅiiarị mụnọọ, ị̀ soku-ḅẹ warị mẹ ḅio?” Ẹkwẹn mẹ paa amadaḅọ ḅe ḅịḅị pẹlẹ gbọrụ sakị mie ini Emanị tọrụ fịna gbaịn ye.

⁹Anịtẹso Abona anị sakị mẹ ḅụ fịrịmẹnjị amadaḅọ ḅe pịrịarị pootẹ fịrịmẹnjị-opuapụ ma ḅẹ gbọrụḅọ nwẹnị ḅẹẹ, “Emanị tẹlẹma tẹ kẹ Mọdịkaya ḅe tẹ ori ẹkwẹn-ḅịḅị amadaḅọ ḅe ḅọrọmam nwẹn ḅẹẹ ḅọ ḅe pịrị kịnị-kpọḅaaye mẹ sọ Emanị warị ḅio sịẹsime wararị — tesi oyia aḅụọ-kuḅu finji na sọnọ na (22 m) anị nwẹn kẹ gelem.” Amadaḅọ ḅe nwẹnị tọn, “Ọmịnị anị ọgọnọ ọ̀ kpọ-ḅaa.”

¹⁰Anieḅụ ịn nwẹnị Emanị kpọ-ḅaa, ọ̀ tẹlẹma tẹ kẹ Mọdịkaya pịrị kịnị-kpọḅaaye mẹ ọgọnọ. Anịtẹrẹmẹ amadaḅọ ḅe ịganị mẹ nwẹnị dein.